Ambe enga Biblia uandajka méntkisï marhuasïndi

ERANHASKA je eskajtsï museurhu ma jarhaska enga uánikua ióntki anapu ambe jaka. Sáno iámindu ambe enga jima jaka, sésiksï kʼamarastia, máruksï jarhanharhistia ka kʼependinksï ka máruksï mándani pedasujkustiksïa. Peru jarhasti ma ambe enga no ma ambe úkuarhika, enga sési kompletu jaka, ísïmindu jarhasti eska na jásïipka ueenakuarhu. Ka chá kurhamarhisïnga imani enga jima ánchikuarhijka: “¿I sánderu jimbanhiski?”. Ka imaksïni arhisïndi: “Nómbe, sánderu ióntki anapuesti ka no méniksï sési jájkuntaxati”. Jimajkani chájtsï arhisïnga: “¿Xáni sési patsakata jarhaspi?”. Ka imaksïni arhini: “Nómbe, i jindeesti enga sánderu no sési nitamaka, tarhiatani ka janikuani jimbo ka uánikuaksï uékastia no sési úkuni”. Jimbojtsïsï chá eratsejka: “¿Ambeeri úkata jaki?”.

Biblia sáno ísïisti eska ima ambe engachi uandani japka. Sánderu ióntki anapu libru máesti ka eska máteruecha. Nájkirukaksï jaka máteru ióntki anapu karakatecha, nóteruksï májkueni marhuasïndia iásï. Pori ejemplu, ambe engaksï ima ióntki anapu karakatecha uandeenga siensieri ambe, nóteru terokuntasïndia imani ambe jingoni enga iásï mítenhakia. Ka engaksï medisineri ambe uandajka, peekaksï sánderu no sési útspijka ka eska sési útspini. Ka uánikua inde ióntki anapu karakatecha, ma partijkusï jarhastia jimbokaksï máteru particha tsïncheskia o nóteruksï xarhanharhinia.

Peru Biblia jingoni no ísïisti, iauani ménderuenisti. Jukari tres mili kinientu uéxurhini nitamastia enga karakuarhika ka májkueni marhuaxati. Nájkirukaksï iónisï uékapkia kʼamajkuni Bibliani, komu uékanksï kurhirantani, nóteruksï uékania paraksï kʼuiripuecha jatsini ka no sésiksï ambe uandani imeeri ambe, peru Biblia, útasï jarhasti iásï jamberi. Ka enbesi de nóteru marhuania imani ambe jingoni enga iásï mítenhakia, ambe enga Biblia uandajka xarhatasïndi eskajtsïni orhetapasïnga aianguni ambe ma ante de mítenhani (exe je rekuadruni “¿Nóteru marhuasïnia ojtsïni orhetapasïni aianguni ambe ma?”).

KONSEJUECHA ENGACHI PAUANI PAUANI UÉTARHINCHAJKA

Peru jamberijtsï kurhamarhikuarhijka: “¿Meruksï marhuajki Bibliarhu anapu konsejuecha?”. Parajtsï míteni mókuntskuani, eratseanta je sánderu kʼérati uandanhiatechani engaksï kʼuiripuecha jatsiaaka. ¿Nákiskiksï sánderu no sési járhati uandanhiatecha? Jamberijtsï eratsejka eska guerrecha, kontaminasioni, atajperakuecha o engaksï kʼuiripuecha no jurhimbikua jingoni jámajka. Iásï exe je máru ambe enga Biblia jorhentpijka ka engajtsï na arhintapani jauaka kurhamarhikuarhi je: “¿Sánderuchi sési irekapirini engachi iámindu úpiringa eska Biblia na arhijka?”.

UÉKANI ESKA PÍNANDEKUA JAUAKA

“Tsípisïndiksï imeecha engaksï újka eska pínandikua jauaka, jimbokaksï arhinhaaka eskaksï Tata Diosïri uájpeeska” (Mateo 5:9, TNM). “Ka chaari parti jimbo jánguarhi je eskajtsï xáni uaka sési pájperani iámindu kʼuiripuechani jingoni enga újka ísï úkuarhini” (Roma 12:18).

PʼAMOJPINI KA PUÁTSPINTANI

“Tsípisïndiksï imeecha engaksï pʼamojpitiika, jimbokaksï imajtu niáraaka pʼamojkunhani” (Mateo 5:7, TNM). “Tekaatsperanta je ka puátsperantani enga nema jatsika arhijperakua máteruni jingoni, ka ísï eskaksïni Tata Diosï Jeobaa na puáchentaka chánksïni, chájtu ísï ú je” (Colosenses 3:13, TNM).

SÉSICHI PÁJPERANI NANI UÉJKISÏCHI ANAPUENI

Tata Diosï májku acheeti jimbojku “kueraasti iámindu kʼuiripuechani parakaksï irekapiringa iápuru parhakpinirhu” (Ukuecha 17:26). Tata ‘Diosï no nani kʼuetsapisïndi, sino jaiapanhentasïndi nákinterku ma nasioni anapu kʼuiripuni enga janhanharhijka imani, ka sési úni’ (Ukuecha 10:34, 35).

JÁNGUARHINTANI ECHERINI KUIDARINI

“Jimajkani, Tata Diosï Jeoba jardini de Edénirhu peeraspti acheetini paraka kuidaripiringa echerini ka ánchitani” (Génesis 2:15). Tata Diosï kʼamajkuauati “imeechani engaksï ikichakua újka parhakpinini” (Jaŋaskuecha 11:18).

