SEMANA 30
PIREKUA 97 Para irekani uétarhesïndi Tata Diosïri Uandakua
Ambe enga ma orhetku ueenajka jorhenguarhini méntkisïjtsïni jarhuataati
“Jimboksïnisï uéjka méntku miátantani jarhani ini ambe, nájkirukajtsï chá sési mítekia ini ambe ka sésijtsï uaxastakata jarhania” (2 PED. 1:12).
AMBE ENGACHI JORHENGUARHIAKA
Exeakachi nénajtsïni uaa seguiriini jarhani jarhuatani ima ambe engachi orhetku ueenapka jorhenguarhini Biblieri ambe.
1. ¿Chá néna pʼikuarheraspi engajtsï ueenapka míteni Biblieri ambe?
AMBE enga ma orhetku ueenajka jorhenguarhini Biblieri ambe úsïndi eskachi mójtakurhiaka. Pori ejemplu engachi mítepka eska Tata Diosï arhinhasïnga Jeoba, ueenaspkachi sési pájperani imani jingoni (Is. 42:8). Kánikuachi sési pʼikuarheraspka míteni eskaksï uarhiriicha no kómu nitamakuarhixaka, sino eskaksï méntku no ma ambe mítesïnga (Ecl. 9:10). Ka engachi jorhenguarhipka eska Tata Diosï aiatspeska eska Echeri paraisu máeuaka, nóteruchi uandanhiasïngia imani ambe jimbo enga úkuarhiaka sánderu orhepatini jimbokachi míteska eskachi uaaka irekani para méntkisï ka no solu 70 o 80 uéxurhini (Sal. 37:29; 90:10).
2. ¿Andisï Pedru miátaantapi kristianuechani eskaksï jatsispka para seguiriini jarhani jukaparharani ambe engaksï orheta ueenapka jorhenguarhini? (2 Pedru 1:12, 13).
2 Nájkirukachi ióni páni jakaia Biblieri ambe míteni, ju je no mirikurhini eska kánikua jukaparhakueska ambe engachi orheta ueenapka jorhenguarhini. Enga apostoli Pedru ménderu karakuapka kristianuechani, arhiaspti eskaksï ʻsési uaxastakata jarhaspka jurhimbikuarhu’ (arhinta je 2 Pedru 1:12, 13). Joperu jarhasptiksï kúnguarhikuarhu máru kʼuiripuecha engaksï uékeenga támisï paani kristianuechani (2 Ped. 2:1-3). Ka jimboka Pedru uékasïreenga jarhuataani kristianuechani, miátaantaspti ambe engaksï orheta ueenapka jorhenguarhini paraksï úni orhepani uérani ka nóksï méni jurajkuni Tata Diosïni Jeobani.
3. ¿Andisï uétarhijki eskachi iámindu kristianuecha seguiriini jauaka eratsentani ambe enga ma orheta ueenajka jorhenguarhini? Úra je ejemplu ma.
3 Nájkirukachi máru kristianuecha ióni páni jakaia marhuakuni Tata Diosï Jeobani, útasïjtsïni seguiriini jauati kánikua jarhuatani ima ambe engachi orheta ueenapka jorhenguarhi Bibliarhu. Ju je ejemplu ma úrani. Ísï eska naandi ma ka uájpa nanaka ma, na májkueni ambe úrajka para úmantani, naandi sánderu ásperantaati jimboka sánderu ióni paxakaia úmantani. Májkueni, imeecha engaksï sánderu ióni páni jakaia marhuakuni Tata Diosï Jeobani uaatiksï sánderu uánikua ambe jorhenguarhini Biblieri karakateeri ma ka eska imeecha engaksï apenasi ueenani jaka jorhenguarhini Biblieri ambe. ¿Andichisï ísï uandajki? Jimbokachi nóteru májkueni irekaxakaia ka sánderuchi marhuakuxakaia Tata Diosï Jeobani desde jiáni uératini engachi itsï atakuarhika. Ísï jimbo, engachi eratsentajka imani ambe engachi orheta ueenapka jorhenguarhini ka ístu na engachi irekani jakaia iásï, uaakachi exeni nénajtsïni uaa sánderu jarhuatani ima ambe engachi orheta ueenapka jorhenguarhini. Ka ini artikulu jimbo, exeakachi tanimu ambe enga ma orheta ueenajka jorhenguarhini ka ístu ambeksï uaa jorhenguarhini indeeri ambe ima kristianuecha engaksï ióni páni jakaia marhuakuni Tata Diosï Jeobani.
