SEMANA 37
Ju je kurhajchani Jeobani
“¿Andichisï no sánderu janhanharhia” Tátini? (EBR. 12:9).
PIREKUA 9 ¡Jeoba juchari Juramutisti!
AMBE ENGACHI EXEAKAa
1. ¿Andichisï jatsi para Jeobani kurhajchani?
JATSISKACHI para Jeobani kurhajchani. Ima jindesti juchari Kuerajpiri ka jimbojtsïnisï újti arhini ambe engachi jatsika para úni (Jaŋ. 4:11). Peru sánderu jukaparhakua ambe engachi jimbo jatsika para kurhajchani, jindesti jimboka ima sánderu ambakiti juramuti máeska. Desde iónisïa, uánikua kʼuiripuechaksï juramukuastia máteruechani. Peru no ma jarhasti enga ísïka eska Jeoba, enga sánderu jánhaskatiika, uékpitiini, ka pʼamojpitiini (Éx. 34:6; Rom. 16:27; 1 Juanu 4:8).
2. ¿Andichisï jatsi para Jeobani kurhajchani eska na arhijka Ebreu 12:9-11?
2 Jeoba uékasïndi eskachi kurhajchaaka jimbokachi xénchasïnga ka jimbokachi ísï exesïnga komueska Táti uékpiti ma ka no jimbokachi chérhisïnga. Pablueri karta enga ebreu anapuechani karakuapka, uandasïndi eskachi jatsiska para kurhajchani juchari Tátini jimbokajtsïni ima jorhendasïnga “ambe engajtsïni sési uérachiaka” o marhuachini (arhinta je Ebreu 12:9-11).
3. a) ¿Nénachi xarhatasïni eskachi kurhajchasïnga Jeobani? b) ¿Náki kurhamarhikuechanchi mókuantaua?
3 Kurhajchasïngachi Jeobani engachi jánguarhintajka iámindu ambe ísï úni eska ima na uandajka ka no imani ambe engachi jucha eratsijka eska sési jarhaska (Prov. 3:5). Engachi mítejka na enga jásï Tata Diosï máeka, sánderu fásilisïndi kurhajchani, jimboka iámindu ambe enga ima újka xarhatasïnga na enga jásïka (Sal. 145:9). Engachi sánderu sési mítejka Jeobani, sánderuchi xénchasïnga. Ka engachi xénchajka, nóchi uétarhinchasïnga eskachi uánikua ambe arhinhaaka ambe engachi jatsika para úni ka ambe nómbe. Jánguarhintasïngachi ambakiti ambe eratsini ísï eska Jeoba ka no úni imani ambe enga no sési jaka (Sal. 97:10). Peru ménisï uáti úkua jukani kurhajchani. ¿Andi? ¿Ka ambeksï uá jorhenguarhini orhejtsïkuticha juramuti Neemiasiri ambe, táticha rei Dabidiri ambe ka nándicha Mariaeri ambe enga Jesusiri amambepka? Ini artikulu jimbochi exeantauaka mókuntskuechani.
ANDICHISÏ MÉNISÏ ÚKUA JUKANCHAJKI KURHAJCHANI JEOBANI
4, 5. Eska na arhijka Roma 7:21-23, ¿andichisï ménisï úkua jukanchajki kurhajchani Jeobani?
4 Ma ambe jimbo engachi úkua jukanchajka kurhajchani Jeobani, jindesti jimbokachi no perfektueska. Jimbochisï pʼindeka no kurhandirani. Engaksï Adani ka Eba no kurhajchapka Jeobani ka imani frutanksï arhani enga Tata Diosï arhiapka eskaksï no apiringa, imechaksï jandiajku erakuspti ambe enga sési jaka ka ambe nómbe (Gén. 3:22). Iásï, ístu sáno iámindu kʼuiripuechaksï májkueni no kurhajchasïndi Tata Diosïni ka imechaksï mismu uandani ambe sési jarhaski ka ambe nómbe.
5 Asta jucha engachi míteka Jeobani ka xénchani, jamberichi úkua jukanchajka iámindu ambe ísï úni eska Jeoba na uéjka. I ambesï nitamakuarhipti apostuli Pablu (arhinta je Roma 7:21-23). Májkueni eska Pablu, imani ambechi uékasïnga úni enga Jeoba jaiapanhintajka. Peru jatsiskachi para jánguarhintani jimboka sánderu fásiliska para jucha imani ambe úni enga no sési jaka.
