Chájtsï uaaka tsípikua jingoni irekani

1. ¿Ambe arhikuekasïni eskachi “uétarhinchasïnga Tata Diosïni” ka nénajtsïni jarhuatasïni parachi úni tsípikua jingoni irekani?

TSÍPINI pʼikuarherani, no jindeesti ambe ma enga ma ratujku ísï pʼikuarherakuarhijka sino ambe ma engaksï kʼuiripuecha uaaka para méntkisï ísï pʼikuarherani. Enga Jesúsi Juátarhu Arhijtsïkpipka uandaspti ambe enga uétarhijka para ma úni tsípikua jingoni irekani, uandaspti: “Tsípisïndiksï imeecha engaksï exejka eskaksï uétarhinchasïnga Tata Diosïni” (Mat. 5:3, TNM). Ima mítespti eskachi kʼuiripuecha kueraakata jarhaska parachi uékani míteni juchaari Kuerajpirini, Tata Diosï Jeobani ka kʼéri ambe arhini. Indeni ambesï arhikuekajti Biblia enga arhijka eskachi “uétarhinchasïnga Tata Diosïni”. Ka jimboka Jeoba Tata Diosï máeska “enga xáni tsípijka” juchajtu engachi imani marhuakujka uaakachi májkueni tsípikua jingoni irekani (1 Tim. 1:11, TNM).

2, 3. a) ¿Ístu Jesúsi neechani uandaaspi eskaksï uaaka tsípikua jingoni irekani? b) ¿Ambechi exeni jaua ini jorhenguarhikua jimbo, ka andisï uétarhijki eskachi iiri ambe uandaaka?

² ¿Meru uétarhisïni eska iámindu ambe sési jauaka paraka ma uaaka tsípikua jingoni irekani? Nómbe. Enga Jesúsi Juátarhu Arhijtsïkpipka uandaspti ambe ma engajtsïni ísku pakatajka. Uandaspti eskaksï imeecha engaksï “kómu pʼikuarherajka” uaakaksï tsípikua jingoni irekani nájkirukaksï kánikua kulpabli pʼikuarheraaka imeecheeri pekaduechani jimbo o nájkirukaksï no sési nitamakuarhini jauaka. Ístu, uandaspti eskaksï uaaka tsípikua jingoni irekani “imeecha engaksï no sési kánhajka jimbokaksï jurhimbitku jámasïnga” o engaksï no sési arhinhajka jimbokaksï Jesúsiiri chúxapatiiska (Mat. 5:4, TNM, 10, 11). Peru, ¿nema uaa tsípikua jingoni irekani nájkiruka indeni ambe nitamakuarhini jauaka?

³ Jesúsi jorhentpispti eska para ma úni meru tsípikua jingoni irekani no uétarhisïnga eska iámindu ambe sési jauaka juchaari irekuarhu, sino eskachi jorhenguarhiaka Tata Diosïiri ambe ka eskachi imani andarhieraaka (Sant. 4:8). ¿Nénachi uaa ísï úni? Ini jorhenguarhikua jimbochi tanimu ambe exeni jauaka engaksï kánikua jukaparhakueka ka engajtsïni jarhuataaka parachi úni tsípikua jingoni irekani.

JU JE JORHENGUARHINI TATA DIOSÏIRI AMBE

4. ¿Ambechi orheta jatsiski para úni parachi meru tsípikua jingoni irekani? (Salmo 1:1-3).

⁴ PRIMERU: Parachi úni meru tsípikua jingoni irekani jatsiskachi para arhintani ka jorhenguarhini Tata Diosïiri Uandakuani. Jesúsi terukutantaspti Tata Diosïiri Uandakuani tʼirekua jingoni. Kʼuiripuecha ka animaliicha uétarhinchasïndiksï tʼirekua paraksï úni seguiriini irekani. Joperu solu kʼuiripuechajkuchisï újka arhintani Tata Diosïiri Uandakuani, ka uétarhinchasïngachi ísï úni. Jimbosï Jesúsi uandapti: “No solu kurhinda jimbojku uaati irekani ma kʼuiripu, sino iámindu uandakua jimbo enga [Tata] Diosï uandaka” (Mat. 4:4). Ísï jimbo, ju je no jurajkuni eska nitamaaka ni ma jurhiatikua ka jucha no arhintani Tata Diosïiri Uandakuani. Salmista, ísï uandaspti: ‘Tsípikuarhisïndi ima kʼuiripu enga [...] kánikua tsípikuarhijka Tata Diosï Jeobaeri leini jimbo, jurhiakua ka chúrikua arhintasïndi imeeri leini’ (arhinta je Salmo 1:1-3).

