¿Náksï xáni niua auandarhu?

Biblia uandasïndi eskaksï 144.000 kʼuiripuecha tsítanhantaaka paraksï auandarhu irekani (Jaŋaskuecha 7:4). Bisioni ma jimbo, apostoli Juanu úspti exeni “Karichi sapichuni [Jesukristuni tsíntatini jarhania] Sioni anapu juáta jimbo, ka imani jingoni jarhasptiksï siento kuarentaikuatro mili kʼuiripuecha” (Jaŋaskuecha 14:1-3; Juanu 1:29; 1 Pedru 1:19). Sioni anapu juáta, arhikuekasïndi juramukua enga Tata Diosï íntskuka tata Jesukristuni ka ístu 144.000 kʼuiripuechani engaksï imani jingoni juramuaka auandarhu (Salmo 2:6; Ebreu 12:22).

Imeecha engaksï ‘ióarhinhaka ka erakukatenksï’ para Kristuni jingoni juramuni Tata Diosïri Reinurhu, ístuksï mítekatesti komu ‘namunitu’ karichicha (Jaŋaskuecha 17:14; Lukasʌ 12:32). I ambe xarhatasïndi eskaksï erakukatecha no xáni uaaniska eskaksï máteru karichicha (Juanu 10:16).

Máruksï ini ambe jakajkusïndi: Eska númeru 144.000 enga Apokalipsisirhu jaka simbolikueska.

Ambe enga ísïika: Nájkirukaksï jaka máru númeruecha engaksï simbolikueka i librurhu, máruksï literalisti. Ma ejemplu jindeesti “Karichi sapichueri dose apostulicheri” nombricha (Jaŋaskuecha 21:14). Ju je exeni máteru ambe enga xarhatajka eska númeru 144.000 literaliska.

Jaŋaskuecha (Apocalipsis) 7:4 uandasïndi “na engaksï xáni uániipka engaksï mínda jatsikunhapka [enga arhikuekajka, paraksï úni auandarhu irekani] ka jindeesptiksï sienti kuarentaikuatro mili”, ka luegu luejku uandasïndi “exeaspkani uánikua kʼuiripuechani enga no nema úpka jamberi kuentuani”. I “uánikua kʼuiripuechani” ístuksï intsïnhasïndi pʼímutantskua (Jaŋaskuecha 7:9, 10). Enga númeru 144.000 simbolikuepiringa ka uánikua kʼuiripuechani arhikuekani jarhani, no úpirindi kurhangukuarhini náki i tsimani grupuecheri sánderu kʼériski.a

Ístu, uandasïndi eskaksï i 144.000 piántskata jarhaska “komueska ma fruta enga ueenajka pʼikunhantani” (Jaŋaskuecha 14:4). Uandakua “ueenajka pʼikunhantani” arhikuekasïndi eskaksï namunitu erakunhaska uánikuecheri. Ísï jimbosï sési terukuntajti imani namunitu erakukatechani jingoni engaksï tata Jesukristuni jingoni auandarhu uératini juramukuauaka imani kʼuiripuechani enga no nema jamberi újka kuenta úni ka engaksï ixú Echerirhu irekaaka (Jaŋaskuecha 5:10).