6, 7. ¿Ístuchi andisï úpirini úkua jukanchani para kurhajchani Jeobani? Jatsiku je ejemplu ma.
6 Ístuchi uáka úkua jukanchani kurhajchani Jeobani imani ambe jimbo engachi desde sapichuetini jorhendanhaka. Uánikua ambe enga kʼuiripu eratsijka méntku no terukuntasïndi imani ambe jingoni enga Jeoba uandajka, ka jamberichi méntkisï jánguarhintani jauaka parachi nóteru ísï eratsinia eska na eratsijka kʼuiripu. Ju je exeni ma ejemplu.
7 Máru lugaricha jimbo no no sési exenhasïndi paraksï tumbiichani arhiani eskaksï méntkisï jánguarhintaaka kánikua tumina andani. Ini ambesï nitamakuarhipti pirenchi Mary.b Antesi de Jorhenguarhini Jeobaeri ambe, ambakiti eskuela ma jimbo niraspti imeri paisirhu. Imeri familia arhisïrendi eska jánguarhintapiringa ánchikuarhita ma jatsini nani enga kánikua tumina andapiringa ka mítekateni. Ka Mary tsitisïrendi indeni ambe. Peru enga niárapka míteni Jeobani ka xénchani, inde ambe mójtakurhispti. Joperu pirenchi uandasïndi: “Ménisï exesïnga eskani úpiringa jatsiani negosiuechani nani engani kánikua tumina andapiringa, peru inde amberini no jurajkupirindi marhuakuni Jeobani. Jimbokani ísï kʼuiriperanhaska, úkua jukanchasïnga no tsitini indeni ambe. Kómarhisïnga Jeobani eskarini jarhuataaka parani no jiókuarhini imani ánchikuarhitani engarini ójkutaaka imani marhuakuni” (Mat. 6:24).
8. ¿Ambechi jorhenguarhia?
8 Eskachi na exekia, marhuachisïndijtsïni kurhajchani Jeobani. Peru ístu imecha engaksï juramukua jatsika komu orhejtsïkuticha, táticha ka nándicha, jatsistiksï para kurhajchani Jeobani jimbokaksï ísï uáka jarhuataani máteruechani. Ju je exeani máru ejempluechani engaksï Bibliarhu jaka engajtsïni jorhendajka néna juramukuani máteruechani ísï eska Jeoba na jaiapanhintajka.
AMBEKSÏ UÁ JORHENGUARHINI ORHEJTSÏKUTICHA NEEMIASIRI AMBE
Ísï eska Neemiasi na jarhuajpipka paraksï ménderu uántani Jerusaleni anapu bardechani, orhejtsïkutichaksï jarhuajpisïndi ánchikuarhita ambe jingoni enga Kʼumanchikua Reinuerirhu úkuarhijka. (Exe je párrafu 9 a 11).c
9. ¿Ambe niáraspi míteni Neemiasi?
9 Jeoba orhejtsïkutichani jurajkukuasti ánchikuarhita paraksï imeri marhuarichani kuidariuani (1 Ped. 5:2). Orhejtsïkutichaksï uáti uánikua ambe jorhenguarhini juramuti Neemiasiri ambe na enga kámapka Tata Diosïri iretani. Jimboka juramutispka Juda, kʼéri ambespti (Neh. 1:11; 2:7, 8; 5:14). Ju je exeni ambe enga nitamakuarhipka. Mítespti eskaksï Judiuecha ikichakueni jásï ambe úspka templurhu ka eskaksï no íntsaaxapka lebitechani tumina eska na uandenga Lei. Ístuksï no jukaparharasïrendi jurhiatikua sábaduni ka máruksï máteru paisirhu anapuecha jingoni tembuchaspti. Ísï jimbo Neemiasi jatsispti para úni ambe ma (Neh. 13:4-30).
10. ¿Ambe úspti Neemiasi jiáni enga máru ambe kánikua úkua jukapka?
10 Neemiasi no úraspti imeri juramukuani para úni eskaksï judiuecha afuersa kurhajchapiringa. Sánderu sési, mintsita jingoni kómarhispti Jeobani eska jarhuatapiringa ka jorhendaaspti kʼuiripuechani ambe enga Tata Diosïri Lei arhienga (Neh. 1:4-10; 13:1-3). Ístu, kaxumbitispti ka asta májku kʼéri ánchikuarhispti judiuecha jingoni paraksï ménderu uántani Jerusaleni anapu bardechani (Neh. 4:15).
