Orhejtsïkutiicha, májkueni ú je eska Gedeóni

1. Ísï eska na arhijka 1 Pedru 5:2, ¿náki kóntperataksï jatsiski kúnguarhikuarhu anapu orhejtsïkutiicha?

TATA DIOSÏ JEOBA arhiasïndi kúnguarhikuarhu anapu orhejtsïkutiichani eskaksï kuidariuauaka imeeri karichiichani. Ka orhejtsïkutiichaksï kánikua jukaparharasïndi indeni kóntperatani paraksï imeeri erachiichani marhuakuani ka jánguarhintasïndiksï ambakiti orhejtsïkutiini (Jer. 23:4; arhinta je 1 Pedru 5:2). ¡Kánikuachi agradesidu jarhaska engaksï kúnguarhikuarhu jaka erachiicha engaksï ísï ánchikuarhijka!

2. ¿Náki tsʼéjkukuechanksï jatsiasïni máru orhejtsïkutiicha?

² Engaksï imeecheeri ánchikuarhita úni jarhajka, orhejtsïkutiichaksï uánikua tsʼéjkukuechani jatsiasïndi. Pori ejemplu, kánikuaksï ánchikuarhisïndi paraksï úni kúnguarhikuani kuidarini. Ju je eratsentani ambe enga nitamakuarhika Tony, Estados Unidos anapu orhejtsïkuti ma. Ima uandaspti eska jatsispka para exeni asta nani jamberi úpirini úni ambe ma. Tony uandantasïndi: “Enga pandemia COVID-19 ueenakuarhipka, kánikua ánchikuarhita jarhaspti para tánguarhikuecha ka aianhpikuani organisarini, ka ji iámindu ambe jimbo jarhuajpesïreenga. Peru nájkirukani kánikua jánguarhinteenga méntkisï kánikua ánchikuarhita jarhasïreendi. Ísï jimbo, nóteruni xáni arhintasïreengia Bibliani, níjtuni jandiajku jorhenguarhini Biblieri ambe ka nóteruni xáni kómarhisïreengia Tata Diosïni”. Ilir, orhejtsïkuti ma enga Kosovo anapueka, sáno májkueni ambe nitamakuarhispti. Ima irekaspti nani enga guerra úkuarhini japka ka kánikua úku jukanchaspti úni ambe enga organisasioni uandeenga. Ima uandasïndi: “Engareni Beteli arhipka eskani jarhuataapiringa imani erachiichani engaksï jimeesïsï irekapka enga peligrosuepka, kánikua chéspka. No fásiliispti balori xarhatani, ka ístu ambe engajtsïni arhienga eskachi úpiringa ísï xarharasïreendi enajki no marhuapirini”. Ka Asia, misioneru ma enga Tim arhinhajka, kánikua úkua jukanchasïreendi iámindu imeeri ánchikuarhitani úni. Ima uandantasïndi: “Ménichani kánikuani kuataratini pʼikuarherasïreenga parani úni jarhuataani erachiichani ka pirenchichani”. ¿Ambeksï uaa úni orhejtsïkutiicha engaksï i jásï ambe nitamakuarhini jauaka?

3. ¿Andisï sési jaki eskachi iáminduecha jorhenguarhiaka Gedeóniiri ambe?

³ Orhejtsïkutiichaksï uaati kánikua ambe jorhenguarhini juesi Gedeóniiri ambe (Ebr. 6:12; 11:32, TDU). Ima kuájchakusïreendi ka orhejtsïkuni Tata Diosïiri iretani (Juec. 2:16; 1 Crón. 17:6). Iásï anapu orhejtsïkutiicha májkueni eska Gedeóni, indenksï ánchikuarhitani jatsisti para kuidarini Tata Diosïiri iretani ini tiempu jimbo enga kánikua úku jukaka (Uku. 20:28; 2 Tim. 3:1). Ísï jimbo, orhejtsïkutiichaksï uaati ambakiti ambe jorhenguarhini engaksï exeska na enga Gedeóni kurhanguenga eska no úsïreenga iámindu ambe úni, eska kaxumbitiispka, eska kurhandiraspka ka eska kánikua tekaantaspka. Ístu, i juesiiri ejemplu jarhuatauati iámindu kúnguarhikuarhu anapuechani paraksï sánderu jukaparharani ánchikuarhitani engaksï orhejtsïkutiicha újka ka iámu mintsita jingoni jarhuataani (Ebr. 13:17).

