¿Ambejtsïni jorhendasïni kueraakata ambe?

“Kurhamarhia sáni animalichani ka imaksïni jorhendaati; ístu kurhamarhia auandarhu anapu pajaruechani ka imaksïni aianguati. O exe echerini ka imakeni jorhendaati; ka ístu marirhu anapu kuruchechaksïni uaati aianguni” (JOB 12:7, 8).

SIENTIFIKUECHAKSÏ ka injenieruechaksï jorhenguarhisïndi plantecheri ka animalicheri ambe ka jánguarhintasïndiksï paraksï jimbanhi makinechani uaani ka uánikua máteru ambe enga sáno májkueni marhuauaka eskaksï plantecha ka animalicha.

Baiena kʼumbupareri aletecha

Imeecha engaksï abionichani uaajka, uaatiksï uánikua ambe jorhenguarhini baiena kʼumbupareri aletecheri ambe. I jásï baiena ma enga kʼérijkia, niárasïndi kʼuetsapeni ma 30 tonelada ísï, ka ma 12 metrisï ióskani, nóksï úsïndi kánikua tsikakuarhini ka kʼérati aletechanksï jukaasti. Joperuksï kʼóru úsïndi sóntku manakuarhini. Pori ejemplu, engaksï uéjka tʼireni, kétsekuaksï niárasïndi jima engaksï uánikua kuruchecha jarhajka ka ueenasïndiksï karhakisï xarhiani sirkuluecha jimbo ka uánikua burbujechanksï uaasïndi. I xáni uánikua burbujechaksï redini jásï ma úsïndi enga újka eskaksï kuruchecha terujkanikuarhu pakaraaka. Jiájkani, ballena sóntku nirasïndi ka auantasïndi.

Sientifikuechaksï no úsïreendi kurhanguni néna jámasïni para xáni uantsïkuarhini inde xáni kʼéri animali enga no újka xáni tsikakuarhini. Ma ladu aletecharhu nóksï pareju jáxesti, ísï eskaksï na jáxeka abioniri alecha, sánderu sési, kʼumbunderastiksï.

Enga imeeri aletechaksï ísï k’umbunderaka, jarhuatasïndi baienani para sánderu sóntku karakisï nirani nájkiruka no xáni jánguarhintaaka. ¿Néna úkuarhisïni inde ambe? Rebista ma uandasïndi eska engaksï aletecha ísï k’umbunderaka, úsïndi eska itsï uantsïkuarhika aletecharhu uirhipandani ka inde ambe jarhuatasïndi baienani paraka no xáni jánguarhintaaka karakisï nirani. Enga aleteri oriia pareju jáxépiringa, baiena no úpirindi i ambe úni.

Engaksï sientifikuecha mítekia ini ambe, ¿néna marhuaua? Engaksï obioniri alecha ísïksï úkata japiringa komueska baiena k’umbupareri aletecha, nóksï xáni uánikua piesecha uétarhipirindi, sánderuksï seguruepirindi ka no xáni someni uétarhipirindi eskaksï arreglariantani japiringa. John Long enga kánikua mítekuka biomekanikeri ambe, eratsesïndi eska “jamberichi no ióni jimbo exeauaka iámindu abionichani májkuenksï járhati kʼumbunderakuechani jukaani eskaksï baiena kʼumbupareri aletecha”.

Gabioteri alecha

Mítekata jarhasti eskaksï injenieruecha iónisï kopiariuaska pajaruecheri kʼésïchani paraksï abioniri alechani uaani. Ka iásïksï sánderu jánguarhintaxati para sánderu sési terukukuantani pajaruecheri kʼésïchani. Rebista ma enga siensieri ambe uandajka, uandasïndi eskaksï Universidad de Florida anapu sientifikuecha, jánguarhintaxaka parakaksï abionicha uaaka májkueni kárani eskaksï gabiotecha. Ústiksï dronini ma enga újka karhakua pakarani, úsïndi sóntku kétseni ka ístu sóntku karakisï nirani májkueni eskaksï gabiotecha.

