Konsejuecha parachi sési pʼikuarherani imani ambe jingoni engachi jatsikuarheka

Ambakiti ánchikuarhiri máe je

“Ánchikuarhie imeeri jájkichani jimbo iámindu ambe enga sésiika, paraka jatsiaka ambe enga jimbo jarhuataaka nákinterku nemani enga uétarhinchakua jatsiaka” (EFESU 4:28).

Juchaari Kueraajpirijtsïni arhisïndi eskachi ísï exeaka ánchikuarhitani komueska ambakiti ambe. ¿Andi? jimboka ima enga ambakiti ánchikuarhiri máejka, jatsisïnga ambe enga uétarhinchajka ka kéndasïndi imeeri familiani ka i ambe úsïndi eska sési pʼikuarheraaka. Aska úsïndi jarhuataani imeechani engaksï uétarhinchajka. Patronichaksï kánikua jukaparharaasïndi ambakiti ánchikuarhirichani ka ísï jimboksïsï ióni jamberi jatsijti imeecheri ánchikuarhitani. Ísïisti eska Biblia na uandajka enga arhijka eska ambe enga nema jatsijka imeeri ánchikuarhita jimbo, jindeeska ‘Tata Diosïri intsïmperakua ma’ (Eclesiastés 3:13).

Jurhimbikua jingoni jáma je

Seguruchi jarhaska “eskachi nómbe kʼamanharhintskua jingoni jámaxaka, ka uékasïngachi iámindu ambe jimbo sési jámani” (EBREU 13:18).

Engachi jurhimbikua jingoni jámaaka, sésichi pʼikuarheraaka, nóchi kʼuratsekua jingoni jámaaka ka agustuchi kʼuíkuarhiaka chúrikuechani. Ístu, máteruechajtsïni janhanharhiati ka mintsinharhiatijtsïni. Imeecha engaksï no jurhimbikua jingoni jámajka, nóksï úsïndi jatsini i jásï ambe. Jamberi imeecheri konsiensia no sési pʼikuastajti ka chénksï eskaksï máteruecha niáraka ménisï míteni ambe engaksï úni jaka.

Asï jukari tsiti je sentabuni

“Asï jáma je jatsikuarhekuekani, sino tsípi je indeni ambe jingoni engajtsï jatsika” (EBREU 13:5).

Uétarhinchasïnchachi sentabu parachi tʼirekua ambe piáni ka máteru ambe, joperu enga nema jukari tsitiaka sentabuni uaati no sési úkuarhinchani. Nema úpirindi kánikua jánguarhintani para úni jatsini sánderu ambe. Enga i ambe úska, úpirindi sánhani arhini jarharini témbani o uámbani, no xáni jarhani uájpeecha jingoni, o asta jamberi niárani pʼamenchani (1 Timoteo 6:9, 10). Kʼuiripu ma enga kánikua tsitijka sentabuni, úpirindi eratseni no sési jásï ambe niátani. Kʼuiripu ma enga kánikua jánhastiipka uandaspti: “Kʼuiripu ma enga jurhimbitku jámajka, uánikua kóntperatechani intsïnhauati, joperu ima enga uéjka sóntku riku úkuarhini niáraati kastigarinhani” (Proverbios 28:20).

Eraku je sánderu ambakiti jorhenguarhikuani

“Kuájchaku jánhaskakuani ka eratsekuani” (PROVERBIOS 3:21).

Ambakiti jorhenguarhikua ma, jarhuatasïndijtsïni parachi ambakiti kʼuiripu máeni ka parachi ambakiti taaticheni. Joperu i ambejkujtsïni no uaati jarhuatani parachi tsípikua jingoni irekani ka parachi jatsikuarheni ambe engachi uétarhinchajka. Parakajtsïni méntkisï sési nicheaka iámu ambe jimbo engachi uaaka, uétarhinchasïngachi jorhenguarhikuani engajtsïni Tata Diosï íntskujka. Ka Biblia uandasïndi eska imeecha engaksï kurhajchajka Tata Diosïni, iámindu ambe jimboksï sési uéranchasïnga (Salmo 1:1-3).