¿Nénaksï mítenhantasïni jurhimbiti kristianuecha?

¿MÍTESKIJTSÏ namuni kʼuiripuecha jarhaski iámu parhakpinirhu engaksï uandajka eskaksï kristianueska? Seguni libru ma enga arhinhajka Atlas of Global Christianity, 2010 jimbo sáno 2,300 miioni kristianuechaksï jarhaspti 41,000 relijionicharhu, iáminduechaksï táchani jásï ambe jorhentpisïndi ka mámaru járhati pʼindekuechanksï jatsiasti. Jimbokaksï xáni uánikua kʼuiripuecha jarhaska engaksï uandajka eskaksï kristianueska, máru kʼuiripuechaksï no mítesti ambe arhikuekasïni meru kristianueni ka nóteruksï mintsikaasïndia relijionichani. Jamberiksï kurhamarhikuarhijti: “¿Meruksï kristianueski iámindu imeecha engaksï uandajka eskaksï jindeeska?”.

Parachi úni kurhanguni ju je eranhaskani íni ambe. Engajtsï chá uékapiringa máteru paisirhu nirani, ¿nénajtsï xarhatapirini eskajtsï meru jima anapueska engajtsï uandani jaka? ¿A no eska uétarhisïnga sïranda ma o máteru ambe enga xarhataaka eskajtsï meru jima anapueska engajtsï uandani jaka? Sáno májkueni, jurhimbiti kristianu ma no solu jatsisti para uandani eska jakajkusïnga Kristuni, sino jatsisti para xarhatani eska ísïiska. ¿Ambe arhikuekasïni i ambe?

Uandakua kristianu ueenaspti úrakuarheni enga na nitamapkia uéxurhini 44 despuesi de Jesúsi. Lukasï, enga Biblieri karari máepka, uandaspti eska “Antiokíasïksï úndapti jorhenguarhiricha arhinhani, kristianuecha” (Ukuecha 11:26). Ísï jimbo, kristianuechaksï jindeespti Kristueri chúxapatiicha. Peru, ¿ambe arhikuekasïni tata Jesukristueri chúxapati máeni? Diccionario Teológico del Nuevo Testamento uandasïndi: “Para Jesúsiri chúxapati máeni, arhikuekasïndi eska nema jurajkuaka iámindu ambe para imani marhuakuni ka eska ísï uaaka [...] para méntkisï”. Ísï jimbo, jurhimbiti kristianu ma ísï úsïndi eska Jesúsi na jorhentpipka ka eska na juramupka, jimboka ima jindeeska enga úka eskaksï jauaka kristianuecha.

Ima kʼuiripuecheri engaksï uandajka eskaksï kristianueska, ¿jaki nema enga újka ambe enga Jesúsi uandapka? ¿Ambe uandaspi Jesúsi eskaksï jimbo mítenhantapiringa imeeri chúxapatiicha? Para míteni ambe enga Biblia uandajka iiri ambe, pʼímarhisïngaksïni arhiantani máteru sinko jorhenguarhikuechani. Mándani jorhenguarhikua uandasïndi ambe ma engaksï jimbo úpiringa mítenhantani Jesúsiri chúxapatiicha. Ístuchi exeni jauaka ambeksï úspi primeru siglurhu anapu kristianuecha paraksï xarhatani eskaksï jurhimbiti kristianuespka ka tátsekuachi jánguarhintaaka exeni náki kristianuechaksï májkueni úxaki iásï.

Ú je eskaksïni ji na arhijka

“Engajtsï chá méntku jauenaska úni eskaksïni ji na arhijka, sési jimbo chá[jtsï] jindeuaka juchiiti jorhenguarhitiicha. Ka míteakajtsï indeni ambe enga sési jimboeka, ka inde enga sési jimboeka uaati eska chá nóteru jindeuaka jántspiricha” (JUANU 8:31, 32).

