Engachi sési kámpiska xarhataakachi eskachi uinhapitiiska

1. ¿Ambejtsïni úpirini kurhamarhini juchaari kompanieruecha ánchikuarhitarhu o eskuelarhu?

¿NÉNAJTSÏ pʼikuarherasïni engaksïni ánchikuarhitarhu o eskuelarhu kurhamarhijka ima amberi engachi jakajkujka? ¿Chésïntsï? Uánikuechachi ísï pʼikuarherasïnga. Peru i járhati kurhamarhikuechajtsïni uaati jarhuatani parachi míteni ambe jakajkusïni ima kʼuiripu ka ambe eratsesïni juchaari ambe. Ístujtsïni jarhuatasïndi parachi úni aianguani Tata Diosïiri ambe. Perujtsïni nema úpirindi kurhamarhini ambe ma nomasi parachi arhirperani. Ka i ambejtsïni no jatsisti para ísku pakatani. Jamberijtsïni kʼuiripu kurhamarhijti indeni ambe jimboka máteruechani kurhajchaska juchaari ambe uandani (Úku. 28:22). Ístu irekaxakachi “últimu jurhiatikuechani jimbo”, tiempu ma jimbo engaksï uánikua kʼuiripuecha ʻnóksï nani máru uékajkaʼ kurhanguni ka ʻno sésiksï jámaniʼ (2 Tim. 3:​1, 3).

2. ¿Andisï xáni jukaparhakue eskachi sési kámpiaka?

² Jamberijtsï kurhamarhikuarhijka nénajtsï uaa iátsitakuarhu jámani ka no sóntku ikiani engaksïni nema ikiatinku kurhamarhiaka ima amberi engachi jakajkujka. Jarhasti kualidadi ma engaksïni jarhuataaka, jindeesti sési kámpini. Nema enga sési kámpijka, no sóntku ikiasïndi ka úsïndi pʼíngukuarhini jiáni engaksï máteruecha ikiatani uéjka o enga no mítejka néna mókuntani ambe ma (Prov. 16:32). Jamberijtsï ísï exejka eska kánikua úkua jukaska ini kualidadini xarhatani, joperujtsï uaaka ísï úni. ¿Néna? ¿Ambeksïni uaa jarhuatani parajtsï sési kámani nemani enga uékaaka arhirperani chánksïni jingoni ima ambeeri engajtsï jakajkujka? Ka engajtsï sapiichani kaajka, ¿ambejtsï uaa úni parajtsï jarhuataani iátsitakuarhu kuájpini imani ambe engaksï jakajkujka? Ju je exeni ambe engajtsï uaaka úni.

JU JE JORHENGUARHINI SÉSI KÁMPINI

3. ¿Andichisï uandajki eska kʼuiripuecha engaksï sési kámpijka o iátsitakuarhu jámajka, uinhapitiiska? (2 Timoteu 2:​24, 25).

³ Enga nema sési kámpijka no arhikuekasïndi eska débiliiska, sino eska uinhapitiiska. Uétarhisïndi eska nema kánikua uinhapikuarhintaaka para no sóntku ikiani enga úkuarhini jauaka ambe ma. Espiritu santu úsïndi eska nema “iátsitakuarhu jámaaka” o eska sési kámpiaka (Gal. 5:​22, 23). Idioma griegu jimbo, “iátsitakuarhu jámani”, ménichani úranhasïreendi para arhikuekani kabaiuni ma enga mansu únheenga. ¿Úsïntsï eranhaskani na enga xáni mójtakurhienga kabaiu? Nóteru no sési jámasïreendia, sánderu sési, mansuesptia…, mansu peru uinhapiti. ¿Ka juchaia? ¿Nénachi uaa iátsitakuarhu jámani, peruchi ístu uinhapitiini? Jandiajku nóchi uaaka indeni ambe úni; uétarhisïndi eskachi kurhakuaka Tata Diosïni espiritu santu. Uánikuechaksï exestia eska nema uaaka iátsitakuarhu jámani. Pori ejemplu, uánikua Testiguechaksï iátsitakuarhu mókukuantasïndi kʼuiripuechani engaksï arhirperani uékajka imeecha jingoni, ka i ambe jarhuataasti máteruechani paraksï sési ambe uandani Jeobaeri testiguecheri ambe (arhinta je 2 Timoteu 2:​24, 25). ¿Ambejtsï uaa úni parajtsï chá jorhenguarhini iátsitakuarhu jámani?