Paraksï úni sési kárani, gabiotechaksï tsikakuasïndi imeecheri kʼésïchani imani kutukua jimbo engaksï koduecharhu jukaka. Rebista engachi uandakia, uandasïndi eska ima droni engaksï úka, jukaaska alechani engaksï sáno májkueni manakuarhijka eska gabiotecheri kʼésïcha. I alechaksï úsïndi eska droni uaaka karhakua pakarani ka kʼérati edifisuecharisï jámani. Soldaduechaksï uékapirindi ini járhati dronichani jatsiani paraksï úni jirinhantaani kʼérati siudadicharhisï arma kimikuechani ka biolojikuechani engaksï úrakuarhejka para uándikpini.

Jekoeri jantsiricha

Ístuchi uaaka uánikua ambe jorhenguarhini máteru animalicheri. Pori ejemplu, jarhasti tikuini sapichu ma enga jeko arhinhajka ka enga újka paredicharhu ka techuecharisï jámani. Ambe enga i animali sapichu újka, desde iónisï ísku pakataasïreendi kʼuiripuechani (Prov. 30:28). ¿Ambe jarhuatasïni jekoni para no uekorheni?

Jeko úsïndi xanharani asta jimeesïsï enga kánikua pitsipika komu bidriu ma, jimboka sapirhati jauirichani jukandurhaaska ka no jimboka uéndurhajka ambe ma enga újka eska mátakuarhiaka nani enga atastajka. Sánderu sési, jeko úsïndi jimeesïsï jámani jimboka imeeri jantsiricheri molekulecha mátakuarhisïnga imani molekulecha jingoni nani enga atastani jarhajka ka jimbosï no uekorhejti. Kʼuiripuechachi no úsïnga paredicharisï jámani o techurisï ísï eska jeko. Joperu i animali sapichu úsïndi ísï úni jimboka ima jauiri sapirhati enga jukanduraajka sánhani arhisïnga jupikuarhini jimeesïsï enga atastani jarhajka.

¿Nénaksï uaa kʼuiripuecha kopiarini ini ambe engaksï sientifikuecha exentaka? Úpirindiksï úni materiali ma enga májkueni marhuauaka eska belkru.a Inbestigadori ma uandasïndi eska i ambe úpiringa marhuani para sinta ma úni enga úpiringa úrakuarheni jiáni engaksï doktoricha no újka kimiku ambe úrani para míkuarhentani eridecha.

¿Nénchi jatsipirini para diosmaiamukua arhini ini ambe jimbo?

Kúnguarhikua ma enga NASA arhinhajka (Administración Nacional de Aeronáutica y del Espacio, de Estados Unidos), roboti ma ústi enga sáno májkueni xanharajka eska eskorpioni ma, ka jini Finlandia ústiksï traktori ma enga seisi jantsiricha jukaaka, enga xásïika komueska kʼéri animali ma ka enga újka iápurisï jámani. Máteru sientifikuechaksï ústi ambe ma enga ísï mítakuarhejka ka míkuarhentani eskaksï uanhasïcha. Ístu, jarhasti empresa ma enga kopiarini jaka na enga manakuarhijka kurucha ma (pez cofre), para karru ma úni enga tarhiata no xáni pʼínguaka. Máteru inbestigadoricha uékaxatiksï míteni andiksïsï máru marirhu anapu konchecha xáni chopejki. Uékasïndiksï xukuparhakua ambe úni enga kánikua marhuakuauaka sondaduechani paraksï kuájchakukuarhini, joperu enga no xáni kʼuetsapeaka.

Sientifikuechaksï uánikua ambe jorhenguarhistia naturaleseri ambe. Ka komputadorecharhuksï iámu ambe karakata jatsisti na engaksï jámajka ka ambe engaksï újka animalicha ka plantecha. Rebista ma uandasïndi eskaksï sientifikuecha jima jirinhantasïnga informasioni jiáni engaksï uékani jarhajka sési péntani ambe ma. I ambe engaksï sientifikuecha xáni mítekia animalicheri ka plantecheri ambe, sáno májkuenisti eska marka ma jatsini o dueniueni ambe máeri. Méntkisï enga nema jimbanhi ambe petajka, imeeri nombri ka imasï kʼéri ambe exenhajti imani ambe jimbo. Ka sientifikuechaksï uandasïndi eskachi jatsipiringa para diosmaiamukua arhini naturalesani iámindu ambe jimbo enga xáni jaka.

