Tata Diosï Jeobaksïni jarhuataati uandanhiateecha jingoni engajtsï ma repentku jatsiauaka

1. ¿Ambeerichi seguru jarhaski?

TATA Diosï Jeobaeri marhuariichachi míteska eskajtsïni ima kánikua xénchasïnga ka eska sánderu ambakiti ambe uékasïnga para jucha (Rom. 8:35-39). Ístuchi seguru jarhaska eska kurhajchaani Biblieri prinsipiuechani, méntkisïjtsïni marhuachesïnga (Is. 48:17, 18). Peru ¿ambechi uaa úni enga ima ambe úkuarhiska engachi no erokuarhini jauaka?

2. ¿Jamberichi náki uandanhiateechanchi úpirini jatsiani, ka ambechi úpirini kurhamarhikuarhini?

² Iámindu Tata Diosï Jeobaeri marhuariichachi uandanhiateechani jatsiasïnga. Pori ejemplu, jamberi familiari ma uaati o uandani ambe ma engajtsïni no sési pʼikuastaaka. Ochi jamberi pʼamenchani jarhani ka indeni ambe jimbo nóchi úni marhuakuni Tata Diosï Jeobani ísï eskachi na uékapiringa. Ochi jamberi no sési nitamakuarhini jarhani desastre naturali ma jimbo. Ochi no sési kánhani jarhani imani ambe jimbo engachi jakajkujka. Engachi ini ambe nitamakuarhini jarhajka, úpiringachi kurhamarhikuarhini: “¿Andisïni ji ísï nitamakuarhini jaki? ¿Úski ambe ma enga no sési jaka? ¿I ambe xarhatasïni eskarini Tata Diosï Jeoba no újchakuraxaka?”. Enga chá ménisï niáraka ísï pʼikuarherani, asï chkétakuarhi je. Uánikua Tata Diosï Jeobaeri marhuariichaksï niáraspti ísï pʼikuarherani (Sal. 22:1, 2; Hab. 1:2, 3).

3. ¿Ambejtsïni jorhendasïni Salmo 34:19?

³ (Arhinta je Salmo 34:19). I bersikulu uandasïndi tsimani ambe enga kánikua jukaparhakueka: 1) eskaksï imeecha engaksï jurhimbitku jámajka uandanhiateechani jatsiasïnga ka 2) eskajtsïni Tata Diosï Jeoba iámindu ambe jimbo jarhuatasïnga. Ma ambe enga Tata Diosï Jeoba újka parajtsïni jarhuatani, jindeesti eskajtsïni jarhuatasïnga kurhanguni eska ini parhakpini jimbo uandanhiateechanchi jatsiauaka. Ísïisti, Tata Diosï Jeobajtsïni aiachisïndi eskachi tsípikua jingoni irekaaka engachi marhuakuska, peru inde ambe no arhikuekasïndi eskachi iásï no jatsiauaka uandanhiateechani (Is. 66:14). Tata Diosïjtsïni arhisïndi eskachi eratsentaaka na engachi irekaaka sánderu orhepatini; nani engachi uaaka irekani para méntkisï ísï eska ima na uéjka (2 Kor. 4:16-18). Ka enga jamberi niáraaka ima jurhiatikua, pauani pauantsïni jarhuatasïndi parachi orhepani uérani (Lam. 3:22-24).

4. ¿Ambechi exeni jaua ini jorhenguarhikua jimbo?

⁴ Ini jorhenguarhikua jimbo exeakachi máru Tata Diosï Jeobaeri marhuariicheeri ejemplu engaksï ióntki irekapka ka ístu máteruecheeri engaksï iásï irekani jaka. Ísï eskachi na exeni jauaka, jamberichi jatsiauaka uandanhiateechani engachi no erokuarhiani jauaka. Peru engachi mintsikaska Tata Diosï Jeobani, imajtsïni méntkisï jarhuataati (Sal. 55:22). Engachi exeni jauaka mándani ejemplu, ju je kurhamarhikuarhini: “¿Ambe úpirini ji engani indeni ambe nitamakuarhini japiringa? ¿Nénarini jarhuatasïni i ejemplu parani sánderu mintsikani Tata Diosï Jeobani? ¿Néna uaa májkueni úni eska inde kʼuiripu?”.