5, 6. a) ¿Ambechi uaa jorhenguarhini Bibliarhu? b) ¿Nénajtsïni jarhuatasïni Bibliani arhintani?

⁵ Tata Diosï Jeobajtsïni kánikua xénchasïndi, ísï jimbojtsïnisï arhijti Bibliarhu ambe engachi jatsika para úni parachi tsípikua jingoni irekani. Pori ejemplu, jorhendasïndijtsïni andijtsïnisï kueraa, nénachi uaa imeeri amigueni ka ambechi jatsiski para úni parajtsïni puácheantani juchaari pekaduechani. Ístujtsïni jorhendasïndi ima ambakiti irekueri enga sánderu orhepani jauaka (Jer. 29:11). Míteni ambe engajtsïni Biblia jorhendajka, úsïndi eskachi sési pʼikuarheraaka juchaari mintsitarhu.

⁶ Eskachi na mítekia, Biblia uánikua konsejuechani jataasti engajtsïni jarhuatajka juchaari irekuarhu ka engachi kurhajchaajka, úsïngachi tsípikua jingoni irekani. Ísï jimbo, engachi no sési pʼikuarherani jarhajka problemecha jimbo, ju je arhutani tiempu parachi sánderu arhintani Tata Diosï Jeobaeri Uandakuani ka eratsentani ambe engachi arhintaaka. Jesúsi uandaspti: “Sánderuksï tsípisïndi imeecha engaksï kurhandijka [Tata] Diosïiri uandakuani ka únksï eska na arhijka” (Luk. 11:28).

7. ¿Nénachi uaa sánderu sési úrani juchaari tiempuni engachi arhintani jauaka Tata Diosïiri Uandakuani?

⁷ Engachi arhintani jauaka Tata Diosïiri Uandakuani, ju je arhutani tiempu parachi “aspemuntani” ambe engachi arhintani jauaka. ¿Ambe arhikuekasïni i ambe? Exeakachi ejemplu ma. Ju je eratseni eskajtsïni nema imani tʼirekua úchintaska engachi jucha kánikua anhenchajka, joperuchi jucha jukari uiriikuarhu ísï jámasïnga o uánikua uandanhiateechani jatsiani engachi sóntku arhajka ka nóchi jamberi aspemuntani. Engachi kʼamachajkia, exesïngachi eskachi jukari sóntku tʼireska ka eskachi no úska aspemuntani indeni tʼirekuani. Úpiringachi májkueni úkuarhinchani engachi Bibliani arhintajka. Jamberichi jukari uiriikuarhu arhintajka ka nóchi jamberi úni kurhanguni ambe engachi arhintani jarhajka. Ísï jimbo, ju je arhutani tiempu parachi eranhaskani ambe engachi arhintani jaka, kurhauani kʼuiripuechani enga Biblia uandaajka ka eratsentani ambe engachi arhintajka. Engachi ísï úska, uaakachi sánderu tsípikua jingoni irekani.

8. ¿Néna kumplirixaki ‘jántspiri enga mintsinharhikueka ka jánhastiini’ imeeri ánchikuarhitani? (Ístu exe je notani).

⁸ Jesúsi íntskusti “jántspirini enga mintsinharhikueka” ka jánhastiini ánchikuarhita parajtsïni jorhendani Tata Diosïiri ambe jiáni engachi uétarhinchani japiringa ka ijtsïni kánikua sési jorhendaxati (Mat. 24:45).b Iámindu ambe enga jántspiri újka parajtsïni jorhendani pʼitakata jarhasti Tata Diosïiri Karakatarhu (1 Tes. 2:13). I ambejtsïni jarhuatasïndi míteni na enga eratsejka Tata Diosï Jeoba, ísï eska Biblia na uandajka. Jimbochisï arhiantajka rebistechani Aianhpiri ka ¡Tsínharhi!, ka artikuluechani engaksï jw.org jimbo jaka. Ístuchi prepararikuarhisïnga para tánguarhikuecha engachi entre semana jimbo jatsiajka ka fini de semana jimbo. Ka enga jakaia juchaari idioma jimbo, exesïngachi programani JW Broadcasting^® enga mándani mesi uérajka. Engachi jánguarhintaska úrani iámindu ini ambe, i ambejtsïni jarhuatati parachi úni máteru ambe enga uétarhijka parachi tsípikua jingoni irekani.

