Uaakajtsï úni ambe engajtsï eratsetini jaka parajtsï sánderu marhuakuni Tata Diosïni

1. ¿Ambechi úkua jukanchasïni uánikuecha?

IÁMINDUECHACHI uékasïnga sánderu sési marhuakuni Tata Diosï Jeobani ka sési pʼikuastani. Ka parachi ísï úni, uaakachi jánguarhintani parachi sánderu sési xarhatani kualidadi ma, Bibliani arhintani pauani pauani, sánderu sési jorhenguarhini Biblieri ambe o úni ambe ma parachi sánderu sési aianhpini. Jamberijtsï chá eratsekia úni ambe ma perujtsï úkua jukanchani jarhani ísï úni. Pori ejemplu, Philip uékasïreendi sánderu someni kómarhini Tata Diosïni ka mintsita jingoni, peru úkua jukanchasïreendi arhutani tiempu para indeni ambe úni. Erika uékasïreendi sánderu xarhentku niárani tánguarhikuecharhu engaksï jindeeka para uérani aianhpini, peru nájkiruka jánguarhinteenga, sáno méntkisï ióndasïreendi niárani. Ka Tomáš uánikua xanhari jánguarhintaspti iámu Bibliani arhintani. Ima uandasïndi: “Ji no tsitisïreenga arhintani. Tanimu xanhari jánguarhintaspka, peru Levitico jamberkuni niárasïreenga”.

2. ¿Andichisï no jatsi para chkétakuarhini engachi no úni jaka ambe engachi eratsetini jaka úni para sánderu marhuakuni Tata Diosïni?

² Engajtsï chá jánguarhintani jaka úni ambe ma, perujtsï no úni jarhani ísï úni, asï chkétakuarhi je. Tiempu uétarhisïndi ka eska ma jánguarhintaaka para úni ambe enga eratsetini jaka, nájkiruka inde ambe no xáni úkua jukaaka. Enga chá seguiriini jaka jánguarhintani, xarhatasïngajtsï eskajtsï kánikua jukaparharasïnga sési pájperani Tata Diosï Jeoba jingoni ka eskajtsï uékasïnga sánderu ambakiti ambe íntskuni. Tata Diosï exesïndi indeni ambe ka nóksïni kurhachesïndi ambe ma engajtsï chá no uaaka úni (Sal. 103:14; Miq. 6:8). Ísï jimbo, engajtsï eratsetini jauaka úni ambe ma, exe je eska ima ambeuaka engajtsï chá meru uaaka úni. Ka engajtsï seguru jakaia eskajtsï uaaka indeni ambe úni, ¿ambeksïni jarhuataa parajtsï indeni ambe úni? Ju je exeni máru ambe engaksïni jarhuataaka.

KÁNIKUA JUKAPARHAKUESTI ESKACHI UÉKAAKA ÚNI AMBE ENGACHI ERATSETINI JAUAKA

3. ¿Andisï xáni jukaparhakue eskachi meru uékaaka úni ambe engachi eratsetini jaka?

³ Parachi sánderu ambe úni parachi marhuakuni Tata Diosïni, kánikua jukaparhakuesti eskachi meru uékaaka ísï úni. ¿Andi? Jimboka engachi meru uékajka úni ambe ma, sánderuchi jánguarhintasïnga. Ka inde ambe ísïisti komueska tarhiata enga pʼákchakujka barku sapichuni ma. Enga tarhiani jauaka, jamberi barku sapichu uaati niárani nani enga jatsika para niárani. Ka enga sánderu uinhamu tarhiaska, jamberi barku sánderu kókuani niáraati. Sáno májkueni, engachi meru uékani jauaka úni ambe ma, jamberichi sánderu jánguarhintaaka ísï úni. Erachi ma enga David arhinhajka ka enga El Salvador anapueka, uandasïndi: “Engari meru uékani jarhajka úni ambe ma, sánderuri jánguarhintasïnga. Úsïngari ambe enga xáni uétarhijka parakakeni no ma ambe ójkutaaka”. Jimajkani, ¿ambeksïni jarhuataa parajtsï meru uékani úni ambe engajtsï eratsetini jaka?

