Enga Salomoni uénapka juramuni Israeli, Jeoba kurhamarhispti: “¿Amberi uékasïni eskakini íntskuaka?”. Salomoni arhispti: “Jukari sapichueska ka nótkini úsïnga sési úni ambe ma. Jimboetakua, íntskurini jánhaskakua parani chíti iretani kuidarini”. Ka Jeoba arhispti: “Jimbokarini jánhaskakua kurhacheska, uáka eskari tʼu sánderu jánhaskatiuaka echerirhu. Ístukini íntskuaka jatsikuarhikua ka engarini kurhajchaska, ióniri irekaaka”.

Salomoni uénaspti templuni úni. Úraspti sánderu ambakiti oru, plata, chkari ka tsakapu. Uánikua achaticha ka uarhiiticha engaksï jorhenapka, ánchikuarhisptiksï para templuni úni. Siete uéxurhini jimbo, listu jarhasptia paraksï Jeobani dedikarikuni, jimboksïsï kéjtsïtakua ambe pérapti altarirhu. Salomoni tinguixurhispti altarirhu orhepani ka kómarhispti: “Oh, Jeoba, tʼuri jukanchaska sánderu kʼéri ma templu intsïnhani ka sánderu sési jásï ma eska i. Peru jimboetakua, jiókuarhi na engaksïni marhuachini jaka ka kurhaua juchari kómarhikuechani”. ¿Néna exepi Jeoba templuni ka Salomoniri komarhikuani? Enga Salomoni kómarhipkia, kétsispti chpiri auandarhu uératini ka kurhiraaspti kéjtsïtakuechani. Ísï úparini, Jeoba xarhataspti eska jeiapanhintaspka templuni. Engaksï israelitecha exepka ini ambe, kánikuaksï tsípispti.

Rei Salomoni, iámu Israeli mítinhaspti ka asta máteru iretecharhu engaksï iauani japka, jimboka jánhaskatispka. Kʼuiripu nirasïrendi exeni paraka jarhuataapiringa imecheri problemecha jingoni. Asta reina Seba anapu niraspti exeni para tsʼéjkuni kurhamarhikuecha jingoni engaksï difisilipka. Enga kurhaapka Salomoniri mókuntskuechani, uandaspti: “No jakajkusïrenga ambe engajtsïni eiangupka chíti ambe, peru iásï kʼóruni mítiskia eskari sánderu jánhaskatiska ka eskajtsïni na eiangupka. Chíti Tata Diosï Jeobakini újchakurasti”. Israeli kánikua sési irekanhaspti ka tsípikua jingoni. Peru i ambe sóntku mójtakukuarhepirindi.

Mientrasi enga Salomoni Jeobani marhuakupka, Israeli sési irekanhaspti. Peru ima, uánikua uátsïcha jingoni tembuchaspti engaksï máteru paisicharhu anapuepka ka engaksï idoluechani kómarhiauenga. Salomoni sánhani arhispti mójtakurhini ka ístu uénaspti idoluechani kómarhiani. Jeoba ikiaspti ka arhispti: “Euantaaka chíti familiani Israeliri reinuni ka tsimapuru arhukuaka. Parti enga sánderu kʼéaka, chíti jántspirini ma íntskuaka ka chíti familia imani partijku juramuati enga sánderu sapichueuaka”.

Jeoba úspti máteru ambe paraksï iáminduecha sánderu sési kurhanguni ambe enga uandapka. Salomoniri jántspiri ma, enga Jeroboáni arhinhaenga, biajarixapti ka xanharu jimbo profeta Aíani exentaspti. I profeta 12 pedasu jimbo karukuspti imeri kʼuáparhakuani ka arhispti Jeroboánini: “Jeoba euantaati Salomoniri familiani Israeliri reinuni ka tsimani reinu uáti. Pʼíku 10 pedasu i xukuparhakueri, jimbokari tʼu reiuaka 10 tribuecheri”. Enga Salomoni mítipka ini ambe, uékaspti uándikuni Jeroboánini. Jimbosï Jeroboáni Ejiptu sïpakuarhipti. Tátsekua, Salomoni uarhispti ka imeri uájpa Reoboami uénaspti juramuni. Jimajkani Jeroboáni eratsispti eska peligru nitamaspkia ka kʼuanhatsintaspti Israeli.

Tátsekua, Israeliri orhejtsïkutichaksï arhispti Reoboamini: “Engari sési kámaska iretani, kʼuiripukini no méni jurajkuati”. Peru tumbiicha engaksï Reoboamiri amiguepka, arhisptiksï: “Jatsiskari para no sési kámani iretani. Afuersa ánchitaa sánderu”. Reoboami kasu úkuaspti ka no sési kámaspti kʼuiripuni. Jimbosï kʼuiripu nóteru uékaptia kurhajchani Reoboamini ka úsptiksï eska Jeroboáni juramukuapiringa 10 tribuechani, enga arhinhapka Israeliri reinu. Ka máteru tsimani tribuecheri juramukua, arhinhaspti Judaeri reinu ka i no jurajkuspti Reoboamini. Ísïksï niáraspti arhukurhini 12 tribuecha Israeliri.

Jerusaleni, Reoboamiri juramukuarhu pakaraspti. Ka Jeroboáni no uékasïrendi eska imeri ireta jini nipiringa Jeobani kómarhini. ¿Mítiskiri andi? Jimboka Jeroboáni chésïrenga eskaksï nóteru kasu úkupiringia ka Reoboaminksï kurhajchania. Ísï jimbosï tsimani beserru oruerichani uaapti ka arhispti imeri iretani: “Jerusaleni jukari iauani jarhasti. Sánderu sési, ixú pakara je kómarhiani ini beserruechani”. Ka kʼuiripu kasu úkuspti ka ménderuksï mirikurhispti Jeobani.