Néna sési pʼikuarherantani nájkiruka atajperanhajka ka guerrecha jarhani
Gary enga ióntki ejersiturhu japka, uandasïndi: “Ante de ji jorhenguarhini Biblieri ambe, no úsïreenga kurhanguni andiksïsï xáni uánikua problemeecha japi, no sési kámberanhani ka atajperanhani parhakpinirhu. Joperu iásï sési pʼikuarherasïngia jimbokani míteskia eska Tata Diosï uaaka eskachi uaaka seguru irekani Echerirhu”.
No Garijkusï ísï pʼikuarherajti. Ju je exeni na enga Biblia jarhuataakia máteru kʼuiripuechani.
AMBE ENGA BIBLIA UANDAJKA: Tʼu Tata Diosï Jeoba ʻkánikuari sési kámpisïnga ka jingontkuri jarhasïnga parari puátspentani’ (Salmo 86:5).
NÉNAJTSÏNI JARHUATASÏNI: “I uandakuechaksï úsïndi eskani sési pʼikuarheraaka jimbokajtsïni jorhendasïnga eska Tata Diosï pʼamojpesïnga. Míteska eskarini ima uékaxaka puáchentani iámu ambe jimbo engani úka guerrarhu” (Wilmar, Colombia).
AMBE ENGA BIBLIA UANDAJKA: “Jimbanhi auanda ma uáka ka jimbanhi echeri ma; ka nóteru miánhantaatia no sési jásï ambe enga ióntki japka ka i ambe nóteru no sési pʼikuastaatia mintsitani” (Isaías 65:17).
NÉNAJTSÏNI JARHUATASÏNI: “Kánikuani no sési pʼikuarherasïnga ka ístuni kómu pʼikuarherasïnga iámu imani ambe jimbo engani nitamakuarhipka ejersiturhu. Joperu i teksturini miátantasïndi eska no ióni jimbo Tata Diosï Jeoba kʼamajkuaka ambe engani xáni nitamakuarhika ka eska uaaka eskani nóteru eratseni jauakia ambe engareni xáni no sési pʼikuastajka. Nóteruni miáni jauakia no sési ambe. ¡Xáni enga sésiuaka!” (Zafirah, Estados Unidos).
AMBE ENGA BIBLIA UANDAJKA: Uániuatiksï “kʼuiripu jurhimbiticha, ka kánikua pínandikua jauati astaka luna nóteru jauakia” (Salmo 72:7).
NÉNAJTSÏNI JARHUATASÏNI: “Uánikua uelta eratsesïnga indeni ambe. No ióni jimbo, nóteru nema miáuatia na engaksï guerrecha xáni no sési útspijka ka nóteruni jatsiakia para uandanhiani jarhani imeecha jimbo engani ji xáni xénchaajka” (Olexandra, Ucrania).
AMBE ENGA BIBLIA UANDAJKA: “Chiiti uarhirichaksï tsíntaati [...]. ¡Tsínharhi je ka uinhacha je tsípikua jingoni chá engajtsï tʼupurirhu inchatsikuarhu jaka! (Isaías 26:19).
NÉNAJTSÏNI JARHUATASÏNI: “Jiáni engaksï xáni uánikua kʼuiripuechani uándikuapka (engaksï arhikuarhijka tutsis), sáno iámu juchiiti familianksï uándikuspti. Joperu i uandakuechajtsïni xarhatachesïndi eskani ménderu uaaka exeantani. Uékaxakaia ménderu kurhaani na engaksï xáni sési terekuarhiaka jiáni engaksï tsíntaaka” (Marie, Ruanda).
AMBE ENGA BIBLIA UANDAJKA: “Nóteru ióni jimbo, no sési úrichaksï nóteru jauatia […]. Peru echeri kaxumbiticheriuati, ka sésiksï pʼikuarheraati jimboka kánikua pínandikua jauaka” (Salmo 37:10, 11).
NÉNAJTSÏNI JARHUATASÏNI: “Nájkiruka ixú guerra kʼamakurhikia, no jarhasti justisia ka útasïksï jarhasti no sési úriicha. Joperu i teksturini kánikua uinhaperantasïndi jimboka Tata Diosï Jeoba exexaka iámindu ambe ka kurhangusïndi na engani pʼikuarherajka ji. Ístu, ima aiatspestia eska no ióni jimbo nóteru jauakia i ambe ka níjtuchi miáua kómu nitamakua ambe” (Daler, Tayikistán).
I kʼuiripuecha engachi ini rebistarhu uandaaka, ístuksï kuenta úkuarhisïndi imani xáni uáni Testiguecha jingoni engaksï niárakia sési pʼikuarherani jimbokaksï míteskia ambe enga Biblia arhijka. Jamberiksï orhetku kánikua no sési pʼikuarhereendi xáni mámaru ambe jimbo engaksï nitamakuarhipka imeecheeri rasa jimbo o jimbokaksï máteru naniisï anapueska, joperuksï iásï nóteru uandanhiasïndia ini ambe jimbo (Éfesu 4:31, 32). Tata Diosï Jeobaeri testiguechachi no inchamukusïnga politikarisï ka níjtuchi jámajki uarhipeni (Juanu 18:36).
Jeobaeri testiguechachi jarhuajperasïnga máteru ka máteruecha jingoni eska familia ma (Juanu 13:35). Pori ejemplu, Olexandra, engachi orhetku uandaka, ima jatsispti para sïpakuarhini ka nirani máteru paisi jimbo imeeri ermana jingoni jimboka guerra úkuarhixapka imeeri paisirhu. Ima uandantasïndi: “Engachi niárapkia máteru lugari jimbo, jirejiresïchi exeaspka Jeobaeri testiguechani imani paisirhu, listuksï jarhasptia parajtsïni erokani. Imeecheeri jarhuajperata jimbo, nóchi xáni úkua jukanchaspka parachi pʼindeni jima irekani”.
Pʼímarhisïngaksïni parajtsï nirani juchaari tánguarhikuecharhu. Jimajtsï uaaka jorhenguarhini néna sési pʼikuarherani iásï ka na enga Biblia uandajka eska parhakpinirhu jauaka pínandikua. Incha je pájinarhu jw.org ka jirinhanta je lugari ma enga no iauani pakarajka parajtsï úni nirani o kurhajkuarhi je Biblieri jorhenguarhikua ma gratisi. Jeobaeri testiguksïni ma jorhendaati Biblieri ambe arini publikasioni jingoni Tsípikua jingoni ireka je.