4. ¿Ambechi uaa kurhakuni Tata Diosï Jeobani? (Filipusʌ 2:13; ístu exe je imajenini).

⁴ Kurhaku je Tata Diosïni eskaksïni jarhuataaka uékani úni ambe ma. Imeeri espiritu jingoni, Tata Diosï Jeobaksïni uaati jarhuatani parakajtsï uékaaka úni ambe engajtsï eratsetini jaka (arhinta je Filipusʌ 2:13). Ménichanchi uandasïnga eskachi uaaka ambe ma jimbokachi míteska eskachi jatsiska para indeni ambe úni, ka no no sési jarhasti inde ambe. Peruchi jamberi no uékani jarhajka ísï úni. Inde ambesï úkuarhinchapti pirenchi Norina enga Uganda anapueka. Ima eratsetixapti Biblieri ambe jorhendani nemani, peru no uékaxapti ísï úni jimboka uandasïreenga eska no úsïreenga sési jorhentpini. ¿Ambe jarhuataspi para uékani ísï úni? Ima uandantasïndi: “Pauani pauani ueenaspka kurhakuni Tata Diosï Jeobani eskarini jarhuatapiringa parani uékani nemani jorhendani Biblieri ambe ka jíjtuni jánguarhintaspka úni ambe ma parani sánderu sési jorhentpini. Máru mesiicha tátsekua, exespka eskani sánderu uékaxapkia ísï úni. Ka ima mismu uéxurhini ueenaspka tsimani kʼuiripuechani jorhendaani Biblieri ambe”.

5. ¿Ambechi uaa eratsentani parachi sánderu uékani úni ambe engachi eratsetini jaka?

⁵ Eratsenta je ambe enga Tata Diosï Jeoba úkia chánksïni jimbo (Sal. 143:5). Apostoli Pablu eratsentaspti na enga xáni kóndentapka Tata Diosï Jeoba ka inde ambe úspti eska mintsita jingoni uékapiringa marhuakuni (1 Kor. 15:9, 10; 1 Tim. 1:12-14). Sáno májkueni, engajtsï sánderu eratsentaska ambe enga Tata Diosï Jeoba úkia chánksïni jimbo, sánderujtsï uékaaka úni ambe engajtsï eratsetini jaka (Sal. 116:12). Exe je ambe enga jarhuatapka pirenchini ma enga Honduras anapueka para prekursora úkuarhini. Ima uandantasïndi: “Eratsentaspka na engareni xáni xénchajka Tata Diosï Jeoba. Ima ústi eskani imeeri ireta jimbo japiringa, uandanhiasïndi jíndeni jimbo ka kuájchakusïndireni. Ini ambe eratsentani, jarhuatastireni sánderu xénchani Tata Diosï Jeobani ka parani sánderuni uékani prekursora úkuarhini”.

6. ¿Ambe máteru ambejtsïni jarhuataa parachi uékani úni ambe engachi eratsetini jaka?

⁶ Eratsenta je ambe engajtsï andaaka engajtsï jánguarhintaska úni ambe engajtsï eratsetini jaka. Ju je exeni Erikaeri ejempluni engachi párrafu 1 jimbo uandaka. ¿Ambe jarhuataspi para xarhentku niárani tánguarhikuecharhu engaksï úkuarhijka para uérani aianhpini? Ima uandantasïndi: “Exeska eskani uánikua ambe tsïtakuarhixapka engani ióndeenga niárani indeni tánguarhikuecharhu. Peru engani xarhentkuni niárapiringa, úpiringa uandajpaani erachiichani ka imeecha jingoni uandontskuarheni. Ístuni úpiringa kurhauani konsejuechani engajtsïni jarhuatapiringa sánderu sési aianhpini ka sési pʼikuarherani engani ísï úni japiringa”. Erika eratsentaspti ambe enga xáni andapiringa ka inde ambe jarhuataspti sánderu xarhentku niárani tánguarhikuecharhu. Májkueni, engajtsï chá eratsentaska ambe engajtsï andaaka engajtsï úska ambe engajtsï eratsetini jaka, kánikuaksïni jarhuataati. Pori ejemplu, enga chá eratsetini jaka sánderu arhintani Bibliani ojtsï sánderu sési uaani chaari kómarhikuechani, eratsenta je na engaksïni inde ambe jarhuataaka sánderu sési pájperani Tata Diosï Jeoba jingoni (Sal. 145:18, 19). Ka engajtsï uékani jaka xarhatani kualidadi ma, eratsenta je na engaksïni jarhuataaka sánderu sési pájperani máteruecha jingoni (Kol. 3:14). ¿Ambejtsï máteru ambe uaa úni? Kara je andisïjtsï uéjki úni ambe engajtsï eratsetini jaka ka someni exe je ambe engajtsï karaka. Tomáš engachi ueenakuarhu uandaka, uandasïndi: “Engani exejka eskani uánikua ambe andaaka engani úska ambe engani eratsetini jaka, sánderuni jánguarhintasïnga indeni ambe úni”.

