Juchiiti ambe jimbojkuni uandanhiasïreenga

NA ENGANI IREKAPKA IÓNTKI:

Engani sapichuepka, Alemania irekaspka, ireta ma jimbo enga arhinhajka Leipzig jima no iauani jarhasti Polonia ka República Checa. Engani 6 uéxurhini jatiripka, Brasil niraspkachi irekani ka tátsekua Ecuador, jimboka juchiiti papa jima ánchikuarhisïrenga.

Engani 14 jatiripkia, papajtsïni ménderu axantaspti Alemania parani jima estudiarini. Papaksï iauani jarhaspti, ísï jimbo pʼindespkia jandiajkuni úni iámindu ambe ka no uandanhiasïreenga ambe engaksï uandapiringa máteruecha.

Jiáni engaksï papa junguapkia Alemania, ji 17 jatirispkia. No ióni irekaspka imeecha jingoni jimbokani pʼindespkia jandiajkuni úni ambe, úkua jukasïrenga kurhajchani, ísï jimbo engani 18 jatiripka, nóteruni uékaspkia imeecha jingoni irekani.

No úsïreenga agustu irekani ka nijtu jánhaskani ambe úni juchiiti irekua jingoni. Uánikua kúnguarhikuecha jingoni jámaspka, peru últimu erakuspka eska sánderu sésispka nirani miiuni iápuru ísï ante de kʼuiripu kʼamajkuni ini xáni sési planetani.

Motuni ma piáspka ka Alemania uératini niraspka África. Peru ísï tátsekua kʼuanhatsentaspka Europa jimboka motu xerekuarhespka. Peru engani na arreglarintapkia, niraspka plaiarhu jini Portugal. Ka engani jima japka, uénaspka eratseni nóteru motu jingoni jámani sino iásï barkuni jimbo jámania.

Tumbiichani máru kúrhiaspka engaksï prepararikuarhini japka paraksï parhikuni océano Atlántico. Imeechani jingoni jámasïreendi Laurie, enga tátsekua jindeepiringa juchiiti uarhiti. Niraspkachi islas del Caribe, Puerto Rico ka tátsekuachi kʼuanhatsentaspka Europa. Laurie ka ji uékasïreengachi barku sapichu ma piáni parachi úni jima irekani. Peru engachi tanimu mesi páni japkia jirinhani jatsispkachi para erokuarhini sáni jimboka ejersitu Alemania pásptireni.

Jarhaspka 15 mesi ejersiturhu ka imani mesicha jimbo tembuperaspkachi. Uékasïreengachi seguirini iápuru ísï miiuni. Ante dejtsïni páni ejersiturhu piáspkachia barku sapichu ma ka sánhani arhispkachi arreglarini parachi úni jima irekani. Indeni barku jingoni, uékasïreengachi seguirini iápurisï miiuni. Engani uéntapkia ejersiturhu uératini ka antedechi kʼamarani arreglarini barkuni, Jeobaeri testiguechajtsïni uandontskuarhichespti ka uénaspkachi jorhenguarhini Biblieri ambe.

NA ENGARINI BIBLIA MÓJTAKUCHEKA IREKUA:

Uénani jámani eratsespka eskani no jatsispka parani uánikua ambe mójtakuni: tembuchaspkia imani jingoni engani jingoni irekani japka ka nóteruni itsutasïreengia (Efesu 5:5). Ístuni eratsesïrenga eska nirani iápuru ísï ka exeni xáni sési ambe enga Tata Diosï kueraaka, sési úrani japiringa juchiiti tsípikuani.

Peru útasïni jatsispka parani mójtakuni ambe, na engani jásïipka. Útasïni kʼéramakuarhisïreenga ka tsitini jandiajku úni ambe ka xarhatakuani máteruechani ambe engani xáni jorhenapka úni. Juchiiti ambe jimbojkuni uandanhiasïreenga.

Ma jurhiatikua arhintaspka Sermoni Monteri jimini (Mateu, kapitulu 5 a 7). Ískuni pakaraspka engani arhintapka eska imeecha engaksï kʼarimani jaka ka kʼarhichani, tsípisïngaksï (Mateu 5: 6). Peruni kurhamarhikuarhisïrenga, néna úpirini nema enga kʼarimani jaka ka kʼarhichani, tsípikua jingoni irekani. Engani na jorhenguarhipani japka Biblieri ambe, kuenta íntskukuarhespka eskachi iáminduecha jatsiska para míteni Tata Diosïni ka parachi ísï úni jatsiskachi para kaxumbitini. Ísï eska na uandapka Jesúsi: “Tsípisïndiksï imeecha engaksï exejka eskaksï uétarhinchasïnga Tata Diosïni (Mateu 5:⁠3).

Laurie ka ji, Alemania ueenaspkachi jorhenguarhini Biblieri ambe, joperuchi mótsispka Francia ka tátsekua Italia. Iápurisïksï jarhaspti Jeobaeri testiguecha. Ma ambe engareni ísku pakatenga imeecheri ambe, jindeespti na engaksï xénchperaenga ka márkuksï ánchikuarhini. Exespka eskaksï iáminduecha ísï kámberasïreenga komueska ma familia (Juanu 13:​34, 35). Ka tátsekuachi itsï atakuarhispka.

Nájkirukani Jeobaeri testiguepkia, jatsispka parani seguirini mójtakuni na engani jásïipka. Laurie ka ji eratsespkachia eskachi África nipiringa ka Atlántico ísï parhikuni, asta Estados Unidos niárani. Engachi marirhu terumikua japka juchiiti uarhiti jingoni ka imani barku sapichu jingoni ka xáni káni itsï, jima exespka na engachi xáni sapichitu ambeka Tata Diosï kueraajpiri jingoni. Jima kánikua tiempu jatsispka (jimboka marirhu ma no úsïnga uánikua ambe úni), ísï jimbo pauani pauani arhintasïreenga Bibliani. Arhintani ambe enga úpka Jesúsi, kánikuarini eratsetarantaspti. Nájkiruka ima perfektuepka ka sési járhati kualidadichani jatsiani, méntkisï kaxumbikua jingoni jámasïreendi. Sánderu uandanhiasïreendi imeeri Taati jémbeeri ambe jimbo.

Engani eratsentapka Jesúsiri ejempluni, exespka eskani jatsispka parani no solu jiáni marhuakuni Tata Diosï engani tiempu jatsipiringa, sino méntkisï orheta peerani imeeri ambe (Mateu 6:33). Engachi niárapkia Estados Unidos, eratsespkachi jima pakarani ka ueenani sési marhuakuni Tata Diosïni.

NAKI KÓNTPERATECHANI ÍNTSINHASKIA:

Jiáni engani juchiiti ambe jimbojkuni uandanhiauenga, no úsïreenga míteni nénarini nichepirini. Peru iásï, míteskia né engari uáka méntkisï íntskuni jánhaskakua (Isaías 48:17, 18). Ístuni exentaskia ambe engani uáka juchiiti tsípikua: kómarhini Tata Diosïni ka jarhuataani máteruechantu parakaksï imeechajtu míteaka.

Bibliarhu anapu konsejuechajtsïni jarhuatasti parachi sánderu sési irekani Laurie jingoni. Ístu, Jeobajtsïni újchakurasti engajtsïni íntskuka sési jásï nanaka sapichuni ma enga ístu mítejka Jeobani ka xénchani.

Nájkirukachi ménisï jatsiajka uandanhiatechani, Jeobajtsïni no méni jurajkusïndi ka juchajtuchi no méni jurajkuaka imani ka seguiriuakachi mintsikani imani (Proverbios 3:5, 6).