Juanu
20 Primeru jurhiatikua semaneeri,* María Magdalena xarhentku niraspti nani enga Jesúsi jatsinhantapka jiáni enga útasï nótki erandeni japka. Ka enga na niárapkia tumbarhu, exespti eskaksï tʼuini kénditaspkia tsakapuni. 2 Ísï jimbo, uiriipantaspti jima enga Simóni Pedru ka máteru chúxapati japka, ima enga Jesúsi xáni xéncheenga ka arhiaspti: “¡Tata nóteru tumbarhu jarhastia, kénditastiksï ka nóchi míteska naniksï páski!”.
3 Jiájkani Pedru ka máteru chúxapati, nirasptiksï tumbarhu. 4 Tsimarhanksï uiriipaspti, joperu máteru chúxapati orhetku niáraspti tumbarhu jimboka sánderu uiriispka eska Pedru. 5 Enga kʼutitsepka para eranhani, linueri takusïichanderkusï exeantaptia, joperu no inchaspti. 6 Jimajkani Simóni Pedrujtu niáraspti ka inchaspti tumbarhu ka imajtu linueri takusïichanderkusï exeasptia. 7 Ka ima takusï engaksï Jesúsini irhijtsïkupka, no imani takusïichani jingoni jarhaspti, támu jarhaspti irhikukata. 8 Jimajkani, ima chúxapati enga orhetku niárapka, imajtu inchaspti tumbarhu ka exespti indeni ambe ka jakajkuspti. 9 Jimbokaksï nótki kurhanguxapka ambe enga Karakateecharhu arhijka eska ima jatsispka para tsíntani. 10 Ísï jimbo, ima chúxapatiichaksï níntaspti cheeni jémbo.
11 Joperu María uérakua pakaraspti, tumbarhu jandukutini ueraxapti. Ka ueparini, kʼutitsespti para tumbarhu eranhani 12 ka tsimani ánjeliichani exeaspti engaksï takusï urapiti xukuparhatini japka, jimaksï uaxakatixapti nani enga Jesúsi peeranhapka; ma jima uaxakatixapti enga éjpu japka ka máteru nani engaksï jantsiriicha japka. 13 Ka imeechaksï kurhamarhispti: “Nana, ¿andiresï uerani jaki?”. Ima arhiaspti: “Kénditastiksï juchiiti Tatani ka nanindiksï peeria”. 14 Enga na ísï arhiapkia, María pʼirhikuarhispti ka exespti Jesúsini enga jima anhandetini japka, joperu no mítentaspti. 15 Jesúsi kurhamarhispti: “Nana, ¿andiresï uerani jaki? ¿Néndi jámaxaki jirinhantani?”. Ka María eratsespti eska ima achamasïispka enga ambaatani jámeenga, jimbosï arhipti: “Tata, engari tʼu kénditaka, arhireni naniri peeraski ka ji niuaka pʼíntani”. 16 Jesúsi arhispti: “¡María!”. Ima pʼirhipakuarhespti ka ebreu jimbo arhispti: “¡Rabbóni!” —enga arhikuekajka “jorhentpiri”—. 17 Jesúsi arhispti: “Jurajkureni, asïrini jupika, jimbokani útasï nótki karhanchentaxaka parani juchiiti Taatini andarhientani. Ka ní sáni juchiiti erachiichani* jingoni ka arhia: ‘Niuaka karhanchentani juchiiti Taatini jingoni enga ístu chaari Taatiika, juchiiti Tata Diosïni jingoni enga ístu chaari Tata Diosïika’”. 18 María Magdalena niraspti Jesúsiiri chúxapatiichani aianguani ka arhiaspti: “¡Exeskia Tatani!”. Ka aianguaspti ambe enga ima arhipka.
19 Primeru jurhiatikuespti semaneeri ka xatiniisptia; ka Jesúsiiri chúxapatiicha engaksï tánguarhitini japka, sésiksï mínhakuarhetixapti* jimbokaksï chérhiaxapka judiuechani. Jimajkani, Jesúsi terujkani xarhakuaspti ka arhiaspti: “Eskajtsï pínandikua jatsiaka”. 20 Enga na ísï arhiapkia, exeraaspti jájkiichani ka jima engaksï lansa jingoni atapka. Ka imeeri chúxapatiichaksï kánikua tsípispti engaksï exepka Tatani. 21 Jesúsi ménderu arhiaspti: “Eskajtsï pínandikua jatsiaka. Ísï eskarini Taati na axaka jíndeni, jíjtuksïni májkueni axaxaka chánksïni”. 22 Ka enga na ísï arhiapkia, pʼunijtsïkuaspti ka arhiaspti: “Pʼí je espiritu santuni. 23 Engajtsï chá puákuntaska nemani pekadu ambe, ima puáminhantaati; joperu engajtsï chá no puákuntaska, ima no puáminhantaati”.
24 Joperu Tomási, ima engaksï arhienga Jemelu, ka enga 12 apostoliichani jingoni kuenta úkuarhienga, no jima jarhaspti enga Jesúsi niárapka. 25 Ísï jimbo, máteru chúxapatiichaksï arhispti: “¡Jucha exeskia Tatani!”. Joperu ima arhiaspti: “Engani ji no erajkuska ka inchanhani dedu jima engaksï chájkupka ka ístuni inchanhani jájkini jima engaksï lansa jimbo atapka, no méni jakajkuaka”.
26 Ka ochu jurhiatikua ísï tátsekua, Jesúsiiri chúxapatiichaksï ménderu tánguarhintatixapti kʼumanchikuarhu ka Tomásijtu jima jarhaspti imeechani jingoni. Ka nájkirukaksï sési mínhakuarhetini japka, Jesúsi terujkani xarhakuaspti ka arhiaspti: “Eskajtsï pínandikua jatsiaka”. 27 Tátsekua arhispti Tomásini: “Ixú peera chiiti deduni ka erajkurini; ixúani jua jájkini ka inchanha ixú engajtsïni lansa jimbo ataka. Ásteru jámia no jakajkuni ka jakajkia”. 28 Jimajkani Tomási arhispti: “¡Juchiiti Tata ka juchiiti Tata Diosï!”. 29 Ka Jesúsi arhispti: “¿Iásï kʼóruri jakajkuskia jimbokarini exeska? Tsípisïndiksï imeecha engaksï jakajkujka nájkirukaksï no ma ambe exejka”.
30 Jesúsi uánikua máteru milagruechani uaaspti imeeri chúxapatiichani japarini engaksï no karakata jaka ini karakateecharhu.* 31 Joperuksï karakata jarhasti parajtsï chá jakajkuni eska Jesúsi jindeeska Kristu, Tata Diosïiri Uájpa, ka parajtsï tsípikua jatsini imeeri nombri jimbo jimbokajtsï jakajkuska.