SEMANA 44
PIREKUA 138 Tʼupuntsïkua, korona máesti enga sési xarharajka
Nénachi uaa tsípikua jingoni jámani nájkirukachi kʼériikia
“Nájkirukaksï tʼarhepiakia seguirinksï jauaka sési jarhani” (SAL. 92:14).
AMBE ENGACHI JORHENGUARHIAKA
Exeni jauakachi andisï jukaparhakue eskaksï kristianuecha engaksï kʼériikia seguiriini jauaka tsípikua jingoni jámani ka nénaksï uaa ísï úni.
1, 2. ¿Néna exeasïni Tata Diosï Jeoba erachiichani engaksï tʼarhepini jakaia? (Salmo 92:12-14; ístu exe je imajenini).
MÁRU lugariicha jimbo kʼuiripuechaksï sési pʼikuarherasïndi kʼériinia. Joperu máteruechaksï mámaru ambe úsïndi paraksï no xarharani eskaksï kʼériixakaia. Jirejiresïksï pʼirasïndi jauiri urapiti ma engaksï na andatajkia, joperu na uéjkiksï pʼiuani seguirinksï jauati andantani. Jo, ambe engaksï újka máru kʼuiripuecha xarhatasïndi eskaksï no uékasïnga kʼériini.
2 Joperu ju je exeni néna exeasïni Tata Diosï Jeoba erachiichani engaksï kʼérini jakaia (Prov. 16:31). Ima ísï exeasïndi komueska sési járhati anhatapuecha (arhinta je Salmo 92:12-14). Sési jásï ambe jingoni terukutaantasïndi, jimbokaksï inde anhatapuecha engaksï ióniikia xúxunharhasïndiksï ka sésiksï jájkundeni. Komu Japón anapu anhatapu ma, i anhatapu sési tsïpasïndi ka sési jájkundeni ka jukari 1,000 uéxurhini jarhasïndi. Anhatapuecha engaksï ióniikia kánikuaksï sési jáxesïndi. Ka ima kristianuecha engaksï kʼériikia, ístuksï kánikua sési xarharasïndi ka Tata Diosï sánderu sési exeasïndi. Tata Jeoba no solu jauiri urapitiichani exekuasïndi, sino sési járhati kualidadiichani. Ka nájkirukaksï ménisï no sési nitamakuarhienga, méntkisïksï sési marhuakusti Tata Diosï Jeobani.
Erachiicha engaksï kʼériikia kánikuaksï sési eraakuarhisïndi ísï komueska uiuinhasï anhatapuecha engaksï sési jáxeka. (Exe je párrafu 2).
3. ¿Neechani úraspi Tata Diosï Jeoba para úni ambe enga ima uékeenga?
3 Na uéjkichi kʼérini jarhania Tata Jeoba seguiriini jarhasïndi jukaparharaani imeechani engaksï kʼériikia.a Ka imani kʼuiripuechani úraasïndi engaksï kʼériikia para úni ambe enga ima uéjka. Komu Sarani; ima kutsïmestia enga ánjeli ma arhipka eska sapi ma kánguarhipiringa ka eska indeni uájpa jimbo niárapiringa kʼéri ireta ma jarhani ka eska Sara niárapiringa Mesíasiiri parientini (Gén. 17:15-19). Ka ístu, Moisési kʼériisptia enga Tata Diosï arhipka eska petantapiringa israeliteechani Ejiptu uératini (Éx. 7:6, 7). Ístu, apostoli Juanu tʼarhepisptia enga Tata Diosï arhipka eska karaapiringa sinko libruechani engaksï Bibliarhu jaka.
4. Eska na arhijka Proverbios 15:15, ¿náki kualidadi jarhuataua erachiichani engaksï kʼériikia paraksï no xáni no sési pʼikuarherani? (Ístu exe je imajenini).
4 Enga ma jatiriijkia uánikua ambe ma nóteru úsïndia úni. Jimbosï pirenchi ma uandapti tsípiparini: “Tʼarhepikua no jindeesti para chémsïicha”. Joperu jarhasti kualidadi ma enga jarhuatauaka paraksï no xáni no sési pʼikuarherani, jindeesti: méntkisï tsípikua jingoni jámani (arhinta je Proverbios 15:15).b Ini artikulu jimbo, exeakachi ambeksï uaa úni erachiicha paraksï seguiriini tsípikua jingoni jámani. Ístuchi exeaka nénachi uaa jarhuatani, joperuchi orheta exeaka andisï úkua jukajki seguiriini tsípikua jingoni jámani.
