¿Chájtu májkueni eratsesïni ísï eskaksï i tanimu kʼuiripuecha? Jamberijtsï uékapka Bibliani arhintani, joperu jarhaspti ambe ma engaksï ójkutapka. Uánikua kʼuiripuechaksï kuatantasïndi engaksï uékajka Bibliani arhintani. Peru ambe enga Biblia uandajka uaati úni eskajtsï tsípikua jingoni irekaaka ka jarhasti máru ambe engajtsï uaaka úni parajtsï tsitini Bibliani arhintani. ¿Uékapirintsï míteni nénaksïni uaa jarhuatani Biblia?

Exe je ambe engaksï uandajka máru kʼuiripuecha engaksï ueenapka Bibliani arhintani ka engaksï exepka na enga xáni marhuajka ísï úni.

Ezekiel, enga 20 uéxurhini ísï jatiriika, uandasïndi: “Ióntki, ísïispka komueska ima kʼuiripuecha engaksï karreterarhisï nirajka peru engaksï no míteka naniksï niáraa. Peru Bibliani arhintani ústi eskani ménderueni irekapiringa. Ambakiti konsejuechani jukaasti para juchaari irekua”.

Frieda enga ístu 20 ísï jatiriika uandasïndi: “Ji kánikua ikiasïreenga ambe uéjki jimbo, peru imani ambe engani Bibliarhu arhintajka, jarhuatasïndireni parani pʼíngukuarhini. Iásï nóteruni xáni ikiasïngia ka sánderu uánikua amiguechani jatsiaskia”.

Eunice, uarhiiti ma enga jukari 50 uéxurhini jatiriika, uandasïndi: “Bibliareni jarhuataxati parani sánderu ambakiti kʼuiripu máeni ka jurajkuni imani no sési ambe engani ueenga”.

Bibliani arhintani uaati úni eskajtsï sánderu tsípikua jingoni irekaaka ísï eskaksï ícha engachi arhintakia ka ístu uánikua máteru kʼuiripuecha (Isaías 48:17, 18). Biblia uaatiksïni jarhuatani parajtsï imani ambe úni enga sési jaka, ambakiti amiguechani jatsiani, no xáni uandanhiani ka ístu para imani ambe úni enga sánderu jukaparhakueka, enga jindeeka jorhenguarhini juchaari Kueraajpiriri ambe. Bibliarhu anapu konsejuechaksï, Tata Diosï jimbo jurhasïndi, ísï jimbo, nójtsïni méni no sési nicheati engachi ísï uaaka. Imajtsïni méntkisï ambakiti ambe arhistachesïndi.

Ambe enga sánderu jukaparhakueka jindeesti ueenani arhintani. Máteru artikuluecha jimbo, exeakajtsï máru ambe engaksïni jarhuataaka Bibliani arhintani ka tsitini ísï úni.

¿Nénajtsï uaa úni parajtsï tsitini Bibliani arhintani ka paraksïni kánikua marhuacheni? Exea je sinko konsejuechani enga uánikuechani jarhuataakia engaksï tsitijka arhintani.

Eraku je ambakiti lugari ma. Nani enga no jauaka ruidu ambe. Enga no xáni jauaka ima ambe engaksïni uaaka ójkutani ka enga sési erajkukuarhiaka ka enga tarhiata ambe inchaaka, sánderujtsï sési kurhanguaka ambe engajtsï arhintaaka.

Arhinta je eratseparini eskajtsï ambakiti ambe jorhenguarhiaka. Biblia regalu máesti juchaari Taati auandarhu anapueri. Parajtsï kánikua marhuatani ambe engajtsï arhintaaka, ísï ú je eska sapi ma na újka enga uéjka jorhenguarhini imeeri taati jémbeeri ambe. Engajtsï no sési eratsejka ojtsï no sési exeni ambe ma Biblieri ambe, jánguarhi je no ísï eratseni ka jurajku je eskaksïni Tata Diosï jorhendaaka (Salmo 25:4).

Kómarhi je Tata Diosïni ante dejtsï ueenani arhintani. Biblia, Tata Diosïri eratsekuechani jataasti, ísï jimbo, uétarhisïndi eskajtsïni ima jarhuataaka kurhanguni. Ima aiatspesïndi eska íntsauaka espiritu santu imeechani engaksï kurhakuaka (Lukasʌ 11:13). Espiritu santuksïni uaati jarhuatani kurhanguni néna enga eratsejka juchaari Kueraajpiri. Ka ísï tátsekuajtsï uaaka kurhanguni “asta imani ambe enga Tata Diosïjku míteka ka enga jískakata jaka” (1 Korintu 2:​10).