¿Néna úski naturalesa paraka xáni ambakiti ambe japiringa? Uánikua inbestigadorichaksï eratsesïndi eska uánikua uéxurhini jimbo, iámu ambe sánhani arhiska ebolusionarini ka eska ísï niáraska jarhani iámu ambe enga iásï xáni sési úkata jaka. Joperu máteruecha ménderueni eratsesïndi. Uéxurhini 2005 jimbo, sientifiku Michael Behe ini ambe karaspti periodikurhu The New York Times: “Nóchi uaaka uandani eska no ísïiska ambe enga naturalesa xarhatajka. Pori ejemplu, enga animali ma ísï xanharajka eska patu ma ka májkueni mintsirani eska patu ma, uaakachi seguru jarhani eska patu máeska. Ístu, enga xáni sési úkata jaka iámu ambe naturalesarhu, uaakachi seguru jarhani eska jarhaska nema enga xáni sési úka iámindu ambe”.

Enga nema sánderu jimbanhi abioniri ala ma újka, jimbanhi sinta ma, sánderu ambakiti xukuparhakua ambe o sánderu ambakiti karru ma úni, jatsisïndi para k’éri ambe exenhani imani ambe jimbo enga úka. Ísï jimbo, kopiarini ambe ma enga máteru nema úka ka no uandani néni kopiarikuski, ísïipirindi komu delitu ma.

¿Chá jakajkupirini eska inde xáni ambakiti ambe engaksï sientifikuecha jánguarhintani jaka kopiarini, ísku niáraski jarhani? Enga xáni jánhaskakua uétarhijka para kopiarini ambe ma, útasï sánderu jánhaskakua uétarhisïndi para desde ueenani kueraani ambe ma. ¿Né jatsiski para sánderu k’éri ambe arhinhani: ima enga jánhaskakua jingoni kueraaka o ima enga nomasi kopiarika?

Ambe engachi jorhenguarhijka

Engaksï kʼuiripuecha exejka na enga xáni sési úkata jaka iámu ambe naturalesarhu, niárasïndiksï májkueni eratseni eska salmista na karaka: “¡Na enga xáni uánikua ambeka chiiti úkuecha, oh Jeoba! Mímixekua jingoni úskari iámindu ambe. Echeri uinindentasti ima ambe jingoni engari tʼu kueraaka” (Salmo 104:24). Pablu, enga ístu karaka ma parti Biblieri, sáno májkueni ambe karaspti: “Jimboka iámindu imeeri ambe enga no xarharajka, komueska imeeri uinhapikua enga méntkisï jindeeka, ka imeeri Diosïkua, xarharaska desde jimajkantki úndani enga parhakpini kueraanhaka, jimboka mítenhasïnga iámindu ambe jimbo enga úkateka” (Roma 1:20).

Joperu uánikua kʼuiripuecha engaksï jakajkujka Tata Diosïni, útasïksï eratsesïndi eska Tata Diosï ebolusioni jimbo kueraaska iámindu xáni ambakiti ambe enga naturalesarhu jaka. Joperu, ¿inde ambesï jorhentpijki Biblia?

[Nota]

[Komentariu]

¿Néna úski naturalesa paraka xáni ambakiti ambe japiringa?

[Komentariu]

¿Né kueraaski iámindu ambe enga xáni jaka naturalesarhu?

[Rekuadruecha/Imajeni]

Enga xáni jánhaskakua uétarhijka para kopiarini ambe ma, útasï sánderu jánhaskakua uétarhisïndi para desde ueenani kueraani ambe ma.