Tsípikua jingoni jámani kánikua jarhuatauati parakaksï no xáni uandanhiauaka ka paraksï no xáni no sési p’ikuarherani engaksï na sánderu kʼérini jarhajkia. (Exe je párrafu 4).
ANDISÏ ÚKUA JUKAJKI SEGUIRIINI TSÍPIKUA JINGONI JÁMANI
5. ¿Andiksïsï máru erachiicha engaksï jatiriikia niárajki no sési pʼikuarherani?
5 Ju je exeni andichisï úpirini no sési pʼikuarherani engachi na kʼériini jarhajkia. Jamberichi kómu pʼikuarherajka engachi exejka eskachi nóteru úsïngia imani ambe úni engachi antesi ueenga. O jamberichi miántajka engachi sapichku japka ka nóchi xáni pʼamenchani (Ecl. 7:10). Pirenchi Rubic uandantasïndi: “Kánikua pʼamerhikuarhisïnga engani mórhekuarhini jarhajka. No sésini pʼikuarherasïnga engani mediasi jukantani jarhajka. Juchiiti jájkiichaksï chanhapesti ka kánikua pʼameraasïnga asta parani sapichitu ambe úni”. Aarón, enga Beteli marhuapka, uandantasïndi: “Kánikua ikiasïnga engani exejka eskani nóteruni úsïngia imani ambe úni engani antesi ueenga. Méntkisï tsitiska uiriini ka béisboli chʼanani. Engachi chʼanani jarheenga máteruechaksï uandasïreendi ‘¡Aarónini kʼuanikuku je pelotani, inde méntkisï jatsirasïndi!’. Joperu iásï nóteruni jamberini úsïngia ni pelota ma kʼuanikuni”.
6. a) ¿Andichisï úpirini kómu pʼikuarherani engachi kʼériini jakaia? b) Engachi sánderu jatiriini jakaia, ¿nénachi uaa míteni sinchi útasï manejariua o nóteria? (Exe je artikuluni “¿Uétarhisïni eskani seguiriini jauaka manejariini?”).
6 Ístuchi no sési pʼikuarherajka jimbokachi nóteru úsïngia jandiajku úni ambe ka sánderia engajtsïni juchaari uájpa ma pájka kuidariini. O ístu jimbokachi nóteru úsïngia jandiajku nirani nani pʼamenchakua ma jimbo, jimbokachi nóteru úsïngia éskani o manejariini. ¡Xáni enga kómu pʼikuarherakuarhijka! Joperu kánikuajtsïni jarhuataati miáni eskajtsïni Tata Jeoba ka ístu máteruecha kánikua jukaparharasïnga nájkirukachi nóteru újkia jandiajkuni úni ambe, jandiajku irekani o manejariini. Ístuchi míteska eskajtsïni Tata Diosï Jeoba kurhanguchisïnga na engachi pʼikuarherajka. Ima mítesti eskachi kánikua xénchasïnga ka ístu erachiichani (1 Sam. 16:7).
7. Engachi ueenaka eratseni eskachi tʼuini uarhiakia ante de Armajedoni janoni, ¿ambejtsïni jarhuataa no kómu pʼikuarherani?
7 Ístuchi kómu pʼikuarherasïnga jimbokachi eratsesïnga eskachi tʼuini uarhiakia ante de Armajedoni janoni. Joperu ambe engajtsïni jarhuataaka jindeesti miáni eska Tata Diosï Jeoba kánikua tekaantskua xarhataxaka jimboka íntsaaxaka tiempu imani kʼuiripuechani engaksï nótki míteni jaka paraksï niárani marhuakuni ante de Armajedoni janoni (Is. 30:18; 2 Ped. 3:9). Ísï jimbo, engachi ueenaaka kómu pʼikuarherani, ju je miáni eska Tata Diosï Jeoba tekaantskua jingoni erokuarhixaka parakaksï kʼuiripuecha o asta juchaari familiariicha niáraaka míteni imani ante de kʼamajkuni parhakpini anapu ambe.
