Na enga exejka Tata Diosï Jeoba iurhirini

Iurhiri kánikua jukaparhakuesti. Engachi no jatapiringa iurhiri nóchi úpiringa tsípiti jarhani. Ka jimbokajtsïni Tata Diosï kueraaska, imajtsïni úsïndi arhini nénachi jatsiski para úrani iurhirini. ¿Ambe uandasïni Tata Diosï iurhiriri ambe? ¿Uaachi arhani o jatantani? ¿Ka ambeksïni uaa jarhuatani chánksïni parajtsï ambakiti ambe erakuni úni íri ambe?

1. ¿Néna exesïni Tata Diosï Jeoba iurhirini?

Ióntki, Jeoba arhiaspti imeeri marhuarichani: ‘Iurhiri jindeesti tsípikua iámindu jásï kʼuiripeteeri’ (Levítico 17:14). Para Tata Diosï Jeoba iurhiri jindeesti tsípikua. Ka jimboka tsípikua Tata Diosïri regalu máeska—ambe ma enga kánikua jukaparhakueka ka pímbinhasïini—, iurhiri ístu pímbinhasïisti.

2. ¿Ambe uandaspi Tata Diosï iurhiri ambe?

Enga na nitamapkia K’éri Janikua, Tata Diosï íntsaaspti arhini juramukuani imeeri marhuarichani, eskaksï no apiringa iurhirini, ka ísï tátsekua, ménderu íntskuspti ini juramukuani ióntki anapu Israelini (arhinta je Génesis 9:4 ka Levítico 17:10). Ka sánderu tátsekua, Tata Diosï ménderu íntskuspti ini juramukuani kúnguarhikua kristianani. Kuerpu gobernanti—enga grupu máepka apostolicheri ka orhejtsïkuticheri enga iámindu kúnguarhikuechani orhekupauenga—kristianuechani ini juramukuanksï íntsaaspti: “Eskajtsï no auaka [...] iurhirini” (arhinta je Ukuecha 15:28, 29).

¿Ambe arhikuekasïni no arhani iurhirini? Engaksïni doktori arhipiringa eskajtsï no auaka alkoli, ¿a no eskajtsï chá no apiringa? Perujtsï ¿apirini ambe ma enga alkoli jukapiringa ojtsï jukapirini kʼuanhapikuarhisï? Nómbe. Májkueni úkuarhisïndi ini juramukuani jingoni para no arhani iurhiri. Kurhajchani Tata Diosïni arhikuekasïndi no arhani iurhiri ni kʼuiripeta enga no tsïtanhaka iurhiri, ístuchi no jámaaka arhani t’irekua ambe engaksï iurhiri jatsikuaka.

¿Ka enga uétarhiaka iurhiri para tratamientu ma? Máru tratamientuecha ka operasionicha úsïndiksï eska nema no kurhajchaaka Tata Diosïri juramukuani, komu iurhiri jatantani o úrani imani tʼámu ambe enga iurhirirhu uérajka: glóbulos rojos, glóbulos blancos, plaquetas ka plasma. Peru ménichanisï ma úpirindi no xáni sóntku kuenta íntskukuarheni eska prosedimientu ma jimbo, ma kurhajchani jarhasïnga Tata Diosïri leini o nómbe. Pori ejemplu, máru tratamientuecharhuksï jukasïndi sapichu ambe enga iurhirirhu petanhajka. Ka máteruecharhuksï úrasïndi iurhirini ima mismu kʼuiripueri enga p’amenchani jarhajka. Enga ma exeakia ambe enga xáni jaka, mándani kʼuiripu jatsisti para erakukuarhini ambe úni (Galasia 6:5).a

JORHENGUARHI JE SÁNDERU AMBE

3. Imani ambe eraku je úni enga Tata Diosï Jeoba jaiapanhintajka

¿Nénajtsï uaa imani ambe erakuni úni enga Tata Diosï jaiapanhintajka enga iurhiriri ambeuaka? Exe je BIDEUNI ka tátsekua uandontskuarhi je na enga xáni jukaparhakueka úni ambe enga bideurhu uandajka:

BIDEU: Néna sési ambe erakuni úni enga iurhiriri ambeuaka (5:47)

• Kómarhi je Tata Diosïni paraksïni íntskuni jánhaskakua (Santiagu 1:5).

• Jirinhaanta je Bibliaeri prinsipiuechani engaksï íri ambe uandajka ka exe je nénajtsï uaa úraani (Proverbios 13:16).

• Exe je ambe ka ambejtsï uaa úrani ka sinksï jarhaski jima engajtsï chá irekaka.

• Exe je ambe ka ambejtsï no jatsipirini para jiókuarhini.