7. ¿Ambe úspi Julio ka imeeri témba paraksï ísï úni eskaksï na eratsetini japka?

⁷ Imani kʼuiripuechani kúrhia je engaksïni jarhuataaka úni ambe engajtsï eratsetini jaka (Prov. 13:20). Julio ka imeeri témba, uékasïreendiksï mótsini nani enga sánderu uétarhini japka aianhpinhani. Ima uandantasïndi ambe enga jarhuataapka paraksï ísï úni: “Jánguarhintaspkachi imani amiguechani jatsiani engajtsïni jarhuatapiringa úni imani ambe engachi uékani japka ka indeeri ambechi uandontskuarhekuasïreenga. Uánikua imeecha sánoksï májkueni jásï ambe úsptia ka úpirindijtsïni ambakiti konsejuechani íntsaani. Ístujtsïni kurhamarhisïreendi nájtsïni nichexapi imani ambe jingoni engachi uékani japka úni. Ka engachi uétarhincheenga, uinhaperantasïreendijtsïni parachi seguiriini jánguarhintani”.

ENGACHI NO KÁNI UÉKANI JARHAJKA ÚNI AMBE ENGACHI ERATSETINI JAKA

8. ¿Ambe úkuarhipirini engachi solu jiántku jánguarhintapiringa engachi jucha uékapiringa? (Ístu exe je imajenini).

⁸ Ísïisti, ménichanchi no únchani jarhasïnga ambe engachi eratsetini jaka. ¿I ambe arhikuekasïni eskachi nóteru jánguarhintaakia? Nómbe. Ju je ménderu exeni barku sapichueri ejempluni. Tarhiata úsïndi páni barkuni asta jima enga uétarhijka niárani, peru ménichani no xáni tarhiani jarhasïndi ka jarhasïndi jurhiatikuecha enga no tarhiajka. ¿Arhikuekasïni inde ambe eska barku nóteru uaakia manakuarhini? Nómbe, jimbokaksï máru barku sapirhatiicha motoriksï ma jukasïnga ka máteruecha remuechani. Ima enga barkurhu nirani jarhajka úrasïndi i ambe para barku seguiriini manakuarhini. Uékani úni ambe engachi eratsetini jaka, ísïisti komueska tarhiata. Jauatiksï jurhiatikuecha engachi uékani jauaka ísï úni, peru ménichani nómbe. Joperu engachi solu jiántku jánguarhintapiringa engachi jucha uékapiringa, nóchi méni úpiringa úni ambe engachi eratsetini jaka. Peru ísï eska ima enga barkuni páni jarhajka na mámaru ambe úrajka enga no tarhiani jarhajka, juchajtuchi uaaka seguiriini jánguarhintani parachi ísï úni eskachi na eratsetini jaka nájkirukachi no uékani jauaka ísï úni. Ka para ini ambe úni uétarhisïndi eskachi jánguarhintaaka, peruchi kánikua ambe andaaka engachi ísï úska. Ante dechi jorhenguarhini ambe engajtsïni jarhuataaka engachi ísï pʼikuarherani jauaka, ju je orheta mókuntani kurhamarhikua ma engaksï máru úpiringa úkuarhini.

9. ¿Sési jaki eskachi jánguarhintaaka úni ambe ma parachi sánderu marhuakuni Tata Diosïni nájkirukachi no káni uékani jauaka ísï úni?