8. ¿Ménisïchi ambe niárasïni úni o uandani tʼarhepikua o pʼamenchakua jimbo?
8 Iáminduechachi ménisï niárasïnga kómu pʼikuarherani nájkirukachi sapichu jarhajka o kʼériinia ka imani ambechi uandani o úni engachi tátsekua pʼamondakuarhini jarhajkia (Ecl. 7:7; Sant. 3:2). Inde ambesï nitamakuarhipti Jobu. Ima xáni no sési nitamakuarhixapti enga ‘no sáni eratseparini uandapka’ (Job 6:1-3, nota). Ístu, pʼamenchakua májtsïni no sési ambe úrasïndi o uandarani. Joperuchi no jatsiska para indeni ambe arhiparhatarani para uinhamarhitspini o no sési pʼikuastpeni. Ka engachi no uékaparini ísï úskia, ju je arhijpini eskajtsïni tekaachintaaka (Mat. 5:23, 24).
AMBE ENGAJTSÏNI JARHUATAAKA SEGUIRIINI TSÍPIKUA JINGONI JÁMANI
¿Nénachi uaa seguiriini tsípikua jingoni jámani nájkirukachi kʼériini jauakia? (Exea je párrafuechani 9 a 13).
9. ¿Andisï sési jaki jurajkuni eskajtsïni máteruecha jarhuataaka? (Ístu exea je imajeniichani).
9 Ju je jurajkuni eskajtsïni máteruecha jarhuataaka (Gal. 6:2). No fásiliisti, pirenchi Gretel uandantasïndi: “Ménisï no uékasïnga eskajtsïni jarhuataaka parani no úkua jatsikukuani jarhani. Joperu uétarhisïndi kaxumbitiini ka uékani parajtsïni nema jarhuatani”. Ka engachi jurajkujka eskajtsïni máteruecha jarhuataaka, imeechajtuksï sési pʼikuarherasïndi (Úku. 20:35). Ka ístu jucha, jimbokachi exesïnga eskajtsïni xénchasïnga ka uandanhiani.
(Exe je párrafu 9).
10. ¿Andichisï jatsi para méntkisï diosmaiamukua arhijpini? (Ístu exea je imajeniichani).
10 Ju je diosmaiamukua arhijpini (Kol. 3:15; 1 Tes. 5:18). Nájkirukachi sési p’ikuarherajka engajtsïni nema jarhuatajka, ménisïchi no jamberi diosmaiamukua arhisïnga, joperu engachi ísï újka ka tsípikuni, xarhatanchi jarhasïnga eskachi jukaparharasïnga ambe engaksï újka juchantsïni jimbo. Lea enga Beteli kuidariuajka jatiriichani, uandantasïndi: “Pirenchireni ma nota ma jurajkuchesïndi ka nájkiruka no uánikua ambe arhijka, ji sési pʼikuarherasïnga jimboka ima pirenchi kánikua jukaparharasïnga ambe engani újka imani jimbo”.
(Exe je párrafu 10).
11. ¿Ambechi uaa úni parachi máteruechani jarhuataani? (Ístu exea je imajeniichani).
11 Ju je jarhuataani máteruechani. Engachi jánguarhintaaka jarhuataani máteruechani, nóchi juchaari ambe jimbojku uandanhiani jauaka. Imeecha engaksï kʼériikia ísïistiksï komueska libruecha engaksï uánikua ambe jorhentpijka. Ka paraksï kʼuiripuecha úni jorhenguarhini jatsistiksï para arhintani. Sáno májkueni, tumbiichaksï no uaati jorhenguarhini engachi no aianguauaka ambe engachi xáni míteka. Ísï jimbo ju je uandontskuarhekuani ka kurhajchaani ambe engajtsïni aiangukuarhiaka. Ístu ju je aianguani andisï sánderu sésii méntkisï kurhajchani Tata Diosï Jeobani para sési irekani. Ka uaakachi seguru jarhani eskachi juchajtu sési pʼikuarheraaka engachi jarhuatauaka ka uinhaperaantani (Sal. 71:18).
(Exe je párrafu 11).
