1-3. a) ¿Ambechi kurhamarhikuarhisïni enga nema uarhijka? b) ¿Ambeksï uandasïni máru relijionicha ambe engachi úkuarhinchajka engachi uarhijka?

BIBLIAJTSÏNI aiachisïndi eska sánderu orhepani “nóteru jaua[kia] uarhikua” (Jaŋaskuecha 21:4). Kapitulu 5 jimbo, jorhenguarhiskachi eska pʼímutantskua jimbo, uákachi irekani para méntkisï. Peruchi seguirixaka uarhini (Eclesiastés 9:5). Ísï jimbo, kurhamarhikua ma enga jukaparhakueka ka engachi iáminduecha úkuarhijka jindesti “¿Ambechi úkuarhinchasïni engachi uarhijka?”.

² Kánikua jukaparhakuesti míteni mókuntskuani i kurhamarhikueri ka sánderia enga familiari ma uarhiaka o amigu ma. Jamberichi kurhamarhikuarhijka: “¿Nani jarhaski? ¿Exexakijtsïni? ¿Kómu nitamaxaki? ¿Uájtsïni jarhuatani? ¿Uáchi ménderu exentani?”.

³ Relijionichaksï mámaru járhati mókuntskuechani íntspiasïndi para i kurhamarhikuecha. Máruksï jorhentpisïndi eskaksï ambakiti kʼuiripuecha auandarhu nirasïnga ka no sési úricha infiernurhu. Máteruksï uandasïndi eska engachi uarhijka, espirituchi úkuarhintasïnga ka eskachi juchari familiaricha jingoni niántasïnga engaksï uarhikia. Ka máteruechaksï jorhentpisïndi eska engachi uarhijka, jusgarinhasïngachi ka ménderuchi uénasïnga irekani o máteru kuerpu jimbo. Uandasïndiksï eskachi úsïnga máteru kʼuiripu úkuarhintani o asta animali ma.

4. ¿Náki eratsekuaksï jorhentpisïni relijionicha uarhikueri ambe?

⁴ Nájkirukaksï relijionicha mámaru ambe uandajka uarhikueri ambe, sáno iáminduechaksï májku eratsekua jorhentpisïndi: eska engachi uarhijka, ma parti juchari ambe tsípiti pakarasïnga. Peru ¿ísïski inde ambe?

¿AMBECHI ÚKUARHINCHASÏNI ENGACHI UARHIJKA?

5, 6. ¿Ambechi úkuarhinchasïni engachi uarhijka?

⁵ Jeoba mítesti ambe engachi úkuarhinchajka engachi uarhijka. Imajtsïni jorhendasïndi Bibliarhu eska engachi uarhijka, juchari tsípikua kʼamakurhisïnga. Engachi uarhijka, nóteruchi exesïnguia, kurhaani ni eratseni. Nóteruchi ambe ma pʼikuarherasïnga ni miáni. Nóchi jatsiska espiritu ma enga tsípiti pakarajka máteru nanisï.a

⁶ Rei Salomoni karaspti eskaksï uarhiricha ‘méntku nóteru ambe ma míteskia’. Ísï jimbo, nóteruksï uékpisïndia ni ikiatspini. Ístu Salomoni uandaspti eska “no jarhaska ánchikuarhita ni ambe ma para úni, ni jánhaskakua ni mímixekua jini Tumbarhu” (arhinta je Eclesiastés 9:5, 6, 10). Ka Salmo 146:4 arhisïndi eska enga nema uarhijka, imeri eratsekuechaksï ístu uarhisïnga.

¿AMBE UANDASPI JESUSI UARHIKUERI AMBE?

7. ¿Jesusi ambe jingoni terukutantaspi uarhikuani?

⁷ Enga Lasaru uarhipkia, Jesusi arhiaspti imeri chúxapatichani: “Juchari amigu Lasaru kʼuíxati, peru niraxamkani tsínharhitani”. ¿Ambe arhikuekaxapi? Ísï tátsekua uandantaspti: “Lasaru uarhistia” (Juanu 11:11-14). Ísï jimbo, Jesusi ísï terukutantaspti uarhikuani komueska uinhamu kʼuíni jarhani. Ima no uandaspti eska Lasaru auandarhu jarhaspka o imeri familiaricha jingoni engaksï uarhipkia. Ístu no uandaspti eska Lasaru kómu nitamaxapka infiernurhu ni eska máteru kuerpu jimbo andajpenuspka o animali ma jimbo. Sánderu sési, ísïspti enajki Lasaru uinhamu kʼuíni japi. Ístu, máteru xanhari Jesusi ísï terukutantaspti uarhikuani komu kʼuíni jarhani. Enga tsinapka Jairueri uájpani, uandaspti: “No uarhirixati sino kʼuíxati” (Lukasʌ 8:52).