I droni, sési manakuarhisïndi jimboka jukaaska alechani engaksï sáno májkueni manakuarhijka eska gabiotecheri kʼésïcha

Jekoechaksï no méni no sési jándurasïndi, no méni nóksï sési jántskasïndi nani engaksï atastajka, úsïndiksï sáno iápurisï mátakuarhini ka ístuksï úsïndi sóntku kéndikukuarhini jima uératini engaksï mátakukuarhitini japka. Inbestigadorichaksï jánguarhintaxati paraksï májkueni úni ambe ma

Na enga kurucha kofre újka xáni sóntku manakuarhini itsïrhu, ústi eskaksï uékapiringa karru ma úni enga sáno májkueniuaka

[Nani enga uéraka ilustrasioni]

Aeronave: Kristen Bartlett/University of Florida; jekoeri jantsiri: Breck P. Kent; kurucha (pez cofre) ka karru: Mercedes-Benz USA

[Rekuadruecha/Imajeni]

NEMA ÏSÏ KUERAASTI

Uánikua animalichaksï úsïndi iápurisï nirani ka nóksï tsïnchesïndi. Úsïndiksï sési niárani jima engaksï uékeenga nirani. Ju je exeani tsimani ejempluechani.

◼ Na engaksï sïrukicha újka sési nirani ka kʼuanhatsentani ¿Nénaksï úsïni sïrukicha nidurhu kʼuanhatsentani engaksï nirajka tʼirekua jirinhantani? Máru sientifikuecha Inglaterra anapu uandasïndiksï eskaksï sïrukicha pʼuntsumikua ma jurajkusïnga iámu xanharu jimbo ka eskaksï xanharuechani uaasïnga paraksï úni míndaskuarhintani ka únksï nidurhu kʼuanhatsentani. Pori ejemplu, jarhastiksï máru sïrukicha engaksï xanharuechani uaajka nidurhu iauanisï ka engaksï ísï újka, tátsekuaksï arhukusïndi xanharuni ma paraksï tsimani xanharuenia. Ka rebista ma uandasïndi eskaksï méntkisï májkueni arhukusïnga xanharuni enajkiksï sési tsʼéritajki. I ambe ískujtsïni pakatasïndi ka kánikua marhuasïndi jimboka enga sïruki ma niárajka jima enga xanharu arhukurhijka, imani xanharuni jupikasïndi enga sánderu sési exeaka. Ka náki uéjki xanharu jupikani méntkisï imeeri nidurhu páati. I ambe kánikua marhuakuasïndi sïrukichani paraksï nirani ka ménderu junguani nidurhu ka ísïksï no kuatarasïndi jimbokaksï no tsïnchesinga

◼ ¿Andiksïsï no tsïnchejki pajaruecha? Jarhastiksï mámaru járhati pajaruecha engaksï mótsijka máteru nanisï; iauanisïksï kárasïndi ka na uéjki jánhaskuarhini jarhani, nóksï tsïnchesïndi. ¿Nénaksï úsïni inde ambe úni? Sientifikuechaksï exestia eskaksï inde pajaruecha úsïnga pʼikuarherani o kampu magnetiku enga Echerirhu jaka. Joperu rebista ma uandasïndi eska kampu magnetiku no iápurisï májkueniska ka eska no méntkisï nortisï apuntarisïnga. Jimajkani, ¿andiksïsï no tsïnchejki ima pajaruecha engaksï mótsijka? Paraksï úni míteni nanisïksï niua, i pajaruechaksï ístu exesïndi nani enga jarhajka jurhiata inchatiruechani. Ka nájkiruka jurhiata interu uéxurhini manakuarhini jarhajka, pajaruechajtuksï sési mítesti ambe tiempu jimboksï jarhaski. I tsimani ambe úsïndi eskaksï pajaruecha sési míteaka nani engaksï ísï jatsika para kárani.

¿Né jorhendaaski sïrukichani paraksï xáni sési tsʼéritaani imeecheri xanharuechani? ¿Né jorhendaaski pajaruechani paraksï míteni naniisïsï kárani? ¿Ísku úkuarhiski? ¿O Kuerajpiri jánhaskati ma úski?

[Nani enga uéraka ilustrasioni]

© E.J.H. Robinson 2004