“Ini jimboksï míteati iámindu kʼuiripuecha eskajtsï jindeeska juchiiti jorhenguarhitiicha”

1. ¿Ambeksï sánderu tsitisïni uánikuecha engaksï ueenajka tánguarhikuarhu ma nirani? (Ístu exe je fotuni).

JU JE eranhaskani eska temungurhiri ma ueenasïnga tánguarhikuarhu ma nirani. Ískuksï pakarasïndi exeni na engaksï erachiicha sési eroajka ka na engaksï xáni uékperajka. Ka engaksï na kʼuanhatsentani jarhajkia imeecho, uarhiiti arhisïndi uámbani: “Jeobaeri testiguechaksï ménderueniisti eskaksï máteru kʼuiripuecha ka tsitiska imeecha jingoni jarhani”.

2. ¿Andiksïsï máru nóteru marhuakujkia Tata Diosï Jeobani?

² Na engaksï xáni xénchperajka Tata Diosïiri kúnguarhikuarhu, kánikua ambakiti ambeesti. Ísïisti, Jeobaeri testiguechachi no perfektueska (1 Juanu 1:8). Ísï jimbo, engachi sánderu míteajka erachiichani, jamberichi sánderu exeaka ambe engaksï no újka sési úni (Rom. 3:23). Ka máruksï nóteru marhuakusïndia Tata Diosï Jeobani imani ambe jimbo engaksï máteruecha újka.

3. ¿Ambe jimboksï mítenhantapirini jurhimbiti kristianuecha? (Juanu 13:34, 35).

³ Ju je ménderu exeni tekstu nani enga pʼitakata jaka i jorhenguarhikua (arhinta je Juanu 13:34, 35). ¿Ambe jimboksï míteantapirini jurhimbiti Kristueri chúxapatiichani? Uékperakua jimbo ka no jimbokaksï perfektuepiringa. Ístu, Jesúsi no uandaspti: “Ini jimbojtsï míteaka chá eskajtsï jindeeska juchiiti jorhenguarhitiicha”, sánderu sési uandaspti: “Ini jimboksï míteati iámindu kʼuiripuecha eskajtsï jindeeska juchiiti jorhenguarhitiicha”. Ini ambe jingoni, Jesúsi xarhataspti eskaksï imeeri chúxapatiicha ka ístu máteru kʼuiripuecha míteantapiringaksï jurhimbiti kristianuechani jimbokaksï mintsita jingoni uékperapiringa.

4. Jamberiksï máru, ¿ambe kurhamarhikuarhijki?

⁴ Máru kʼuiripuecha engaksï no Jeobaeri testigueka, jamberiksï kurhamarhikuarhijti: “¿Andiksïsï uékperakua jimbo mítenhantapirini jurhimbiti kristianuecha? ¿Néna xarhataspi Jesúsi eska xénchaasïreenga imeeri apostoliichani? ¿Ka néna uaa májkueni úni eska Jesúsi?”. Ka engachi Jeobaeri testiguekia ístu sési jauati eskachi kurhamarhikuarhiaka indeni ambe. Ísï úni, jarhuataatijtsïni sánderu uékpini ka sánderia jiáni engaksï máteruecha imani ambe uaaka engajtsïni no sési pʼikuastaaka (Efes. 5:2).

¿ANDIKSÏSÏ UÉKPERAKUA JIMBO MÍTENHANTAJKI JURHIMBITI KRISTIANUECHA?

5. ¿Ambe arhikuekaxapi Jesúsi ixú Juanu 15:12, 13 jimbo?

⁵ Jesúsi uandaspti eskaksï imeeri chúxapatiicha kánikua uékperapiringa (arhinta je Juanu 15:12, 13). Jesúsi ini ambe juramukuaspti: “Eskajtsï uékperaaka máteru ka máteruni jingoni májku jásï eskaksïni ji na uékaka”. ¿Ambe arhikuekaxapi? Jesúsi mismu uandaspti eskaksï kristianuecha jatsiska para kánikua xénchaani máteruechani, ka enga kʼuaniaka, íntspini tsípikuani máteru kristianu jimbo.b

6. ¿Néna xarhatasïni Tata Diosïiri Karakata eska kánikua jukaparhakueska uékpini?

⁶ Tata Diosïiri Karakata jorhentpisïndi na enga xáni jukaparhakueka uékpini. Uánikuechaksï uandasïndi eskaksï kánikua tsitiasïnga ini karakateechani: “Tata Diosï jindeesti uékperakua” (1 Juanu 4:8). “Uékaakari máteruni eska tʼujkumindu na uékakuarhijka” (Mat. 22:39). “Ima enga uékpijka, puátspentasïndi uánikua pekaduechani” (1 Ped. 4:8). “Uékperakua no méni kʼamaraati” (1 Kor. 13:8). I bersikuluecha ka ístu máteruecha, uandasïndiksï na enga xáni uétarhijka eskachi uékpiaka.

