Uaakachi erokuarhikua ma jatsini na uéjki no sési jánhaskuarhini jarhani parhakpinirhu

“Últimu jurhiatikuechani jimbo jaua[ti] peligru” (2 TIMOTEO 3:1).

¿KURHAASKIJTSÏ méni ojtsï exeni ini no sési jásï ambe?

● Uánikua kʼuiripuechaksï uarhisïndi pʼamenchakua ma jimbo.

● Uánikua kʼuiripuechaksï uarhisïndi k’arhingua jimbo.

● Jenchekua ma úsïndi eskaksï uánikuecha uarhiaka ka eskaksï máteruecha tsïtakuarhiaka imeecheri kʼumanchikuani.

Ini rebistarhu, exeakajtsï mámaru no sési jásï ambe enga úkuarhini jaka parhakpinirhu komu iicha engajtsï arhiantakia. Chájtsï uaaka exeni eska Biblia t’uini uandaspkia eska i xáni no sési jásï ambe jiáni úkuarhini japiringa “últimu jurhiatikuechani jimbo”.

Parajtsï míteni andisï Tata Diosï jurajkujki eska no sési jásï ambe úkuarhiaka, arhinta je artikuluni “¿Andisï jurajkujki Tata Diosï eska no sési jásï ambe jauaka ka kómu nitamakua ambe?”, enga pájina 16 ka 17 jimbo jaka ini rebistarhu.

I artikuluechaksï no úkata jarhasti paraksïni exerani eskachi irekaxaka parhakpini ma jimbo enga uánikua uandanhiata ambe jaka sino paraksïni erokuarhikua ma íntskuni. Exeakachi eskaksï seisi profesiecha enga Biblia uandaajka ka engaksï iásï kumplirikuarhini jaka, xarhatasïngaksï eskaksï no ióni jimbo kʼamakurhiakaksïa “últimu jurhiatikuecha”. Ístuchi exeaka néna engaksï máru no jakajkujka eskachi “últimu jurhiatikuechani jimbo” irekaxaka. Ka ístu, andichisï uaa seguru jarhani eska no ióni jimbo nóteru jauakia kómu nitamakua ambe ka eskachi niáraaka sési irekani.

1. Kʼéri jenchekua ambe

“Kʼérati jencheati” (LUKASʌ 21:11).

● Notisiecharhu xarharaxapti na enga xáni no sési jánhaskuarhini japka jini Haití jenchekua ma jimbo. Ka ma repentku imeecha engaksï jima japka, kurhaasptiksï nema uerani jarhani jimeesïsï enga iámu ambe xerentskata japka. Pʼitaskuntasptiksï nanaka sapichuni ma enga Winnie arhinheenga ka enga ma uéxurhini ka terujkani jatiripka. Imajkusï tsípiti pakarapti ka taati jémbeechaksï uarhispti.

AMBE ENGA XÁNI ÚKUARHIKA Enga xáni kʼéri ma jenchepka jini Haití, eneru 2010 jimbo, jukari 300,000 kʼuiripuechaksï uarhispti ka 1,300,000 kʼumanchikuechaksï xerekuarhentaspti. Kánikua no sési jánhaskuarhispti imani xáni kʼéri jenchekua jimbo ka ístu ma parhakpini jimbo útasï jenchespti. Ma 18 kʼérati jenchekuecha jarhaspti abrilini 2009 uératini asta abrilini 2010 jamberi.

MÁRUKSÏ INI AMBE UANDASÏNDI. No sánderu jenchesïndi iásï eska antesi. Sino iásï, teknolojia jimbochisï újka sánderu míteni káni enga jenchejka.

¿ÍSÏISKI ESKAKSÏ NA UANDAJKA? Biblia no uandasïndi namuni enga kʼérati jenchekuecha japiringa últimu jurhiatikuechani jimbo. Sánderu sési, uandasïndi: “Kʼérati jencheati”, ka “naninterkisï jencheati”. Ka i ambesï xarhatajti eskachi últimu jurhiatikuechani jimbo irekaxaka (Markusʌ 13:8; Lukasʌ 21:11).