¿Ambe arhikuekaxapi Jesúsi? Enga uandapka eskaksïni “ji na arhijka” arhikuekaxapti imani ambe enga ima jorhentpipka. Joperu ístu uandaspti eska ambe enga ima jorhentpienga, nemani jimboespka enga sánderu míteka eska ima. Uandaspti: “Juchiiti Taati engareni axaka, imarini juramuchisti ambe engani jatsika para uandani ka ambe engani uandantaaka” (Juanu 12:49). Enga Jesúsi kómarhini japka Tata Diosï Jeobani, imeeri Taatini auandarhu anapuni, uandaspti: “Chiiti uandakua ísïisti”. Ísï jimbo, méni enga jorhentpienga uandasïreendi ambe enga Tata Diosï arhiapka imeeri ióntki anapu marhuarichani (Juanu 17:17; Mateu 4:4, 7, 10). Jimajkani, ¿nénaksï ísï úsïni eska Jesúsi na jorhentpipka jurhimbiti kristianuecha? Engaksï jiókuarhijka eska Tata Diosïiri Karakata, Biblia, jurhimbitku uandasïnga ka eska jimini uandasïnga ambe enga ma jatsika para jakajkuni ka ambe enga jatsika para úni.

Primeru kristianuecheri ejemplu. Apostoli Pablu enga sánderu uánikua kartechani karaapka engaksï Bibliarhu jaka, kánikua janhanharhisïreendi Tata Diosïiri Karakatani májkueni eska Jesúsi. Ima karaspti: “Iámindu [Tata] Diosïiri Karakata, [Tata] Diosïni jimboesti ka marhuasïndi” (2 Timoteo 3:16). Ístu arhiasptiksï imani achamasïchani engaksï kúnguarhikuecharhu jorhentpienga, eskaksï no jatsipiringa para “máteru ambe jorhentpini enga no [jindeepiringa] ima ambe enga Tata Diosï uandaka” (Tito 1:7, 9, Biblia en Lenguaje Sencillo [Nuevo Testamento]). Ístu, kristianuechaksï arhinhaspti eskaksï no jámapiringa jiókuarhini ʻjorhenguarhikuechani ka chkuanderakuechaniʼ engaksï “no marhuajka, eska na jindeeka kʼuiripuecheri jorhengua enga parhakpinirhu anapu eratsekuechani jimboeka ka no Kristuni jimbo” (Kolosasi 2:8).

¿Neechaksï májkueni úsïni iásï? Constitución dogmática sobre la divina revelación —enga Vaticano jiókuarhipka 1965 jimbo ka enga Catecismo de la Iglesia Católica jimbo úranhajka— uandasïndi eska iglesia [catolica], no solu úrasïnga Tata Diosïiri Karakatani para jorhentpini, ístu úraasïndi iglesieri pʼindekuechani enga ísï exeajka eskaksï májkueni jukaparhakueska eska Tata Diosïiri Karakata. Rebistarhu Maclean’s, uarhiiti ma enga Toronto (Canadá) anapueka, uandaspti: “¿Andichisï jatsipirini para imani ambe úni enga dosi mili uéxurhinisïkia enga uandanhaka? Juchajtuchi ambakiti ambe uékasïnga úni, joperuchi no úsïnga úni, jimbokachi arhinhasïnga eskachi jatsiska para úni ambe enga Jesúsi jorhentpipka ka ambe enga arhijka Tata Diosïiri Karakata”.

Libru New Catholic Encyclopedia, ari ambe uandasïndi Testiguecheri ambe: “Bibliarhuksï jupindaskuarhisïndi ambe engaksï jakajkujka ka ísïksï jámasïndi eska jimini na arhijka”. Nótki xáni iónisti enga Canadá anapu acheeti ma arhipka uarhiitini ma enga Testigueka: “Míteskia neeskijtsï chá”. Ka Bibliani tʼantsiraparini enga uarhiiti kamani japka, arhispti: “Úsïngaksïni mítentani indeni libru jimbo engajtsï kamani jaka”.