IÓNTKI ANAPUECHEERI EJEMPLU

5. ¿Jakobu náki uandanhiateechani jatsiaspi Labániiri kulpa jimbo? (Exe je dibujuni enga ueenakuarhu jaka i rebistarhu).

⁵ Ióntkiksï jarhaspti Tata Diosï Jeobaeri marhuariicha engaksï problemeechani jatsiapka engaksï no erokuarhiani japka. Ju je eratsentani ambe enga úkuarhinchapka Jakobu. Imeeri Taati jémba arhispti eska tembuchapiringa Labániiri uájpa ma jingoni, enga familiari máepka enga kómarhienga Tata Diosï Jeobani. Ka aiakuspti eska Tata Diosï Jeoba uánikua kóntperateechani íntsaapiringa (Gén. 28:1-4). Ka Jakobu ísï úspti: Kanaáni uératini niraspti asta jima enga Labáni irekapka, enga tsimani uájpeechani káuenga, Leani ka Rakelini. Jakobu tsitispti Rakelini enga sánderu sapichuepka ka uékaspti siete uéxurhini ánchikuarhikuni Labánini para úni Rakeli jingoni tembuchani (Gén. 29:18). Peru no ísï úkuarhispti eska Jakobu na erokuarhini japka. Labáni enganiarispti ka Leani íntskuspti enga sánderu kʼériipka paraka imeeri témbeepiringa. Ma semana ísï tátsekua jurajkuspti eska Rakeli jingoni tembuchapiringa, peru arhispti eska máteru siete uéxurhini ánchikuarhikupiringa (Gén. 29:25-27). Peru no inde ambejkuespti. Labáni ístu no jurhimbikua jingoni kámaspti Jakobuni imeecheri negosiuecha jingoni. ¡Úspti eska 20 uéxurhini ánchikuarhikupiringa! (Gén. 31:41, 42).

6. ¿Náki máteru uandanhiateechani jatsiaspi Jakobu?

⁶ Peru Jakobu ístu máteru problemeechani jatsiaspti. Kʼéri familia ma jatsispti ka imeeri uájpeechaksï no méntkisï sési pájperaspti, astaksï niáraspti atarantani Joséni para jántspini jámani. Ístu, tsimani Jakobueri uájpeechaksï —Simeóni ka Lebí— no sésiksï pakataspti imeeri familiani ka ístu Tata Diosï Jeobaeri nombrini. Tátsekua, imeeri témba Rakeli enga Jakobu xáni xéncheenga, uarhispti enga kánguarhini japkia imeeri segundu uájpani. Ka jimboka uánikua uéxurhini no jarhaspka tʼirekua jima enga Jakobu irekapka, ima Ejiptu niraspti irekani ka jiánisï kánikua jatiriisptia (Gén. 34:30; 35:16-19; 37:28; 45:9-11, 28).

7. ¿Tata Diosï Jeoba néna xarhatakuspi Jakobuni eska sési exesïreenga?

⁷ Nájkiruka iámindu indeni ambe nitamakuarhipka, Jakobu méntkisï mintsikaspti Tata Diosï Jeobani ka ambe enga ima aiakupka. Ka Tata Diosï Jeoba xarhatakuspti eska ima sési exesïreenga. Pori ejemplu, nájkiruka Labáni someni enganiariuenga Jakobuni, ima niáraspti uánikua ambe jatsikuarheni Tata Diosïiri jarhuajperata jingoni. Ka seguru eska Jakobu kánikua agradesidu pʼikuarherapka Tata Diosïni jingoni enga uánikua uéxurhini tátsekua úpka ménderu exentani Joséni, jimboka Jakobu eratsesïreenga eska José uarhispkia. Jakobu úspti tekaantani iámindu indeni ambe jimboka sési pájperasïreenga Tata Diosï Jeoba jingoni (Gén. 30:43; 32:9, 10; 46:28-30). Engachi juchajtu kánikua sési pájperaska Tata Diosï Jeoba jingoni, ístuchi uaaka tekaantani uandanhiateechani engachi ma repentku jatsiauaka.

8. ¿Ambe uékasïreeni úni rei Dabidi?

