ARHUKUKATA 24

Pablu karakuasïndi kúnguarhikuechani

Pablu, karakatechani axasïndi para uinhaperantani kristianuechani

KRISTUERI kúnguarhikua enga apenasi uénapka, ambakiti ánchikuarhita ma úpirindi paraka úkuarhipiringa ambe enga Jeoba uéjka úni. Joperu imaksï engaksï ini kúnguarhikuani jimbo japka, tekantasptiksï engaksï kʼuiripuecha no sési káuenga, ka asta tsʼéjkukuechani jamberi engaksï kúnguarhikuarhu japka. ¿Ambeksï úspi paraksï no jurajkuni Tata Diosïni? I kristianuecha úsptiksï uinhapikuarhintani ka exentani jarhuajperata engaksï uétarhinchaenga, indeni beintiuni karakatechani jimbo engaksï Karakata Griegaechani jimbo jaka.

Katorse karakatechani Pablu karaspti, Romanusi uénani asta Ebreusi jamberi. Iáminduechaksï inde arhinhakua pásïndi né enga intsïnhapiringa, ka úpirindi jindeni kʼuiripu ma o kúnguarhikua ma. Exeakachi máru ambe enga Pablu jima karakuapka.

Úkuecha ka jángua. Né engaksï ísku jándi úkuarhejka, o né enga apondijka imani jingoni enga no témbeuaka o no uámbeuaka, o imecha engaksï kʼérati pekaduechani uájka ka nóksï jurajkuani indeni no sési jarhati úkuechani, “nóksï ma ambe erensia pʼiua[ti] Tata Diosïri juramukuarhu” (Galasia 5:19-21; 1 Korintu 6:9-11). Imaksï engaksï Jeobani marhuakujka jatsistiksï para sési pájperani ka no arhiati nani uéjki anapuenksï (Roma 2:11; Efesu 4:1-6). Jatsistiksï para íntspirini ka jarhuatani imechani engaksï májkueni jásï jakajkujka (2 Korintu 9:7). Apostuli Pablu arhiasïndi eskaksï aiangukuarhiaka iámindu ambe Jeobani, ka ístu arhiasïndi: ‘Méntku jauena je kómarhiniʼ (1 Tesalonika 5:17; 2 Tesalonika 3:1; Filipusʌ 4:6, 7). Joperu paraka Tata Diosï kurhauaka imecheri kómarhikuechani, jatsistiksï para jakajkukua jingoni kómarhini (Ebreu 11:6).

¿Pablu ambe arhistakuaspi familiechani? Achaticha, jatsistiksï para uékani imeri uarhitichani isï eska imajkuminduksï na uékakuarhijka. Ístu uarhiticha, jatsistiksï para mintsita jingoni janhanharhiani imeri achatichani. Ístu, Tata Diosï erokuarhisïndi eska sapicha kurhajchauaka tátembechani, ka tátembecha jatsistiksï para kʼuiriperani uékperakua jingoni uájpechani ka arhistakuaparini ambe enga Biblia uandajka (Efesu 5:22–6:4; Kolosasi 3:18-21).

Mapa enga xarhatajka nani enga Pablu karaka imeri karakatechani

Ambe enga Tata Diosï uéjka úni. Moisesiri Juramukua kuájchakuaspti ka jorhendaspti israelitechani astaka janopka Mesiasi, joperu kristianuecha, nóteruksï jatsisptia para chúxapani (Galasia 3:24). Imani karakata jimbo enga Pablu Ebreuechani karakuapka, —kristianuecha engaksï judiuepka—, Pablu arhiaspti andisï Tata Diosï íntskuapi Moisesiri Juramukuani ka na enga Kristuni jimbo úkuarhipiringa ambe enga Tata Diosï uéjka úni. Ístu uandaspti, eska uánikua ambe enga Moisesiri Juramukua uandaenga xarhatasïrenga ambe enga sánderu orhepatini úkuarhipiringa. I jindesti eranhikua ma, engaksï ióntki animalichani kéjtsïtauenga, arhikuekasïrendi eska sánderu orhepatini Jesusi íntspepiringa tsípikuani ka indeni jimbo jucha puáminhantapiringa pekaduechani ma uelta ka para méntkisï (Ebreu 10:1-4). Isï jimbo, Kristueri uarhikua úspti eska Moisesiri Juramukua nóteru uétarhipiringia (Kolosasi 2:13-17; Ebreu 8:13).