¿NÁJTSÏ EXESÏNI CHÁ? ¿Úkuarhixaki eska na uandapka Biblia eska kʼérati jenchekuecha japiringa?

No solu kʼérati jenchekuecha xarhatasïndi eskachi últimu jurhiatikuechani jimbo irekaxaka. Iásï ju je exeni máteru profesia.

[Komentariu]

“Para jucha [geofísicos], jindeestiksï kʼérati jenchekuecha. Peru para kʼuiripuecha soluksï jindeesti no sési jásï ambe enga úkuarhijka”. (KEN HUDNUT, SERVICIO GEOLÓGICO DE ESTADOS UNIDOS)

[Nani enga uéraka ilustrasioni]

© William Daniels/​Panos Pictures

2. Kʼarhingua

“Naninterkisï kʼarhingua ja[uati]” (MARKUSʌ 13:8).

● Acheeti ma niárasïndi ireta ma jimbo enga Nigerieri kapitali no iauani jaka. Imeeri primu jémbeecha, ermanu jémbeecha ka piremba jémbeechajtuksï iauani uératini jurhasïndi jimboka kʼarhingua ambe jarhaska. Ima acheeti, kʼuírakueni jásï ma jimbo apokuatsesïndi. ¿Andisï ísï újki? Sidi, acheeti enga orhejtsïkujka imani aldeani uandasïndi eska ima acheeti ísï úska “Jimboka kánikua no sési pʼikuarherasïnga ka kʼuratseni enga ísï no újka tʼirerani imeeri familiani”.

AMBE ENGA XÁNI ÚKUARHIKA Siete kʼuiripuecheri, ma kʼuiripu no sési nitamakuarhisïndi kʼarhingua jimbo, ka sánderia jini África nani enga tanimu kʼuiripuecheri, ma, no jatsisti xáni tʼirekua eska na uétarhinchajka. Parachi úni kurhanguni ini ambe, ju je eranhaskani familiani ma nani enga jaka taati jémba, amamba ka tataka sapichu ma. Enga solu jaka tʼirekua para tsimani kʼuiripuecha, ¿né no tʼirea? ¿Taati jémba o amamba? Uánikua familiecha jingoni ísï úkuarhisïndi pauani pauani.

MÁRUKSÏ INI AMBE UANDASÏNDI. Echeri íntspisïndi tʼirekua enga sési andangupiringa para iáminduecha. Ambe enga uétarhijka jindeesti eska sési etsakunhaaka ambe enga echeri íntspijka.

¿ÍSÏISKI ESKAKSÏ NA UANDAJKA? Ísïisti eska iásï sánderu kánikua tʼirekua jarhaskia iámu parhakpinirhu. Ísï jimbo, juramutichaksï jatsipirindi para úni eska iámindu i tʼirekua iáminduechani niárakuapiringa paraka nóteru kʼarhingua ambe japiringa parhakpinirhu. Peru nájkirukaksï iónisï jánguarhintakia, nóksï úxati ísï úni.

¿NÁJTSÏ EXESÏNI CHÁ? ¿Úkuarhixaki ambe enga Markusʌ 13:8 uandajka? Nájkiruka iásï sánderu teknolojia ambe jaka, andisï xáni kʼarhingua ambe jaki?

Kʼérati jenchekuecha ka kʼarhingua ambe, sáno méntkisïksï úsïndi eska máteru uandanhiata ambe jauaka enga ístu Biblia tʼuini uandapkia.