7. ¿Andisï Satanási no újki úni eskaksï kʼuiripuecha májku kʼéri jauaka ka eskaksï uékperaaka?

⁷ Uánikua kʼuiripuechaksï kurhamarhikuarhisïndi: “¿Néna uaa míteni náki relijioni jurhimbitiiski? Iáminduechaksï uandasïndi eskaksï jurhimbikua ambe jorhentpisïnga, peruksï táchani jásï ambe jorhentpisïndi Tata Diosïiri ambe”. Satanási ústi eskaksï uánikua relijioni no jurhimbitiicha jauaka ka inde ambe úsïndi eskaksï kʼuiripuecha nóteru míteakia náki relijionisï jurhimbitii. Joperu ambe enga Satanási no újka úni jindeesti eskaksï kʼuiripuecha uékperaaka. Tata Diosï Jeobajkusï újti indeni ambe úni, jimboka ima úsïnga eska uékperanhaaka. Imeechajkuksïsï újti sési jimbo uékperani enga Tata Diosï íntsaajka imeeri espiritu ka enga kóndiajka (1 Juanu 4:7). Jimbosï Jesúsi uandapti eskaksï uékperakua jimbo mítenhantapiringa imeeri chúxapatiicha.

8, 9. ¿Néna jarhuataaskia uánikua kʼuiripuechani engaksï exejka na engaksï xáni xénchperajka Jeobaeri testiguecha?

⁸ Ísï eska Jesúsi na uandapka, uánikua kʼuiripuechaksï ústia míteantani jurhimbiti kristianuechani jimbokaksï xénchperasïnga. Pori ejemplu, erachi ma enga Ian arhinhajka, miásïndi enga ueenapka kʼéri tánguarhikuarhu ma nirani estadiurhu ma enga no iauani pakareenga imeo uératini. Máru mesiicha antesi, imani mismu estadiurhu jimbo niraspti chʼanakua ma exeni. Ima uandantasïndi: “Kʼéri tánguarhikuarhu kánikua ménderueniispti. Jeobaeri testiguechaksï kánikua sési kámpisïreendi ka sésiksï mórhekuarhitini nirasïreendi ka imeecheeri sapiichaksï kurhandirasïreendi”. Ístu uandasïndi: “Ambe engareni sánderu ísku pakatapka, jindeespti eskaksï iáminduecha tsípixapka ka eskaksï sési pájperasïreenga, ji indeni ambesïni meru uékani japka. No miásïnga ambe enga uandanhapka diskursuecharhu, joperu no méni mirikurhiaka na engaksï jámeenga Jeobaeri testiguecha”.c Na engaksï jámeenga erachiicha kʼéri tánguarhikuarhu, jindeesti jimbokachi jucha kánikua xénchperasïnga. Ka jimbokachi kánikua xénchaasïnga juchaari erachiichani, sésichi kaasïnga ka respetu jingoni.

⁹ Erachi ma enga John arhinhajka, ístu ísku pakaraspti enga ueenapka Kʼumanchikua Reinuerirhu ma nirani. Kánikua tsitispti na engaksï xáni sési kámapka iáminduecha ka na engaksï xáni sési jámeenga enga uandapka: “Na engaksï xáni uékperakua jingoni kámbereenga úspti eskani seguru japiringa eska i jindeeska jurhimbiti relijioni”.d I ka máteru eksperiensiechaksï xarhatasïndi eskaksï Jeobaeri testiguecha jindeeska jurhimbiti kristianuecha.

10. ¿Kánchi úpirini úkua jukanchani uékperakua jingoni kámpini? (Ístu exe je notani).

¹⁰ Ísï eskachi ueenakuarhu na uandaka, no ma juchaari erachi perfektuesti. Jamberiksï uaati ambe ma oksï uandani ambe ma engajtsïni no sési pʼikuastaaka (Sant. 3:2).e Enga inde ambe úkuarhiska, úpirindi úkua jukani xarhatani eskachi uékpisïnga. ¿Ambejtsïni jarhuataa uékperakua xarhatakuani? Ju je exeni Jesúsiiri ejempluni (Juanu 13:15).