11. Eska na arhijka 1 Tesalonika 2:7, 8, ¿nénaksï jatsiski para kaani orhejtsïkuticha kúnguarhikuarhu anapuechani?
11 Jamberiksï orhejtsïkuticha no xárhati problemechani jatsiauati eska Neemiasi. Peruksï uáti májkueni úni uánikua ambe jimbo. Por ejemplu, kánikuaksï ánchikuarhisïndi paraksï erachichani jarhuataani. Ka nóksï sánderu kʼéri pʼikuarherasïndi jimbokaksï juramukua jatsiska, sánderu sési, uékperakua jingonksï kaasïndi kúnguarhikuarhu anapuechani (arhinta je 1 Tesalonika 2:7, 8). Na engaksï uandajpaajka máteruechani xarhatasïndi na engaksï xáni xénchpijka ka kaxumbitinksï. Andres enga ióni orhejtsïkutikia, uandasïndi: “Kuenta íntskukuarhiska eskaksï erachicha sési pʼíkuarherasïnga engaksï orhejtsïkuticha sési kaajka ka xarhatakuanksï eskaksï mintsita jingoni xénchaasïnga. I ambe úsïndi eskaksï erachicha méntkisï uékaaka jarhuataani orhejtsïkutichani”. Ka Tomasi, enga ístu ióni páni jakaia orhejtsïkutini, uandasïndi: “Jánguarhintasïnga ísï úni eska Filipusʌ 2:3 na arhijka ka méntkisï máteruechani ísï exeani eskaksï sánderu kʼéri ambeska eska ji. I amberini jarhuatasïndi parani no afuersa uékani eskajtsïni máteruecha kurhajchaaka”.
12. ¿Andiksïsï jatsi para kaxumbitiini orhejtsïkuticha?
12 Orhejtsïkutichaksï jatsisti para kaxumbitiini, ísï eska Jeoba. Nájkiruka ima Juramutiika iámindu amberi, kʼutitsesïndi para ‘tʼupurirhu uératini jauatantani kaxumbitini’ (Sal. 18:35; 113:6, 7). Kurhunhisïndi enga nema kʼéramakuarhijka (Prov. 16:5).
13. ¿Andiksïsï orhejtsïkuticha jatsi para pʼímukukuarhini?
13 Orhejtsïkuticha engaksï kurhajchajka Jeobani jatsistiksï para pʼímukukuarhini. Engaksï no ísï uáka, uátiksï no sési ambe arhiani máteruechani engaksï no janhanhariauaka (Gal. 5:14, 15; Sant. 1:26). Andres, engachi antesi uandaka, uandasïndi: “Ménisï engani ísï exejka eskarini erachi ma no janhanharhiska, uékani jarhasïnguia no sési arhini. Peru eratsiantani ambakiti ejempluechani achamasïcheri enga Biblia uandaajka, jarhuatasïndini exeni na enga xáni jukaparhakueka kaxumbitiini”. Orhejtsïkutichaksï xarhatasïndi eskaksï kurhajchasïnga Jeobani engaksï uékpijka ka ambakiti uandakuechanksï úraani engaksï erachicha jingoni uandontskuarheni jarhajka ka ístu máteru orhejtsïkuticha jingoni (Kol. 4:6).
AMBEKSÏ UÁ JORHENGUARHINI TÁTICHA REI DABIDIRI
14. ¿Jeoba náki ánchikuarhita íntsaaski tátichani ka ambe uékasïni eskaksï uáka?
14 Jeoba tátichani jurajkukuasti paraksï orhejtsïkuni familiani ka uékasïndi eskaksï jorhendauaka ka jurhimberantaani uájpechani (1 Kor. 11:3; Efes. 6:4). Peruksï táticha no iámindu juramukua jatsisti. Jatsistiksï para kuenta íntskuntani Jeobani, imani enga kueraaka familiani (Efes. 3:14, 15). Engaksï táticha kʼumanchikuarhu ísï juramujka eska Jeoba na jaiapanhintajka, xarhatasïndiksï eskaksï kurhajchasïnga. Arhintani rei Dabidiri ambe, uáti uánikua ambe jorhendaani.
Na enga kómarhijka táti ma, jatsipirindi para xarhatakuni imeri familiani eska kaxumbitiska. (Exe je párrafu 15 ka 16).d
15. ¿Andisï rei Dabidi ambakiti ejemplu máe para táticha?