TATA DIOSÏ JEOBA JINDEESTI KUERAJPIRI
4. ¿Nénajtsïni jarhuataskia míteni eskajtsïni Tata Diosï Jeoba kueraaska?
4 Ebreu 3:4 arhisïndi: “Joperu Tata Diosïsï úti iámindu ambe”. Juchaari Tata Kuerajpiri enga kánikua jánhastiika ka uinhapitiini kueraasti Echerini ka iámindu ambe enga jaka. Jimbokajtsïni ima kueraaska kánikuajtsïni sési mítesti, ka ístujtsïni xénchasïndi ka mítesti ambe enga sánderu sésiika para jucha. Iásï engachi mítekia eskajtsïni Tata Diosï Jeoba kueraaska kánikuajtsïni jarhuatasïndi ka pauani pauanchi tsípikua jingoni irekasïnga.
5. ¿Ambejtsïni jarhuataa sánderu kaxumbitiini? (Isaías 45:9-12).
5 Míteni eskajtsïni Tata Diosï Jeoba kueraaska, ístujtsïni jorhendasïni eskachi jatsiska para kaxumbitiini. Ju je Jobueri ejempluni exeni. Ima mirikurhispti ambe enga sánderu jukaparhakuepka ka masi úspti imeeri ambe jimbojku uandanhiani jimbosï Tata Diosï Jeoba miátantapti eska ima jindeeska Kuerajpiri enga iámindu ambe újka úni (Job 38:1-4). I ambe jarhuataspti Jobuni para exeni eska iámindu ambe enga Tata Diosï Jeoba újka méntkisï sési jarhasïnga. Ísï jimbo, profeta Isaíasi karaspti eskaksï kʼuiripuecha no méni jatsiska para eratseni eskaksï sánderu jánhaskatiiska eska juchaari Kuerajpiri (arhinta je Isaías 45:9-12).
6. ¿Andisï sési jaki eskachi eratsentaaka na enga xáni kʼéri ambeeka Kuerajpiri? (Ístu exea je imajeniichani).
6 Erachi ma enga ióni páni jakaia marhuakuni Tata Diosïni úpirindi ueenani imajku mintsinharhikuarhini ka nóteru jurajkuni eska Tata Diosï Jeoba jarhuataaka nijtu arhintani imeeri Karakatani (Job 37:23, 24). Paraka no inde ambe úkuarhinchaaka jatsisti para arhutani tiempu ka eratsentani na enga xáni jánhastiika ka kʼéri ambeeni juchaari Kuerajpiri (Is. 40:22; 55:8, 9). I ambe jarhuatati sánderu kaxumbitiini ka miátantani eska Tata Diosï Jeoba no ísï exesïnga ambe ma eska jucha.
¿Ambejtsïni jarhuataa miántani eska Tata Diosï Jeoba iauani sánderu sési eratsesïnga eska jucha? (Exe je párrafu 6).
7. ¿Ambe jarhuataspi Rahelani para no no sési exeni ambe enga mójtakurhipka Tata Diosï Jeobaeri kúnguarhikuarhu?