[Komentariu]

“Uánikua sapiicha engaksï niárajka uarhini neumonía, pátskua o máteru jásï pʼamenchakua ambe jimbo, jamberiksï no uarhipirindi engaksï sési tʼirepiringa”. (ANN M. VENEMAN, EX DIRECTORA EJECUTIVA DE UNICEF)

[Nani enga uéraka ilustrasioni]

© Paul Lowe/Panos Pictures

3. Pʼamenchakuecha

“Uánikuechaksï no sési nitamakuarhiati no sési járhati pʼamenchakuecha jimbo.” (LUKASʌ 21:11, Traducción en lenguaje actual)

● Bonzali, acheeti ma enga gobiernu jingoni ánchikuarhienga para pʼamenchakua ambe exeni África anapu paisi ma jimbo enga no sési jánhaskuarhijka guerra jimbo, kánikua jánguarhintaspti para tsinaani imeechani engaksï minecharhu ánchikuarhienga ka engaksï uarhini japkia virus de Marburgo jimbo.a Ima, kurhakuaspti jarhuajperata kʼéri iretarhu anapu juramutichani, peruksï no jarhuataspti. Tʼámu kutsï ísï tátsekua engaksï uékapkia jarhuatani, Bonzali tʼuini uarhisptia. Ima mineruecha enga ima uékeenga tsinaani, kéritasptiksï pʼamenchakuani.

AMBE ENGA XÁNI ÚKUARHIKA Mándani uéxurhini, uánikua kʼuiripu uarhisïndi ini pʼamenchakuecha jimbo: nemonía, pátskua, sida, tuberkulosisi ka paludismu. Uéxurhini 2004 jimbo, sáno onse miioni kʼuiripuechaksï uarhispti ini pʼamenchakuechani jimbo. I ambe arhikuekasïndi eska ma kʼuiripu uarhisïreenga mándani tanimu segundu jimbo.

MÁRUKSÏ INI AMBE UANDASÏNDI. Iásï sánderu uáni kʼuiripu jarhastia parhakpinirhu jimboksïsï sánderu uánikua kʼuiripuecha pʼamenchajti.

¿ÍSÏISKI ESKAKSÏ NA UANDAJKA? Ísïisti eska iásï sánderu uánikua kʼuiripu jarhaskia parhakpinirhu, peru ístu, iásï kʼuiripuecha sánderu sési mítestia néna tsinajpini o kontrolarini pʼamenchakua ma. Ísï jimbo pʼamenchakuecha jatsipirindi para sánhani arhini kéndikukuarhini. Joperu sánderu uánikua jarhastia.

¿NÁJTSÏ EXESÏNI CHÁ? ¿Úkuarhixaki iásï ambe enga Biblia uandapka eska kʼérati pʼamenchakuecha japiringa?

Uánikua kʼuiripuechaksï kómu nitamakuarhisïndi kʼérati jenchekuecha jimbo, kʼarhingua ka pʼamenchakuechani jimbo. Ka máteruechaksï kómu nitamakuarhisïndi jimboka imeecha engaksï jatsipiringa para kuájchakuani, no sésiksï kámaasïndi. Exe je ambe enga Biblia uandajka iiri ambe.

[Nota]

[Komentariu]

“Kánikua no sési ambeesti uarhini jimbokakeni leoni o máteru animali ma ántaaka, peru ístu kánikua no sési ambeesti eskakeni pʼamenchakua ma sánhani arhiaka uándikuni incharinisï ka tʼu exeni jarhani ambe engari úkuarhinchani jaka”. (MICHAEL OSTERHOLM, EPIDEMIÓLOGO)

[Nani enga uéraka ilustrasioni]

© William Daniels/​Panos Pictures

4. Nóteru xáni xénchperanhani familiarhu

“Nóksï uéauati imeecheri kʼumanchikuarhu anapuechani ka parienti jémbechani” (2 TIMOTEO 3:1-3).

● Chris ánchikuarhisïndi jini engaksï jarhuatanhajka imeecha engaksï kʼumanchikuarhu no sési kánhajka jini Gales. Ima uandasïndi: “Ma jurhiatikua, jurhaspti uarhiiti ma enga no sési atanhapka, xáni engani no jamberi úpka mítentani. Máteru uarhiiticha engaksï jurhajka parachi jarhuataani, kánikuaksï no sési arhinhasïndi jimboksïsï méntkisï kétsekisï eraani jarhajti”.