8. ¿Nénachi míteski eskajtsïni Tata Diosï no kueraaska parachi uarhini?

⁸ ¿Tata Diosï nomasi kuerauaski kʼuiripuechani paraksï uarhini? Nómbe. ¿Nénachi míteski? Jeoba kueraaspti Adani ka Ebani paraksï irekani para méntkisï no ma pʼamenchakua jingoni. Ístu, ísï kuerauaspti paraksï tsitini irekani para méntkisï (Eclesiastés 3:11). No jarhasti táti ma enga tsitijka eskaksï imeri sapiicha pʼamenchaaka ka uarhini. Májkueni, juchari Táti Jeoba, no sáni tsitisïndi exeni eskachi pʼamechaaka ka uarhini. Peru engajtsïni Tata Diosï ísï kueraaka parachi irekani para méntkisï, jiájkani, ¿andichisï uarhijki?

¿ANDICHISÏ UARHIJKI?

9. ¿Andisï sési japi ima juramukua enga Tata Diosï íntsaapka Adani ka Ebani?

⁹ Iámindu ambe jardini de Edenirhu uénaspti, Jeoba arhispti Adanini: “Uákari arhani iámindu anhatapuecheri engaksï jardinirhu jaka astakari uiniarhaaka. Peru nóri jatsiska para arhani ima anhatapueri enga jindeka para míteni ambe sési jarhaski ka ambe no sési jarhaski, jimboka ima jurhiatikua engari auaka, niáraakari uarhini” (Génesis 2:9, 16, 17). I juramukua enga no úkua jukapka para kurhanguni, fásilispti para kumplirini. Ka máteru ambe, Jeoba Kuerauaspti ka ima úpirindi arhiani ambe sési jarhaspi ka ambe nómbe. Engaksï Adani ka Eba kurhajchapiringa Jeobani, xarhatapirindiksï eskaksï janhanharhisïrenga ka eskaksï diosmaiamukua íntskuntasïrenga iámindu ambe jimbo enga íntsaapka.

10, 11. a) ¿Néna úspi Satanasi parakaksï Adani ka Eba no kurhajchapiringa Tata Diosïni? b) ¿Andisï no ma ambe japi engaksï jimbo Adani ka Eba jatsipka para inde ambe úni?

¹⁰ Peruksï Adani ka Eba no uékaspti kurhajchani Jeobani, xáni no sési. Satanasi arhispti Ebani: “¿Meru ísïski eskaksïni Tata Diosï arhiska eskajtsï no jatsiska para arhani iámindu anhatapuecheri engaksï jardinirhu jaka?”. Ka Eba mókukuspti: “Jucha uáka fruta akuni iámindu anhatapuechani engaksï jardinirhu jaka. Peru Tata Diosï arini ambe uandasti inde fruteri enga anhatapurhu jukaka enga jardinirhu terujkani jaka: ‘Nójtsï jatsiska para arhani, nómbe, nójtsï jatsiska para pʼárhini; sinojtsï uarhiaka’” (Génesis 3:1-3).

¹¹ Jimajkani Satanasi arhispti Ebani: “Nójtsï niáraaka uarhini. Jimboka Tata Diosï míteska eska ima mismu jurhiatikua jimbo engajtsï akuaka, niáraakajtsï uánikua ambe míteni ka ísïuakajtsï eska Tata Diosï, míteakajtsï ambe sésiski ka ambe nómbe” (Génesis 3:4-6). Satanasi uékasïrendi eska Eba ísï exepiringa eska úpiringa jandiajku exeni ambe sési jarhaski ka ambe nómbe. Peru ístu Satanasi chkuanderakuspti Ebani ima amberi enga úkuarhinchapiringa enga no kurhandirapiringa. Noambakiti arhispti eska no uarhipiringa, ísï jimbo Eba arhaspti frutani. Tátsekua, Eba íntskuspti Adanini frutani ka imajtu arhaspti. Adani ka Eba, mítesptiksï eska Jeoba arhiaspka eskaksï no apiringa frutani. Engaksï apka, imaksï erakuspti no ísï úni eska na uandenga juramukua enga no úkua jukapka para kurhanguni ka fásilini para kumplirini. Ambe engaksï erakupka úni, Adani ka Ebaksï xarhataspti eskaksï no janhanharisïrenga imecheri Táti auandarhu anapuni enga xáni uékpitika. ¡No ma ambe jarhaspti engaksï jimbo jatsipka para inde ambe úni!