NÉNA XARHATASPI JESÚSI ESKA XÉNCHAASÏREENGA IMEERI APOSTOLIICHANI

11. Imani ambe jingoni engaksï úpka Santiagu ka Juanu, ¿ambeksï xarhataspi? (Ístu exea je imajeniicha).

¹¹ Jesúsi no erokuarhisïreendi eskaksï imeeri chúxapatiicha iámindu ambe sési úpiringa. Sánderu sési, jarhuataaspti paraksï mójtakurhini ka ísïksï úni jaiapanherantani Tata Diosï Jeobani. Ma xanhari, apostoli Santiagu ka Juanu arhisptiksï imeeri amambani eska kurhakupiringa Jesúsini paraka ambakiti lugarirhu ma peeraapiringa imeeri Reinurhu (Mat. 20:20, 21). Íksï tsimani apostoliicha xarhataspti eskaksï kʼéramakuarhisïreenga (Pro. 16:18).

12. ¿Andichisï míte eskaksï no Santiagu ka Juanujkusï no sési ambe úpka?

¹² Peru ima xanhari no solu Santiagu ka Juanujkuksïsï no sési ambe úpti. Ju je exeni ambe engaksï úpka máteru apostoliicha. Engaksï máteru diesi apostoliicha kurhaapka indeni ambe, “úndasptiksï ikiakuani imani tsimani ermanuechani” (Mat. 20:24). ¿Úsïnchi eranhaskani na engaksï arhijperapka ima xanhari? Jamberiksï máteru apostoliicha arhipka Santiaguni ka Juanuni: “¿Neeskijtsï chá parajtsï ambakiti lugariichani kurhajkuarhiani jarhani Reinurhu? Nójtsï chájkusï xáni ánchikuarhika Jesúsi jingoni, juchajtuchi jukanchaska parachi ambakiti lugari ma jatsini ísï eska chá”. Ambe uéjki úkuarhini, ima xanhari apostoliichaksï nóteru uékperakua jingoni kámberasptia.

13. ¿Néna kaaspi Jesúsi imeeri apostoliichani nájkirukaksï ima no iámindu ambe sési ueenga? (Mateu 20:25-28).

¹³ ¿Ambe úspi Jesúsi? Ima no ikiaspti. No uandaspti eska jirinhantaapiringa máteru achamasïichani engaksï sánderu kaxumbitiipiringa, engaksï méntkisï xénchperakua jingoni kámberapiringa ka engaksï sánderu ambakiti kʼuiripuepiringa paraksï imeeri apostoliini. Sánderu sési, Jesúsi tekaantskua jingoni uandontskuarhekuaspti jimboka mítespka eskaksï imeecha ambakiti mintsita ma jataspka (arhinta je Mateu 20:25-28). Nájkirukaksï Jesúsiiri apostoliicha mémindu arhirperani jarheenga né enga jindeepka sánderu kʼéri ambe, ima méntkisï sési kaaspti ka uékperakua jingoni (Mar. 9:34; Luk. 22: 24).

14. ¿Náksï eratsesïreeni kʼuiripuecha jiáni engaksï Jesúsiiri apostoliicha tʼarhexepka?

¹⁴ Ístu, Jesúsi mítespti na engaksï eratseenga kʼuiripuecha jiáni engaksï apostoliicha tʼarhexepka (Juanu 2:24, 25). Imani tiempu jimbo, relijioniiri orhejtsïkutiichaksï kánikua jukaparharasïreendi enga nema jatsikuarheriipiringa o juramukua jatsini (Mat. 23:6; terukutanta je bideu jingoni Asientos del frente en la sinagoga, enga nota de estudio de Mateo 23:6, TNM jimbo jaka). Asta Judá anapu relijioniiri orhejtsïkutiichaksï sánderu kʼéri ambe exekuarhisïreendi eska máteruecha (Luk. 18:9-12).f Jesúsi mítespti eskaksï imeeri apostoliichajtu úpiringa májkueni eratseni eska inde kʼuiripuecha ka sánderuksï kʼéri exekuarhini eska máteruecha (Prov. 19:11). Ima no erokuarhisïreendi eskaksï imeecha iámindu ambe sési úpiringa, nijtu ikiaueni engaksï imeecha no sési ambe ueenga. Ima mítespti eskaksï ambakiti mintsita ma jataspka, ísï jimbo tekaantskua jingoni jarhuataaspti paraksï kénditani inde jásï eratsekuani ka paraksï kaxumbitiini ka uékpitiini.

¿NÉNACHI UAA MÁJKUENI ÚNI ESKA JESÚSI?

15. ¿Ambechi jorhenguarhisïni ima ambeeri enga Santiagu ka Juanu nitamanchapka?