15 Jeoba no solu úspti eska Dabidi imeri familiani orhejtsïkupiringa, sino ístu iámindu ireta Israelini. Dabidi kánikua uinhapikua jatsispti jimboka reispka. Peru ménisï no sési úraspti imeri juramukuani ka kánikua no sési ambe niátaspti (2 Sam. 11:14, 15). Nájkiruka ísï úpka, kurhajchaspti Jeobani enga jurajkupka eska jurhimberantapiringa. Mintsita jingoni kómarhisïrendi ka méntkisï jánguarhintani ísï úni eska Jeoba na arhistakuenga (Sal. 51:1-4). Ístu, xarhataspti kaxumbikua para úni kurhajchaani máteru acheetichani ka ístu uarhiitichani (1 Sam. 19:11, 12; 25:32, 33). Dabidi pʼikuarherakua jukasptia imani ambe jimbo enga no sési úpka ka jánguarhintaspti paraka Jeobani marhuakuni, sánderu jukaparhakua ambepiringa imeri irekuarhu.
16. ¿Ambeksï uá jorhenguarhini táticha Dabidiri ambe?
16 Ju je exeni máru ambe engajtsï cha táticha, uáka jorhenguarhini rei Dabidiri. Ísï juramukua je chári kʼumanchikuarhu anapuechani eska Jeobani na jaiapanhintajka. Jiókuarhi je ambe engajtsï no sési úka ka ísï ú je eskaksï Bibliaeri karakatecha na uandajka. Engajtsï ísï úska, chári uarhiiti ka sapiichaksïni janhanharhiati jimbokajtsï kaxumbitiska. Ístu, engajtsï imecha jingoni uáka kómarhikua, mintsita jingoni kómarhi je Jeobani. Ini ambe úparini, chári familia exeati na enga xáni uétarhijka Jeobaeri jarhuajperata. Ka antesi de máteru ambe, sánderu jukaparhara je Jeobani marhuakuni (Deut. 6:6-9). Chári ejemplu jindesti sánderu ambakiti ambe engajtsï uáka íntskuni chári familiani.
AMBEKSÏ UÁ JORHENGUARHINI NÁNDICHA MARIAERI AMBE
17. ¿Jeoba náki ánchikuarhita íntsaaski nándichani?
17 Jeoba ambakiti ánchikuarhita ma íntsaasti nándichani familiarhu ka paraksï úni arhiani sapiichani ambe engaksï uáka (Prov. 6:20). Ambe engaksï nándicha újka o uandani, sapiichaksï méntkisï miáni jarhasïndi (Prov. 22:6). Ju je exeni ambe engaksï uáka jorhenguarhini nándicha Mariaeri ambe enga Jesusiri amambepka.
18, 19. ¿Ambeksï uá jorhenguarhini nándicha Mariaeri ambe?
18 Maria sési mítespti ambe enga arhienga Tata Diosïri Karakata. Kánikua janhanharhisïrendi Jeobani ka ambakiti pájperakua ma jatsispti imani jingoni. Ka nájkiruka imeri irekua méntku mójtakurhipiringa, úspti ambe enga Jeoba uékenga eska úpiringa (Luk. 1:35-38, 46-55).
Enga nándi ma kuataratini jarhajka o ikiani jarhani, jamberi jatsiati para sánderu jánguarhintani xarhatakuani imeri familiarhu anapuechani eska xénchaasïnga. (Exe je párrafu 19).e
19 Ju je exeni máru ambe engajtsï cha nándicha uáka jorhenguarhini Mariaeri ambe. Orheta, arhinta je Bibliani ka kómarhi je parajtsï seguirini ambakiti pájperakua ma jatsini Jeoba jingoni. Tsimani úni jámani, jánguarhinta je mójtakurhini parajtsï sési pʼikuastani Jeobani. Por ejemplu, jamberi chári tátichaksï sóntku ikiauendi ka no sésiksï arhiani sapiichani. Ísï jimbo, jamberijtsï ísï kʼuiripika eratsiparini eska ísï uétarhisïnga tʼarhexeraani sapiichani. Asta iásï jamberi engajtsï mítekia na enga uéjka Jeoba eskaksï kánhaaka sapiicha, jamberijtsï útasï úkua jukanchajka no sóntku ikiani ka tekaantani, sánderia jiáni engaksï sapiicha no kurhanderajka ka cha kuataratini jarhani (Efes. 4:31). Enga inde ambe úkuarhiaka, jiáni sánderu uétarhiati eskajtsï kómarhiaka Jeobani. Nándi ma enga Lydia arhinhajka, uandasïndi: “Ménisï jatsisïnga parani mintsita jingoni kómarhini Jeobani parani no uinhamarhikuni juchiti sapini engarini no kurhajchajka. Asta engani arhini jarhajka ambe ma, pʼíngukuarhisïnga parani sïpatikuarku kurhakuni Jeobani eskarini jarhuataaka. Kómarhikua jimbo, úsïnga pʼíngukuarhini” (Sal. 37:5).