12. ¿Andisï no sési pʼikuarherapi Jeoba, Adani ka Ebani jimbo?

¹² Seguru eska Jeoba kánikua no sési pʼikuarherapka Adani ka Ebani jimbo. Jeoba imecheri Tátispti, ka imaksï no sáni janhanharhispti. Eranhaska je eskajtsï kánikua jánguarhintasïnga para tʼarhexeraani chári sapiichani, ma tatakani ka ma nanaka. Peruksïni chári sapiicha nóteru uékasïndia kurhajchani ka únksï ambe engaksï imecha uéjka úni. ¿A no eskajtsï kánikua no sési pʼikuarherapiringa?

13. ¿Ambe arhikuekaxapi Jeoba enga arhipka Adanini eska tʼupuri úkuarhintapiringa?

¹³ Engaksï Adani ka Eba no kurhandirapka, tsïtasptiksï sésikua para irekani para méntkisï. Jeoba arhispti Adanini: “Jimbokari tʼupuririska ka tʼupuriri úkuarhintaaka” (arhinta je Génesis 3:19). Adani tʼupuri jingoni únhaspti, ísï jimbo, Jeoba arhikuekaxapti eska Adani ménderu tʼupuri úkuarhintapiringa, ísï enajki no méni irekapi (Génesis 2:7). Enga uarhipka, méntku kʼamakurhisti.

14. ¿Andichisï uarhijki?

¹⁴ Engaksï Adani ka Eba kurhajchapiringa Tata Diosïni, útasïksï tsípiti japirindi. Peru engaksï no kurhandirapka, pekarisptiksï ka tiempu jingonksï uarhisti. Kʼamanharhintskua ísïsti komu no sési jásï pʼamenchakua ma engajtsïni kéritaka juchari orheta táticha. Jimbochisï uarhijka jimbokachi iáminduecha kʼamanharhintskua jingoni andajpenusïnga (Roma 5:12). Peru Jeoba no méni uékasïrendi eskaksï kʼuiripuecha uarhipiringa. Jimbosï Biblia arhijti eska uarhikua “ikiatspiti” máeska o enemigu ma (1 Korintu 15:26).

MARHUACHISÏNDIJTSÏNI MÍTENI JURHIMBIKUA UARHIKUERI AMBE

15. Míteni jurhimbikua uarhikueri ambe ¿néna úsïni parachi nóteru jakajkunia chkuanderakua ambe?

¹⁵ Uánikua relijionichaksï jorhentpisïndi eskaksï uarhiricha seguirini jarhasïnga irekani máteru nani ka eskachi jucha uáka jarhuataani. Enga nema uarhijka, ménisïksï familiaricha tumina íntsaasïndi relijioniri orhejtsïkutichani paraksï kómarhijpikuni imani kʼuiripuni o paraksï misa ma úkuni. Peru Biblia uandasïndi eskaksï uarhiricha no kómu nitamaxaka ni kómu pʼikuarherani. Juchachi no úsïnga uandontskuarheni imecha jingoni ni jarhuataani. Imechajtuksï no úsïndi uandontskuarheni juchantsïni jingoni nijtsïni jarhuatani ni no sési ambe úchini. Ísï jimbochisï no jatsika para chérhiani. Jo, míteni jurhimbikua uarhikueri ambe úsïndi eskachi nóteru chkuanderakua ambe jakajkuakia.

16. ¿Náki chkuanderakuanksï jorhentpisïni uánikua relijionicha uarhikueri ambe?

¹⁶ Satanasi, relijioni no jurhimbitichani úraasïndi parajtsïni támisï janhastani ka parachi jakajkuni eskaksï uarhiricha seguirini jarhasïnga irekani. Por ejemplu, máru relijionichaksï jorhentpisïndi eska engachi uarhijka, ma parti juchari ambe seguirini jarhasïnga irekani máteru nani. ¿I ambe jorhentpisïni chári relijioni, o ima ambe enga Biblia jorhentpijka? Satanasi ini chkuanderakuani úrasïndi ka máteruechani para úni eskaksï kʼuiripuecha jarhariaka Tata Diosïni.

17. ¿Andisï no sési pakatajki Jeobani i jorhentperakua eskaksï no sési úricha infiernurhu kurhisïnga?

