¿Ambeski Tata Diosïri Reinu?

1. ¿Ambeski Tata Diosïri Reinu?

Tata Diosïri Reinu auandarhu jarhasti. I Reinu kénditauati iámindu gobiernuechani ka uáti eska úkuarhiaka ambe enga Tata Diosï uékajka auandarhu ka ixú Echerirhu. Ambakiti ambesti enga Tata Diosïri Reinu uáka. No ióni jimbo, Tata Diosïri Reinu íntskuauati kʼuiripuechani imani ambe engaksï xáni jirinhajka, ambakiti gobiernu ma, ka i gobiernu uáti eskaksï iáminduecha sési pájperaaka. Arhinta je Daniel 2:44; Mateu 6:9, 10, ka 24:14.

Ísï eska gobiernu ma jimbo na jarhajka juramuti ma, Jeoba imeri Uájpa Jesukristuni erakusti para Juramutini imeri Reinurhu. Arhinta je Jaŋaskuecha (Apocalipsis) 11:15.

Exe je bideuni ¿Ambeski Tata Diosïri Reinu?

2. ¿Andisï Jesusi jindee sánderu ambakiti juramuti?

Tata Diosïri Uájpa jindesti sánderu ambakiti juramuti, jimboka pʼamojpitiska ka tsitisïndi úni ambe enga jurhimbitika (Juanu 1:14). Ka jimboka ima juramutiuaka Parhakpinirhu, auandarhu uératini, jatsisti uinhapikua para jarhuatani kʼuiripuni. Enga Jesusi tsíntapkia, auandarhu karhanchintaspti ka Jeobaeri jurhijkandani ladu uaxakaspti erokuarhini astaka intsïnhapiringa juramukua (Ebreu 10:12, 13). Tátsekua Tata Diosï íntskusti uinhapikua paraka uénapiringa juramuni. Arhinta je Daniel 7:13, 14.

3. ¿Néksï juramua Jesusini jingoni?

Jarhastiksï máru kʼuiripuecha engaksï Jesusini jingoni juramuaka auandarhu ka íksï arhinhasïndi, “pímbinharaticha” (Daniel 7:27). Orheta pímbinharhati erakukatechaksï jindespti Jesusiri apostulicha. Ka iásï jamberi Jeoba útasï erakuaxati ini jarhati kʼuiripuechani. Ka ísï eska Jesusi, tsíntasïndiksï kuerpu ma jingoni enga ísïka eska ánjilicheri. Arhinta je Juanu 14:1-3 ka 1 Corintios 15:42-44, NM.

¿Namuni kʼuiripuechaksï niua auandarhu? Jesusi uandaspti eskaksï ‘namunitkueska’ (Lukasʌ 12:32). Biblia uandasïndi eskaksï jindeska 144,000. Íksï auandarhu uératini, Jesusini jingonksï juramuati Echerirhu. Arhinta je Jaŋaskuecha 14:1.

4. ¿Ambe úkuarhispi enga Jesusi uénapka juramuni?

Jesusi 1914 jimbo uénasti juramuni. Ka ma ambe enga Jesusi uénapka úni, jindespti kʼuanijpani Satanasini ka imeri demoniuechani Echerirhu.a I ambe kánikua ikiataspti Satanasini, jimbosï jiáni úndati xáni no sési jánhaskuarheni ixú parhakpinirhu (Jaŋaskuecha 12:7-10, 12). Jiánksï uénasti sánderu uandanhiata jatsiani kʼuiripuecha. Uarhiperakuecha, kʼarhingua, pʼamenchakuecha ka jenchekuecha, jindestiksï ambe ma enga xarhatajka eska no ióni jimbo Tata Diosïri Reinu enkargarikuariaka iámindu ambe ixú Echerirhu. Arhinta je Lukasʌ 21:7, 10, 11, 31.

5. ¿Ambe úxaki Tata Diosïri Reinu iásï ka ambe uá sánderu orhepatini?

Eianhperakuani jimbo enga iámu parhakpinirhu úkuarheni jaka, Tata Diosïri Reinu tánaaxati ‘uánikua kʼuiripu’ iápurisï anapuechani. Miioni jimbo kʼuiripuechaksï jiókuarhixati eska Jesusi juramukuauaka. Íksï tsípiti pakaraati enga Tata Diosïri Reinu kʼamajkuauaka iámindu no sési úrichani. Engachi uékaaka tsípiti pakarani, jatsiskachi para kurhajchani Jesusini. Arhinta je Jaŋaskuecha 7:9, 14, 16, 17.

Ma tiempu enga jindeuaka mili uéxurhini, Tata Diosïri Reinu uáti eska úkuarhiaka echerirhu ima ambe enga Tata Diosï uékaenga uénakuarhu. Iámu Parhakpini paraisu ma úkuarhintaati. Ka tátsekua, Jesusi íntskuntati juramukuani imeri Tátini (1 Korintu 15:24-26). ¿Uékapirintsï nemani eianguni Tata Diosïri Reinueri ambe? Arhinta je Salmo 37:10, 11, 29.