ENGA ÚKUA JUKAAKA KAXUMBITIINI

4. ¿Néna xarhataspi Gedeóni eska kaxumbitiispka ka eska no kʼéramakuarhisïreenga?

⁴ Gedeóni kaxumbitiispti ka no kʼéramakuarhisïreendi.b Enga ánjeli ma arhipka eska Tata Diosï Jeoba erakuspka para israeliteechani pʼímutaantani engaksï Madiáni anapuecha juramukuani japka, Gedeóni kaxumbikua jingoni mókuntaspti: “Juchiiti familia jindeesti enga menusi jukaparhakueka engaksï Manasésiirika ka ji jindeeska engani menusi jukaparhakueka juchiiti taatiiri kʼumanchikuarhu” (Juec. 6:15). Ima eratsesïreendi eska no úpiringa indeni ánchikuarhita úni. Peru Tata Diosï Jeoba mítespti eska ima úpiringa ísï úni, ka Gedeóni úspti indeni ánchikuarhitani Tata Diosï Jeobaeri jarhuajperata jingoni.

5. ¿Ambe úpirini úni eskaksï orhejtsïkutiicha úkua jukanchapiringa kaxumbitiini?

⁵ Orhejtsïkutiichaksï kánikua jánguarhintasïndi paraksï méntkisï kaxumbitiini (Miq. 6:8; Uku. 20:18, 19). Nóksï jámasïndi kʼéramakuarhini imani ambe jimbo engaksï jorhenaka úni, níjtu imani ambe jimbo engaksï úkia. Ka ístu nóksï eratsesïndi eskaksï nóteru jukaparhakueskia jimbokaksï no úska sési úni ambe ma. Peru ménichani jarhasïndi ambe ma engaksï jimbo úkua jukanchajka kaxumbitiini. Ju je exeani máru ejempluechani, jamberi orhejtsïkuti ma jiókuarhiati uánikua responsabilidadichani ka tátsekua exeni eska no uaaka iámindu ambe úni. O jamberi úkua jukanchajti kaxumbitiini engaksï máteruecha no sési exejka na enga újka ambe ma o engaksï sési arhijka jimboka sési úska ambe ma. Enga i ambe úkuarhipiringa, ¿néna úpirini Gedeóniiri ejemplu jarhuataani orhejtsïkutiichani?

6. ¿Nénaksï uaa orhejtsïkutiicha kaxumbitiini ísï eska Gedeóni? (Ístu exe je imajenini).

⁶ Kurhajkuarhi je jarhuajperata. Kʼuiripu ma enga kaxumbitiika mítesti eska no uaaka iámindu ambe úni. Gedeóni kaxumbitiispti ka jimbosï arhiapti máteruechani eskaksï jarhuatapiringa (Juec. 6:27, 35; 7:24). Orhejtsïkutiicha engaksï jánhastiika májkueni ambeksï úsïndi iásï. Tony, engachi párrafu 2 jimbo uandaka, uandasïndi: “Jimbokani ísï tʼarhexeranhaspka, iámindu ánchikuarhiteechani jiókuarhiasïreenga, nájkirukani no ueenga iámindu ambe úni. Ísï jimbo, familieri jorhenguarhikuarhu kaxumbikueri ambechi jorhenguarhispka ka kurhamarhispka juchiiti uarhiitini nénarini exesïreeni ima. Ístu, ménderuni exespka bideuni ma enga jw.org jimbo jaka enga arhinhajka Ísï eska Jesusi, ju je jorhendaani máteruechani ka mintsikaani”. Ísï jimbo, Tony ueenaspti máteruechani arhiani eskaksï jarhuatapiringa, ka aiangusïndijtsïni na enga marhuakuka ísï úni, uandasïndi: “Kúnguarhikuarhu iáminduksï sési úsïndi imeecheri ánchikuarhita, ka iásï ji sánderuni tiempu jatsiskia para sánderu sési pájperani Tata Diosï Jeoba jingoni”.

7. ¿Nénaksï uaa orhejtsïkutiicha májkueni úni eska Gedeóni engaksï arhiajka eskaksï no sési úxaka ambe ma? (Santiagu 3:13).