20. ¿Náki problemaksï jatsisïni máru nándicha ka nénaksï uá orhepani uérani?
20 Ístuksï máru nándicha úkua jukanchasïndi xarhatakuani uájpechani na engaksï xáni xénchaajka (Titu 2:3, 4). Ka jindesti jimboka jiáni engaksï imecha sapichuepka, imecheri tátichaksï no xarhatakuasïrendi eskaksï xénchaasïrenga. Peru nándichaksï no jatsisti para májkueni úni. Enga nándi ma uéjka kurhajchani Jeobani, jatsisti para jorhenguarhini xarhatakuani uájpechani eskaksï xénchaasïnga. Jamberi no fásiliuati para imecha mójtakuni na engaksï eratsijka, pʼikuarherani ka úni ambe ma, peruksï uáti ísï úni. Ini ambe jimbo, iámindu familia sánderu sési irekaati.
JU JE SEGUIRINI KURHAJCHANI JEOBANI
21, 22. Eska na arhijka Isaías 65:13, 14, ¿nénajtsïni marhuachisïni kurhajchani Jeobani?
21 Rei Dabidi mítespti na enga xáni marhuajka kurhajchani Jeobani. Ima karaspti: “Jeobaeri juramukuechaksï ambakitisti, jimbokaksï úsïnga eska mintsita sési pʼikuarheraaka; Jeobaeri juramukuechaksï pímbinharhasti, úsïndiksï eskaksï éskuecha meremerexeaka”. Ka ístu uandaspti: “Indechani jimbo, chíti jántspiri mítetixatiia; seguirini jarhani úni ambe engaksï uandajka, kʼéri kóntperata ma jarhasïndi” (Sal. 19:8, 11). Ini jurhiatikuecha jimbo, úsïngachi exeni eskaksï imecha engaksï kurhajchajka Jeobani, ménderueniska imecha jingoni engaksï no jiókuarhijka Tata Diosïri ambakiti jarhuajperatani. Imecha engaksï kurhajchajka Jeobani, kánikuaksï tsípikua jingoni irekasïndi jimboka imecheri mintsita kánikua sési jarhaska (arhinta je Isaías 65:13, 14).
22 Engaksï orhetsïkuticha, táticha ka nándicha uéjka Jeobani kurhajchani, sánderuksï sési irekasïndi, imecheri familiaechaksï sánderu felisisïndi ka iámindu kúnguarhikua sánderu májku kʼéri jarhasïndi. Ka sánderu jukaparhakua ambe, kánikuaksï sési pʼikuastasïndi Jeobaeri mintsitani (Prov. 27:11). ¡No jarhasti máteru ambe engajtsïni sánderu sési pʼikuastajka!
PIREKUA 123 Ju je méntkisï kurhajchani Jeobaeri juramukuani
a Ini artikulu jimbochi exeaka andichisï jatsi para Jeobani kurhajchani. Ístuchi exeauaka ejempluechani, komu juramuti Neemiasiri, rei Dabidiri ka Marieri enga Jesusiri amambepka ka exeakachi ambeksï uá jorhenguarhini imecha engaksï juramukua jatsika, komu orhejtsïkuticha, táticha ka nándicha.
b Ini artikulu jimbo, máru nombrichaksï mójtakurhisti.
c AMBE ENGAKSÏ XARHATAJKA IMAJENICHA: Ísï eska Neemiasi na jarhuataapka judiuechani paraksï ménderu uántani Jerusaleni anapu bardechani, orhejtsïkuti ma ka imeri uájpa, ánchikuarhixatiksï para iámindu ambe sési jarhani Kʼumanchikua Reinuerirhu.
d AMBE ENGA XARHATAJKA IMAJENI: Táti ma mintsita jingoni kómarhixati Jeobani imeri familia jingoni.
e AMBE ENGA XARHATAJKA IMAJENI: Tataka sapichu ma ióni chʼanastia bideojuegu jingoni ka no úntaxati tarea ni ambe enga arhinhaka eska uáka kʼumanchikuarhu. Nájkiruka amamba kuataratini jaka, no sóntku ikiasïndi ka iatsitakuarhu jurhimberantasïndi ka no uinhamarhikusïndi.