“Ní orheta puátantani chíti ermanutini”

Eranhaska je eskajtsï Galilea irekaska, Jesusiri tiempu jimbo. Niraskajtsï asta Jerusaleni para Kabaniecheri Kʼuínchikua úntani. Ístuksï nirasti uánikua máteru kompanieruecha uápurisï anapuecha engaksï májkueni ambe jakajkujka eska cha, ka iretarhu uánikua jánhaxati. Ka uékasïngajtsï kéjtsïtakua ma úkuni Jeobani. Uénasïngajtsï xanharani xanharu sapirhaticharhisï engaksï iretarhu jaka enga uánikua kʼuiripu nirani jaka templurhu ka chibuntsï ma páxaka. Engajtsï niárajkia templurhu, no nema jatanhesïndi; uánistiksï engaksï ístu uéjka kéjtsïtakua ma úni. Ka iásï kʼóru chári turnuestia parajtsï íntskuni saserdotichani chári chibuni. Peru engajtsï na íntspeni jámkia, miásïngajtsï erachini ma engajtsï útsperaka ambe ma ka enga úpiringa kʼuiripuecha jingoni jarhani o máteru naniisï iretarhu. Jesusi explikarisïndi ambe engajtsï jatsipiringa para úni (arhinta je Mateu 5:24). ¿Ambejtsï úpirini cha ka erachi enga no sési pʼikuastanhaka para úni ambe enga Jesusi juramupka ka pínandikua jatsini? Markari je opsionini enga sési jaka tsimani listeri.

AMBE ENGAJTSÏ CHA ÚPIRINGA

• Uandontskuarhini erachi jingoni, solu jiáni engajtsï eratsiaka, eska erachi jatsiska rasoni ma para ikiani jarhani.

• Afuersa uékani eska jiókuarhiaka eska no sési jarhaska, engajtsï exeaka eska ima sáni ambe jimbojku no sési pʼikuarherasïnga o eska imajtu kulpa jatsiska.

• Jingontku kurhajchani ka nájkirukajtsï no iámu ambe kurhanguaka ka nójtsï uékaparini no sési úkuni, mintsita jingoni kurhaku je eskaksïni puáchentaaka.

AMBE ENGA ERACHI JATSIPIRINGA PARA ÚNI

• Kúnguarhikuarhu anapu erachichani aianguani, ambe engajtsï úkuka paraksï apoiarini.

• Arhinharhikunksïni ambe enga úkuarhika, uandantaparini iámindu ambe ka afuersa uékani eskajtsï jiókuarhiaka eska cháriska kulpa.

• Exeni eskajtsï kaxumbikua ka tsʼiuekua uétarhinchaspka para imani jingoni uandontskuarhini ka mintsita jingonksïni puáchentani.

Nájkirukachi iásï no uájka kéjtsïtakuechani para Tata Diosïni kómarhini, ¿ambe uaxastaspi Jesusi parachi sési pájperani juchari erachicha jingoni ka kómarhini Tata Diosïni ísï eska ima na jaiapanhintajka?