⁷ Asï ikia je engaksïni nema arhiska eskajtsï no sési úska ambe ma. Engaksï orhejtsïkutiicha arhinhaaka eskajtsï no sési úska ambe ma úpirindi úni eskajtsï úkua jukanchaaka kaxumbitiini. Peru ménderu Gedeóniiri ejemplu uaati kánikua jarhuataani. Ima mítespti eska no perfektuespka ka engaksï Efraíni anapu acheetiicha arhipka eska no sési úspka ambe ma, ima no ikiaspti (Juec. 8:1-3). Enbesi de ikiani, kaxumbikua xarhataspti jimboka jingontku kurhajchaaspka ka iatsitakuarhu arhiaspti ambe ma, ka inde ambe úspti eskaksï ima acheetiicha nóteru ikiani japiringia. Orhejtsïkutiicha engaksï jánhastiika, májkuenksï úsïndi eska Gedeóni. Enga nema arhiajka eskaksï no sési úska ambe ma, jingontkuksï kurhajchasïndi ka sésiksï kurhakuasïndi (arhinta je Santiagu 3:13). Engaksï ísï újka, jarhuajpesïndiksï paraksï iáminduecha sési pájperani kúnguarhikuarhu.

8. ¿Ambeksï jatsipirini para úni orhejtsïkutiicha engaksï kʼéri ambe arhiauaka? Uanda je ejemplu ma.

⁸ Ú je eska Tata Diosï Jeobajku kʼéri ambe arhinhaaka. Enga Gedeóni sési ambe arhinhapka jimboka andaaspka Madiáni anapuechani, ima arhispti iretani eskaksï kʼéri ambe arhipiringa Tata Diosï Jeobani (Juec. 8:22, 23). ¿Nénaksï uaa májkueni úni orhejtsïkutiicha? Ísïksï úsïndi engaksï kʼéri ambe arhijka Tata Diosï Jeobani imani ambe jimbo engaksï sési úka (1 Kor. 4:6, 7). Pori ejemplu, engaksï orhejtsïkutini ma felisitarijka jimboka sési jorhentpisïnga, ima uaati uandani eska iámindu ambe enga uandaka, Tata Diosïiri Uandakuarhu pʼitakata jarhaska ka eskachi iámindu úsïnga uánikua ambe jorhenguarhini jimbokajtsïni Tata Diosï Jeobaeri organisasioni jorhendasïnga. Kánikua sésiisti eskaksï ménichani orhejtsïkutiicha kurhamarhikuarhiaka sini na engaksï jorhentpijka kʼéri ambe arhisïni Tata Diosï Jeobani, oksï solu uékasïni eskaksï kʼéri ambe arhiauaka imeechani. Ju je eratsentani ambe enga nitamakuarhika erachi ma enga Timothy arhinhajka. Enga orhejtsïkuti únhapka, kánikua tsitisïreendi arhijtsïkperateechani nitamataraani. Ima uandantasïndi: “Uánikua ambe uandasïreenga parani ueenani arhijtsïkperata ma ka ístuni uánikua ejempluechani jatsikuasïreenga, ka indeni ambe jimbo erachiichajtsïni arhisïreendi eskani kánikua sési arhijtsïkpisïreenga. Indeni ambe jimbo jíntsïnisï kʼéri ambe exeni japti ka no Tata Diosï Jeobani o Bibliani”. Ísï tátsekua, Timothy exespti eska jatsispka para mójtakuni na enga jorhentpienga para no ima kʼéri ambe exenhani (Prov. 27:21). ¿Ambe úkuarhispi tátsekua? Ima uandasïndi: “Iásï máru erachiichajtsïni arhisïndi eska juchiiti arhijtsïkperata jarhuataaska orhepani uérakuni problemani ma, tekaantani engaksï no sési nitamakuarhini jarhajka o para sánderu andarhierani Tata Diosï Jeobani. Ka iásï sánderuni sési pʼikuarherasïnga engajtsïni erachiicha indeni ambe arhijka ka eska antesi engajtsïni jíndeni kʼéri ambe arhienga”.

ENGA ÚKUA JUKAAKA KURHANDIRANI KA BALORI XARHATANI

9. ¿Káni úkua jukaspi para Gedeóni kurhandirani ka balori xarhatani? (Exe je dibujuni enga ueenakuarhu jaka i rebistarhu).