12. Eska na arhijka Isaías 46:4, ¿ambejtsïni aiachixaki Tata Diosï? (Ístu exea je imajeniichani).
12 Ju je kurhakuni uinhapikua Tata Diosï Jeobani. Ima no kuatarasïndi ka ni kueratanchajki uinhapikua (Is. 40:28). Imeeri uinhapikua no méni kʼamakurhiati ka úrasïndi para uinhaperaantani imeeri marhuariichani engaksï kʼériikia (Is. 40:29-31). Biblia uandasïndi eskajtsïni Tata Diosï Jeoba jupixukutini paaka (arhinta je Isaías 46:4). Ka ima méntkisï kumplirisïndi ambe enga uandajka (Jos. 23:14; Is. 55:10, 11). Kánikuachi sési pʼikuarherasïnga méni engachi exejka na engajtsïni jarhuatajka ka na engajtsïni xáni xénchajka. Ísï jimbo, engachi niáraaka ísï p’ikuarherani eskachi kuataraskia ka eskachi nóteru uaakia, ju je miáni eska Tata Diosï Jeoba kánikua uinhapiska ka eskajtsïni jarhuataaka.
(Exe je párrafu 12).
13. Eska na arhijka 2 Korintu 4:16-18, ¿ambechi jatsiski para méntkisï miáni? (Ístu exe je imajenini).
13 Ménderuchi sapichkuentaaka ka nóteruchi pʼamenchaakia. Biblia uandasïndi eska imeecha engaksï tʼarhepikia ménderuksï sapichkuentaaka ka eska nóteru jauakia pʼamenchakua ambe. Míteni ini ambe jarhuatasïndijtsïni tekaantani (Job 33:25; Is. 33:24). Máruksï uandasïndi eska nitamaskia ima tiempu engachi sapichku japka, joperu no ísïisti, jimbokachi jimbanhi parhakpinirhusï meru sési irekuarhiaka (arhinta je 2 Korintu 4:16-18). Iásï, ju je exeni nénaksï uaa jarhuajpeni máteruecha.
(Exe je párrafu 13).
¿NÉNACHI UAA JARHUATANI IMEECHANI ENGAKSÏ K’ÉRIIKIA?
14. ¿Andisï uétarhijki uandajpani ka pʼorhembini erachini ma enga kʼériikia?
14 Someni nirani pʼorhembiani ka uandajpaani (Ebr. 13:16). Sáno méntkisï imeecha engaksï jatirijkia jandiajkuksï jarhasïndi. Erachi Carlos enga kʼériikia, uandasïndi: “No nani máru pʼikuarherasïnga, kuatantasïnga jimbokani nóteruni úsïngia uérani ni uánikua ambe úni”. Ísï jimbo, engachi nirajka pʼorhembiani, xarhatakuani jarhasïngachi eskachi uandanhiasïnga imeecha jimbo ka eskachi xénchaasïnga. Ka jamberichi iáminduecha eratsejka nirani pʼorhembini erachini ma o uandajpani, joperu tátsekuachi miripakurhini. Jiájkani, jimboka kánikua jukaparhakueska nirani pʼorhembini ini erachiichani, ¿ambejtsïni jarhuataa ísï úni? (Filip. 1:10). Jamberichi uaaka kalendariurhu karani na jatinchi uaa uandajpani erachini o mensaji ma axakuni. Ka engachi uékaaka nirani pʼorhembini, ju je exeni na jatinchi uaa nirani ka no naemengachi jatini jucha uékaaka.
15. ¿Ambe ka ambeksï uaa úni tumbiicha ka imeecha engaksï kʼériikia?