Nóksï parhakpinirhu anapuesti

“Parhakpini anapuecha[ksï] no exenchaasti, jimbokaksï imeecha no parhakpinirhu anapueska” (JUANU 17:14).

¿Ambe arhikuekaxapi Jesúsi? Ima no parhakpini anapuespti jimboka no jámaspka imani kʼuiripuecha jingoni engaksï politikarhisï jámeenga, ima uandaspti: “Enga juchiiti juramukua ini parhakpini jimboepiringa, juchiiti jántspiricha jupirindi ka uarhipepirindiksï para eskani ji no entregarpinhapiringa Israeli anapuechani, peru juchiiti juramukua no ixúesti” (Juanu 18:36). Ístu jorhendaaspti imeeri chúxapatiichani parakaksï no ísï eratsepiringa, uandani, nijtu imani ambe úni enga Biblia uandajka eska no sési jarhaska (Mateu 20:25-27).

Primeru kristianuecheri ejemplu. Jonathan Dymond enga relijioniri ambe karajka uandaspti eskaksï orheta kristianuecha “no uékaspka guerrarhu nirani nájkirukaksï kʼuratsetanhapiringa, ónhanhanksï oksï uándikunhani”. Nóksï uékaspti politikarhisï inchamukuni nájkirukaksï no sési nitamakuarhipiringa. Ístu ambe ma engaksï jimbo ménderuenipka, jindeespti jimbokaksï kánikua janhanharhiasïreenga Tata Diosïiri juramukuechani. Jimboksïsï arhiapti: “Chájtsï nóteru jámasïngia imeecha jingoni parajtsï májku jásï jurajkutakuarheni no sési jásï ambe úni ka ísï jimboksïnisï no sési arhijti” (1 Pedru 4:4). Eska na uandapka Will Durant, enga istorieri ambe míteka “kristianuechaksï pʼamojkuasïreendi máteruechani ka jánguarhintasïrendiksï ambakiti jángua ma jatsini ka indeni ambe jimbo, kʼuiripuecha engaksï puro tsípikuarhini jámeenga kánikuaksï no sési exeasïreendi ini kristianuechani”.

¿Neechaksï májkueni úsïni iásï? New Catholic Encyclopedia uandasïndi imeecheri engaksï no uéjka armeechani úraani eska “no sési jarhaska no uékani indeni ambe úni solu jimboka konsiensia no sési pʼikuastaasïnga”. Rebista Reformierte Presse karaspti artikulu ma, ima ambeeri enga African Rights uandapka, enga jindeeka organisasioni ma enga kʼuiripuecheri derechuechani exeajka, eskaksï iámindu iglesiecha “menusi Jeobaeri testiguecha” jarhuajpespkaksï 1994 jimbo jiáni engaksï xáni uánikuechani uándikuapka jini Ruanda.

Profesori ma sekundarieri, uandaspti eska kánikua no sési exespka eska jiáni engaksï nasiicha xáni uánikuechani uándikuapka, “no ma grupu ni organisasioni uandapka eska no sési jarhaspka ambe engaksï nasiicha úni japka, komu no sési kaani kʼuiripuechani ka máteru xáni no sési jásï ambe engaksï úpka”. Joperu enga na sánderu ambe jorhenguarhipkia indeeri ambe jini Museo Conmemorativo del Holocausto enga Estados Unidos jaka, karaspti: “Iásï míteskia eska no ísïiska eskani ji na eratseenga”. Jorhenguarhispti eskaksï Jeobaeri testiguecha seguirispka imani ambe úni engaksï jakajkuenga, nájkirukaksï kánikua no sési kánhapka.