⁹ Ísï tátsekua enga Tata Diosï Jeoba arhipka Gedeónini eska orhejtsïkupiringa ireta Israelini, jatsipirindi para kurhandini ka balori xarhatani. Ima arhinhaspti eska úpiringa ambe ma enga kánikua úkua jukapka, eska xerentapiringa altarini enga imeeri taati jémba jatsipka nani engaksï kómarhienga Baalini (Juec. 6:25, 26). Sánderu tátsekua, Gedeóni kʼéri ejersitu ma úspti ka tsimani xanhari Tata Diosï Jeoba arhispti eska no xáni uánikua sondaduechani paapiringa uarhipeni (Juec. 7:2-7). Ka últimu, Tata Diosï Jeoba juramukuspti eska chúrikua nipiringa uarhipeni imeeri enemiguecha jingoni (Juec. 7:9-11).

10. ¿Káni úpirini úkua jukanchani orhejtsïkuti ma kurhandirani?

¹⁰ Orhejtsïkutiichaksï jatsisti paraksï méntkisï kurhandirani (Sant. 3:17). Enga orhejtsïkuti ma kurhandirajka, tsípikua jingoni úsïndi ambe enga arhijka Tata Diosïiri Karakata ka imeeri organisasioni, ka ísï, ambakiti ejemplu ma íntskuasïndi máteruechani. Jamberi ménichani úkua jukanchajti ísï úni eskaksï na arhijka instruksionicha enga Tata Diosïiri organisasioni íntspiajka. Ka ménichani úpirindi kurhamarhikuarhini sini sési jaki ísï úni eska instruksioni ma na arhijka o jamberi arhinhani eska uaaka ambe ma enga jimbo úpiringa ónhanhani. Enga i ambe úkuarhiska, ¿nénaksï uaa orhejtsïkutiicha májkueni kurhandini ísï eska Gedeóni?

11. ¿Ambe uaa jarhuatani orhejtsïkutiichani paraksï kurhandirani?

¹¹ Jingontku kurhaa je ambe engajtsï arhinhaaka para úni ka ísï ú je. Tata Diosï Jeoba arhispti Gedeónini ambe enga jatsipka para úni para xerentani taati jémbeeri altarini, ístu arhispti nani enga jatsipka para úni altari ma para Tata Diosï Jeoba ka náki animalini jatsispi para kéjtsïtakuni. Gedeóni no uandauandamispti, sánderu sési, sóntku úspti ísï eska Tata Diosï na arhipka. Iásï, Tata Diosï Jeobaeri kúnguarhikua arhiasïndi orhejtsïkutiichani ambe engaksï jatsika para úni, karteecha jimbo, aianhperakuecha jimbo ka máteru instruksionicha jimbo. Iámindu i ambe marhuasïndi parajtsïni kuidarini ka parachi no jurajkuni Tata Diosïni. Kánikuachi xénchaasïnga orhejtsïkutiichani jimbokaksï imeecha meru ísï úsïnga eska na arhiajka Tata Diosï Jeobaeri kúnguarhikua. Ka jimbokaksï kurhandirasïnga, iámu kúnguarhikuani sési nikusïndi (Sal. 119:112).

12. ¿Nénaksï uaa orhejtsïkutiicha úni ambe enga arhijka Ebreu 13:17 enga organisasioni arhiaska eskaksï iásï ménderueni uaakia ambe ma?