NO TSITINI JATSIKUARHIKUEKANI NI ÍSKU JÁNDIKUA AMBE

“Xéparini, asï jáma je jukari tsitini jatsikuarhekuekani, jimboka no jatsikuarhekua ambe jimbosï uaaka ma kʼuiripu tsípikua jatsini” (Lukasʌ 12:15). “Peru asï jáma je ni sikiera [uandani] ísku jángua ambe ka iámindu ikichakueni jásï ambe ka nijtu tsititspikua, jimboka no terukuntasïnga para Diosïri míndakatecha” (Efesu 5:3).

JURHIMBITKU JÁMANI KA ÁNCHIKUARHINI

“Uékasïngachi iámindu ambe jimbo sési jámani” (Ebreu 13:18). “Ima enga sïpatspienga, ásteru sïpatspie, sino ánchikuarhie imeeri jájkichani jimbo” (Efesu 4:28).

JARHUATAANI IMEECHANI ENGAKSÏ UÉTARHINCHAJKA

‘Uinhaperantaa je imeechani engaksï kuatantani jaka, ka mintsita jatsikuantani imeechani engaksï debiliika, ka ísï tekaantani jarhani iáminduechani jingoni’ (1 Tesalonika 5:14). “Jarhuataani uerandi jupindichani, ka ístu tsïndichani engaksï no sési úkuarhinchani jarhajka” (Santiagu 1:27).

Bibliajtsïni no solu jorhendasïndi ambe enga sési jaka, ístujtsïni arhisïndi nénachi uaa ísï úni. Enga iámindu kʼuiripu úpiringa i ambe engachi exekia, ¿chá no ísï exesïni eska iámindu ambe ménderuenipiringa ixú parhakpinirhu? Ísïisti, Bibliarhu anapu konsejuechaksï kánikua marhuaxati iásï enga xáni uétarhijka. Peru, ¿nénaksïni uaa jarhuatani Biblia chánksïni?

NÉNAKSÏNI UAA JARHUATANI BIBLIA

Achamasï enga sánderu jánhastiipka, uandaspti: “Peru ambakiti jorhengua xarharasïndi eska ambakitiska imeechani jimbo engaksï janhanharhijka” (Mateu 11:19). I ambe ísïisti, ¿a no? Para míteni sini marhuajki konseju ma, uétarhisïndi ísï úni ka exeni na engajtsïni nichejka engachi na ísï újkia. Ísï jimbo, no no sési jarhasti engajtsï chá eratseaka: “Enga Biblia meru marhuajka, ¿no jatsipirini para úni eskani sánderu sési irekaaka? ¿Uaarini jarhuatani parani orhepani uérakuani uandanhiatechani engani iáiasï jatsiaaka?”. Ju je exeni ejemplu ma.

Dianab kánikua sési irekaxapti ka méntkisï úkua ambe jatsispti, peru ma repentku no sési ambe nitamanchaspti. Uarhiranchaspti imeeri nanakani, jurajperasptiksï imeeri acheeti jingoni ka niáraspti sentabu uétarhinchani. Ima uandantasïndi: “Nóteruni mítespkia neespi ji, nóteruni jatsispkia juchiiti nanakani, ni juchiiti acheetini ni kʼumanchikua. Iámu ambe tsïtaspka, nóteruni jánhaskasïrengia ambe úni”.

Jiájkani Diana sési kurhanguspti eskaksï ísïiska ari uandakuecha: “Na engachi xáni ióni irekajka, jindeesti setenta uéxurhini o ochenta enga ma meru kánikua uinhapikua jatsiaka. Peru kánikua uandanhiakuarhisïndi ka no sési pʼikuarherakuarhini; sóntku nitamasïndi tiempu ka nóteruchi jarhasïngia” (Salmo 90:10).

Biblia kánikua jarhuataspti Dianani para úni orhepani uérakuani imani uandanhiatechani. Eskachi na exeaka máteru tanimu artikuluecha jimbo, uánikua kʼuiripuechaksï exestia eska para úni orhepani uérakuani uandanhiatechani, sánderu sésiska úni ambe enga Biblia uandajka. Ka kuenta íntskukuarhestiksïa eska Biblia ísïiska komueska ima ióntki anapu ambe engachi ueenakuarhu uandaka. ¿Andisï Biblia no májkuenii eska máteru libruecha? ¿Jindee jimboka Tata Diosï kararkuarhiska ka no kʼuiripuecha? (1 Tesalonika 2:13).

Jamberijtsï chájtu eratsejka eska tsípikua sóntku kʼamakurhisïnga ka eska uánikua uandanhiatecha jarhasïnga. Engajtsï uánikua uandanhiata ambe jatsijka, ¿néntsï kurhakusïni eskaksïni arhistachiaka ka jarhuatani?

Ju je exeni tanimu ambe na engaksïni Biblia uaaka jarhuataani chaari irekuarhu. Uaatiksïni jarhuatani para:

1. No jatsiani máru uandanhiatechani.

2. Sési peentani imani uandanhiatechani engajtsï jatsiauaka.

3. Tekaantani imani uandanhiatechani engajtsï chá no uaaka sési peentani.

Máteru artikuluechaksï i tanimu ambeeri uandaati.