7 Kurhanguni eskajtsïni Tata Diosï Jeoba kueraaska, kánikua jarhuataspti pirenchi Rahelani enga Eslovenia anapueka para úni jiókuarhini enga ambe ma mójtakurhijka Tata Diosï Jeobaeri kúnguarhikuarhu. Ima uandantasïndi: “Ménisï úkua jukanchasïnga jiókuarhini ambe engaksï erakujka úni erachiicha engaksï orhejtsïkujka interu parhakpini anapu ánchikuarhitani. Pori ejemplu, nájkirukani exepkia Aianhperakua 8, Grupueri enga Orhejtsïkuajka iámindu kúnguarhikuechani 2023 anapu, joperu engani ueenapka exeni erachini ma enga tisïnharhipka arhijtsïkpini jarhani kánikua no sési exespka. Ísï jimbo kómarhispka Tata Diosï Jeobani ka kurhakuspka eskarini jarhuatapiringa no no sési exeni”. Rahela kurhanguspti eska ima enga kueraaka auandani ka Echerini uaaka arhini kúnguarhikuani ambe enga sánderu sésiuaka para úni. Enga chájtu úkua jukanchajka jiókuarhini ambe engachi arhinhajka para úni o enga Biblieri karakata ma sánderu sési kurhangunhajkia iásï, jánguarhinta je arhutani tiempu ka eratsentani na enga xáni jánhastiika ka uinhapitiini juchaari Kuerajpiri (Rom. 11:33-36).
¿ANDISÏ JURAJKUJKI ESKACHI KÓMU NITAMAKUARHIAKA?
8. ¿Nénajtsïni jarhuatasïni míteni andisï Tata Diosï jurajkuni jaki eskachi kómu nitamakuarhiaka?
8 Engaksï máru kʼuiripuecha no mítejka andichisï kómu nitamakuarhijki, jarharisïndiksï Tata Diosïni ka nóteruksï mintsikasïndia nijtu jakajkuni (Prov. 19:3). Joperuchi jucha míteska eskachi pekadu jimbosï kómu nitamakuarhijka ka nóchi perfektueni ka eska no Tata Diosïsï újka eskachi kómu nitamakuarhiaka. Ka ístuchi jorhenguarhiskia na enga Tata Diosï xáni tekaantstiika ka jimboksïsï iásï uánikua kʼuiripuecha niáratia míteni ambe enga uaaka ima para kʼamajkuni kómu nitamakuani (2 Ped. 3:9, 15). Míteni ini ambe, sésijtsïni pʼikuastantasïndi ka sánderuchi andarhierasïnga imani.
9. ¿Káni uétarhisïni eskachi miántaaka andisï Tata Diosï Jeoba jurajkujki eskaksï kʼuiripuecha no sési nitamakuarhiaka?
9 Enga jamberi niáraaka ima jurhiatikua enga Tata Diosï Jeoba kʼamajkuaka kómu nitamakuani, míteskachi eskachi jatsiska para tekaantani. Joperu engachi problema ambe jatsijka, no sésichi kánhani ochi uarhiranchani nemani, niárasïngachi eratseni andisï Tata Diosï ióndani jaki kénditani indeni ambe (Hab. 1:2, 3). Joperuchi jiánisï jatsika para sánderu miáni andisï Tata Diosï Jeoba jurajkuni jaki eskaksï ambarhati kʼuiripuecha kómu nitamakuarhiaka (Sal. 34:19).a Ístuchi uaaka eratsentani eska Tata Diosï kʼamajkuaka kómu nitamakuani para méntkisï.
10. ¿Ambe jarhuatasïni Anneini para nóteru kómu pʼikuarherania?
10 Míteni andisï Tata Diosï Jeoba jurajkuni jaki eskachi kómu nitamakuarhiaka, jarhuatasïndijtsïni tekaantani. Anne enga Mayotte irekani jaka, isla ma enga océano Índico jaka, uandantasïndi: “Enga mama uarhipka, kánikua no sési pʼikuarheraspka. Joperuni someni miántasïnga eska no Tata Diosïsï újka eskachi no sési nitamakuarhiaka, sánderu sési, ima uékasïndi kénditani iámu ambe engajtsïni no sési pʼikuastajka ka tsítaantani uarhiriichani. Engani eratsentajka ini ambe, kánikua sési pʼikuarherantasïnga ka nóteruni kómu pʼikuarherasïngia”.