4. ¿Ambechi jorhenguarhisïni Isaakiiri ejemplu jingoni?

⁴ Bibliarhu uánikua ejempluechaksï jarhasti engaksï xarhatajka eska iátsitakuarhu jámani jukaparhakueska. Pori ejemplu, jiáni enga Isaaki Guerari irekapka, filisteuecha engaksï jima irekapka, úndasptiksï enbidiarini, ka tunhaantasptiksï imani posuechani enga Isaakiiri taati jamberi jántspiriichaksï uaapka. Peru Isaaki enbesi de arhirperani posuecha jimbo, iauanisï niraspti irekani ka máteru posuechani uaaspti (Gén. 26:​12-18). Peruksï filisteuecha ménderu ueenaspti uandani eska itsï enga jima japka, imeecheerispka. Nájkiruka Isaaki ísï nitamakuarhipka, ima no ikiaspti (Gén. 26:​19-25). ¿Ambe jarhuataspti paraka ima iátsitakuarhu jámapiringa, asta jiáni jamberi engaksï máteruecha uékeenga ikiatani? Seguru eska taati jémbeecheri ejemplu kánikua jarhuataspka. Pori ejemplu, Abraáni sési kámpisïreendi ka Sara ístu pínandikua jatsisïreendi ka “iátsitakuarhu jámani” (1 Ped. 3:​4-6; Gén. 21:​22-34).

5. ¿Náki ejemplu xarhatasïni eskaksï taatiicha uaaka jorhendaani imeeri sapiichani paraksï iátsitakuarhu jámani?

⁵ Taatiicha engaksï kristianueka, ístuksï uaati jorhendaani imeecheeri sapiichani eska kánikua jukaparhakueska sési kámpini. Ju je exeni ambe enga úkuarhinchapka Max,b enga 17 jatiriika. Imeeri eskuelarhu ka ístu jima enga aianhpienga, jarhasptiksï kʼuiripuecha engaksï no sési kámpienga. Peru tekaantskua jingoni imeeri taatiichaksï jarhuatapti Maxini para ima úni iátsitakuarhu mókukuantani máteruechani. Imeechaksï uandantasïndi. “Juchaari sapi niárasti kurhanguni eska sánderu úkua jukaska pʼíngukuarhini ka eska ikiani o májkueni úkuantani máteruechani”. ¡Iásï Max jorhenguarhistia iátsitakuarhu jámani!

6. ¿Nénajtsïni jarhuatasïni kómarhikua parachi sánderu iátsitakuarhu mókukuantani máteruechani?

⁶ Eranhaska je eska nema no sési ambe uandasïnga Tata Diosï Jeobaeri ambe ka ístu ima ambeeri enga Biblia jorhentpijka. ¿Ambejtsïni jarhuataa enga ísï úkuarhiaka? Kurhakuni Tata Diosï Jeobani eskajtsïni íntskuaka imeeri uinhapikuani ka jánhaskakua parachi úni iátsitakuarhu mókuntani. ¿Ka ambechi uaa úni engachi kuenta íntskukuarheska eskachi jatsipiringa para sánderu sési mókuntani? Uaakachi ménderu uandontskuarheni Tata Diosï Jeobani jingoni ka eratsentani ambechi uaa úni ménderu jimbo. Engachi ísï úska, Tata Diosï Jeobajtsïni íntskuati imeeri espiritu santuni parachi úni pʼíngukuarhini ka iátsitakuarhu jámani.

7. ¿Nénajtsïni marhuachea jorhenguarhiani máru tekstuechani para jiáni engajtsïni nema uékaaka ikiatani? (Proverbios 15:​1, 18).

⁷ Máru Biblieri tekstuechajtsïni uaati jarhuatani parachi iátsitakuarhu uandani jiáni enga no sési ambe úkuarhini jauaka. Espiritu santujtsïni jarhuataati miántaani indeni Biblieri bersikuluechani (Juanu 14:26). Libru de Proverbios jimbo, jarhastiksï prinsipiuecha engajtsïni jarhuataaka iátsitakuarhu jámani (arhinta je Proverbios 15:​1, 18). Ístu i Biblieri librujtsïni xarhatachesïndi andisï xáni marhuajki eskachi pʼíngukuarhiaka jiáni engajtsïni nema uékani jauaka ikiatani (Prov. 10:19; 17:27; 21:23; 25:15).

JÁNHASKAKUAJTSÏNI JARHUATASÏNDI PARACHI IÁTSITAKUARHU JÁMANI

8. ¿Ambe sési jarhaski eskachi miáuaka engajtsïni nema kurhamarhiska ambe engachi jakajkujka?

