Saserdoti ma enga Sakariasi arhinhaenga ka témba Elisabeti, Jerusaleni no iauanksï irekaspti. Jukari 400 uéxurhini nitamasptia desde engaksï Jerusaleniri bardecha únhantapka. Sakariasi ka Elisabeti ióniksï páxaptia temungurhirini, peruksï no ma sapini kámasïrendi. Ma jurhiatikua, enga Sakariasi insiensu kéjtsïtani japka templueri Santurhu, ánjili Gabrieli xarhakuspti. Sakariasi kánikua chéspti, peru Gabrieli arhispti: “Asï ché. Jeobarini axasti parakini ambakiti ambe aianguni. Chíti uarhiiti, Elisabeti, sapini ma kánguarhiati, ka Juanu arhinhaati. Jeoba, ánchikuarhita espesiali ma erakusti para Juanu”. Sakariasi arhispti: “¿Néna uá mítini ji eska meru ísïska? Elisabeti ka ji, kánikuachi jatiriskia parachi sapini ma kánguarhini”. Gabrieli arhispti: “Jeobarini axasti parakini aianguni ini ambakiti ambe. Peru jimbokarini no jakajkucheska, nori uáka uandani, astaka charhaku andajpenuaka”.

Sakariasi jiáni sánderu ióni pakaraspti templueri Santurhu. Enga uéntapkia, kʼuiripu enga uérakua erontani japka uékasïrendi mítini ambe úkuarhispi. Peru Sakariasi no úsïrendi uandani, seniasi ambejkusï uéndi. Jimajkani kʼuiripu kuenta íntskukuarhispti eska Tata Diosïri mensaji ma intsïnhaspka.

Ísï tátsekua, Elisabeti embarasada pakaraspti ka tatakani ma kánguarhispti, ísï eska ánjili na uandapka. Elisabetiri amiguecha ka familiaricha, nirasptiksï charhakuni exeni ka kánikuaksï tsípispti. Elisabeti uandaspti: “Juanu arhinhaati”. Ka imaksï arhispti: “No nema ísï arhinhasïndi chíti familiarhu. Mejori, Sakariasi arhinhatara, ísï eska táti jemba”. Peru Sakariasi karaspti: “Inderi nombri Juanuesti”. Ima ratu jimbo, Sakariasi ménderu úsptia uandani. Iámu Juda mítikuarhispti charhakueri ambe ka kʼuiripu kurhamarhikuarhisïrendi: “¿Ambeua i sapi enga kʼériuakia?”.

Jimajkani, Sakariasi espiritu santu intsïnhaspti ka profesia ma uandaspti: “¡Ju je kʼéri ambe arhini Jeobani! Ima aiakuspti Abraanini eska axapiringa Mesiasini parajtsïni salbarini. Ka Juanu, profeta máeuati enga eianhpiaka eska Mesiasi janoaka”.

Elisabetiri parienti ma enga Maria arhinhaenga, ístu kánikua sési jásï ambe úkuarhinchaspti. Ju exeni máteru kapitulurhu.

Maria uátsï máespti enga Nasareti irekapka, jini Galilea ka Elisabetiri parientispti. Maria karpinteru ma jingoni uambuchapirindi enga Jose arhinhaenga. Enga Elisabeti seisi kutsï páni japkia embarasada, ánjili Gabrieli, Mariani xarhakuspti ka arhispti: “Maria, Jeobakini kánikua újchakurasti”. Maria no kurhanguspti ambe enga Gabrieli arhipka, jimbosï ima arhipti: “Embarasadari pakaraaka ka sapi mari kánguarhiaka. Ka Jesusiri arhinhataraaka. Reiuati ka imeri Reinu para méntkisïuati”.

Maria arhispti: “Peruni ji birgeniska. ¿Néna uá sapini ma kánguarhini?”. Gabrieli arhispti: “Para Jeoba iámindu ambe úsïndi úkuarheni. Intsïnhaakari espiritu santu ka sapi mari kánguarhiaka. Chíti parienti Elisabeti ístu embarasada jarhasti”. Jimajkani Maria arhispti: “Ji Jeobaeri jántspiriska. Eska ísï úkuarhiaka eskari na uandaka”.

Maria niraspti pʼorhembini Elisabetini, iretarhu ma enga juátarhisï japka. Enga niárapka, saludarispti ka Elisabeti pʼikuarheraspti na enga charhaku manakuarhipka. Elisabeti espiritu santu intsïnhaspti ka uandaspti: “Maria, Jeobakini újchakurasti. Kʼéri kóntperata máesti para ji engarini juka pʼorhembini, Mesiasiri amamba”. Maria mókuntaspti: “Kʼéri ambe arhisïnga Jeobani iámu mintsita jingoni”. Tanimu kutsï pakaraspti Elisabeti jingoni ka tátsekua níntaspti Nasareti.

Enga Jose mítipka eska Maria embarasada jarhaspka, nóteru uékaspti imani jingoni tembuchani. Peru Jeobaeri ánjili ma xarhakuspti tsánharhikua ma jimbo ka arhispti: “Asï ché tembuchani Maria jingoni. No ma ambe no sési ústi”. Jimbosï Jose tembuchapti Maria jingoni.