Ísï eskaksï primeru kristianuecha na janhanharhiauenga Tata Diosïiri juramukuechani, ¿neechaksï májkueni úxaki iásï? Rebista U.S. Catholic uandasïndi eskaksï “sáno iámindu tumbiicha engaksï katolikueka nóksï ísï úsïnga eska iglesia na jorhentpijka, komu para máteruechani jingoni sési pájperani o no relasioni seksuali jatsini ante de tembuchani o uambuchani”. Rebistarhu uandasïreendi eska achamasï ma enga iglesiarhu marhuajka (diácono) uandaspka: “Uánikua kʼuiripuechani engani konsejuechani íntsaajka —jukari 50% ísï— tʼuinksï márku irekani jarhasïndia engaksï tembuchani jurhajka”. The New Encyclopædia Britannica, uandasïndi eskaksï Jeobaeri testiguecha “kánikua jánguarhintasïn[ga] paraksï kurhajchaani Tata Diosïiri juramukuechani”.

“Xénchperasïndiksï máteru ka máteruni jingoni”

“Ma mandamientu jimbanhi íntskuakaksïni, eskajtsï uékperaaka máteru ka máteruni jingoni. Ka eska jíksïni na uékaka chánksïni, chájtu jatsiska [para] ísï uékperani máteru ka máteruni jingoni. Ka ini jimboksï míteati iámindu kʼuiripuecha eskajtsï jindeeska juchiiti jorhenguarhitiicha engajtsï uékperaaka máteru ka máteruni jingoni” (JUANU 13:34, 35).

¿Ambe arhikuekaxapi Jesúsi? Ima arhiaspti imeeri chúxapatiichani eskaksï jatsispka para xénchperani májkueni eska ima na xénchaapka. Peru Jesúsi, ¿nena xarhatakuaspi eska xénchasïreenga? No méni májkueni eratsespti eska ima kʼuiripuecha engaksï menusi uáuenga nanakechani o máteru paisiri anapuechani (Juanu 4:7-10). Ístu, kánikua tiempu úraspti ka uinhapikua para jarhuataani máteruechani nájkiruka méni no ueenga mintsikuarhini (Markusʌ 6:30-34). Peru sánderu kʼéri ambe enga úpka para xarhatakuani eska xénchasïreenga, jindeespti enga íntspipka imeeri tsípikua imeechani jimbo. Ima uandaspti: “Ji jindeeska [...] ambakiti karichi eranguti, [enga] tsípikua íntspi[jka] karichichani jimbo” (Juanu 10:11).

Primeru kristianuecheri ejemplu. I kristianuechaksï ísï uandajperasïreendi komueska erachicha (Filemoni 1, 2). Kúnguarhikuarhu, sésiksï eroasïreendi náki uéjki kʼuiripuni, no arhiparini nani uéjki ísï anapuepirini. Eratsesïrendiksï eskaksï judiuecha ka grieguecha májkuenksï jukaparhakuespka jimbokaksï tsimarhani májku Tata Diosïnksï kómarhisïreenga (Roma 10:11, 12). Uéxurhini 33 jimbo, enga kʼuínchikua Pentekostesiri kʼamarapka, Jesúsiri chúxapatiicha engaksï Jerusaléni japka “íntspikuarhisïrendiksï imeeri echerichani ka ambe engaksï jatsikuarhienga, ka arhukutsperasïrendiksï eska xáni uétarhincheenga mándani kʼuiripu”. ¿Andiksïsï ísï úpi? Parakaksï imeecha engaksï apenasi itsï atakuarhipka úpiringaksï siudadirhu pakarani ka seguirinksï jorhenguarhini ambe engaksï apostolicha jorhendaapiringa (Ukuecha 2:41-45). Sáno dosientosi uéxurhini tátsekua engaksï na uarhipkia apostolicha, Tertuliano uandaspti ambe engaksï máteru kʼuiripuecha uandeenga kristianuecheri ambe: “Exe [...] na engaksï xáni xénchperajka máteru ka máteruni jingoni [...] ka astaksï uarhipirindi máteruni jimbo”.