¹² Enga iásï ménderueni úkuarhiakia ambe ma, ísï ú je. Miá je eska Tata Diosï Jeoba arhispka Gedeónini eska namunitu sondaduecha jingoni pakarapiringa (Juec. 7:8). Jamberi ima eratsepti: “¿Meru uétarhijki ini ambe úni? ¿Sési uéra iámindu ambe?”. Nájkiruka indeni ambe kurhamarhikuarhipka, Gedeóni kurhajchaspti Tata Diosïni. ¿Nénaksï uaa orhejtsïkutiicha májkueni úni? Engaksï kurhandiraska enga Tata Diosï Jeobaeri kúnguarhikua uandaaka eskaksï iásï ménderueni uaakia ambe ma (arhinta je Ebreu 13:17). Pori ejemplu, 2014 jimbo, Grupu enga Orhejtsïkuajka iámindu kúnguarhikuechani uandaspti na enga úranhani japiringia sentabu para Kʼumanchikua Reinueriichani uaani ka Kʼumanchikuecha para Kʼérati Tánguarhikuechani uaani (2 Kor. 8:12-14). Ióntki, organisasioni kuánetasïreendi sentabu kúnguarhikuani paraka úpiringa Kʼumanchikua Reinuerini, ka tátsekua kúnguarhikua íntspintasïreendi indeni sentabuni. Peru iásï organisasioni úrasïndi sentabuni engaksï iámindu kúnguarhikuecha íntspijka para uaani Kʼumanchikua Reinueriichani ka Kʼumanchikuechani para Kʼérati Tánguarhikuechani imani lugarichani jimbo enga uétarhini jarhajka, no arhiparini na xáni káni sentabu uaa íntspini jima anapu kúnguarhikua. Enga orhejtsïkuti ma enga José arhinhajka, mítepka ini ambe uandaspti eska no úpiringa ísï úkuarhini. Eratsespti: “Inde ambe no uaati ísï úkuarhini ixúesïsï, jamberi máteru naniisï jo. Exeakajtsï eska no ma Kʼumanchikua Reinueri uaaka úkuarhini”. Joperu, ísï úspti eska na arhinhapka. ¿Andi? Ima uandantasïndi: “Miántaspka ambe enga uandajka Proverbios 3:5, 6, eskani jatsiska parani mintsikani Tata Diosï Jeobani. ¡Ka i ambe kánikua sési uéraxati! Iásïksï sánderu uánikua Kʼumanchikua Reinueriicha jarhastia, joperu ístuchi jorhenguarhixaka mámaru jarhuajpeni parachi iáminduecha májkueni jatsikuarheni”.

13. a) ¿Ambeeri seguru jarhaspi Gedeóni? b) ¿Ambeksï uaa úni orhejtsïkutiicha paraksï ísïini eska Gedeóni? (Ístu exe je imajenini).

¹³ Balori jingoni ú je ambe enga Tata Diosï Jeoba uékajka. Gedeóni kurhajchaspti Tata Diosï Jeobani nájkiruka cheenga ka nájkiruka úpiringa no sési ambe úkuarhinchani (Juec. 9:17). Enga Tata Diosï Jeoba na arhipkia eska jarhuatapiringa, Gedeóni seguru jarhaspti eska Tata Diosï jarhuatapiringa kuájchakuni imeeri iretani. Ima orhejtsïkutiicha engaksï imani lugaricha jimbo irekajka nani engaksï no jurajkunhajka úni juchaari ánchikuarhita, ísïistiksï eska Gedeóni. Balori jingonksï organisariuasïndi tánguarhikuechani, orhejtsïkusïndiksï aianhpikuani nájkirukaksï úpiringa ónhanhani, oksï kurhamarhiani kúnguarhikueri ambe, chútanhantanksï ánchikuarhitarhu oksï no sési kánhani.c Kʼéri mískuarhitarhu, orhejtsïkutiichaksï jatsiati para kánikua balori jukani paraksï úni ambe engaksï arhinhajka, nájkirukaksï úpiringa no sési ambe úkuarhinchani. Jamberiksï arhinhaati ambe engaksï jatsika para úni paraksï aianhpini eska Tata Diosï kʼamajkuauaka imeechani engaksï no uéjka imani kurhajchani. Ka inde ambe ísïiuati komueska kʼérati xanuateecha. O jamberiksï arhinhaati ambe engaksï jatsika para úni parachi úni tsípiti pakarani jiáni engajtsïni Gog de Magog no sési kámaaka (Ezeq. 38:18; Jaŋ. 16:21).

ENGA ÚKUA JUKAAKA TEKAANTANI

14. ¿Andisï Gedeóni jatsipi para tekaantskua xarhatani?

¹⁴ Gedeóni jatsispti para uinhamu ánchikuarhini jimboka Israeli anapu juesiispka. Engaksï Madiáni anapuecha sïpakuarhipka chúrikua enga Gedeóni nípka imeecha jingoni uarhipeni, ima niraspti andanguani desde Jesreeliiri pákua uératini asta riu Jordánirhu enga kánikua uitsakua jukapka chekamikua jingoni (Juec. 7:22). ¿Ambe úspi ima? ¿Nóteru niraspia andanguani? ¡Jo, seguiriispti nirani andanguani! Nájkiruka ima ka imeeri 300 sondaduecha kánikuaksï kuataratini japka, parhikusptiksï riuni ka seguiriisptiksï andanguani. Últimu, andanguasptiksï Madiáni anapuechani ka andasptiksï (Juec. 8:4-12).

