¿Ambe uandasïni Biblia na engachi jatsika para íntspini ambe ma?
Ambe enga Biblia uandajka
Biblia uandasïndi eskachi listu jauaka parachi tsípikua jingoni intsïmbini. Engachi ísï újka, no solu imani kʼuiripuni marhuakusïndi engachi íntskujka, sino ístu juchantsïni (Proverbios 11:25; Lukasʌ 6:38). Jesúsi uandaspti: “Ma sánderu sési pʼikuarherasïndi intsïmpini ka eska intsïmbinhani” (Ukuecha 20:35).
¿Káni sési jarhaski íntspini?
Enga ma tsípikua jingoni íntspijka kánikua marhuasïndi. Biblia uandasïndi: “Eska mándani arhini uaaka ambe enga uandarini jakaia imeeri mintsitarhu ka eska no jámaaka pʼamondakuarhini nijtu afuersa íntspini, jimboka Tata Diosï xénchasïnga imani kʼuiripuni enga tsípikua jingoni íntspijka” (2 Korintu 9:7).
Tata Diosï uékasïndi eskachi imeeri marhuaricha mintsita jingoni íntspiaka (Santiagu 1:27). Engachi jarhuataajka imeechani engaksï uétarhinchani jarhajka, Tata Diosïnchi jarhuatani jarhasïnga ka ima ísï exesïndi eskajtsïni káncheni jarhasïnga indeni ambe jimbo, jimbokachi tsípikua jingoni íntspisïnga (Proverbios 19:17). Biblia uandasïndi eskajtsïni Tata Diosï maiamuntaaka (Lukasʌ 14:12-14).
¿Káni no sési jarhaski íntspini?
Engachi interesi jimbo íntspijka. Pori ejemplu:
Parachi ísku pakataani máteruechani (Mateu 6:2).
Parachi juchajtu intsïnhani ambe ma (Lukasʌ 14:12-14).
Sentabu ambe íntspini parachi pʼímutantskata uérani (Salmo 49:6, 7).
Engachi imani úkuechani ka pʼindekuechani apoiariuajka enga Tata Diosï no jaiapanhentajka. Por ejemplu, no sési japirindi nemani íntskuni sentabu para apostarini, kauini o drogarikuarhini (1 Korintu 6:9, 10; 2 Korintu 7:1). Ístu no sési japirindi íntskuni sentabu imani enga úpiringa ánchikuarhini, joperu enga no uékajka (2 Tesalonika 3:10).
Engachi jukari íntsaapiringa máteruechani ka nóteru andangunia para juchaari familia. Biblia uandasïndi eska familieri orhejtsïkuti jatsiska para íntskuni imeeri familiani ambe enga uétarhinchajka (1 Timoteo 5:8). No sési japirindi eskaksï imeeri familiarhu anapuecha niárapiringa kueratanchani ambe ma jimboka familieri orhejtsïkuti máteruechani íntsaani jarhasïnga. Ístu Jesúsi uandaspti eskaksï no sési úxapka imeecha engaksï no uékeenga jarhuataani taati jémbeechani engaksï jatiripkia, jimbokaksï uandasïreenga eskaksï imeecheri jatsikuarhekua ambe ‘intsïmperata máespkia para Tata Diosï’ (Markusʌ 7:9-13).