Arhinta je para kurhanguni. Asï ísku arhinta je, engajtsï arhintani jauaka, eratsi je ambe engajtsï arhintani jaka. Kurhamarhikuarhi je: “¿Náki kualidadichani xarhataaski i kʼuiripu enga ixú uandajka? ¿Néna uaa ísï úni eskani na jorhenguarhini jaka?”.

Eratsetini ja je ambe engajtsï uéjka jorhenguarhini. Parajtsï tsitini Bibliani arhintani, jánguarhi je jorhenguarhini ambe ma engaksïni marhuacheaka. Uaakajtsï arhini ambe erakuni, sánderu míteni Tata Diosïni, sánderu ambakiti kʼuiripu máeni, sánderu ambakiti uámba o témba máeni o máteru ambe. Tátsekua, eraku je partini ma Bibliarhu engaksïni jarhuataaka ísï úni.a

I sinko konsejuechaksïni jarhuataati parajtsïni ueenani arhintani Bibliani, peru ¿ambe uaa úni paraka sánderu interesantiuaka Bibliani arhintani? Máteru jorhenguarhikuarujtsï exeaka ambe engajtsï uaaka úni.

Parakajtsï no kuatantaaka Bibliani arhintani ka parakaksïni marhuacheaka, jatsiskajtsï para exeni andi engajtsï arhintaaka. Exeakachi ambe engajtsï uaa úni parakajtsï sánderu tsitiaka Bibliani arhintani.

Imani Bibliani arhianta je enga mintsinharhikueka ka enga iásï anapu uandakuechani úraajka. Engajtsï arhintani jauaka ka uánikua uandakuechantsï no úni kurhanguani oksï nóteru úrakuarhenia, nójtsï tsitiaka arhintani. Ísï jimbo, jirinha je Bibliani ma enga no úkua jukaaka kurhanguni ka engaksïni mintsitarhu niáracheaka. Ístu jatsisti para traduksioni máeni enga jurhimbitku uandantajka ka mintsinharhikueni.a

Úraa je jimbanhi teknolojiechani. Biblia, iásï no solu imprimirinhasïndi, sino ístu jarhasti elektroniku jimbo. Uaakajtsï arhintani Interneti jimbo o késkuni komputadorarhu, tabletarhu o telefonurhu. Máru bersionichaksï jukasti ambe ma parakajtsï chá uaaka exeani máteru traduksionichani inde mismu bersikulueri o parajtsï terukutantani máteru tekstuecha jingoni. Ka engajtsï no uékaaka arhintani ka uékantsï kurhaani, ístu jarhasti audiu jimbo. Uánikuechaksï tsitisïndi kurhaani engaksï ánchikuarhini nirani jarhajka karru jimbo, engaksï jupani jarhajka o engaksï máteru ambe úni jarhajka enga no xáni uétarhijka para ma jingontku jarhani. ¿Náki sánderu sési japirini para chá? ¿Andijtsï no ísï újki?

Jirinhanta je sánderu informasioni. Jarhastiksï publikasionicha engaksïni jarhuataaka sánderu sési kurhanguni Bibliani. Por ejemplu, jarhastiksï mapecha lugaricheri enga Biblia uandaajka engaksïni jarhuataaka míteni nani enga úkuarhipka ambe ma ka parakajtsï eranhaskaaka ambe enga jima úkuarhipka. Ístu, máru jorhenguarhikuecha engaksï ini rebista jimbo uéraka ka engaksï partirhu jaka “Biblieri jorhenguarhikuecha” pájina Internetiri jimbo jw.org, jarhuataatiksïni kurhanguni uánikua ambe enga Bibliarhu jaka.

Mámaru ambe jimbo arhinta je Bibliani. Engajtsï kuatantajka uénakuarhu ka asta kʼamarhukuni jamberi arhintani, jiájkani imani ambe ueena je arhintani Bibliarhu engajtsï tsitiaka. Parajtsï sánderu míteni kʼuiripueri ma enga kánikua mítekateeka Biblieri, uaakajtsï arhintani mándani kʼuiripuecheri. Rekuadru “Jorhenguarhi je sánderu Biblieri ambe mítepariani kʼuiripuechani enga Biblia uandaajka” uaatiksïni jarhuatani parajtsï sánderu sési míteni kʼuiripueri ma. Ístujtsï uaaka arhintani temecha jimbo o eska na úkuarhipaka ambe ma. ¿Andijtsï no újki ma ini ambe?

Biblia no náki uéjki libru máesti. Ixúchi exeantasïnga juchaari Kueraajpiriri konsejuechani (2 Timoteo 3:​16). Ambe enga Biblia uandajka uaatiksïni kánikua jarhuatani. Biblia mismu uandasïndi ‘Tata Diosïri uandakua tsípitiisti ka uinhapitiini’ (Ebreu 4:​12). I libruksïni uaati tsimani ambe jimbo jarhuatani parajtsï sánderu sési irekani: íntsauatiksï konsejuechani parajtsï pauani pauani úraani ka jarhuataatiksïni parajtsï míteni Tata Diosïni ka ambe enga ima aiatspijka (1 Timoteo 4:8; Santiagu 4:8).