15 Engari tʼu sapichku jaka, jamberiri eratsejka “Ka ji ambeeri uaa uandontskuarheni imeecha jingoni engaksï kʼériikia o ambechi uaa úni márku”. Joperu asï uandanhia indeni ambe jimbo, solu uétarhisïndi eskari ambakiti amigu máeuaka (Prov. 17:17). Uaakari uandontskuarheni imeecha jingoni ante de ueenani tánguarhikua o enga na kʼamakurhiakia. Uaakari kurhamarhini náki tekstuni sánderu tsitisïni, kurhamarhini ambe enga nitamakuarhipka enga sapichuepka. O ístu, pʼímarhia exeni JW Broadcasting®. Ka ísturi uaaka jarhuataani imeeri tableta o selulari jingoni ka ísturi uaaka jarhuataani késkuani últimu publikasionichani. Pirenchi Carol enga kʼériikia, ini konsejuni íntspisti: “Ji útasïni tsitisïnga tsípikuarhini, nirani piáni ambe, uérani tʼireni ka exeni ambe enga xáni kueraaka Tata Diosï. Jimbosïni uandajka eskaksï máteruechajtu útasï tsitisïnga mámaru ambe úni. Ísï jimbo, pʼímarhia imeechani engaksï jatiriikia imani ambe úni engari t’u tsitijka”. Ka máteru pirenchi enga Maira arhinhajka, uandantasïndi: “Juchiiti amiga ma 57 uéxurhini sánderu kʼériisti eska ji, ima 90 jatiriistia, joperuni no indeni ambe exesïnga jimbokachi masi arhisïnga tsípikuarhini ka pelikula ambe exeni. Ka engachi uétarhinchajka konseju ma, jarhuajperasïngachi”.
16. ¿Andisï sési jaki pámbetaani erachiichani doktori jingoni?
16 Ju je pámbetaani doktori jingoni. Engachi niuaka pámbetaani, ju je imeecha jingoni pakarani parakaksï doktoriicha sési atenderiuauaka (Is. 1:17). Ístuchi úpiringa karani ambe enga arhiauaka doktori. Pirenchi Ruth uandantasïndi: “Engani jandiajku nirajka, doktoriichajtsïni no sési atenderisïndi. Ménisïksï doktoriicha ísï arhijpisïndi eska ma ískusï ísï uandani jarhajka, eska no ísïiska ambe enga ma p’ikuarherani jarhajka. Joperu engareni nema nirajka pámbetani, sésijtsïni kámasïndi. Kánikua agradeserikuasïnga erachi ka pirenchiichani engajtsïni nirajka pámbetani”.
17. ¿Nénachi úpirini aianhpini imani erachiicha jingoni engaksï kʼériikia?
17 Ju je uérani aianhpini imeecha jingoni. Ménichanksï nóteru úsïndia uérani aianhpini ima erachiicha engaksï kʼériikia, ísï jimbo, uaakachi pʼímarhiani paraksï juchantsïni jingoni jarhani karriturhu ka astachi úpiringa pákuani uaxantskuani ma. O arhini eskajtsïni pámbetaaka Biblieri ambe jorhendani kʼuiripuni ma o imeo uératini jorhentpini. Ístuksï orhejtsïkutiicha úpirindi indeni erachiicheeri kʼumanchikuarhu uératini nirani aianhpini. Engachi ísï uaaka, Tata Diosï Jeoba kánikua tsípiati jimbokachi xarhatakuani jauaka ini erachiichani eskachi janhanharhiasïnga ka xénchaani (Prov. 3:27; Rom. 12:10).
18. ¿Ambechi exeni jaua máteru artikulu jimbo?
18 Ini artikulu jimbochi exeskia eska Tata Diosï Jeoba ka iámindu kúnguarhikuarhu anapuecha xénchaasïnga ka jukaparharaani imani erachiichani engaksï kʼériikia. Ka nájkirukaksï úkua jukanchajkia, Tata Diosï Jeobaeri jarhuajperata jimboksï uaati seguiriini tsípikua jingoni jámani (Sal. 37:25). ¡Kánikuachi sési pʼikuarherasïnga míteni eska nótki nitamaxaka ima tiempu enga ma sapichku jarhajka, sánderu sési eska apenasi niáraaka! Máteru artikulu jimbochi exeni jauaka ambejtsïni jarhuataa seguiriini tsípikua jingoni jámani nájkirukachi kuidarini jauaka familiarini ma enga jatiriikia, sapini ma o amiguni ma enga pʼamenchani jaka.
PIREKUA 30 Juchiti Amigu, Tata Diosï ka Táti
a Exe je pájinarhu jw.org ka JW Library® bideuni Juchaari erachiicha engaksï jatiriikia kánikuaksï jukaparhakuesti.
b JUKAPARHAKUA AMBE: Parachi úni tsípikua jingoni jámani jatsiskachi para sési pájperani Tata Diosï Jeoba jingoni ka imajtsïni íntskuati imeeri espiritu santu parachi úni xarhatani indeni kualidadini (Gal. 5:22).
c Máru nombriichaksï mójtakurhisti.