¿Neechaksï májkueni úsïni iásï? Libru Historia de la decadencia y ruina del Imperio romano, uandasïndi eskaksï imeecha engaksï uandeenga eskaksï kristianuespka uánikua uéxurhini “kánikuaksï no sési útsperaspka imeecha mismu ka eska imeecha jingoni engaksï no jakajkutipka”. Nótki xáni iónisti enga estudiu ma únhapka Estados Unidos enga xarhatapka eskaksï imeecha engaksï relijionirhu jámajka ka engaksï kristianu arhikuarhijka, nóksï sési exeasïnga máteruechani solu jimbokaksï máteru paisirhu anapueska. Ima kʼuiripuecha engaksï mismu relijionirhu jámajka peru engaksï táchani paisirhu anapueka, nóksï úsïndi sési pájperani. Ísï jimbo, nóksï úsïndi jarhuajperani —oksï meru no uékani ísï úni— enga nema uétarhinchani jarhajka ambe ma.

Uéxurhini 2004 jimbo, jini Florida (EE.UU.) tsimani mesesi jimbojku tʼámu urakanichaksï úkuarhispti. Ísï tátsekua, presidenti enga orhejtsïkujka grupuni ma enga jarhuajpejka enga no sési ambe úkuarhijka, uékaspti míteni na enga úrakuarheni japka ima ambe enga íntspini japka para jarhuajpeni. Enga exepka eska no ma grupu jarhaspka enga xáni sési organisadu japka eskaksï Jeobaeri testiguecha, arhiaspti eska íntsaapiringa ambe engaksï xáni uétarhinchani japiringa. Uéxurhini 1997 jimbo, Jeobaeri testiguecheri grupu ma, niraspti República Democrática del Congo para erachichani ka máteru kʼuiripuechani pákuani medisina ambe, tʼirekua ka xukuparhakua ambe. Máru Testiguecha engaksï Europa anapueka, ma miioni de dolariksï íntspisti paraksï ini ambe piáni.

“Aianguaskia na engari arhinhajka”

“Ini achamasïchani engareni t’u íntsaaka ixú parhakpinirhu […]. Ji aianguaskia na engari arhinhajka ka útasïni aianguauaka” (JUAN 17:6, 26, TNM).

¿Ambe arhikuekaxapi Jesúsi? Ima mítetarpisti Tata Diosïiri nombrini enga aianhpienga. Ka meru uandeendi imeeri nombrini enga arhinteenga Karakata Ebreechani, jimboka pʼindespka ísï úni (Lukasʌ 4:16-21). Ístu jorhendaaspti imeeri chúxapatiichani parakaksï kurhajkuarhipiringa: “Juchaari Taati […] eska mítenhaaka chiiti nombri eska pímbinhasïtiska” (Lukasʌ 11:2).

Primeru kristianuecheri ejemplu. Enga apostoli Pedru uandontskuarhepka Jerusaléni anapu orhejtsïkuticha jingoni, uandaspti eska Tata Diosï, nasionicharhu uératini erakuaspka “máru engaksï imeeri nombri jimbo jindeepiringa imeeri kʼuiripuecha” (Ukuecha 15:14). Apostolicha ka máteru Jesúsiri chúxapatichaksï aianhpisïreendi: “Iámindu imeecha engaksï kómarhiaka Tata Diosï Jeobaeri nombri jimbo pʼímutantskateuatiksï” (Hechos 2:21, TNM; Romanos 10:13, TNM). Ístu, jatsikusïreendiksï Tata Diosïiri nombrini imeecheri karakatecharhu. Karakata Tosefta, enga jatapka judiuecheri leichani —enga uéxurhini 300 jimbo ísï kʼamaranhapka karanhani— uandasïndi eskaksï kristianuecheri karakatecha kurhiranhasïreenga. Jima uandasïndi: “[Ebanjeliuecha] ka libruecha engaksï sektericheeka [jamberi judeokristianuecheri] jatsistiksï para kurhiranhani; jima engaksï jaka imeecha ka ístu Tata Diosïiri nombri enga jukanharhiaka”.