⁹ Tata Diosï Jeoba uékasïndi eskachi tsípikua jingoni marhuakuaka ka iámu mintsita jingoni (Sal. 100:2; 2 Kor. 9:7). Jimajkani, ¿andichisï jatsi para jánguarhintani sánderu marhuakuni Tata Diosïni engachi no káni uékani jaka ísï úni? Ju je ménderu exeni apostoli Pablueri ejempluni. Ima uandaspti: ʻJi kastigarhisïnga juchiiti kuerpuni ka úsïnga eskarini janhanharhiakaʼ (1 Kor. 9:25-27). Pablu uinhapikuarhintaspti para úni ambe enga Tata Diosï Jeoba erokuarhienga eska ima úpiringa nájkiruka no káni uékani japka ísï úni. ¿Sési pʼikuarheraspi Tata Diosï Jeoba imani ánchikuarhita jingoni enga Pablu ueenga para marhuakuni? ¡Jo! Ka kóndentaspti enga ima xáni jánguarhintapka (2 Tim. 4:7, 8).

10. ¿Ambechi andaa engachi jánguarhintaska úni ambe engachi eratsetini jaka nájkirukachi no káni uékani jauaka ísï úni?

¹⁰ Tata Diosï Jeoba ístu sési pʼikuarherasïndi enga exejka eskachi jánguarhintaxaka úni ambe engachi eratsetini jaka nájkirukachi no káni uékani jauaka ísï úni. ¿Andi? Jimboka ima exesïnga eska nájkirukachi no tsitini jarhajka indeni ambe úni, ísïchi úsïnga jimbokachi xénchasïnga. Tata Diosï Jeoba újchakuraspti apostoli Pabluni ka ístujtsïni újchakuraati juchantsïni engachi jánguarhintaska (Sal. 126:5). Ka engachi exeaka eskajtsïni Tata Diosï Jeoba újchakuraxaka, jamberichi sánderu uékaaka úni ambe engachi eratsetini jaka. Polonia anapu pirenchi ma enga Lucyna arhinhajka, uandantasïndi: “Ménichani no uékasïnga uérani aianhpini ka sánderia engani kuataratini jarhajka. Joperu kʼéri regalu máesti na engani pʼikuarherajka engani na kʼuanhatsentajkia jucheeni”. Ju je exeni iásï ambe engachi uaaka úni engachi no káni uékani jarhajka úni ambe ma.

11. ¿Nénajtsïni jarhuatasïni Tata Diosï Jeoba parachi úni pʼíngukuarhini?

¹¹ Kurhaku je Tata Diosï Jeobani eskaksïni jarhuataaka pʼíngukuarhini. Kʼuiripu ma enga ini kualidadini xarhatajka, úsïndi pʼínguni ambe enga pʼikuarherajka ka ambe enga újka. I kualidadi, no solujtsïni jarhuatasïndi parachi no úni imani ambe enga no sési jaka, ístujtsïni jarhuatasïndi parachi úni ambe enga sési jaka. Ka sánderia engachi úkua jukanchani jarhajka ísï úni o engachi no káni uékani jarhajka ísï úni. Ju je miáni eska espiritu santu úsïnga eskachi uaaka pʼíngukuarhini. Ísï jimbo, engachi kurhakuska Tata Diosï Jeobani eskajtsïni íntskuaka imeeri espiritu, uaakachi xarhatani ini kualidadini enga kánikua jukaparhakueka (Luk. 11:13; Gal. 5:22, 23). David engachi párrafu 3 jimbo uandaka, jánguarhintaspti sánderu someni jandiajku jorhenguarhini Biblieri ambe. Imani kánikua jarhuataspti kómarhini Tata Diosïni. Ima uandasïndi: “Kurhakuspka Tata Diosï Jeobani eskarini jarhuatapiringa pʼíngukuarhini, ka imarini jarhuataspti. Ambakiti programa ma úspka parani jandiajku jorhenguarhini Biblieri ambe ka seguiriixaka ísï úni”.

12. ¿Nénajtsïni jarhuatasïni Eclesiastés 11:4 parachi úni ambe engachi eratsetini jaka?