JU JE KURHAJCHAANI TATA DIOSÏ JEOBAERI JURAMUKUECHANI

9. ¿Ambe jindeeski máteru ambe engachi jatsika para úni parachi tsípikua jingoni irekani?

⁹ SEGUNDU: Parachi úni meru tsípikua jingoni irekani, jatsiskachi para kurhajchaani Tata Diosï Jeobaeri juramukuechani. Salmueri karari ma uandaspti: “Tsípisïndi ima enga janhanharhijka Tata Diosï Jeobani, ima enga imeeri xanharuecha jimbo jámajka” (Sal. 128:1). Janhanharhini Tata Diosï Jeobani arhikuekasïndi eskachi no uékasïnga imani ambe úni enga ima no jaiapanhentajka (Prov. 16:6). Jimbochisï seguirijka jánguarhintani kurhajchaani Tata Diosïiri juramukuechani engaksï Bibliarhu jaka engaksï uandajka ambe enga sési jaka ka ambe enga no sési jaka (2 Kor. 7:1). Engachi imani ambe úska enga Tata Diosï Jeoba jaiapanhentajka ka nóchi úni imani ambe enga kurhunhijka, uaakachi tsípikua jingoni irekani (Sal. 37:27; 97:10; Rom. 12:9).

10. Eska na arhijka Roma 12:2, ¿ístu ambechi jatsiski para úni?

¹⁰ (Arhinta je Roma 12:2). Jamberi nema míteti eska Tata Diosï Jeoba jatsiska juramukua para uandani ambe enga sési jaka ka ambe enga no sési jaka. Peru ístu, uétarhisïndi eska kurhajchauaka Tata Diosïiri juramukuechani. Ju je exeni ejemplu ma. Jamberi kʼuiripu ma míteti eska gobiernu juramukua jatsiska para uandani na enga xáni uaaka uiriini karru ma karreterarhu, joperu jamberi no uékaati kurhajchaani indeni juramukuechani ka sánderu uinhamu manejarini. Májkueni, juchaari jángua jingoni uaakachi xarhatani sinchi meru exesïni eska kurhajchaani Tata Diosï Jeobaeri juramukuechani marhuasïnga parajtsïni sési nicheni (Prov. 12:28). Dabidi jakajkusïreendi eska inde ambe meru ísïispka, jimboka arhispka Tata Diosï Jeobani: “Jorhendasïngarini imani ambe úni enga tsípikuarhu pájpejka. Jima enga tʼu jaka kánikua sési p’ikuarherakuarhisïndi; chiiti jurhijkandani ladu jimbo kánikua sési pʼikuarherakuarhiati para méntkisï” (Sal. 16:11).

11, 12. a) Engachi uandanhiani jauaka o chkétakuarhitini pʼikuarherani jarhani, ¿ambe jingonchi jatsiski para jingontku jarhani? b) ¿Nénajtsïni jarhuatasïni uandakuecha engaksï Filipusʌ 4:8 jimbo jaka parachi sési erakuni ambe engachi jingoni tsípikuarhiaka?

¹¹ Engachi uandanhiani jarhajka o chkétakuarhitini pʼikuarherani, jamberichi uékaaka úni ambe ma engajtsïni jarhuataaka parachi mirikurhiani juchaari uandanhiateechani, ka inde ambe no no sési jarhasti. Peruchi jatsiska para jingontku jámani, parachi no úni imani ambe enga Tata Diosï Jeoba kurhunhijka (Efes. 5:10-12, 15-17).