11. Míteni andisï Tata Diosï jurajkuni jaki eskachi kómu nitamakuarhiaka, ¿andijtsïnisï jarhuatajki seguiriini jarhani aianhpini?
11 Míteni andisï Tata Diosï jurajkuni jaki eskachi kómu nitamakuarhiaka, jarhuatasïndijtsïni seguiriini jarhani aianhpini. Ka juchachi míteska eska Tata Diosïiri tekaantskua jimbo, ima kʼuiripuecha engaksï móantaaka uaatiksï tsípiti pakarani jimboka apostoli Pedru ísï uandaspka ka ístu karaspti: “¡Jingontku exe je na jásï kʼuiripujtsïsï jatsi para jindeeni! Jatsiskajtsï para sési jámani parajtsï pímbinhasïini ka jánguarhintani sési marhuakuni Tata Diosïni” (2 Ped. 3:11). Ka parachi xarhatani eskachi sési marhuakuxaka, jatsiskachi para uérani aianhpini. Tata Diosï xénchaasïndi kʼuiripuechani ka uékasïndi eskaksï irekaaka para méntkisï ka juchajtisï. Ima tekaantstiisti ka jimbosï uékajti eskaksï jimeesïsï anapuecha engachi aianhpijka niáraaka marhuakuni. Ka juchachi kʼéri kóntperata ma jatsiska parachi Tata Diosï jingoni ánchikuarhini ka jarhuataani uánikua kʼuiripuechani imani míteni ante de parhakpini anapu ambe kʼamajkunhani (1 Kor. 3:9).
ÚLTIMU JURHIATIKUECHA JIMBOCHI IREKAXAKA
12. Míteni eskachi últimu jurhiatikuecha jimbo irekaxaka, ¿nénachi exesïni Bibliani?
12 Bibliajtsïni sési aiangusïndi na engaksï jámapiringa kʼuiripuecha últimu jurhiatikuecha jimbo (2 Tim. 3:1-5). Ka juchachi nani uéjkisï exeasïnga xárhati kʼuiripuechani. Engachi exejka eskaksï kʼuiripuecha sánhani arhixaka sánderu no sési jámani, sánderuchi jakajkusïnga eska ísïiska ambe enga Biblia uandajka (2 Tim. 3:13-15).
13. ¿Ambechi jatsiski para kurhamarhikuarhini? (Lukasï 12:15-21).
13 Míteni eskachi últimu jurhiatikuecha jimbo irekaxaka, ístujtsïni jarhuatasïndi úni ambe enga sánderu jukaparhakueka ka sési úrani tiempuni. Ma xanhari, Jesúsi úraspti ejemplu ma para xarhatani andichisï jatsi para sési úrani tiempuni (arhinta je Lukasï 12:15-21). ¿Andisï ima acheeti enga jatsikuarheriipka no jánhastiipi? Jimboka masi arhixapka máteru ambe úni. Masi arhixapti kánerakuarhini jatsikuarhekua ambe echerirhu joperu no ma ambe para Tata Diosïni jingoni. Ka kánikua no sési úspti enga no sési úrapka imeeri tiempuni jimboka nóteru ióni irekapiringa, nóchka Tata Diosï arhispi: “I chúriri uarhiaka”. ¿Ambechi jorhenguarhisïni? Nóteru ióni jimbo, parhakpini anapu ambe kʼamajkunhaatia, ísï jimbo, sési japirindi kurhamarhikuarhini: ¿Juchiiti meteechaksï xarhatasïni eskani sánderuni jukaparharasïnga Tata Diosïiri ambe? ¿Ambe arhiasïni juchiiti sapiichani eska sánderu jukaparhakueska úni? ¿Úraxaki tiempuni, uinhapikuani ka sentabuni parani sánderu jatsikuarheriini o parani sési jarhani Tata Diosï Jeoba jingoni?”.