¹⁷ Ambe engaksï jorhentpijka uánikua relijionicha uarhikueri ambe, no sési pakatasïndi Jeobani. Por ejemplu, máruksï jorhentpisïndi eskaksï no sési úricha infiernurhu kurhiaka. Peru inde ambe no ísïsti. ¡Jeoba no méni xáni no sési ambe úkupirindi kʼuiripuni! (Arhinta je 1 Juanu 4:8). ¿Ambejtsï eratsepirini cha tátiri ma enga imeri uájpani jájkichani kurhirakuapiringa para kastigarini? Seguru eskajtsï eratsepiringa eska kánikua no ambakiska, ka nójtsï uékapiringa imeri amigueni. Noambakiti uékasïndi eskachi ísï exeaka Jeobani.

18. ¿Andichisï no jatsi para chérhiani uarhirichani?

¹⁸ Máru relijionichaksï jorhentpisïndi eska engachi uarhijka, espirituchi úkuarhintasïnga. Ístuksï uandasïndi eskachi jatsiska para janhanharhiani ini espirituechani ka asta chérhiani jimbokaksï uáka juchari amiguecheni engaksï uinhapikua jatsika o juchari enemiguecheni engajtsïni no sési úchiaka. Komu uánikua kʼuiripu jakajkujka ini chkuanderakuani, chérhiasïndiksï uarhirichani. Jimboksïsï uánikua kʼuiripuecha uarhirichani kómarhiajti enbesi de Jeobani. Peru miá je eskaksï uarhiricha no ma ambe pʼikuarherasïnga ni úni ambe ma. Ísï jimbo, nóchi jatsiska para chérhiani. Jeoba jindesti juchari Kuerajpiri ka Tata Diosï jurhimbiti. Imantkuchisï jatsika para kómarhini (Jaŋaskuecha 4:11).

19. ¿Nénajtsïni marhuachisïni míteni jurhimbikua uarhikueri ambe?

¹⁹ Míteni jurhimbikua uarhikueri ambe úsïndi eskachi nóteru jakajkuakia relijionicheri chkuanderakua ambe. Ístujtsïni jarhuatasïndi sánderu sési kurhanguni Jeobaeri xáni ambakiti aiatsperakuechani para sánderu orhepani.

20. ¿Náki kurhamarhikuanchi mókuntaa máteru kapitulu jimbo?

²⁰ Ióntki, Tata Diosïri marhuari ma enga Jobu arhinhenga, kurhanguarhispti: “Enga achamasï ma uarhiaka, ¿uá ménderu irentani?” (Job 14:14). Máteru kapitulu jimbochi exeaka ini xáni ambakiti mókuntskuani enga Biblia íntspijka para i kurhamarhikua.

1-3. a) ¿Ambechi niárasïni úkuarhinchani iáminduecha? b) ¿Ambe uá Jeoba uarhikua jingoni?

ERANHASKA je eskajtsï kulparinhasïnga ambe ma jimbo engajtsï no úka ka arhinhantsï eskajtsï ónhakata pakaraaka para méntkisï. Nójtsï méni uáka uéntani. Ísïjtsï pʼikuarherasïnga enajkijtsï nóteru uáia orhepani uérani. Eska no ma ambe jarhaska engajtsï uáka úni. Peru meru jiáni engajtsï ísï exejka eskajtsï nóteru uákia orhepani uérani, mítesïngajtsï eska jarhaska nema engaksïni uáka petantani kárselirhu ka eska aiakukuarhiska paraksïni jarhuatani. ¿Nénajtsï pʼikuarherapirini?

² Iámindu kʼuiripuechachi ísï jarhaska enajkichi jupikakata jaki uarhikuani jimbo. No nema úsïndi úni ambe ma parachi no uarhini. Peru Jeoba jatsisti uinhapikua para úni eskachi nóteru uarhiakia. ¿Néna uá ísï úni? Ima aiatspisïndi eska méntku kʼamajkuaka uarhikuani (1 Korintu 15:26).

³ ¿Úsïntsï eranhaskani na engachi xáni sési pʼikuarheraaka engachi nóteru uarhiakia? Peru Jeoba no solu kʼamajkuati uarhikuani. Sino ístu tsítantauati uarhichani. Jeoba uáti eskaksï tsíntaaka uarhiricha ka aiachisïndijtsïni eska ísï uáka (Isaías 26:19).

ENGACHI UARHIRANCHAJKA NEMANI

4. a) ¿Ambejtsïni uá uinhaperantani enga familiarhu anapu ma uarhiaka o amigu ma? b) ¿Neecha jingoni sési pájperasïreni Jesusi?