¹⁵ Uaakachi uánikua ambe jorhenguarhini ima ambeeri enga Santiagu ka Juanu nitamanchapka. No sési jarhaspti engaksï imeecha ambakiti lugari ma kurhajkuarhipka Reinurhu, peru ístu no sési jarhaspti engaksï máteru apostoliicha jurajkupka eska inde ambe úpiringa eskaksï nóteru sési pájperapiringia. Nájkiruka ísï úkuarhipka, Jesúsi sési kaaspti ka uékperakua jingoni 12 apostoliichani. ¿Ambechi jorhenguarhisïni? Uétarhisïndi eskachi exeaka na engachi jámajka jucha engaksï máteruecha no újka sési úni ambe ma. Ísï jimbo, engachi no sési pʼikuarherani jauaka jimbokajtsïni erachi ma úchiska ambe ma, ju je kurhamarhikuarhini: “¿Andisïni xáni ikiani jaki? ¿Jísïni jatsi parani sánderu sési úni ambe ma? ¿No sési nitamakuarhini jaki erachi? Nájkirukani jatsipiringa para ikiani jarhani, ¿no sánderu sési jarhaski eskani uékperakua jingoni kámaaka ka puákuntani?”. Engachi méntkisï uékperakua jingoni kaaska máteruechani, xarhatani jauakachi eskachi jurhimbiti kristianueska.

16. ¿Ambe máteru ambechi uaa jorhenguarhini Jesúsiiri ejemplu jingoni?

¹⁶ Ístu, Jesúsiiri ejemplujtsïni xarhatachesïndi eskachi jánguarhintaaka kurhangukuani juchaari erachiichani (Prov. 20:5). Ísïisti, Jesúsi úsïreendi exeni ambe enga jarheenga kʼuiripuecheeri mintsitarhu, peruchi jucha no úsïnga ísï úni. Peru ambe engachi kʼóru uaaka úni jindeesti tekaakuantani juchaari erachiichani engaksï no uaaka sési úni ambe ma (Efes. 4:1, 2; 1 Ped. 3:8). Ka ambe ma engajtsïni jarhuataaka jindeesti sési míteani juchaari erachiichani. Ju je exeni ejemplu ma.

17. ¿Néna jarhuataspi sirkuitueri orhejtsïkutini ma enga jánguarhintapka sánderu sési míteni erachini ma?

¹⁷ Sirkuitueri orhejtsïkuti ma enga África oriental marhuani japka, mítespti erachini ma enga ísï xarhareenga enajki no nema jingoni ueeni sési pájperani. ¿Ambe úspi sirkuitueri orhejtsïkuti? Ima uandantasïndi: “Enbesi de no uandajpani, jánguarhintaspka sánderuni sési míteni”. Ísï, úspti míteni eska erachi xásïispka imani ambe jimbo enga nitamakuarhipka. Sirkuitueri orhejtsïkuti uandasïndi: “Engani mítepka na enga xáni jánguarhintapka para nóteru ísï jámania eska ióntki ka na enga xáni mójtakurhipkia, úspti eskani kánikua janhanharhipiringa ka niáraspka kánikua sési pájperani imani jingoni”. Engachi jánguarhintaska sánderu sési míteani erachiichani ka kurhangukuani, sánderu fásiliuati eskachi uékperakua jingoni káuaka.

18. ¿Ambechi uaa kurhamarhikuarhini engajtsïni erachi ma no sési pʼikuastaka? (Proverbios 26:20).

¹⁸ Jamberichi uékaaka uandontskuarheni imani erachi jingoni engajtsïni no sési pʼikuastaka. Peru ante dechi indeni ambe úni, sési japirindi eskachi kurhamarhikuarhiaka: “¿Sési míteski iámindu ambe enga úkuarhika?” (Prov. 18:13). “¿Uékaparini ísï úski?” (Ecl. 7:20). “¿Ji, májkueni ambe úski ióntki?” (Ecl. 7:21, 22). “Engani uandontskuarheaka erachi jingoni, ¿sánderuni kʼéri uaa ka eska sési peentani problemani?” (arhinta je Proverbios 26:20). Engachi arhutaska tiempu parachi eratseantani ini kurhamarhikuechani, jamberichi sánderu sési exeaka uékperakua xarhatani ka mirikurhini ambe enga úkuarhika.

19. ¿Ambechi eratsetixaki úni?

¹⁹ Jeobaeri testiguechachi xarhatasïnga eskachi jindeeska jurhimbiti Kristueri chúxapatiicha. Peru, ¿nénachi uaa mándani arhini xarhatani eska i ambe ísïiska? Engachi mintsita jingoni xénchaaska juchaari erachiichani nájkirukaksï no iámindu ambe sési uaaka. Ka indeni ambe jimbo, jamberiksï máteru kʼuiripuecha míteati náki jindeeski jurhimbitku relijioni ka uékaatiksï juchantsïni jingoni kʼéri ambe arhini Tata Diosï Jeobani, enga kánikua uékpitiika. Ísï jimbo, ju je eratsetini jarhani ima jásï uékperakua xarhatani enga jimboksï mítenhantajka jurhimbiti kristianuecha.