14. ¿Andichisï jatsi parachi eratsentani ambe enga úkuarhini jaka últimu jurhiatikuecha jimbo? Uandanta je eksperiensia ma.
14 Eratsentani eskachi últimu jurhiatikuecha jimbo irekaxaka, jarhuatasïndijtsïni parachi sánderu sési úrani tiempuni. Ini ambesï úpti pirenchi ma enga Miki arhinhajka. I pirenchi uandantasïndi: “Engani na uéntapkia prepa, tsítixapkia inchantani unibersidadirhu parani animaliicheeri ambe estudiariini, joperuni ístu uékasïreenga prekursoreeni ka jima marhuani nani enga sánderu uétarhini japka aianhpini. Máru erachiicha engaksï sési marhuakuni japka Tata Diosïni, arhisptijtsïni eskani sési eratsentapiringa ka exeni sini úpirini estudiariini karrera ma ka ístuni prekursoreeni. Arhisptijtsïni eska i parhakpini no ióni jimbo kʼamajkunhaakia, joperu eskani jimbanhi parhakpinirhu jatsiaka tiempu parani iámindu jásï animaliicheeri ambe jorhenguarhini. Ísï jimbo, kursu ma jimbo niraspka parani jorhenguarhini ambe engareni jarhuatapiringa iáiasï. Ka exentaspka ánchikuarhita ma ka ístuni úspka prekursoreeni. Ísï tátsekua Ecuador niraspka aianhpini”. Iásï Miki ka uámba, Ecuadoriksï marhuaxatiia komu sirkuitueri orhejtsïkuti.
15. ¿Ambechi jorhenguarhisïni Santiagueri ambe? (Ístu exea je imajeniichani).
15 Nóchi jatsiska para no sési pʼikuarherani engaksï kʼuiripuecha no uékaaka kurhaani Biblieri ambe. Jimbokaksï uaaka mójtakurhini ísï eska Santiagu, Jesúsiiri mediu ermanu jémba. Nájkiruka Santiagu exepka na enga kʼuiripepka Jesúsi, niárani Mesíasiini ka sési jorhentpini, ióndaspti imeeri chúxapati úkuarhini asta jiáni enga na tsíntapkia ka kánikua jánguarhintaspti marhuakuni Tata Diosïni (Juanu 7:5; Gal. 2:9).b Ísï jimbo, ju je no méni eratseni eskaksï juchaari familiariicha no méni marhuakuaka Tata Diosïni. Ístu, ju je seguiriini pʼorhembiani imani kʼuiripuechani engaksï nótki jorhenguarhini jaka Biblieri ambe. Ka miáni eskachi últimu jurhiatikuecha jimbo irekaxaka ka eskachi no jatsiska para ísku tsïtani jarhani tiempu. Ambe engachi aianguauaka iásï, jarhuatauati paraksï tátsekua mójtakurhini, no arhiati nájkirukaksï imani tiempu jimbo ísï uaaka enga kʼuiripu ueenaakia no sési nitamakuarhini.c
¿Andichisï no méni jatsi para eratseni eskaksï juchaari familiariicha no méni niáraaka marhuakuni Tata Diosïni? (Exe je párrafu 15).e
JU JE SEGUIRIINI JUKAPARHARANI AMBE ENGAJTSÏNI TATA DIOSÏ JEOBA MIÁTANTAJKA
16. ¿Nénajtsïni jarhuataskia inde informasioni engajtsïni Tata Diosï Jeoba íntskujka? (Exe je rekuadruni “Úra je ini ambe para máteruechani jarhuataani”).