⁸ Rei Dabidi no úspti iámindu ambe enga uékapiringa úni para Tata Diosï Jeobani marhuakuni. Pori ejemplu, iámu mintsita jingoni uékaxapti templu ma úkuni Tata Diosïni. Ka enga aiangupka profeta Natánini ambe enga uékani japka úni, ima arhispti: “Ú ambe enga jaka chiiti mintsitarhu, jimboka Tata Diosï jurhimbiti tʼungini jingoni jarhaska” (1 Crón. 17:1, 2). ¿Úsïnchi eranhaskani na enga xáni sési pʼikuarherapka Dabidi enga kurhaapka ini uandakuechani? Jamberi jirejiresï ueenapti eratseni na enga úpiringa templuni.

9. ¿Ambe úspi Dabidi enga no ísï úkuarhipka eska ima na uékeenga?

⁹ Peru Tata Diosï Jeobaeri profeta niraspti ménderu exeni Dabidini para aianguni ambe ma. Ima mismu chúrikua Tata Diosï Jeoba arhispti Natánini eska no Dabidiipiringa enga templuni úpiringa, sino imeeri uájpa ma (1 Crón. 17:3, 4, 11, 12). ¿Ambe úspi Dabidi enga kurhaapka indeni ambe? Jánguarhintaspti para sentabu tánani ka materiali ambe enga imeeri uájpa Salomóni uétarhinchapiringa para templuni úni (1 Crón. 29:1-5).

10. ¿Tata Diosï Jeoba néna újchakuraspi Dabidini?

¹⁰ Enga Dabidi na mítepkia eska ima no úpiringa templuni, Tata Diosï Jeoba pakatperakua ma úspti imani jingoni: aiakuspti eska imeeri desendienti ma juramupiringa para méntkisï (2 Sam. 7:16). Jimbanhi parhakpinirhu enga Kristu juramuni jauaka Mili Uéxurhini, Dabidi kánikua sési pʼikuarheraati míteni eska ima enga juramuni jaka imeeri desendienti máeska. I ambe enga Dabidi nitamakuarhipka, jorhendasïndijtsïni eska nájkirukachi no uaaka iámindu ambe úni engachi uékapiringa para Jeobani marhuakuni, juchaari Tata Diosï uaatijtsïni újchakurani imani ambe jingoni engachi jucha no erokuarhini jauaka.

11. Nájkiruka Tata Diosïiri Reinu no ueenapka jiáni juramuni engaksï primeru siglurhu anapu kristianuecha erokuarhini japka, ¿néna újchakuraaspi Tata Diosï? (Ukuecha 6:7).

¹¹ Primeru siglurhu anapu kristianuechaksï nitamakuarhispti máru ambe engaksï no erokuarhini japka. Pori ejemplu, imeechaksï uékaxapti eska Tata Diosïiri Reinu juramupiringia, peruksï no mítespti káni ísï úkuarhipirini (Uku. 1:6, 7). Jimajkani, ¿ambeksï úspi? Imeechaksï incharhetakuspti aianhpini. Engaksï exepka eska sánderu lugaricha jimbo aianpinhaxanhapka ambakiti aianhperakua, exesptiksï eska Tata Diosï Jeoba újchakuraaxapka (arhinta je Ukuecha 6:7).

12. ¿Ambeksï úspi primeru siglurhu anapu kristianuecha enga kʼarhingua ma japka?

¹² Primeru siglurhu kʼéri kʼarhingua ma jarhaspti “iápuru parhakpinirhu” (Uku. 11:28). Ka i ambejtu úspti eskaksï kristianuecha no jatsipiringa tʼirekua ambe. Seguru eskaksï imeecha engaksï taatiipka uandanhiani japka nénaksï úpirini kéndani imeecheri familiani. Ka tumbiicha ka uátsïicha engaksï eratseni japka sánderu aianhpini, jamberiksï kurhamarhikuarhiendi sinksï jatsipirini para erokuarhini asta enga na kʼarhingua nitamapiringia. Ambe uéjkiksï nitamakuarhini jarhani, kristianuechaksï seguiriispti jánguarhintani xáni eskaksï xáni úpka para aianhpini ka tsípikua jingonksï intsïmbiaspti ambe engaksï jatsikuarhepka Judea anapu kristianuechani (Uku. 11:29, 30).

