¿Andichisï kómu nitamakuarhijki, tʼarhepini ka uarhini?
Juchaari Kuerajpirijtsïni ísï exesïndi eska imeeri uájpeecha, jimbosï no uéjti eskachi kómu nitamakuarhiaka. Jiájkani, ¿andisï xáni kómu nitamakuarhinhani jaki?
Primeru kʼuiripuecheri kulpa jimbo
“Eska pekadu na juka parhakpinirhu, máechakua kʼuiripuni jimbo ka pekaduni jimbo uarhikua, ka ísï uarhikua pakarani para iámindu kʼuiripuecha” (ROMA 5:12).
Tata Diosï kueraaspti orheta kʼuiripuechani, Adáni ka Ebani, eratsekua ka kuerpu ma jingoni engaksï perfektuepka. Ka Echerirhu ireraspti sési jásï lugari ma jimbo enga arhinheenga jardini de Edéni. Arhiaspti eskaksï úpiringa mámaru jásï frutuni arhani enga jardinirhu jukapka, joperu eskaksï máechakueri no úpiringa akuni. Joperu Adáni ka Eba, arhasptiksï imani engaksï arhinhapka eskaksï no apiringa ka ísïksï niáraspti pekarini (Génesis 2:15-17; 3:1-19). Nóksï kurhajchaspti Tata Diosïni, jimbosï ima petaantapti jardinirhu, Adáni ka Ebani. Jima uératinksï úndaspti kánikua kómu nitamakuarhini. Sánderu orhepani, kánguarhiasptiksï uájpeechani ka imeechajtuksï kánikua kómu nitamakuarhispti. Iáminduechaksï tʼarhepispti ka uarhini (Génesis 3:23; 5:5). Jimbochisï juchajtu pʼamenchajka, tʼarhepini ka uarhini, jimbokachi Adáni ka Ebaeri uájpeeska.
No ambarhati espirituecheri kulpa jimbo
“Iámindu parhakpini anapuecha Noambakitiri juramukua jimbo jarhas[ti]” (1 JUANU 5:19).
Noambakiti, Satanasisti, ánjeli ma enga no kurhajchapka Tata Diosïni (Juanu 8:44; Jaŋaskuecha [Apocalipsis] 12:9). Sánderu orhapatini, máteru ánjelichajtuksï niárapti Satanasi jingoni úkuarhini ka ísïksï niáraspti demoniueni. I noambarhati espirituechaksï úrasïndi imeecheri uinhapikuani paraksï támisï jánhastaani kʼuiripuechani ka paraksï kʼuiripuecha no marhuakuni Tata Diosïni, astaksï úsïndi eskaksï kʼuiripuecha no sési jásï ambe niátaaka (Salmo 106:35-38; 1 Timoteo 4:1). Satanasi ka demoniuechaksï kánikua tsitisïndi úni eskachi jucha kómu nitamakuarhiaka.
Engachi no sési ambe erakujka úni
“Iámindu ambe enga ma kʼuiripu juskaaka, indeni ambemindu pʼikuntaa[ti]” (GALASIA 6:7).
Ménichanisïchi kómu nitamakuarhisïnga pekadueri kulpa jimbo ka jimboka Satanasi úsïnga eskachi no sési ambe uaaka. Joperu ménisï, jindeesïndi jimbokachi jucha mismu erakusïnga no sési ambe úni ka indeni ambe jimbochi kómu nitamakuarhini. Ísï eskajtsïni na sési nichejka engachi ambakiti ambe újka, ístujtsïni no sési nichesïndi engachi imani ambe újka enga no sési jaka o engachi no sési erakujka ambe ma. Pori ejemplu, taati ma enga jurhimbikua jingoni jámajka, enga ánchikuarhirijka ka enga xénchajka imeeri familiani, uaati eska imeeri familia tsípikua jingoni irekaaka. Joperu, enga chʼanaaka sentabu jimbo, kauicheeni o xépitini, uaati eska imeeri familia no ma ambe jatsikuarheaka. Jimbosï xáni sésiiti úni ambe enga juchaari Kueraajpiri uandajka, jimboka ima uékasïnga eskachi ambakiti ambe jatsikuarheaka, komueska kánikua “pínandikua” (Salmo 119:165).
Jimbokachi irekaxaka “últimu jurhiatikuechani jimbo”
“Últimu jurhiatikuechani jimbo [...] kʼuiripuecha solu pendienti pákuarhiati para imajkumindu[ksï] sési uérani ka jukari jatsikuarhekuekanksï [...], nóksï janhanharhia[uati] taati jémbeechani, [...] no ma ambe jimboksï pʼíngukuarhiati, sino no sési kámpinksï ka nóminduksï jaiapanhentani ambakiti ambe” (2 TIMOTEO 3:1-5).
Ini jurhiatikuecha jimbo, uánikua kʼuiripu ísï jámasïndi eska na uandajka i profesia ka i ambe xarhatasïndi eskachi “últimu jurhiatikuechani jimbo” irekaxaka. Ístu, Biblia uandaspti eska ini jurhiatikuecha jimbo, japiringaksï guerrecha, kʼarhingua, kʼérati jenchekuecha ka pʼamenchakuecha (Mateu 24:3, 7, 8; Lukasʌ 21:10, 11). Uánikua kʼuiripuechaksï no sési nitamakuarhisïndi ka uarhini ini ambe jimbo.