15. ¿Andisï ménichani orhejtsïkuti ma úpirini úkua jukanchani tekaantani?

¹⁵ Orhejtsïkuti ma uaati kánikua kuatarani kúnguarhikuani kuidarini ka ístu imeeri familiani. ¿Nénaksï uaa májkueni úni eska Gedeóni orhejtsïkutiicha engaksï ísï pʼikuarherajka?

16, 17. a) ¿Ambe jarhuataspi Gedeónini tekaantani? b) ¿Ambeeriksï uaa seguru jarhani orhejtsïkutiicha? (Isaías 40:28-31; ístu exe je imajenini).

¹⁶ Mintsika je eskaksïni Tata Diosï Jeoba uinhapikua íntskuaka. Inde ambesï úpti Gedeóni ka Tata Diosï Jeoba jarhuataspti (Juec. 6:14, 34). Ma uelta, Gedeóni ka imeeri sondaduechaksï uiriipaspti andanguani tsimani reiichani engaksï Madiáni anapuepka engaksï jamberi kameiu jatarini sïpakuarhini japka (Juec. 8:12, 21). Peru Tata Diosï Jeobaeri jarhuajperata jingoni, íksï israeliteecha engaksï no kuatantapka úsptiksï reiichani andanguani ka andasptiksï. Iásï anapu orhejtsïkutiichajtuksï úsïndi Tata Diosï Jeobani mintsikani, imani Tata Diosïni ‘enga no kuatarajka ka ni kueratanchani uinhapikua’. Imaksïni íntskuati uinhapikua méntkisï engajtsï uétarhinchani jauaka (arhinta je Isaías 40:28-31).

¹⁷ Ju je exeni ambe enga nitamakuarhika Matthew, enga Grupurhu ma jaka enga Jarhuataajka Testiguechani engaksï uétarhinchajka Tratamientu ma. ¿Ambe jarhuatasïni tekaantani? Ima uandasïndi: “Ji mismuni exeskia eska ísïiska ambe enga uandajka Filipenses 4:13. Méni engani kuataratini jarhajka ka engani ísï pʼikuarherajka enajkini nóteru uaaia, mintsita jingoni kómarhisïnga Tata Diosï Jeobani ka kurhakusïnga eskarini íntskuaka uinhapikua parani úni erachiichani jarhuataani. Tátsekua pʼikuarherasïnga na engareni Tata Diosï Jeobaeri espiritu jarhuatajka parani tekaantani”. Májkueni eska Gedeóni, orhejtsïkutiichaksï uinhamu ánchikuarhisïndi paraksï úni kuidarini Tata Diosï Jeobaeri iretani, nájkiruka no méntkisï fásiliuaka. Joperuksï ístu jatsisti para kaxumbitiini ka kurhanguni eskaksï no méntkisï uaaka úni iámindu ambe engaksï tsitipiringa úni. Peru ambe uéjki úkuarhini, orhejtsïkutiichaksï mintsikasïndi eska Tata Diosï Jeoba kurhauaka imeecheri kómarhikuechani ka eska íntsauaka uinhapikua paraksï seguiriini tekaantani (Sal. 116:1; Filip. 2:13).

18. Ísï eskachi na exekia, ¿nénaksï uaa orhejtsïkutiicha májkueni úni eska Gedeóni?

¹⁸ Eskachi na exekia, orhejtsïkutiichaksï uaati uánikua ambe jorhenguarhini Gedeóniiri ambe. Jatsistiksï para kaxumbitiini ka kurhanguni eskaksï no méntkisï uaaka jiókuarhiani iámindu responsabilidadichani ka ístu engaksï arhinhaaka eskaksï no sési úska ambe ma o eskaksï sési úska ambe ma. Ístuksï jatsisti para kurhandirani ka balori xarhatani, ka sánderia iásï enga nóteru ióni kueratani jakaia para kʼamarani i parhakpini. Ka jatsistiksï para mintsikani eska Tata Diosï Jeoba íntsauaka uinhapikua paraksï úni tekaantani ambe uéjki úkuarhini. Ísïisti, kánikuachi jukaparharaasïnga ka ‘sésichi arhiasïnga’ ini orhejtsïkutiichani engaksï uinhamu ánchikuarhijka (Filip. 2:29, TDU).