Kúnguarhikua kristiana ma kurhaxati enga arhinhantani jaka Pablueri karta ma

Néna jatsiski para ánchikuarhini kúnguarhikua ma. Achaticha engaksï orhejtsïkujka kúnguarhikuecharhu jatsistiksï para ambakiti jángua ma jatsini ka úni jarhani ambe enga Tata Diosïri karakata uandajka (1 Timoteo 3:1-10, 12, 13; Titu 1:5-9). Ístu, kánikua jukaparhakuesti eska imecha engaksï Tata Diosïni marhuakujka, méntkisïksï tánguarhiaka para jorhenguarhini Tata Diosïri ambe ka uinhaperperantanksï máteru ka máteruni jingoni (1 Korintu 14:26, 31; Ebreu 10:24, 25).

Enga Pablu karapka imeri ultimu karakatani, enga jindeka segundu karakata para Timoteo, Roma jarhasptia ménderu ónhakata ka erokuarhixapti eskaksï jusgaripiringa. Namunitu kristianuechajkuksï niraspti pʼorhembini ima engaksï no chéanga. Pablu mítisptia eska niáraxapka jurhiatikua para uándikunhani, isï jimbosï karapti: “Ji sési uarhipiska ini ambakiti guerrarhu, ka kʼamataskania ini karrerani ka méntku jauenaskani sési patsani ini jakajkukuani” (2 Timoteo 4:7). Jamberi ima no ióni jimbo uándikunhapti. Joperu imeri karakatecha kánikuaksï jarhuataspti sési jimbo kristianuechani parakaksï méntkisï marhuakupiringa Tata Diosïni, ka útasï iásï jamberi jarhuataxatijtsïni juchantsïni.

(Pʼitakata jarhasti libruecharhu Roma, 1 ka 22 Korintu, Galasia, Efesu, Filipusʌ, Kolosasi, 1 ka 2 Tesalonika, 1 ka 2 Timoteo, Titu, Filemoni ka Ebreu.)

¿NÉ JINDESPI UÁJPA ENGA UANDANHAPKA ESKA JUPIRINGA?

Engaksï Adani ka Eba nóteru uékapkia kurhajchani Tata Diosïni, Tata Diosï arhispti akuitsini terokuntaparini máteru ambe jingoni: “Ji uáka eskajtsï ikiatsperakua jatsiaka tʼu, uarhitini jingoni, ka chíti uájpa uarhitiri uájpani jingoni. Imakini éjpurhu chʼatajtsïkuati ka tʼuri irhandurhakuarhu ataaka” (Génesis 3:15). Eska na uandajka Jaŋaskuecha 12:9, “ióntki anapu akuitsi”, jindesti No Ambakiti. Enga nitamani japkia sientu jimbo uéxurhinicha Biblia sánhani arhispti xarhatani, né jindepirini Uájpa enga chʼatajtsïkupiringa Satanasini.

Dosi mili uéxurhini isï tátsekua enga Adani ka Eba nóteruksï kurhajchapkia Jeobani, Jeoba uandaspti eska Pʼimutantspiti enga eiatspipka Abranini jimbo jupiringa (Génesis 22:17, 18). Sientu jimbo uéxurhini tátsekua, apostuli Pablu uandaspti eska uarhitiri uájpa enga sánderu jukaparhakuepka ka enga jupka Abraniri uájpechani jimbo jindespka Mesiasi, o Jesusi (Galasia 3:16). Enga Kristu uándikunhapkia, ísïspti enajkiksï “irhandurhakuarhu” atapi, eska na uandakata japkia Génesis 3:15 jimbo. Joperu Tata Diosï tsítantaspti Jesusini “komueska espiritu ma” (1 Pedru 3:18, NM).

Ístu, Tata Diosï uékaspti eska japiringa máteru uarhitiri uájpecha engaksï ánchikuarhipiringa Kristuni jingoni, ka íksï jindepirindi 144,000 kʼuiripuecha engaksï ístu intsïnhapiringa Juramukua Kristuni jingoni (Galasia 3:29; Jaŋaskuecha 14:1). Tátsekua, engaksï i uarhipiringa, tsíntapirindiksï paraksï auandarhu irekani komueska espirituecha, ka juramupirindiksï Kristuni jingoni (Roma 8:16, 17).

Jesusi, komueska auandarhu anapu Juramuti sóntku kʼamajkuati No Ambakitini ka imeri uájpani, engaksï jindeka demoniuecha ka kʼuiripu no sési úricha engaksï újka ambe enga Satanasi uéjka (Juanu 8:44; Efesu 6:12). Jesusiri juramukuarhu, jauati pínandikua ka sési pʼikuarherakua para iámindu imecha engaksï no méni jurajkuaka Tata Diosïni. Ka ísï para kʼamarani, Jesusi mísmu chʼatajtsïkuati akuitsiri “éjpuni”, i arhikuekasïndi eska mátirku uándikuakia (Ebreu 2:14).