13. ¿Tata Diosï Jeoba néna újchakuraaspi kristianuechani jiáni enga kʼarhingua japka?

¹³ ¿Tata Diosï Jeoba néna újchakuraspi kristianuechani jiáni engaksï no sési nitamakuarhini japka? Imeecha engaksï intsïnhapka ambe engaksï uétarhinchani japka exesptiksï eska Tata Diosï Jeoba kuidariuaxapka (Mat. 6:31-33). Ka seguru eskaksï sánderu sési pájperasïreengia imani erachiicha jingoni engaksï jarhuataapka. Ístu, imeecha engaksï sentabu ambe jingoni jarhuajpepka o engaksï máteru ambe úpka para jarhuataani erachiichani kánikuaksï sési pʼikuarheraspti (Uku. 20:35). Tata Diosï Jeoba iáminduechani újchakuraaspti jimbokaksï jánguarhintaspka orhepani uérani.

14. ¿Ambeksï nitamakuarhispi Bernabé ka apostoli Pablu, ka ambe úkuarhispi engaksï imeecha xáni jánguarhintapka? (Ukuecha 14:21, 22).

¹⁴ Primeru siglurhu anapu kristianuecha méminduksï no sési kánhaspti, ka ménichani jiáni engaksï no erokuarhini jarheenga. Ju je exeni ambe engaksï nitamakuarhipka Bernabé ka apostoli Pablu engaksï Listra aianhpini jámani japka. Orheta, kʼuiripu kánikua sési eroaspti ka kurhajchaasptiksï. Peru tátsekua, máru imeeri enemiguechaksï úspti eskaksï kʼuiripuecha no sési kaapiringa ka máru ima kʼuiripuechaksï tsakapkueraspti Pabluni ka uandasptiksï eska ima uarhispkia (Uku. 14:19). Peru Bernabé ka Pablu máteru naniksï niraspti ka seguiriisptiksï aianhpini. ¿Ambe úkuarhispi engaksï imeecha xáni jánguarhintapka? “Jakajkutaraa[spti]ksï uánikua kʼuiripuechani” ka imeecheri uandakuecha ka ejemplu jingoni uinhaperaantasptiksï erachiichani (arhinta je Ukuecha 14:21, 22). Engaksï Bernabé ka Pablu no kuatantapka engaksï no sési kánhani japka, inde ambe uánikuechani marhuakuaspti. Májkueni, engachi jucha no kuatantaaka ka engachi seguiriiska imani ánchikuarhitani úni engajtsïni Tata Diosï Jeoba íntskuka, uánikua kóntperatechanchi intsïnhauaka.

IÁSÏ ANAPUECHEERI EJEMPLU

15. ¿Ambejtsï jorhenguarhisïni chá erachi Alexander Macmillaniiri ejemplu jingoni?

¹⁵ Ante de niárani uéxurhini 1914, Jeobaeri marhuariichaksï erokuarhixapti eska úkuarhipiringa ambe ma. Ma jindeespti erachi Alexander Macmillan. Ísï eska uánikuecha, imajtu eratsesïreendi eska nóteru ióni kuerataxapka para auandarhu nirani. Enga arhijtsïkperata ma nitamatarani japka septiembrini 1914 jimbo, uandaspti: “Jamberi i jindeeti últimu arhijtsïkperata engani íntspini jaka”. Peru no ísï úkuarhispti. Ísï tátsekua erachi karaspti: “Máruchi jamberi eratseenga eska enga na niárapiringia tiempu sóntkuchi nipiringa auandarhu”. Ka ístu uandaspti: “Ambe engachi jatsipka para úni jindeespti seguiriini marhuakuni Tatani”. Ka erachi indeni ambesï úpti. Kánikua tsípikua jingoni aianhpispti, ka uánikua erachiichani jarhuataaspti engaksï ónhakuarhetini japka jimbokaksï no uékaspka ejersiturhu inchamukuni ka no méni kuerataspti tánguarhikuecharhu nájkiruka ima kánikua jatiriipkia. Sési úraspti imeeri tiempuni enga jamberi erokuarhini japka imeeri kóntperatani. ¿Néna marhuakuspi ísï úni? Uéxurhini 1966 jimbo, sánititu ante de uarhini, ima karaspti: “Iásï májkueni seguiriixaka mintsikani Tata Diosïni ísï eskani na úka desde iónisï”. Ísïisti, ambakiti ejempluntsïni ma jurajkuchesti iáminduechani, ka sánderia juchantsïni engachi sánderu ióni páni jakaia tekaantani ini parhakpini jimbo ka eska na engachi xáni erokuarhini japka (Ebr. 13:7).