⁸ Jánhaskakuajtsïni ístu uaati jarhuatani (Prov. 19:11). Kʼuiripu ma enga jánhastiika, jorhenasti pʼíngukuarhini jiáni enga nema kurhamarhijka ima ambeeri enga jakajkujka. Sáno méntkisï engajtsïni kʼuiripuecha kurhamarhijka ambe ma, juchachi no mítesïnga andijtsïnisï kurhamarhijki. Ísï jimbo, ante dechi mókuntani, sési jauati eskachi eratsentaaka andijtsïnisï uéjki kurhamarhini indeni ambe (Prov. 16:23).

9. ¿Néna xarhataspi Gedeóni eska jánhastiispka ka eska iátsitakuarhu jámasïreenga?

⁹ Ju je eratsentani Gedeóniiri ejempluni. Achamasïicha engaksï Efraíniiri triburhu anapuepka, kánikuaksï ikiaparini arhispti Gedeónini andisï no pʼímarhiapi imeechani paraksï nirani uarhipeni Israeliiri enemiguecha jingoni. ¿Andiksïsï xáni ikiani japi? ¿Jindeepi jimbokaksï no sési pʼikuarheraspka enga ísï no pʼímarhiapka? ¿Jamberiksï eratseeni eskaksï imeecha jindeespka tribu enga sánderu kʼéri ambeepka Israeli? Ambe uéjki jimboeni, Gedeóni sési eratsentaspti ka respetarispti na engaksï pʼikuarhereenga ka iátsitakuarhu mókukuantaspti. ¿Ambe úkuarhispi enga ísï úpka? Enga ísï mókukuantapka, “imeechaksï nóteru ikiasptia” (Juec. 8:​1-3).

10. ¿Ambejtsïni jarhuataa sési mókukuntani nemani engajtsïni kurhamarhiaka ambe engachi jucha jakajkujka? (1 Pedru 3:15).

¹⁰ Jamberijtsïni ánchikuarhitarhu o eskuelarhu anapu kompanieru ma, kurhamarhiati andichisï kurhajchaajki Biblieri juramukuechani. Ísïisti, juchachi uékasïnga kuájpini ambe engachi jakajkujka, joperu ístuchi uékasïnga respetariini ambe engaksï máteruecha jakajkujka (arhinta je 1 Pedru 3:15). Ístu, ambe ma engajtsïni jarhuataaka jindeesti, ísï exeni kurhamarhikuani komueska oportunidadi ma parachi míteni ambe enga uandanhiatajka kʼuiripuni, ka no ísï exeni eskajtsïni uékasïnga no sési arhini o arhinchani. No arhiparini andisï kʼuiripu uéjki indeeri ambe uandontskuarheni, sési jauati eskachi iátsitakuarhu mókukuntaaka ka no ikiaparini. Ka jamberi inde ambe uaati eska kurhamarhikuarhiaka andisï ísï eratsejki. Juchachi uékasïnga méntkisï sési kaani kʼuiripuechani nájkirukajtsïni imeecha uinhamarhichiaka ojtsïni teresmarhuni (Rom. 12:17).

11, 12. a) ¿Ambechi orheta jatsiski para úni ante de mókukuntani nemani? b) Uanda je ejemplu ma enga xarhatajka eska ísï úni jarhuajpesïnga para úni sési uandontskuarheni máteruecha jingoni. (Ístu exe je imajenini).

¹¹ Eranhaska je eskaksïni ánchikuarhitarhu kompanieru ma kurhamarhisïnga andijtsïsï no uaantajki kumpleaniuechani. ¿Ambechi úpirini eratsentani ante de mókukuntani? ¿Jindee jimboka eratsesïnga eskachi no jurajkunhasïnga parachi tsípikuarhini? ¿O eratsejki eska jimbokachi no uaantasïnga kumpleaniuechani máteruechaksï no agustu jauaka juchantsïni jingoni? Úpiringachi arhini eska kánikua sési jarhaska enga uandanhiajka imeeri kompanieruecha jimbo, ka xásïchi arhini eskachi juchajtu uékasïnga sési pájperani máteruecha jingoni ánchikuarhitarhu. Jamberi inde ambe sési pʼikuastantaati ka uékani sánderu ambe míteni ambe enga Biblia uandajka kumpleaniuecheeri ambe.