¹² Asï erokuarhi je eska iámindu ambe sési jauaka. Ini parhakpini jimbo, jamberi no méni niáraati iámu ambe sési jarhani. Engachi erokuarhiska eska iámu ambe sési jauaka, jamberi nóchi méni niáraaka úni ambe engachi eratsetini jaka (arhinta je Eclesiastes 11:4). Erachi ma enga Dayniel arhinhajka, i ambe uandasïndi: “No jauati jurhiatikua ma enga iámindu ambe sési jauaka. Peru engari ueenaska úni ambe ma, sánderu fásiliuati eskari niáraaka úni ambe engari eratsetini jaka”. Ka Uganda anapu erachi ma enga Paul arhinhajka, uandasïndi andichisï no jatsi para tátsekua jurajkuni ambe engachi eratsetini jaka úni: “Engari jánguarhintaska úni ambe engari eratsetini jaka nájkiruka no fásiliuaka, jurajkuni jarhasïngari eskakeni Tata Diosï jarhuataaka” (Mal. 3:10).

13. ¿Nénajtsïni marhuachea sánhani arhini úni ambe engachi eratsetini jaka?

¹³ Sánhani ari je úni ambe engajtsï eratsetini jaka. Jamberichi ménichani no úni jarhajka úni ambe engachi eratsetini jaka jimbokachi ísï exesïnga eska kánikua úkua jukaska. Engajtsï chá ísï nitamakuarhini jaka, ¿andijtsïsï no jánguarhintajki sánhani arini úni ambe engajtsï eratsetini jaka? Pori ejemplu, engajtsï uéjka kualidadi ma xarhatani, uaakajtsï sapichitu ambe úni para indeni kualidadini xarhatani; ka engajtsï uéjka iámu Bibliani arhintani, orhetajtsï uaaka no xáni kánhachani arhintani. Tomáš engachi ueenakuarhu uandaka ini jorhenguarhikua jimbo, kánikua úkua jukanchasïreendi para ma uéxurhini jimbo iámu Bibliani arhintani ísï eska na eratsetini japka. Ima uandasïndi: “Exespka eskani no úpiringa iámu Bibliani arhintani ma uéxurhini jimbo. Ísï jimbo, ménderuni ueenaspka arhintani, joperu iásï ísï eskani ji na úpiringia. Eratsespka eskani ma jurhiatikua jimbo, máru párrafuechantkuni arhiantapiringa ka eskani eratsentapiringa ambe engani jorhenguarhipiringa. Ísï úspka sánhani arhini sánderuni tsitini Bibliani arhintani”. Jimboka Tomáš sánderu tsitisïreengia Bibliani arhintani, ueenaspti sánderu tiempu úrani para indeni ambe úni ka ísï úspti iámu Bibliani arhintani.b

JU JE SEGUIRIINI JÁNGUARHINTANI NÁJKIRUKAKSÏ ÓJKUTAKUECHA JAUAKA

14. ¿Ambe ka ambejtsïni úpirini ójkutani parachi no úni ambe engachi eratsetini jaka?

¹⁴ Ísïisti, nájkirukachi ménichani meru uékani jauaka úni ambe ma, úpirindi úkuarhini ʻambe ma engachi no erokuarhiniʼ jauaka ka inde ambe úni eskachi nóteru tiempu jatsiakia parachi úni ambe engachi uékani jaka (Ecl. 9:11). Ístu, jamberichi úpiringa problema ma jatsini enga uaaka eskachi nóteru uékaakia úni ambe engachi eratsetini jaka ka eskachi nóteru jatsiakia uinhapikua para indeni ambe úni (Prov. 24:10). Ka jimbokachi no perfektueska, úpiringachi úni ambe ma engachi jimbo sánderu úkua jukanchapiringa úni ambe engachi eratsetini jaka (Rom. 7:23). O jamberichi no újka indeni ambe úni jimbokachi kuataratini jarhasïnga (Mat. 26:43). ¿Ambejtsïni jarhuataa parachi seguiriini jánguarhintani?

15. ¿Andichisï seguiriijki jánguarhintani nájkiruka jarhajka ambe ma engajtsïni ójkutajka? (Salmo 145:14).