⁴ Enga familiarhu anapu ma uarhijka o amigu ma, kánikuachi no sési pʼikuarherasïnga, jimbokachi no ma ambe úsïnga úni parachi tsítantani. Peru ambe enga Biblia uandajka kánikuajtsïni uinhaperantasïndi (arhinta je 2 Korintu 1:3, 4). Ju je exeni ejemplu ma enga xarhatajka eska Jeoba ka Jesusi uékasïnga tsítantaani juchari parientichani ka amiguechani. Enga Jesusi Echerirhu japka, someni nirasïrendi pʼorhembini Lasaruni ka imeri ermanechani, Marta ka Mariani. Taniperanksï sési pájperasïrendi Jesusini jingoni. Biblia arhisïndi: “Jesusi meru tsípisïrendi exeni Martani ka imeri jingonikua jembani ka ístu Lasaruni” (Juanu 11:3-5). Peru sánderu orhepani, Lasaru uarhispti.

5, 6. a) ¿Jesusi néna pʼikuarheraspi enga exepka Lasarueri familiani ka amigu jembechani uerani jarhani? b) ¿Andijtsïnisï uinhaperantajki enga Jesusi no sési pʼikuarherapka?

⁵ Ini ambe jimbo, Jesusi niraspti uinhaperantani Marta ka Mariani. Enga Marta mítepka eska Jesusi niáraxapkia iretarhu, niraspti kúmuni. Tsípispti enga exepka Jesusini, peru arhispti: “Engari tʼu ixú japiringa, juchiti mími no uarhipirindi”. Marta eratsespti eska Jesusi ióndaspka niárani. Tátsekua, Jesusi ístu exespti Mariani uerani jarhani. Enga exepka eska Lasarueri familia ka imeri amiguechaksï ueraxapka, kánikua no sési pʼikuarheraspti enga ístu pʼiarapka uerani (Juanu 11:21, 33, 35). Jesusi májkueni no sési pʼikuarheraspti eska jucha na pʼikuarherajka engachi uarhiranchajka nemani engachi xénchajka.

⁶ Míteni eska Jesusi no sési pʼikuarherasïnga engachi uarhiranchajka nemani, uinhaperantasïndijtsïni. Exerasïndijtsïni eska ima ka imeri Táti no sáni tsitisïnga enga nema uarhijka (Juanu 14:9). Ka Jeoba uinhapikua jatsisti para kʼamajkuni uarhikuani ka aiatspisïndi eska no ióni jimbo ísï uáka.

“LASARU, JUNI UÉNTANI”

7, 8. a) ¿Andisï no uékeni Marta eskaksï kénditapiringa tsakapuni Lasarueri tumbarhu? b) ¿Náki milagru úspi Jesusi?

⁷ Jesusi tumbarhu niraspti nani engaksï Lasaruni jatsintapka. Kʼéri tsakapu ma jingonksï ómutaspti. Jimbosï Jesusi arhiapti: “Pʼiku je tsakapuni”. Peru Marta no uékasïrendi jimboka Lasaru tʼámu jurhiatikua páxapkia uarhirini (Juanu 11:39). Buenu, Marta no mítespti ambe enga Jesusi uékani japka úni Lasaruni jimbo.

⁸ Engaksï kénditapkia tsakapuni, Jesusi uandaspti: “Lasaru, juni uéntani”. Jiájkani, Marta ka Maria exesptiksï ambe ma enga ísku pakataapka: Achamasï enga uarhirini japka “uéntaspti kuebarhu takusï irhikuarhitini ka irhindutini” (Juanu 11:43, 44). ¡Lasaru ménderu tsípiti jarhasptia! Úspti ménderu imeri familia ka amiguecha jingoni jarhani. Iáminduechaksï úsïrendi pʼarhini, kamajchakuni ka imani jingoni uandontskuarheni. ¡Xáni kʼéri milagru ma! Jesusi tsítantaspti Lasaruni.

“IURHITSKIRI SAPICHU TʼUNGUINISÏ ARHIJKA JAUARIA”

9, 10. a) ¿Né íntskuspi Jesusini uinhapikua para tsítantaani uarhirichani? b) ¿Nénajtsïni jarhuatasïni arhintani karakatechani engaksï tsíntskueri ambe uandajka?