16 Máru informasioni engajtsïni Tata Diosïiri kúnguarhikua íntskujka ka enga Bibliarhu pʼitakata jaka, úkata jarhasti para ima kʼuiripuecha engaksï no káni míteka Biblieri ambe. Pori ejemplu, ari ambe jindeesti para imeecha engaksï no Testigueka: arhijtsïkperata enga fini de semana nitamataranhajka, máru artikuluecha ka bideuecha engaksï jw.org jimbo jaka, rebisteecha para kʼuiripuni jurajkukuni. Joperu inde informasioni ístujtsïni iáminduechani marhuachesïndi jimbokajtsïni jarhuatasïnga sánderu xénchani Tata Diosïni Jeobani, sánderu mintsikani imeeri Karakatani ka ístujtsïni jarhuatasïndi sánderu sési jorhentpini Tata Diosïiri ambe (Sal. 19:7).
17. ¿Ambe ka ambe jimbojtsïni uaa jarhuatani ima ambe engachi orhetku ueenajka jorhenguarhini?
17 Máru engachi ióni páni jakaia marhuakuni Tata Diosï Jeobani, sésichi pʼikuarherasïnga engachi aiangunhajka ambe enga iásï sánderu sési kurhangunhajkia Biblieri karakateeri ma, joperu ístuchi sési pʼikuarherasïnga imani ambe jimbo engachi ueenani jámani jorhenguarhipka ka iáminduechachi uaaka seguiriini jarhani sánderu sési jorhenguarhini indeeri ambe. Ka engachi úkua jukanchajka jiókuarhini imani ambe enga mójtakunhaka o máteru ambe, ju je kaxumbitiini ka no jámani eratseni o uandani eska no sési jarhaska inde ambe. Sánderu sési, ju je miáni eska no náki uéjki kʼuiripueska enga orhejtsïkuni jaka kúnguarhikuani sino ima enga kánikua jánhastiika ka uinhapitiini, juchaari Tata Diosï Jeoba. Ka engachi kʼéri problema ma jatsiaka jucha o máteru kʼuiripu, ju je tekaantani ka miáni andisï Tata Diosï jurajkuni jaki eskachi kómu nitamakuarhiaka. Ístu, exeni eskachi últimu jurhiatikuecha jimbo irekaxaka ka eska no ióni jimbo kʼamajkunhaakia parhakpini anapu ambe, jarhuataatijtsïni sési úrani juchaari tiempuni ka uinhapikuani. Ísï jimbo, ju je seguiriini jorhenguarhini imani ambe engajtsïni Tata Diosï méntku arhistachini jarhajka ka ísïchi uaaka sési ambe erakuni úni ka no méni jurajkuni Tata Diosïni.
PIREKUA 95 Lusi ma kánikua tʼíntskaxati
a Exe je artikuluni “Pronto acabará todo el sufrimiento”, rebistarhu Aianhpiri 15 de maiu de 2007, páj. 21-25, utusï jimbo.
b Exe je jorhenguarhikua 8 foieturhu Xénchaa je kʼuiripuechani: Jarhuataa je Jesúsiiri chúxapatiini.
c Exe je artikuluni “¿Míteskichi néna jusgarpia Tata Diosï Jeoba?”, rebistarhu Aianhpiri maiu de 2024, páj. 8-13.
d AMBE ENGAKSÏ XARHATAJKA IMAJENIICHA: Orhejtsïkutiichaksï tánguarhintatixati ka máechakua uandasïndi ambe ma paraksï úni joperu máteruechaksï no deakuerdu jarhasti. Tátsekua, jini erancheparini engaksï uánikua jóskuecha jaka, erachi exesïndi eskaksï Tata Diosï Jeobaeri eratsekuecha iauani sánderu sési jarhaska ka eska ambe enga ima eratsejka.
e AMBE ENGAKSÏ XARHATAJKA IMAJENIICHA: Pirenchi ma jandiajku jorhenguarhixati Biblieri ambe ka exexati eskachi últimu jurhiatikuecha jimbo irekaxakaia, jimbosï uandajpajti imeeri ermanani para aianguni Biblieri ambe.