¹⁵ Miá je eska enga jauaka ambe ma engaksïni ójkutaaka, no arhikuekasïnga eskajtsï nóteru uaakia úni ambe engajtsï eratsetini jaka. Biblia uandasïndi eskachi jamberi uánikua problemeechanchi jatsiauaka. Peru ístujtsïni arhisïndi eska Tata Diosï Jeobaeri jarhuajperata jingoni, uaakachi orhepani uérani ka úni ambe engachi eratsetini jaka (arhinta je Salmo 145:14). Philip engachi primeru párrafurhu uandaka, uandasïndi: “Para ji, ambe enga sánderu jukaparhakueka jindeesti na enga xáni jánguarhintajka parani úni ambe engani uéjka, ka no namuni uelta engani no úkia indeni ambe úni”. Ju je ménderu exeni Davidiiri ejempluni, ima uandasïndi: “Engani no úni jarhajka úni ambe ma, o engareni no sési nicheni jarhajka, no ísï exesïnga inde ambe komu ójkutakua ambe. Sánderu sési, inde amberini jarhuatasïndi parani xarhatakuni Tata Diosï Jeobani na engani xáni xénchajka”. Ísïisti, engachi seguiriijka jánguarhintani nájkirukachi problemeechani jatsiajka, xarhatakuni jarhasïngachi Tata Diosï Jeobani eskachi uékasïnga jaiapanherantani. ¡Tata Diosï Jeoba kánikua sési pʼikuarherajti enga exejka na engajtsï xáni jánguarhintajka úni ambe engajtsï eratsetini jaka!

16. ¿Ambechi uaa jorhenguarhini ima ambeeri engajtsïni ójkutajka?

¹⁶ Jorhenguarhi je ima ambeeri engaksïni ójkutajka. Exe je ambe engaksïni ójkutajka ka kurhamarhikuarhi je: “¿Ambe uaa úni parakarini nóteru ambe ma ójkutaakia?” (Prov. 27:12). Ístu, engajtsï chá no úni jaka ambe engajtsï uéjka nájkirukajtsï mámaru ambe úkia, ¿no sánderu sési japirini eskajtsï mejori máteru ambe uaakia? Parajtsï míteni sintsï chá ini ambe nitamakuarhixaki, eratsenta je sintsï chác meru uaa ambe engajtsï eratsetini jaka. Ka engajtsï no úska úni ambe engajtsï eratsetini japka, jimboka jukari kʼéri ambeeska para chá, Tata Diosï Jeoba no eratseati eskajtsï chá no méni uaaka úni ambe engajtsï eratsetini jaka (2 Kor. 8:12).

17. ¿Andichisï jatsipirini para no mirikurhini ambe engachi xáni úkia?

¹⁷ Miá je ambe engajtsï xáni úkia úni. Biblia uandasïndi eska Tata Diosï “jurhimbitku úsïnga” ka eska ʻno mirikurhiauaka chaari úkuechaniʼ (Ebr. 6:10). Ísï jimbo, chájtu asï mirikurhi je ambe engajtsï xáni úkia. Eratsenta je ambe engajtsï xáni úkia úni, komu Tata Diosïiri amigu úkuarhini, aianhpini ka itsï atakuarhini. Ambe engajtsï xáni úkia ióntki parajtsï sánderu marhuakuni Tata Diosïni, xarhatasïndi eskajtsï uaaka sánderu ambe úni ka eskajtsï niáraaka úni ambe engajtsï iásï eratsetini jaka (Filip. 3:16).

18. ¿Ambejtsï jatsiski para úni engajtsï jamberi uaaka ambe engajtsï eratsetini jaka? (Ístu exe je imajenini).

¹⁸ Ísï eska ima enga barkuni ma páni jarhajka na sési pʼikuarherajka enga niárajka jima enga uékajka, Tata Diosï Jeobaeri jarhuajperata jingoni chájtujtsï uaaka ísï úni eskajtsï na eratsetini jaka. Ístu, uánikua imeecha engaksï barkuni ma páni jarhajka kánikuaksï tsípikuarhisïndi marirhisï nirani. Chájtujtsï uaaka tsípikuarhini engajtsï exeska na engaksïni jarhuatajka Tata Diosï Jeoba ka újchakurani parajtsï úni ambe engajtsï eratsetini jaka (2 Kor. 4:7). Engajtsï no kuatantaska, kʼérati kóntperateechantsï jatsiauaka (Gal. 6:9).