• Exe je eska ima ambe engajtsï erakuaka úni chaari konsiensiaksïni no no sési pʼikuastaaka (Ukuecha 24:16).b

• Miá je eska no nema—ni chaari acheeti, ni chaari uarhiiti, ni orhejtsïkuti ma o ima engaksïni Bibliaeri ambe jorhendani jaka—jatsipiringa paraksïni arhini ambe engajtsï uaaka enga konsiensieri ambeuaka (Roma 14:12).

• Kara je ambe engajtsï erakukia úni parakaksï máteruecha míteaka.

4. Jeobaeri testiguechachi imani doktorichani jirinhaasïnga engajtsïni sési atenderiuaka

Kurhajchani Tata Diosïri leini enga iurhiriri ambe uandajka no arhikuekasïndi eskachi no uaaka jirinhaani doktorichani engajtsïni sési atenderiuaka no úraparini iurhiri. Exe je BIDEUNI.

BIDEU: Entrebista ma profesori Massimo Franchi jingoni (1:36)

Arhinta je Titu 3:2 ka uandontskuarhi je íri ambe:

• ¿Andichisï jatsi para de akuerdu pakarani doktoricha jingoni ka iatsitakuarhu uandontskuarhekuani ka janhanharhikua jingoni?

Nóchi jiókuarhisïnga	Mándani kʼuiripu jatsisti para erakuni
A. Plasma sanguíneo	Sapichu ambe plasmeri
B. Glóbulos blancos	Sapichu ambe glóbulos blancosiri
C. Plaquetas	Sapichu ambe plaquetasiri
D. Glóbulos rojos	Sapichu ambe glóbulos rojosiri

5. Sapichu ambe enga iurhirirhu petanhajka

Iurhiri tʼámu ambe jukasti: glóbulos rojos, glóbulos blancos, plaquetas ka plasma. Ka ístu, mándani i tʼámu ambe uánikua sapichitu ambeksï jukasti, enga ístu ísï mítekateka komueska sapichu ambe enga iurhirirhu petanhajka.c Máru i sapichu ambe úrakuarhesïndi medisinecharhu para máru pʼamenchakuecha o enga ma kánikua iurhiri tsïtani jarhajka enga ísï mítekateeka komueska emorrajia.

Enga sapichu ambeuaka enga iurhirirhu petanhajka o fraksionicha, mándani kristianu jatsisti para erakukuarhini ambe úni exeparini ambe enga imeeri konsiensia arhiaka enga Biblia jingoni jorhendakata jaka. Jamberiksï máru no jiókuarhiati operasioni ma o tratamientu ma enga úrakuarheaka sapichitu ambe enga iurhirirhu petanhajka. Ka jamberiksï máteruecha jiókuarhiati ini ambe.

Engajtsï erakuni jámaaka ambe úni, kurhamarhikuarhi je:

• ¿Néna arhipirini ji doktorini andisïni jiókuarhijki o nómbe sapichu ambe enga iurhirirhu petanhajka o fraksionichani?

AMBE ENGACHI JORHENGUARHIKA

Tata Diosï Jeoba uékasïndi eskachi sési úraaka iurhirini ka eskachi jukaparharaaka.

Ambejtsï jorhenguarhiski

• ¿Andisï Tata Diosï Jeoba iurhirini ísï exejki eska ambe ma enga pímbinhasïika?

• ¿Andichisï míti eska enga Tata Diosï juramujka no arhani iurhiri ístu arhikuekasïnga no jatantani?

• ¿Ambeksïni uaa jarhuatani parajtsï ambakiti tratamientu ma erakuni enga iurhiri uétarhini jauaka?

ÍSTU EXE JE INI AMBE

Ante dejtsï erakuni tratamientu ma nani enga úrakuarheaka chaari iurhiri, ¿ambe ka ambejtsï jatsipirini para exeni?

“Ambe enga kurhanguarhijka ima enga arhintajka” (Aianhpiri, 15 de oktubri de 2000)

Ante dejtsï eratseni sintsï jiókuarhia sapichu ambe enga iurhirirhu petanhajka, ¿ambejtsï jatsipirini para exeni?

“Ambe enga kurhanguarhijka ima enga arhintajka” (Aianhpiri, 15 de juniu de 2004)

¿Ambe jarhuataspi kurhanguni doktorini ma eska ambe enga Jeoba eratsejka iurhiriri ambe ambakiti ambeeska?

“Jiókuarhispka ambe enga Tata Diosï uandajka iurhiriri ambe” (¡Tsínharhi!, 8 de disiembri de 2003)

Exe je na engaksï jarhuataajka erachichani, Grupuecha engaksï Jarhuataajka Testiguechani engaksï Uétarhinchajka Tratamientu ma.

Jeoba kuidariuasïndi pʼamenchatichani (10:23)