¿Neechaksï májkueni úsïni iásï? Biblia Revised Standard Version —enga Consejo Nasional de las Iglesias de Cristo jini Estados Unidos sésikua íntspika para úranhani— ueenakuarhu uandasïndi: “No uétarhisïndi máteru nombrichani úraani para Tata Diosïni arhikuekani enga májkueka ka máechakueni, enajkiksï japirini máteru diosïcha engaksï májkuenika eska ima ka ante deksï Kristianuecha jarhani, judiuechaksï nóteru úrasptia ka no sési jarhaspti eska iglesia kristiana enga ma parhakpinirhu jaka úraaka”. Jimbosï i Biblia no úrapti Tata Diosïiri nombrini sino Tata enga títulu máeka. Ka iásï nótki xáni ióni, Vaticanojtu arini ambe juramukuaspti imeeri obispuechani: “Misecharhu, pirekuecharhu ka kómarhikuecharhu, Tata Diosïiri nombri enga i tʼámu letrecha jimbo karakuarhijka YHWH no jatsisti para uandanhani ni úrakuarheni”.a

¿Jarhaski grupu ma enga úrajka ka mítetarpini Tata Diosïiri nombrini? Tumbi sapichu ma enga Sergey arhinhajka exespti eska jo. Enga apenasi tumbi sapichuepka, jini Kirguistani pelikula ma exespti enga uandeenga eska Tata Diosïiri nombri jindeeska Jeoba. Nóteru kurhaasptia indeni nombrini ma diesi uéxurhini ísï. Tátsekua Estados Unidos mótsispti ka jimaksï pʼorhembispti tsimani Jeobaeri testiguecha ka xarhatakusptiksï Biblia jingoni nena enga arhinheenga Tata Diosï. Sergey kánikua tsípini pʼikuarheraspti enga exentapka relijionini ma enga úreenga Tata Diosïiri nombrini. Diksionariu ma, arini ambe uandasïndi jima enga “Jeoba Diosï” arhijka: “Sánderu kʼéri Tata Diosï ka imajku engaksï Jeobaeri testiguecha kómarhijka” (Webster’s Third New International Dictionary).

[Nota]

“I ambakiti aianhperakua [Tata] Diosïiri Juramukueri, aianhpinhaati”

“I ambakiti aianhperakua [Tata] Diosïiri juramukueri, aianhpinhaati iápuru parhakpinirhu paraka iápuru anapu kʼuiripuecha mítetinksï jauaka, ka jimajkani kʼamaraati i tiempu” (MATEU 24:14).

¿Ambe arhikuekaxapi Jesúsi? Seguni Ebanjeliu Lukasïiri, Jesúsi iápuru “kʼérati iretecharhisï ka ranchuecharhisï” uandajtsïkpisïreendi ka “aianhpini ambakiti aianhperakua [Tata] Diosïiri Juramukuerini” (Lukasʌ 8:1). Ka Jesúsi uandaspti: “Uétarhisïndi eskani tambientu máteru iretecharhisï aianhpiaka ambakiti aianhperakuani [Tata] Diosïiri Juramukuerini, jimboka para ini ambe únisïni axanhaka” (Lukasʌ 4:43). Orheta Jesúsi arhiaspti imeeri chúxapatiichani eskaksï aianhpepiringa kʼérati iretecharhisï ka sapirhaticharhisï engaksï no iauani japka, peru tátsekua arhiaspti: “Uandantaakajtsï juchiiti ambe [...] iápuru parhakpinirhu asta jima enga sánderu iauaniika” (Ukuecha 1:8; Lukasʌ 10:1).