¹² Úpiringachi májkueni ambe úni engajtsïni máteru ambeeri kurhamarhiska. Pori ejemplu, jamberi eskuelarhu anapu kompanieru ma uandaati eskaksï Jeobaeri testiguecha jatsipiringa para ménderueni eratseni omoseksualidadiiri ambe. ¿Ísï uandajki jimboka no míteska ambe engaksï Jeobaeri testiguecha eratsejka indeeri ambe? ¿Imeeri familiari o amigu ma omoseksuali? ¿O eratsejki eskachi jucha kurhunhiasïnga omoseksualiichani? Jamberichi jatsiaka para arhini eskachi uandanhiasïnga iámindu kʼuiripuecha jimbo ka eskachi respetarisïnga ambe enga erakujka mándani kʼuiripu (1 Ped. 2:17).c Ka jamberijtsïni tátsekua jurajkuati parachi aianguni andisï sési jaki eskachi kurhajchauaka Biblieri juramukuechani.

13. ¿Nénachi uaa jarhuatani kʼuiripuni ma enga uandajka eska ísku ambe máeska Tata Diosïni jakajkuni?

¹³ Enga nema enga no májkueni jakajkujka eska jucha, arhiska ambe enga ima eratsejka, ju je no jirejiresï uandani eskachi míteskia ambe enga jakajkujka (Titu 3:2). Eranhaska eskakeni eskuelarhu kompanieru ma arhiska eska ísku ambe máeska Tata Diosïni jakajkuni. ¿Eratsepirindi eska ima ebolusionini jakajkusïnga ka eska kánikua míteska indeeri ambe? Peru jamberi ima ísï uandati jimboka máteruechani kurhajchaaska indeeri ambe. Ísï jimbo, enbesi de arhirperani jarhani ebolusioniiri ambe, sánderu sésiuati imani ambe arhini enga eratsetarantaaka. Jamberiri uaaka axakuni enlasi ma para ima exeni bideu ma o artikulu ma enga kueraakateeri ambe uandajka ka enga jw.org jimbo jaka. Jamberi tátsekua uékaati exeni máteru ambeeri tʼungini jingoni. Respetu jingoni uandontskuarhekuni jamberi marhuauati paraka ima ménderueni eratseaka.

14. ¿Néna úraspi Juanu pájinani jw.org para jarhuatani imeeri kompanieruni ma enga máteru ambe eratseenga Jeobaeri testiguecheeri ambe?

¹⁴ Tumbi sapichu ma enga Juanu arhinhajka, úraspti pájinani jw.org para jarhuatani nemani enga máteru ambe eratseenga Jeobaeri testiguecheeri ambe. Juanu uandantasïndi: “Eskuelarhu anapu kompanierurini ma méntku arhini jarhasïreendi eskani ji no jakajkusïreenga ambe enga siensia uandajka, ka eskani sánderu mintsikasïreenga libruni ma enga kuentu ambejku uandajka, endesi de siensiani enga pruebechani xarhataajka”. Jimboka Juanueri kompanieru no jurajkusïreenga paraka ima aiangupiringa ambe enga jakajkuenga, ima arhiasïreendi eska inchapiringa jw.org partirhu enga arhijka “Biblia ka siensia”. Sánderu tátsekua, Juanu ísku pakaraspti enga mítepka eska imeeri kompanieru arhintaspka informasionini enga jima jaka, ka inde ambe jarhuataspti Juanuni paraka úpiringa uandontskuarhekuni néna ueenaski jarhani tsípikua. Engachi juchajtu májkueni úska, juchaantsïntujtsïni sési nicheati.

FAMILIA JINGONI JORHENGUARHINI

15. ¿Nénaksï uaa jarhuataani taatiicha imeecheeri sapiichani paraksï imeecha iátsitakuarhu mókukuantani máteruechani?

¹⁵ Taatiichaksï uaati jorhendaani imeecheeri sapiichani paraksï iátsitakuarhu mókukuntani nemani enga kurhamarhiauaka ambe engaksï jakajkujka (Sant. 3:13). Máru taatiichaksï jiáni jorhendaasïndi uájpeechani engaksï familieri jorhenguarhikuani jatsijka. Exesïndiksï máru temeechani engaksï úpiringa kurhamarhiani eskuela ka exeraasïndiksï nénaksï uaa mókukuantani máteruechani. Ístuksï taatiicha jorhendaasïndi imeecheeri sapiichani nénaksï uaa iátsitakuarhu mókukuantani máteruechani ka parakaksï kurhajchauaka. (Exe je rekuadruni “Chaari familia jingoni jorhenguarhini jarhuataatiksïni”).