⁹ ¿Né íntskuspi Jesusini uinhapikua para tsítantaani uarhirichani? Ante de tsítantani Lasaruni, Jesusi kómarhispti Jeobani. Jimajkani Jeoba íntskuspti uinhapikua para ima tsítantani Lasaruni (arhinta je Juanu 11:41, 42). Peru aparte de Lasaru, jarhasptiksï máteru kʼuiripuecha engaksï tsíntapka. Por ejemplu, Biblia nanaka sapichueri ma uandasïndi enga 12 jatiripka, enga uinhamu pʼamenchani japka. Jairu arhinhasïrendi imeri táti jemba ka imani sapinkusï kánguarhiendi. Jairu kánikua uandanhiaxapti ka kómarhintaspti Jesusini paraka tsinapiringa imeri nanaka sapichuni. Enga Jesusi jingoni uandontskuarheni japka, achamasïchaksï máru niáraspti ka arhisptiksï Jairuni: “¡Chíti uátsï uarhistia! ¿Ambeteruri úni xáni molestaria jorhentpitini?”. Peru Jesusi arhispti: “Asï jáma chéni, nomasi mintsikarini jindeni ka chíti uátsïti ambakintaati”. Tátsekuaksï májku kʼéri niraspti Jairueri kʼumanchikuarhu. Enga Jesusi niárani japkia, exespti na engaksï no sési pʼikuarheraparini uerani japka kʼuiripuecha. Jesusi arhiaspti: “Iurhitskiri sapichu no uarhirixati sino kʼuíxati”, ísï jimbosï arhiapti eskaksï nóteru uerapiringuia. Jamberi nanaka sapichueri táti jembechaksï no kurhangupti ambe enga Jesusi arhikuekenga. Tátsekua, Jesusi arhiaspti iáminduechani eskaksï uéntapiringa ka niraspti jima enga nanaka sapichu japka imeri táti jembecha jingoni. Jesusi jupijkuspti nanaka sapichuni ka arhispti: “Iurhitskiri sapichu tʼunguinisï arhijka jauaria”. Eranhaska je na engaksï xáni tsípipka engaksï exepka eska imecheri nanaka sapichu jauaraspka ka xanharani. ¡Jesusi tsítantaspti nanaka sapichuni! (Markusʌ 5:22-24, 35-42; Lukasʌ 8:49-56). Jiáni uératini, enga Jairu ka imeri témba exenga imecheri sapini, miántasïrendiksï ambe enga Jeoba úpka imechani jimbo Jesusini úraparini.a

¹⁰ Imecha enga Jesusi tsítantaapka ísï tátsekuaksï ménderu uarhispti. Peru inde ambejtsïni kánikua jarhuatasïndi, jimbokajtsïni ambakiti erokuarhikua ma íntskusïnga. Ístu, xarhatasïndi eska Jeoba uékasïnga tsítantaani uarhirichani ka eska niáraaka ísï úni.

AMBE ENGACHI JORHENGUARHIJKA TSÍNTSKUERI AMBE

11. Seguni ambe enga uandajka Eclesiastés 9:5, ¿ambe úkuarhinchaspi Lasaru enga uarhipka?

¹¹ Biblia uandasïndi eskaksï uarhiricha “méntku nóteru ambe ma mítestia” (Eclesiastés 9:5). Lasaru i ambesï úkuarhinchapti. Enga tumbarhu japka, no mítespti ambesï úkuarhini japi imeri uirhipandani jimbo. Ísï eska na uandapka Jesusi, ísïspti enajki Lasaru kʼuíni japi (Juanu 11:11).

12. ¿Nénachi míteski eska Lasaru meru tsíntaspka?

¹² Uánikua kʼuiripuechaksï exespti enga Jesusi, Lasaruni tsítantapka. Asta imecha engaksï ikiakuenga Jesusini mítesptiksï eska úspka imani milagruni. No nema úpirindi uandani eska inde ambe no ísï úkuarhispka jimboka Lasaru tsípiti jarhaspkia (Juanu 11:47). Peru ístu, uánikua kʼuiripuechaksï niraspti exeni Lasaruni ka uénasptiksï jakajkuni eska Tata Diosï axaspka Jesusini. Imecha engaksï ikiakuenga Jesuni, nóksï tsitispti i ambe, jimboksïsï uénapti exeni nénaksï uándikupirini Jesusini ka Lasaruni (Juanu 11:53; 12:9-11).

13. ¿Andichisï uá seguru jarhani eska Jeoba tsítantauaka uarhirichani?

