Ambe enga kurhanguarhijka ima enga arhintajka

Ambe enga uandajka Galasia 5:22, 23 jimbo, ¿jindeski iámu ambe “enga espiritu santu úrpijka”?

Ini karakata jimbo, uandasïndi nuebi ambe enga kristianu ma jatsika para xarhatani. Karakata arhisïndi: “Enga espiritu santu úrpijka, jindesti para uékpini, ka tsípini, ka pínandikua jatsini, ka ióni tekaantani, ka sési kámpini, ka ambakini, para Diosïni mintsikani, ka kaxumbini, ka pʼíngukuarhini”. Peru no i ambejkuesti enga Tata Diosïri espiritu újka eskachi xarhataaka.

Ju je exeni ambe enga apostuli Pablu karapka ante de ini ambe karani: “Mintsita tamapueri úkuecha engaksï jindeka: Ísku jándi úkuarhini, ka ikichakueni jásï ambe eratseni, ka jurajkutakuarhini para nánterkueni jámani, idoluechani kómarhiani ka sïkuamikueri ambe úni, ka ikiatspini, ka atajpikuekani, ka selosueni, ka sóntku ikiani ka arhinchpini, ka jandiajku juramukuarhini, ka nómindu pájperani máteru ka máteruni jingoni, ka enbidiarpini, ka uandikpinchani, ka kauinchani, ka eskandalu úni jámani, ka iámindu i jásï ambe úni” (Gal. 5:19-21). Pablu ístu úpirindi uánikua máteru ambe uandani enga juchari “mintsitecharhu jaka” (Kol. 3:5). Májkueni ambe úkuarhisïndi imani ambe jingoni enga apostuli Pablu uandapka eskachi jatsiska para úni, enga Galasia 5:22, 23 jimbo uandajka. Jimajkani Pablu no uandaxapti iámindu ambe enga xáni espiritu santu úrpijka.

Niáraskachi ísï kurhanguni engachi terukutantajka ambe enga Galasia uandajka imani ambe jingoni enga Pablu karakupka Efesu anapu kúnguarhikuani, enga arhiapka eska ambe enga tʼíntskua úrpijka, jindeska ambakitiini iámindu ambe jimbo, jurhimbitku jámani ka jurhimbitku uandani (Efes. 5: 8, 9, TNM). Eskachi na exejka, ambakitiini, jurhimbitku jámani ka jurhimbitku uandani ambe máesti enga tʼíntskua úrpijka, peru ístu jindesti ambe enga espiritu santu úrpijka. Ísï jimbo, Pablu úpirindi karani jurhimbitku jámani ka jurhimbitku uandani ixu Galasia 5:22, 23 jimbo, peru no ísï úspti.

Ístu, Pablu arhispti Timoteuni eska jánguarhintapiringa arini seisi ambe xarhatani: “Jurhimbitku jámani, ka janhanharhini Diosïni, ka mintsikani imani, ka uékpini, ka tekaantani, ka kaxumbini” (1 Tim. 6:11). Solu tanimu ambe uandasïndi enga imani lista jimbo jaka enga espiritu santu úrpijka —mintsikani Tata Diosïni, uékpini ka kaxumbini—. Peru Timoteu ístu uétarhinchapirindi espiritu santu para xarhatani máteru ambe enga ístu Pablu uandapka: jurhimbitku jámani, janhanharhini Diosïni ka tekaantskua (terukutanta je Kolosasi 3:12; 2 Pedru 1:5-7 jingoni).

Jimajkani, Galasia 5:22, 23 no uandasïndi iámindu ambe enga kristianu ma jatsika para xarhatani Tata Diosïri espiritueri jarhuajperata jingoni. I espiritujtsïni uáti jarhuatani parachi imani nuebi kualidadichani xarhataani. Peruchi ístu uáka máteru ambe xarhatani parachi úni ambakiti kristianu máeni ka jimbanhintanchi “ísï eska Diosï na kuerajpejka, ka kaxumbini ka pímbinhaxentani ísï eska Diosï na uéjka” (Efes. 4:24, Táta Diósïri Uandakua Tata Jesukristueri Aiatsperakua).