¹² Enga Pablu Filipusï anapu kristianuechani karakuapka, arhiaspti eskaksï méntku eratseni japiringa imani ambe enga jurhimbikueka, enga pímbinhasïika, imani ambe enga ambakiti ambe úrpijka ka enga újka eska uékperanhaaka (arhinta je Filipusʌ 4:8). Nájkiruka Pablu no meru indeeri ambe uandani japka enga ma jingoni tsípikuarhijka, imeeri uandakuechajtsïni uaati jarhuatani engachi erakuni jauaka néna tsípikuarhini. ¿Andichisï no újki arini ambe? Engachi erakuni jámaaka pirekuani ma, pelikulani ma, libruni ma o bideojueguechani, ju je kurhamarhikuarhini, ¿jurhimbikua ambe uandasïni, pímbinhasïiski, ambakiti ambe úrpisïni, úsïni eska uékperanhaaka? I ambejtsïni úpirindi jarhuatani exeni nákini jaiapanhentasïni Tata Diosï ka nákini nómbe. Uékasïngachi ísï irekani eskaksï na uandajka Tata Diosï Jeobaeri ambakiti juramukuecha (Sal. 119:1-3). Engachi ísï úska, ambakiti konsiensiachi ma jatsiaka ka uaakachi úni máteru ambe engajtsïni jarhuataaka parachi tsípikua jingoni irekani (Uku. 23:1).

JU JE KʼÉRI AMBE ARHINI TATA DIOSÏNI ANTE DE AMBE UÉJKI

13. ¿Náki jindeeski máteru ambe engachi jatsika para úni parachi tsípikua jingoni irekani? (Juanu 4:23, 24).

¹³ TERSERU: Jatsiskachi para jánguarhintani kʼéri ambe arhini Tata Diosïni ante de ambe uéjki. Jimboka Tata Diosï Jeoba jindeeska juchaari Kueraajpiri, ima jukanchasti eskachi kʼéri ambe arhiaka (Jaŋ. 4:11; 14:6, 7). Ísï jimbo, ambe enga sánderu jukaparhakueka jindeesti kʼéri ambe arhini Tata Diosïni ísï eska ima na uéjka, “eska espiritu na arhiauaka ka jurhimbikua jingoni” (arhinta je Juanu 4:23, 24, TNM). Jatsiskachi para jurajkuni eskajtsïni espiritu santu arhistachiaka parachi ísï kʼéri ambe arhini Tata Diosïni eska Biblia na arhijka. Tata Diosïni marhuakuni, jatsisti para jindeeni sánderu jukaparhakua ambe nájkiruka jima engachi irekani jaka gobiernu no sésikua íntspiaka para aianhpinhani. Iásïksï jukari 100 erachiicha ka pirenchiichaksï ónhakata jarhasti jimbokaksï Jeobaeri testigueska.c Nájkiruka ísïika, sésiksï pʼikuarherasïndi jimbokaksï úsïnga kómarhini Tata Diosïni, jorhenguarhini ka aianguani máteruechani Tata Diosïiri ambe ka imeeri Reinueri ambe. Nájkirukachi no sési arhinhaaka o no sési kánhani, tsípinchi pʼikuarherasïnga jimbokachi míteska eska Tata Diosï Jeoba juchantsïni jingoni jarhaska ka eskajtsïni maiamuntaaka (Sant. 1:12; 1 Ped. 4:14).

EJEMPLU MA ENGA MERU ÍSÏ ÚKUARHIPKA

14. ¿Ambe nitamakuarhispi erachi ma enga Tayikistán anapueka, ka andi?

¹⁴ Jarhastiksï eksperiensiecha engaksï xarhatajka eska úni indeni tanimu ambe engachi exekia, jarhuatasïngajtsïni para tsípikua jingoni irekani ambe uéjkichi nitamakuarhini jarhani. Ju je exeni ambe enga nitamakuarhipka Yovidón Boboyónov tumbi ma enga 19 jatiriika ka enga Tayikistán anapueka. Ima no uékaspti ejersiturhu nirani, ísï jimboksïsï 4 de oktubrini 2019 jimbo, afuersaksï páspti imeo uératini ka uánikua mesichanksï ónhaspti ka ísïksï kámaspti eska no sési úrini ma. Uánikua paisiicha jimbo uéraspti inde notisia ka uandasptiksï eska no jurhimbikua jingoni kánhaspka ka eska atanhaspka jimbokaksï afuersa uékasïreenga eska jukantapiringa uniformeni ka eska juramentu ma úpiringa ejersiturhu. Ísï tátsekua, kastigarinhaspti ka axasptiksï jima engaksï uinhamu ánchitaajka kʼuiripuechani. Peru tátsekua, paisirhu anapu presidenti juramuspti eskaksï jurajkupiringa. Iámu indeni tiempu jimbo enga xáni no sési nitamakuarhipka, Yovidón no méni jurajkuspti Tata Diosïni ka tsípikua jingoni irekaspti. ¿Néna úspi ísï úni? Jimboka no méni jurajkuspka jorhenguarhini Tata Diosïiri ambe.