Konsejuechani íntspiasïndi parachi pauani pauani úraani. Bibliajtsïni íntsaasïndi konsejuechani ima ambeeri engachi jucha uétarhinchajka ka ístu máteru ambeeri.

• Parachi sési pájperani máteruecha jingoni (Efesu 4:​31, 32; 5:​22, 25, 28, 33).

• Parachi no pʼamenchani ka sési pʼikuarhenhini (Salmo 37:8; Proverbios 17:22).

• Ambakiti jánguecheri ambe (1 Korintu 6:​9, 10).

• Sentabueri ambe (Proverbios 10:4; 28:19; Efesu 4:​28).a

Asia anapu temungurhiri ma engaksï sapichku jaka, exesti na engaksï xáni marhuajka Biblieri konsejuecha. Májkueni eska uánikua imeecha engaksï apenasi tembuperaka úkua jukanchaxaptiksï terukutani ka sési uandontskuarheni. Joperuksï ueenaspti ísï úni eskaksï na jorhenguarhini japka Bibliarhu. ¿Néna marhuakuaspi? Vicent, enga uámbeeka, uandantasïndi:Ambe engani jorhenguarhika Bibliarhu, jarhuatastirini parani úni uékperakua jingoni orhepani uérakuani temungurhirikueri anapu uandanhiatechani. Ísï úni eskaksï na arhijka konsejuecha, ústi eskachi tsípikua jingoni irekaaka”. Imeeri témba, Annalou, májkueni uandantasïndi: “Bibliarhu anapu konsejuechani arhiantani kánikuajtsïni jarhuatasti. Iásï tsípikua jingoni irekaxakaia ka sési pʼikuarherasïnga jimbokachi májkueni járhati metechani jatsiaska”.

Jarhuajpesïndi míteni Tata Diosïni. Vicent uandastia imeeri temungurhirikueri ambe ka ístu uandantasïndi: “Engani arhintajka Bibliani, úsïndi eskani sánderu andarhieraaka Tata Jeobani”. Ambe enga Vicent uandantajka ambakiti ambeksïni uaati jorhendani: Eskaksïni Biblia uaaka jarhuatani sánderu sési míteni Tata Diosïni. Engajtsï ísï úska, nójtsï solu marhuatauaka imeeri konsejuechani, sino ístujtsï uaaka niárani imeeri amigueni. Ka exeakajtsï eska Bibliarhu uandasïnga eskachi sánderu orhepatini niáraaka sánderu sési irekani ka meru tsípikua jingoni para méntkisï (1 Timoteo 6:​19). No járhasti máteru libru engaksïni ini ambe jorhendaaka.

Engajtsï ueenaaka Bibliani arhintani ka pʼindentsï ísï úni, chájtujtsï uaaka sánderu sési irekani iásï ka niáraakajtsï sánderu sési míteni Tata Diosïni. Joperu engajtsïni na arhintani jauaka, jamberijtsï uánikua kurhamarhikuechani jatsiauaka. Engajtsï ísï úkuarhinchaska, miá je ambe enga úpka Etiopía anapu achamasï ma, enga jukari 2,000 uéxurhinikia enga irekapka. I achamasï uánikua kurhamarhikuechani jatsiaspti Tata Diosïri Karakateri ambe. Joperu Felipe, enga Jesúsiri chúxapatipka, kurhamarhispti sini kurhanguxapi ambe enga arhintani japka, ka ima arhispti: “¿Ka nénajtuni uaa kurhanguni enga no nema jaka parareni jorhendani?”. Tátsekua jurajkuspti eska Felipe jorhendapiringa enga ambakiti jorhentpiri máepka (Ukuecha 8:30, 31, 34). Engajtsï chájtu uéjka sánderu sési kurhanguni Bibliani, pʼímarhixakaksïni parajtsï uininharhitani solisitudi ma Internetirhu ixú jw.org o kara je domisiliuni engaksïni sánderu no iauani pakaracheaka enga ini rebista jimbo jaka. Ístujtsï uaaka uandontskuarheni Jeobaeri testiguecha jingoni engaksï jimeesïsï irekaka engajtsï chá irekaaka, ojtsï uaaka nirani Kʼumanchikua Reinueri ma jimbo. Pʼímarhixakaksïni eskajtsï jirinhaaka Biblia ma iásï mismu ka jurajku je eskaksïni jarhuataaka parajtsï sánderu sési irekani.