¹³ Tata Jesukristu uandaspti eskaksï “iámindu imecha engaksï inchatsikurhini jaka” tsíntaaka (Juanu 5:28). I ambe arhikuekasïndi eska Jeoba tsítantauaka iámindu imechani enga imeri eratsekuarhu jatsiaka. Para ísï úni, jatsisti para iámindu ambe miántani ima kʼuiripuecheri. ¿Jeoba uá ísï úni? Eratsi je arini ambe: auandarhuksï uánikua jóskuecha jarhasti ka Biblia uandasïndi eska Tata Diosï míteska na engaksï arhinhajka mándani arhini jóskuecha (arhinta je Isaías 40:26). Enga Jeoba újka miáni na enga arhinhajka mándani jóskua, seguru eska no úkua jukanchaaka miántani iámindu ambe ima kʼuiripuecheri engaksï tsíntaaka. Jeoba kueraasti iámindu ambe, ísï jimbo, uinhapikua jatsisti para úni tsítantaani uarhirichani.

14, 15. ¿Ambechi jorhenguarhisïni ambe enga uandapka Jobu tsíntskueri ambe?

¹⁴ Ióntki anapu ambakiti achamasï ma enga Jobu arhinhenga, jakajkusïrendi tsíntskuani. Ma xanhari, kómarhikua ma jimbo, uandaspti: “Enga achamasï ma uarhiaka, ¿uá ménderu irentani?”. Tátsekua arhispti Jeobani: “Tʼurini uandajpaaka, ka jíkini mókuchiaka. Kánikuari uékaaka ísï úni chíti kueraakatani jingoni”. I ambejtsïni jorhendasïndi eska Jeoba uékaxakia tsítantaani uarhirichani (Job 14:13-15).

¹⁵ ¿Nájtsï pʼikuarherasïni engajtsï tsíntskueri ambe eratsentajka? Kánikuajtsïni uinhaperantasïndi míteni eska Jeoba uékasïnga tsítantaani uarhirichani. Peru jamberijtsï kurhamarhikuarhijka: “¿Ístuksï tsíntaa juchiti familiaricha ka amiguecha engaksï uarhikia?”. Ju je exeni ambe enga uandajka Biblia imecheri ambe engaksï tsíntaaka ka nani engaksï irekaaka.

‘KURHAUATIKSÏ IMERI UANDAKUANI KA TSÍNTAATIKSÏ’

16. ¿Nénaksï ireka imecha engaksï tsíntaaka?

¹⁶ Ima kʼuiripuecha engaksï ióntki tsíntapka, ménderuksï úspti imecheri familia ka amiguecha jingoni jarhani ixú Echerirhu. I ambe úkuarhiati sánderu orhepani, peru sánderu sési jauati. ¿Andi? Jimboka imecha engaksï tsíntaaka uátiksï irekani para méntkisï ixú Echerirhu. Ka irekaatiksï parhakpini ma jimbo enga kánikua ménderueniuaka. Nóteru jauatia uarhiperakua ambe, uándikperakua ni pʼamenchakuecha.

17. ¿Néksï tsíntaa?

¹⁷ ¿Néksï tsíntaa? Tata Jesukristu uandaspti: “Iámindu imecha engaksï inchatsikurhini jaka [...] tsíntaatiksï” (Juanu 5:28, 29). Ístu Biblia uandasïndi: “Mari íntspiantaspti uarhirichani engaksï jima japka, ka uarhikua ka Tumba ístuksï íntspiantaspti uarhirichani engaksï jima japka” (Jaŋaskuecha 20:13, TNM). Apostuli Pablu uandaspti eskaksï “tsíntaaka uarhiricha imecha engaksï ambarhatika [o jurhimbitika], ka ístu imecha engaksï malueka [o no jurhimbitika]” (arhinta je Ukuecha 24:15). ¿Ambe arhikuekaxapi?

18. ¿Néskiksï jurhimbiticha engaksï tsíntaaka?

¹⁸ ¿Néskiksï jurhimbiticha? Máruksï jindesti ióntki anapu Jeobaeri ambakiti marhuaricha engaksï irekapka ante de Jesusi Echerirhu jurhani. Iámindu imechaksï tsíntaati Echerirhu. Máruksï jindesti Noe, Abraani, Sara, Moisesi, Ruti ka Esteri. Ebreu kapitulu 11 jimbo uandasïndi máru i kʼuiripuecheri. Peru ¿ambe úkuarhia Tata Diosïri ambakiti marhuaricha jingoni engaksï i tiempu jimbo uarhijka? Ichajtuksï jurhimbiticha jingoni kuenta úkuarhisïndi ka tsíntaatiksï.

19. a) ¿Néskiksï no jurhimbiticha engaksï tsíntaaka? b) ¿Jeoba ambe sésikua íntsaua?