AMBE ENGA XÁNI ÚKUARHIKA África anapu paisi ma jimbo, uánikua uarhiitichaksï ísku ambe úminhaspti engaksï sapiipka. Imani mismu paisi jimbo, máru acheetichaksï eratsesïndi eska sési jarhaska témbechani ataani. Peru no uarhiitichajkuksïsï niárajti no sési kánhani kʼumanchikuarhu. Jini Canadá uánikua uarhiitichaksï niárasti atani oksï no sési kámani imeecheri acheetichani.

MÁRUKSÏ INI AMBE UANDASÏNDI. Desde iónisï jarhasptia no sési kámberakua kʼumanchikuarhu, joperu iásï sánderu uandanhasïndi indeeri ambe eska ióntki.

¿ÍSÏISKI ESKAKSÏ NA UANDAJKA? Ísïisti eska iásï sánderu uandanhasïngia na enga no sési kámberanhajka familiarhu. Peru, ¿úskia i ambe eska nóteru jauakia no sési kámberakua familiarhu? ¡Nómbe! Iásïksï familiecha nóteru uékperakua xarhatatsperasïndia.

¿NÁJTSÏ EXESÏNI CHÁ? ¿Úkuarhixaki ambe enga 2 Timoteo 3:1-3 uandajka? ¿Exesïntsï chá eskaksï familiecha no sési kámberanhasïnga?

Máteru profesia engachi exeni jaka eska úkuarhixakaia, Echeriri ambe uandasïndi. Ju je exeni ambe enga Biblia uandajka iiri ambe.

[Komentariu]

“Nóksï uánikuesti engaksï aiangujka polisiani engaksï no sési kánhajka kʼumanchikuarhu. Uarhiitini ma úpirindi imeeri acheeti asta treinta i sinku uelta no sési kámani ante de ima nirani polisiani aianguni”. (PORTAVOZ DEL SERVICIO DE AYUDA CONTRA EL MALTRATO DOMÉSTICO DE GALES)

5. Echeri kʼamajkunhaxati

“[Tata Diosï] k’amajkuantaa[ti] imeechani engaksï ikichakua újka parhakpinini” (JAŊASKUECHA [APOCALIPSIS] 11:18).

● Pirri, palmeri binu atarantasïreendi jini Kpor (Nigeria). Joperu nóteru ústi ísï úni jimboka kánikua petroleo tsïnchekuarhiska riu deltarhu ka iámu palmechani tsïjpaasti. Pirri uandasïndi: “Uándikuasïndi kuruchechani, pʼamenchatarasïndijtsïni ka riuechani tsïjpaasti. Nóteruni jánhaskasïngia ambe ánchikuarhini”.

AMBE ENGA XÁNI ÚKUARHIKA. Seguni imeecha engaksï mítekuka, mándani uéxurhini sáno seisi miioni tonelada ka mediaksï kʼuanimanhasïndi basura marirhu. Ka sáno terujkani jindeesïndi plastiku enga kánikua ióndajka paraka uaaka tereni. Kʼuiripuechaksï kontaminarisïndi Echerini, peru ístuksï sóntku kʼamajkuxati iámu ambe enga echerirhu jaka. Imeecha engaksï mítekuka, uandasïndiksï eska sáno ma uéxurhini ka terujkani uétarhisïnga para sési niántani ima ambe engaksï kʼuiripuecha ma uéxurhini jimbo kʼamajkujka. Australia anapu periodiku ma enga arhinhajka Sydney Morning Herald, uandasïndi: “Engaksï sánderu uánikua kʼuiripuecha úkuarhiska ka engaksï seguiriska ísï kʼamajkuni ambe enga echerirhu jaka, para uéxurhini 2035 tsimani parhakpinichaksï uétarhiati”.

MÁRUKSÏ INI AMBE UANDASÏNDI. Kʼuiripuechaksï kánikua jánhaskatiisti ka uaatiksï úni ambe ma paraka parhakpini sési niántaaka.