15. ¿Néna seguiriispi jorhenguarhini Tata Diosïiri ambe Yovidón enga ónhakuarhitini japka?

¹⁵ Enga Yovidón ónhakuarhitini japka seguiriispti jorhenguarhini Tata Diosïiri ambe nájkiruka no jatsipka Bibliani ni publikasionichani ambe. ¿Néna jámaspi para ísï úni? Engaksï erachiicha tʼirekua pákuenga, bolsarhuksï karakusïreendi Biblieri karakata ma para mándani jurhiatikua. Ísï, Yovidón úsïreendi arhintani Bibliani ka eratsentani pauani pauani. Enga uéntapkia kárselirhu, arini konseju íntsaaspti imeechani engaksï nótki xáni kʼérati tsʼéjkukuechani jatsiani jaka: “Jánguarhi je eskajtsï xáni uaaka iásï engajtsï libri jaka parajtsï andarhierani Tata Diosï Jeobani. Ka parajtsï úni ísï úni, kánikua jukaparhakuesti eskajtsï Bibliani arhintaaka ka ístu juchaari publikasionichani”.

16. ¿Ambe sánderu jánguarhintaspi eratseni Yovidón?

¹⁶ Juchaari erachi Yovidón kurhajchaaspti Tata Diosï Jeobaeri juramukuechani. Enbesi de no sési jásï ambe eratseni ka no sési ambe úni, jánguarhintaspti imani ambe eratsentani enga para Tata Diosï kánikua jukaparhakueka. Arhutasïreendi tiempu para Tata Diosïiri kueraakata ambe exeni enga xáni sési jáxeka. Pauani pauani pájaruechaksï tsínharhitasïreendi engaksï ueeneenga pireni, ka chúrikuechani erancheni pakarasireendi para Lunani ka jóskuechani exeani. Uandaspti: “I regaluecha engajtsïni Tata Diosï Jeoba íntskuajka úsïreendi eskani tsípinharhintapiringa ka sésijtsïni pʼikuastantasïreendi”. Engachi jukaparharajka ambe engajtsïni Tata Diosï jorhendajka ka íntskuni, sésichi pʼikuarherasïnga ka inde ambejtsïni uinhaperantasïndi parachi úni tekaantani.

17. Ambe enga 1 Pedru 1:6, 7 uandajka, ¿néna úpirini jarhuatani nemani enga sáno májkueni ambe nitamakuarhini jaka eska Yovidón?

¹⁷ Yovidón ístu orheta peeraspti Tata Diosï Jeobani kʼéri ambe arhini eska ambe uéjki máteru ambe. Mítespti eska kánikua jukaparhakuespka no méni jurajkuni Tata Diosïni. Jesúsi uandaspti: “Chiiti Tata Diosïntkusïri kʼéri ambe arhiaka, ka solu imantkusïri marhuakuaka” (Luk. 4:8). Komandanticha ka sondaduechaksï uékasïreendi eska Yovidón nóteru Jeobaeri testiguepiringia. Joperu ima, chúrikua ka jurhiakua kómarhisïreendi Tata Diosï Jeobani eska jarhuatapiringa paraka úpiringa tekaantani ka no jurajkuni. Nájkiruka no sési kánhapka, Yovidón no jurajkuspti Tata Diosïni. Ísï jimbo, iásï tsípini pʼikuarherasïndia jimboka iásï sánderu mintsikasïngia Tata Diosïni indeni ambe jimbo enga nitamakuarhika ka eska ante deksï ónhani ka atanksï (arhinta je 1 Pedru 1:6, 7).

18. ¿Nénachi uaa seguiriini tsípikua jingoni irekani?

¹⁸ Tata Diosï Jeoba mítesti ambe engaksï kʼuiripuecha uétarhinchajka paraksï tsípikua jingoni irekani. Engachi ini tanimu ambe úska engachi ini jorhenguarhikua jimbo exeka, seguiriuakachi tsípikua jingoni irekani nájkirukachi no sési nitamakuarhini jauaka. Ka ísïchi uaaka uandani: “¡Felisisti ireta enga imeeri Tata Diosï jindeeka Jeoba!” (Sal. 144:15).