16. ¿Náki uandanhiatanksï jatsispi ma repentku erachi Jennings ka imeeri témba? (Santiagu 4:14).

¹⁶ Uánikua Tata Diosï Jeobaeri marhuariichaksï niárasïndi ma repentku pʼamenchani. Pori ejemplu, erachi Herbert Jennings uandantaspti imeeri eksperiensiarhu eska ima ka imeeri témba kánikuaksï tsitisïreenga marhuani Ghana komueska misioneruecha.b Peru ísï tátsekua erachi exeminhantaspti pʼamenchakua ma mentirhu. Erachi Jennings uandaspti eska “no erokuarhixapka ambe enga úkuarhipiringa pauandikua”, ísï eska na uandajka Santiagu 4:14 (arhinta je). Ka ístu karaspti: “Mítespkachi eskachi nóteru úpiringia Ghana marhuani, jurajkuaspkachi uánikua ambakiti amiguechani ka kʼuanhatsentaspkachi Canadá [parani tratamientu ma intsïnhani]”. Tata Diosï Jeoba jarhuataspti erachi Jenningsini ka imeeri témbani paraksï seguiriini sési marhuakuni nájkirukaksï kánikua no sési nitamakuarhini japka.

17. Erachi Jenningsiiri ejemplu, ¿néna jarhuataskia máteru erachiichani?

¹⁷ Ambe enga erachi Jennings uandantaka imeeri eksperiensiarhu kánikua jarhuataasti máteruechani. Pirenchi ma karaspti: “No méni arhintaxapka artikulu ma engareni xáni mintsitarhu niárachepiringa komu eska i eksperiensia […]. Exeni eska erachi Jennings jatsispka para jurajkuni imeeri pribilejiuni para úni kuidarikuarhini, jarhuatasptireni parani ji no xáni no sési pʼikuarherani engani májkueni úpka eska erachi”. Máteru erachi karaspti: “Engani na marhuapkia jukari diesi uéxurhini komu kúnguarhikuarhu anapu orhejtsïkuti, jatsispka parani jurajkuni indeni ánchikuarhitani jimbokani pʼamenchakua ma kámasïreenga mentirhu. Ka jimbokani ísï exekuarhisïreenga enajkini para no ma ambe marhuaueni, no úsïreenga arhiantani eksperiensiechani jimbokajtsïni kómu pʼikuastasïreenga […]. Peru engani arhintapka na enga xáni jánguarhintapka erachi Jennings, kánikuarini uinhaperantaspti”. I ambejtsïni miátantasïndi eskachi uaaka máteruechani uinhaperaantani engachi orhepani uérakuaska uandanhiateechani engachi ma repentku jatsiajka. Ísï jimbo, nájkirukachi no ísï irekani jauaka eskachi na uékapiringa, ambakiti ejemplu máeuakachi para máteruecha engachi mintsikaska Tata Diosïni ka engachi tekaantaska (1 Ped. 5:9).

18. ¿Ambechi jorhenguarhisïni Nigeria anapu pirenchiiri ma enga tsïndiika? (Exea je fotuechani engaksï xarhatajka ambe enga úkuarhipka).

¹⁸ Enga xásï ambe úkuarhijka komueska pandemia COVID-19, Jeobaeri testiguechajtuksï no sési nitamakuarhisïndi. Pori ejemplu, pirenchi ma enga tsïndiika ka enga Nigeria irekaka, no kánikua tʼirekua jatsispti ni sentabu. Ma jurhiatikua, engaksï ma tasaterku jatsipkia arrosueri, imeeri nanaka sapichu kurhamarhispti ambeksï apirini enga xántkuepiringia. Pirenchi arhispti eskaksï nóteru jatsispkia tʼirekua ni sentabu, peru eskaksï májkueni úpiringa eska Sarepta anapu tsïndi. Úmantapirindiksï ambe engaksï jatsipka ka mintsikapirindiksï Tata Diosï Jeobani (1 Rey. 17:8-16). Ima jurhiatikua engaksï útasï nótki exeni japka ambeksï apirini tsípa anapueri, erachiichaksï pákuaspti kaja ma enga mámaru ambe jatapka. ¡Kajarhu jataspti tʼirekua para jukari tsimani semana! Ka indeni ambe jingoni pirenchi úspti exeni eska Tata Diosï Jeoba jingontku kurhajchaspka ambe enga pirenchi arhipka imeeri nanaka sapichuni. Ísïisti, engachi mintsikaska Tata Diosï Jeobani, uandanhiateecha engachi ma repentku jatsiauaka uaatijtsïni jarhuatani parachi sánderu andarhierani imani (1 Ped. 5:6, 7).