¿ÍSÏISKI ESKAKSÏ NA UANDAJKA? Uánikua kʼuiripuechaksï jánguarhintaxati para nóteru kontaminasioni jarhania. Peru útasï kánikua kontaminasioni jarhasti.

¿NÁJTSÏ EXESÏNI CHÁ? ¿Uétarhijki eska Tata Diosï uaaka ambe ma, ísï eska na aiatspekia paraka echeri no kʼamakurhiaka?

Exeskachia sinku profesiechani, peru ístu Biblia uandasïreendi eska ambakiti ambe japiringa últimu jurhiatikuechani jimbo. Ju je exeni ma ambe.

[Komentariu]

“Ixú engani ji irekaka, ísïispti eska paraisu ma, peru iásï ísïistia eska basureru ma enga ikichakueni jásï ambe jaka” (COMENTARIO DE ERIN TAMBER, RESIDENTE DE LA COSTA SUR DE ESTADOS UNIDOS, SOBRE LOS EFECTOS DEL DERRAME PETROLÍFERO DE 2010 EN EL GOLFO DE MÉXICO)

[Rekuadruecha]

¿Tata Diosïri kulpee?

Jimboka Biblia t’uini uandaspkia na enga xáni no sési jánhaskuarhipiringa ini jurhiatikuechani jimbo, ¿arhikuekasïni i ambe eska Tata Diosï kulpa jatsiska ka eska imasï újka eskachi jucha kómu nitamakuarhiaka? Uaakajtsï exeantani ambakiti mókuntskuechani kapitulu 11 jimbo, librurhu ¿Ambemindusï jorhentpejki Biblia?, engaksï Jeobaeri testiguecha úka.

[Nani enga uéraka ilustrasioni]

U.S. Coast Guard photo

6. Aianhperakua iámu parhakpinirhu

“Ka i ambakiti aianhperakua Diosïri juramukueri, aianhpinhaati iápuru parhakpinirhu” (MATEU 24:14).

● Vaiatea irekasti isla ma jimbo enga iauani jaka jini Pacífico, jimeesïsï engaksï uánikua islecha sapirhaticha jaka enga arhinhajka Tuamotú. Jima engaksï sáno ochenta arresificha jaka engaksï etsakuarhitini jaka sáno 803,000 kilometrisï ma uanondani, jimaksï 16,000 kʼuiripuechajkuksïsï irekati. Nájkiruka xáni iauani jaka Jeobaeri testiguechaksï pʼorhembistiksïa Vaiateani ka imeeri besinuechani. ¿Andiksïsï xáni iauani jamberi nirajki? Jimbokaksï uékasïnga aianguani iámindu kʼuiripuechani Tata Diosïri Reinueri ambe, no arhiparini nani engaksï irekaaka.

AMBE ENGA XÁNI ÚKUARHIKA. Aianhperakua Tata Diosïri Reinueri, niárastia iápurisï parhakpinirhu. Uéxurhini 2010 jimbo Jeobaeri testiguechaksï aianhpisti jukari 1,600 miioni orecha, 236 paisicha ka iretecha jimbo, i ambe arhikuekasïndi eska mándani Testigu 30 minutu aianhpiska ma jurhiatikua jimbo. Diesi uéxurhini jimbo enga nitamakia ústiksï ka etsakuastiksï jukari 20,000 miioni publikasionichani engaksï Bibliarhu pʼitakata jaka paraksï úni jorhendaani kʼuiripuechani.

MÁRUKSÏ INI AMBE UANDASÏNDI. Kánikua iónistia enga Biblieri ambe aianhpinhani jaka.