16, 17. ¿Néna uaa jarhuataani tumbiichani engaksï familia jingoni jorhenguarhiska?

¹⁶ Familia jingoni jorhenguarhini no solu jarhuataasïndi tumbiichani paraksï imeecha xarhataaka pruebeecha jingoni eska inde ambe engaksï jakajkujka meru ísïiska, sino ístu jarhuataasïndi paraksï imeecha mismu seguru jarhani inde ambeeri. Partirhu “Jóvenes” enga jw.org jimbo jaka, jarhasti seksioni ma enga arhinhajka “Ponlo por escrito”,d i úkata jarhasti para jarhuataani tumbiichani sánderu mintsikani Tata Diosïni ka parakaksï uaaka máteruechani aianguani ambe engaksï jakajkujka. Engachi juchaari familia jingoni jorhenguarhiska ini informasionini ka ístu seksionini “Tumbiichaksï kurhanguarhisïndi”, iáminduechachi jorhenguarhiaka iátsitakuarhu kuájpini ambe engachi jakajkuka ka eskajtsïni máteruecha uékaaka kurhajchani.

¹⁷ Tumbi ma enga Matthew arhinhajka uandasïndi eska imani kánikua jarhuatasïnga familia jingoni jorhenguarhini. Familieri jorhenguarhikuarhu uánikua uelta inbestigarisïndi imeeri taatiicha jingoni ambe ma engaksï úpiringa eskuela kurhamarhini. Ima uandantasïndi: “Eranhaskasïngachi ambe engajtsïni úpiringa kurhamarhini ka praktikarisïngachi ambe engani uaaka úni, imani ambe úraparini engachi inbestigariikia. Engani seguru jarhajkia ima ambeeri engani jakajkujka, jarhuatasïndirini parani iátsitakuarhu mókukuantani máteruechani”.

18. Eska na uandajka Kolosasi 4:​6, ¿nénachi jatsiski para mókukuantani máteruechani?

¹⁸ Ísïisti, nóksï iáminduecha uékaati jiókuarhi ambe engachi jucha jakajkujka, nájkirukachi sési eksplikarikuauka ambe ma. Peru engachi iátsitakuarhu uandontskuarhekuaska ka sési, inde ambejtsïni uaati jarhuatani (arhinta je Kolosasi 4:6). Uandontskuarheni nemani jingoni ima ambeeri engachi jakajkujka, ísïisti komueska pelota ma kʼuanikukuni; uaakachi iátsitakuarhu o uinhamu kʼuanikukuni. Engachi iátsitakuarhu kʼuanikukuska, sánderu fásiliuati eska ima jupikaaka ka eska seguiriuaka chʼanani. Sáno májkueni, engachi jucha iátsitakuarhu mókukuasta máteruechani ka sési kaani, sánderu segurueuati eskajtsïni imeecha uékaaka kurhajchani. Peru enga nema juchantsïni jingoni uékaaka arhirperani, ojtsïni teresmarhuni uékani, nóchi jatsiska para seguiriini uandontskuarheni imani jingoni (Prov. 26:4). Peru sáno iámindu kʼuiripuechaksï no ísï jámasïndi; jamberijtsïni uánikuecha uékaati kurhajchani.

19. ¿Andichisï jatsi para sési kámpini ka iátsitakuarhu mókukuantani máteruechani?

¹⁹ Eskachi na exekia, kánikua marhuasïndi sési kámpini ka iátsitakuarhu mókukuantani máteruechani. Kurhaku je Tata Diosï Jeobani eskaksïni íntskua uinhapikua, parajtsï iátsitakuarhu mókukuantani imeechani engaksïni kurhamarhiaka ambe engachi jucha jakajkujka o engaksïni arhinchani jauaka. Asï mirikurhi je eska engajtsï iátsitakuarhu mókukuantaska, uaati eskajtsï no arhirperaaka. Ka engajtsï respetu jingoni mókukuantaska ka sési, jamberi uaati eskaksï máteruecha ménderueni eratseaka juchaari ambe ka ima ambeeri enga Biblia jorhentpijka. Ísï jimbo, “méntkisï jingontku jaka je parajtsï úni mókukuantani [...] iátsitakuarhu ka kánikua janhanharhikua jingoni” (1 Ped. 3:15). ¡Jo, engajtsï sési kámpiska ka iátsitakuarhu mókukuantani máteruecha, xarhataakajtsï eskajtsï uinhapitiiska!