Markusï
16 Ka enga na nitamapkia sábadu jurhiatikua, María Magdalena, María Santiagueri amamba ka Salomé, piásptiksï uitsakua ambe enga sési jájkundejka paraksï nirani atarhini Jesúsiiri kuerpuni. 2 Ka primeru jurhiatikua semaneeri,* xarhentku, enga jurhiata na andarapkia, nirasptiksï nani enga Jesúsi jatsinhantapka. 3 Ka úndasptiksï arhijperani: “¿Néjtsïni kénditachea tsakapuni enga tumbarhu jaka?”. 4 Joperu engaksï eraapka, tʼuinksï kénditasptia tsakapuni nájkiruka xáni kʼépka. 5 Engaksï inchapka tumbarhu, exesptiksï tumbini ma enga jurhijkandani jimbo uaxakatini japka, xukuparhakua iósti ma jukarixapti enga tʼuputʼupuxepka. Ka imeechaksï ísku pakareeraspti. 6 Ima arhiaspti: “Asï ché je. Chájtsï Jesúsini jurhaska exeni, Nasareti anapuni, imani enga chkarirhu cháparhatanhaka. Tsítanhantastia.* Nóteru ixú jarhastia. Exe je, ixú peeranhaspti. 7 Joperu ní je, arhia je imeeri chúxapatiichani ka Pedruni: ‘Ima niraxatiia úndani Galilea. Jinijtsï exentaaka ísï eskaksïni ima na arhipka’”. 8 Ísï jimbo, uéntasptiksï tumbarhu uératini ka uiriipantasptiksï. Manarapantaxaptiksï* ka kánikuaksï tsípixapti. Ka nóksï nemani aianguspti jimbokaksï chéxapka.*