¿ÍSÏISKI ESKAKSÏ NA UANDAJKA? Ísïisti eskaksï uánikua kʼuiripuecha jánguarhintastia aianhpini Biblieri ambe. Joperu sáno iáminduecha ma tiempujkuksïsï aianhpijti ka namunitu kʼuiripuechantku. Peru Jeobaeri testiguechaksï interu parhakpinirhu aianhpixati ka uánikua miioni kʼuiripuechanksï aianguaxati. Ka úsïndiksï i ambe, nájtukaksï kánikua no sési kánhaaka máru kʼérati relijionicha jimbo ka máru kʼérati juramuticha jimbo (Markusʌ 13:13).a Ístu Jeobaeri testiguechaksï úrasïndi imeecheri tiempuni paraksï aianhpini ka etsakuani publikasionichani paraksï jorhentpini Biblieri ambe, ka nóksï ma sentabu andasïndi. Imeecheri ánchikuarhita úkuarhisïndi imani sentabu jimbo engaksï kʼuiripuecha tsípikua jingoni íntspijka.

¿NÁJTSÏ EXESÏNI CHÁ? ¿Aianhpinhaxaki “ambakiti aianhperakua Diosïri juramukueri, [...] iápuru parhakpinirhu”? Enga ísï úkuarhini jaka i profesia, ¿arhikuekajki i ambe eska ambakiti ambe úkuarhiaka sánderu orhepani?

[Nota]

[Komentariu]

“Engajtsïni Jeoba sésikua íntskuaka, seguiriuakachi tsípikua jingoni aianhpini ambakiti aianhperakuani, úraparini ambe enga uétarhiaka parachi úni iámindu kʼuiripuechani aianguani” (ANUARIO DE LOS TESTIGOS DE JEHOVÁ 2010)

No ióni jimbo sési jánhaskuarhiati

“Ka nóteru ióni jimbo, no sési úrichaksï nóteru jauatia [...]. Peru echeri kaxumbiticheriuati, ka sésiksï pʼikuarheraati jimboka kánikua pínandikua jauaka” (SALMO 37:10, 11).

SEGURUCHI jarhaska eskajtsï uékapiringa exeni na enga úkuarhiaka profesia enga Salmo 37:10, 11 jimbo jaka. Ka uánikua ambe jarhasti engachi jimbo uaaka seguru jarhani eska nóteru ióni jimbo ísï úkuarhiakia.

Artikuluecha engachi exeakia, uandastiksï máru ambejku profesiecheri engaksï sési xarhatajka eskachi “últimu jurhiatikuechani jimbo” jarhaska (2 Timoteo 3:1-5). Tata Diosï kʼuiripuechani úraaspti parakaksï karaapiringa indeni profesiechani ka parakachi úpiringa erokuarhikua ma jatsini (Roma 15:4). Enga ísï úkuarhini jaka iámu ambe eskaksï na uandeenga inde profesiecha, xarhatasïndi eska no ióni jimbo, iámindu uandanhiatechaksï kʼamakurhiaka.

¿Ka ambe úkuarhia engaksï na nitamaakia últimu jurhiatikuecha? Tata Diosïri Reinu juramukuauatia kʼuiripuechani (Mateu 6:9, 10). Exe je na enga Biblia uandajka eska irekanhaaka echerirhu:

● Nóteru jauatia kʼarhingua ambe. “Kánikua tʼirekua jauati echerirhu; juátecharhu karhakua kánikua tʼirekua jauati” (Salmo 72:16).

● Nóteruksï jauatia pʼamenchakuecha. “No nema enga jima irekaaka uandaati: “Pʼamenchaxaka” (Isaías 33:24).

● Echeri ménderu sési jándentaati. “Desiertu ka echeri kʼarhiri kánikuaksï tsípini jauati, ka pákua enga no ma ambe újka tsikini, tsípini jauati ka ísï tsïpaati komueska asafrani” (Isaías 35:1).

I ambe, máru ambejkuesti iámu ima profesiecheri enga Biblia uandaajka ka engaksï no ióni jimbo úkuarhiaka. Engajtsï uékajka sánderu ambe míteni, arhi je Jeobaeri testiguni ma eskaksïni aianguaka andisï xáni seguru jaki ima eska sési jánhaskuarhiaka sánderu orhepatini.