¹⁹ ¿Néskiksï no jurhimbiticha engaksï tsíntaaka? Iámindu ima kʼuiripuecha engaksï no úpka míteni Jeobani. Nájkirukaksï uarhikia, Jeoba no mirikurhiaxati. Ima tsítantauati ka sésikua íntsauati paraksï míteni ka únksï imani marhuakuni.

20. ¿Néksï no tsíntaa?

²⁰ Jiájkani, ¿arhikuekasïni eskaksï iámindu uarhiricha tsíntaaka? Nómbe. Jesusi uandaspti eskaksï máru kʼuiripuecha no tsíntaaka (Lukasʌ 12:5). ¿Néksï no tsíntaa? No ambarhati kʼuiripuecha engaksï no uékaka mójtakurhini. Peru ¿né exesïni sini kʼuiripu ma tsíntaa o nómbe? Jeoba. Ima jindesti sánderu Kʼéri Juesi, peru ístu Jesusini íntskusti juramukua “para jusgariani tsípitichani ka uarhirichani” (Ukuecha 10:42). (Exe je nota 19).

TSÍNTSKUA AUANDARHU

21, 22. a) ¿Na jásï kuerpu ma jingonksï tsíntasïni imecha engaksï auandarhu irekaaka? b) ¿Né uénaspi tsíntani para auandarhu irekani?

²¹ Biblia ístu uandasïndi eskaksï máru kʼuiripuecha auandarhu irekaaka. Íksï no kʼuiripueri kuerpu ma jingoni tsíntaati, sino kuerpu ma jingoni enga no xarharajka.

²² Jesusi jindesti primeru kʼuiripu enga uénaka tsíntani para auandarhu irekani (Juanu 3:13). Tanimu jurhiatikua ísï tátsekua engaksï uándikupkia Jesusini, Jeoba tsítantaspti, peru no kʼuiripueri kuerpu ma jingoni (Salmo 16:10; Ukuecha 13:34, 35). Apostuli Pedru uandasïndi eska tata Jesukristueri “kuerpu sési jimbo uándikunhaspka, peru imeri espiritu tsíntasti” (1 Pedru 3:18). Jesusi ísï tsíntasti komu espiritu uinhapiti ma (1 Korintu 15:3-6). Peru Biblia uandasïndi eska no solu Jesusi ísï tsíntapiringa.

23, 24. ¿Néskiksï ima kʼuiripuecha enga Jesusi uandapka eskaksï namunitkueska, ka namuniskiksï?

²³ Ante de uarhini, Jesusi arhiaspti imeri chúxapatichani eska ima auandarhu nipiringa prepararikuani lugari ma para imecha (Juanu 14:2). I ambe arhikuekasïndi eskaksï máru Jesusiri chúxapaticha tsíntapiringa paraksï imani jingoni jarhani auandarhu. Jesusi uandaspti eskaksï i kʼuiripuecha namunitkueska (Lukasʌ 12:32). Apostuli Juanu uandaspti na engaksï xánipiringa enga bisioni ma jimbo exepka Jesusini “Sioni anapu juáta jimbo, ka imani jingoni jarhasptiksï sientu kuarentaikuatro mili kʼuiripuecha” (Jaŋaskuecha 14:1).

²⁴ ¿Na jatinksï tsíntapirini ima 144,000 Jesusiri chúxapaticha? Biblia uandasïndi eskaksï ísï tátsekua tsíntapiringa enga Jesusi uénapiringuia juramuni auandarhu (1 Korintu 15:23). Jesusi uénastia auandarhu juramuni ka sáno iámindu imecha engaksï 144,000 jingoni kuenta úkuarhijka tsíntastiksïa ka Jesusini jingonksï jarhastia auandarhu. Peruksï útasï máru Tata Diosïri marhuatspiricha pakaraxati ixú Echerirhu engaksï auandarhu irekaaka. Engaksï icha uarhijka jirejiresïksï tsíntasïndi auandarhu. Peru sánderu orhepanksï sáno iámindu kʼuiripuecha tsíntaati paraksï irekani para méntkisï Paraisurhu ma ixú Echerirhu.

25. ¿Ambechi jorhenguarhia máteru kapitulu jimbo?

²⁵ No ióni jimbo, Jeoba uáti eskachi nóteru méni uarhiakia, uarhikua kʼamajkunhaati para méntkisï (arhinta je Isaías 25:8). Peru ¿ambeksï uá jini auandarhu ima 144,000 kʼuiripuecha? Biblia uandasïndi eskaksï Jesusini jingoni juramuaka. Máteru kapitulu jimbochi sánderu ambe jorhenguarhiaka i juramukueri ambe.