Primeru kristianuecheri ejemplu. Jesúsiri chúxapatichaksï sóntku ueenaspti úni ini ánchikuarhitani. Ukuecha 5:42 jimbo uandasïndi: “Nóksï kuatantasïreendi pauani pauani uandajtsïkpini ka jorhentpini tata Jesukristueri ambe kʼéri tiostarhu ka ístu kʼumanchikuecharhu”. Ini ánchikuarhitani nóksï solu máru úsïreendi, sino iáminduecha. Seguni August Neander enga istorieri ambe exejka, “Celso, achamasï ma enga ikiakuauenga kristianuechani, teresmarhuasïreendi jimbokaksï kánikua incharhutakusïreenga Tata Diosïiri ambe aianhpini imeechani engaksï lanani ambakereenga, sapateruechani, imeechani engaksï sïkuirini ambakereenga, imani kʼuiripuechani engaksï no nípka eskuela ka engaksï no uánikua ambe jorhenapka”. Jean Bernardi enga libruni ma karaka enga primeru siglurhu anapu iglesieri ambe uandajka (Les premiers siècles de L’Église), uandasïndi eskaksï kristianuecha jatsispka “para aianhpini iápurisï ka iámindu kʼuiripuechani, xanharuecharhisï, kʼéri iretecharhu, plasecharhisï ka ístu kʼumanchikuecha jimbo ka no arhiparini engaksï sési eronhapiringa o nómbe”. Ka eska i acheeti na uandapka sánderu tátsekua, jatsisptiksï para “iámu parhakpinirhu aianhpini”.

¿Neechaksï májkueni úsïni iásï? Saserdoti anglikanu David Watson, uandasïndi eskaksï kʼuiripuecha iásï nóteru uékasïngia marhuakuni Tata Diosïni, jimboka iglesia no jánguarhintasïnga sési aianguani ka jorhendaani Tata Diosïiri ambe. José Luis Pérez Guadalupe, imeeri librurhu ¿Por qué se van los católicos? uandasïndi eskaksï Jeobaeri testiguecha uandantani jámasïnga “mándani kʼumanchikua jimbo”, ambe ma engaksï no újka ebanjelikuecha, adbentistecha ka máteru relijionicha.

Cato Institute petaspti ambakiti informasioni ma enga Jonathan Turley uandapka ka enga meru ísïika, uandaspti: “Solu uétarhisïndi Jeobaeri testiguecheri ambe uandani, parakaksï sáno iámindu kʼuiripuecha imeechani eratseauaka engaksï kʼumanchikuecha jimbo jámajka aianhpini jiáni engaksï no eronhani jarhajka. Para imeecha, aianhpini jámani mándani kʼumanchikua jimbo, no solu marhuasïndi parakaksï máteruecha míteaka ambe engaksï jakajkujka, sino ístu parakaksï imeecha mismu sánderu jakajkuaka” (Cato Supreme Court Review, 2001-2002).

[Rekuadruecha]

¿Úskijtsïa míteantani?

Máteru jorhenguarhikuecharhu, exeskachia máru ambe enga Biblia uandajka eska marhuapiringa parachi úni míteantani jurhimbiti kristianuechani. Ka, ¿chá úskia míteantani? Ísïisti eskaksï uánikua grupuecha jarhaska ka relijionicha engaksï uandajka eskaksï kristianeeska. Joperu miá je ambe enga Jesúsi arhiapka imeeri chúxapatiichani: “No iáminduecha engajtsïni arhijka Tata, Tata inchaatiksï auandarhu anapu juramukuarhu, solu imeecha engaksï újka eska juchiiti Taati auandarhu anapu na jaiapanhentajka” (Mateu 7:21). Ísï jimbo, parachi jatsiani imani kóntperatechani engachi intsïnhauaka Tata Diosïiri Reinu jimbo ka engaksï no méni kʼamakurhiaka, jatsiskachi para míteantani imeechani engaksï újka ambe enga Tata Diosï uéjka —o engaksï jurhimbiti kristianueka— ka imeecha jingoni úkuarhini. ¿Uékapirintsï sánderu ambe míteni i Reinueri ambe ka kóntperatecheeri engaksï jauaka? (Lukasʌ 4:43). Jimajkani pʼímarhisïngaksïni parajtsï Jeobaeri testiguechani arhiani eskaksïni jorhendaaka Tata Diosïiri Reinueri ambe ka kóntperatecheeri engaksï jauaka.