19. ¿Ambe úkuarhinchaspi erachi Alexéi Yershov?

¹⁹ Máru uéxurhinisïistia engaksï uánikua erachiicha tekaantani jaka engaksï no sési kánhani jaka ka jamberiksï no erokuarhini japti indeni ambe. Ju je exeni ambe enga úkuarhinchapka erachi Alexéi Yershov enga Rusia anapueka. Enga ima itsï atakuarhipka 1994 jimbo, Jeobaeri testiguechaksï sésikua jatsispti para úni máru ambe para Tata Diosïni marhuakuni. Peru ísï tátsekua, uánikua ambe mójtakurhispti Rusia. Uéxurhini 2020 jimbo, máru polisiechaksï inchaakuspti erachi Yershoviiri kʼumanchikuarhu, uánikua ambeksï jámaspti jirinhani ka uánikua ambeksï euakuarhispti. Máru kutsï tátsekua, juramutiichaksï uandaspti eska erachi no sési ambe niátaspka. Ka ísïksï uandaspti jimbokaksï exeaspka máru bideuechani enga kʼuiripu ma grabariuapka enga jukari ma uéxurhini ísï xarhatapka enajki tsitieni Biblieri ambe jorhenguarhini. ¡Xáni no sési ambe enga úpka inde kʼuiripu!

20. ¿Ambe ka ambe úsïni erachi Yershov para úni sánderu sési pájperani Tata Diosï Jeoba jingoni?

²⁰ ¿Jorhenguarhiski ambe ma erachi Yershov ini ambe jingoni enga nitamakuarhika? Jo. Iásï sánderu sési pájperasïndia Tata Diosï Jeoba jingoni. Ima uandasïndi: “Juchiiti uarhiti ka ji májku kʼérichi kómarhisïnga ka sánderu someni. Míteska eskani no úpiringa orhepani uérani engareni Tata Diosï Jeoba no jarhuatapiringa”. Ka ístu uandasïndi: “Bibliani jorhenguarhini kánikuarini jarhuatasïndi parani no chkétakuarhini. Ístu, eratseantasïnga Tata Diosïiri marhuariichani engaksï ióntki sési marhuakupka imani. Bibliarhu uánikua ejempluechaksï jarhasti engaksï xarhatajka na enga xáni uétarhijka no chéni ka mintsikani eskajtsïni Tata Diosï Jeoba jarhuataaka”.

21. ¿Ambechi jorhenguarhiski ini jorhenguarhikua jimbo?

²¹ ¿Ambechi jorhenguarhiski ini jorhenguarhikua jimbo? Eska nájkirukachi no míteaka ambe enga úkuarhiaka pauani, engachi mintsikaska Tata Diosï Jeobani ima méntkisï jingontku jauati parajtsïni jarhuatani. Ísï eska na uandajka tekstu nani enga pʼitakata jaka i jorhenguarhikua, “uánikua ambe jimbo no sési nitamakuarhisïndi ima enga jurhimbitku jámajka, peru Tata Diosï Jeoba iámindu ambe jimbo jarhuatasïndi” (Sal. 34:19). Ísï jimbo, ju je no xáni eratseantani uandanhiateechani engachi jatsiajka, sino na enga úrajka Tata Diosï Jeoba imeeri uinhapikuani parajtsïni jarhuatani. Engachi ísï úska, uaakachi májkueni ambe uandani eska apostoli Pablu: “Iámindu ambe úsïnga úni jimbokarini Tata Diosïsï uinhaperantajka” (Filip. 4:13, TNM).