Ebikorwa by’Abakwenda
5 Baitu omusaija arukwetwa Ananiya, ali hamu na mukazi we Safiira, bakatunda kimu ha bibanja byabo. 2 Baitu sente ezimu yazisigaza obu na mukazi we akimanyire, kandi yaleeta ekicweka kyazo yazikwasa abakwenda. 3 Baitu Petero yamugambira ati: “Habwaki oikiriize Sitaani kukuleetera kubiiha omwoyo ogurukwera okasigaza zimu ha sente ezi otunzire ekibanja? 4 Kakuba ocwiremu kutakitunda, tikyakusigaire kiri kyawe? Kandi obu omazire kukitunda, sente ezirugiremu tiniiwe abaire aziineho obusobozi? Habwaki oteekeriize kukora ekintu kya mulingo ogu omu mutima gwawe? Tobiihire abantu, baitu obiihire Ruhanga.” 5 Ananiya obu yahuliire ebigambo ebi, yagwa hansi yafa. Kandi boona abaakihuliire, baatiina. 6 Abasigazi baimuka, baamuzinga omu ngoye, baamuhimba baamuturukya aheeru, kandi baamuziika.
7 Hanyuma yokurabaho esaaha nka isatu, mukazi we yaija atamanyire ekibaireho. 8 Petero yamugambira ati: “Ngambira, sente zinu nizo inywe babiri mwatunzire ekibanja?” Yagamba ati: “Ego, nizo twakitunzire.” 9 Petero yamugambira ati: “Habwaki inywe babiri muragaine kulenga omwoyo gwa Yahwe?* Dora! Ebigere by’abo abarukuruga kuziika baro biri ha rwigi, kandi na iwe nibaija kukuhimba bakuturukye aheeru.” 10 Ahonaaho yagwa ha bigere bya Petero, yafa. Abasigazi obu baataahiremu baasanga afiire, na uwe baamuhimba baamuturukya aheeru kandi baamuziika harubaju rwa iba. 11 Okutiina kwaijura ekitebe kyona, hamu n’abo abaahuliire ebintu ebi.
12 Abakwenda baagumizaamu nibakora obwokurorraho bwingi n’ebyamahano omu bantu; kandi baasorrokaniraga hamu omu Muhanda gwa Suleimaani. 13 Amananu gali, busaho abantu abandi abaatungire obumanzi obw’okubeeteeranizaaho, baitu nabwo abantu bakaba nibababazaaho kurungi muno. 14 Oihireho eki, omuhendo mwingi ogw’abasaija n’abakazi abaikiriize Mukama waitu gwaikara nigweyongera. 15 Baaleeta abarwaire ha nguudo, baababyamya ha butabu n’emikeeka nukwo Petero obu araaba naarabaho, haakire ekiituuru kye kihike hali bamu hali bo. 16 Ekindi, ebitebe by’abantu kuruga omu mbuga ezetoroire Yerusaalemu baikara nibaija, bahimbire abarwaire n’abo abarukutalibanizibwa emyoyo emibi, kandi boona baakizibwa.
17 Baitu nyakatagara omukuru akaimuka hamu n’abo abakaba bali hamu na uwe, kandi abakaba bali b’ekitebe ky’Abasadukaayo, baijura ihali. 18 Baakwata abakwenda, baabata omu nkomo. 19 Baitu omu bwire bw’ekiro, malaika wa Yahwe* yakingura enyigi ez’enkomo, yabaturukya aheeru, kandi yabagambira ati: 20 “Mugende mwemerre omu yekaru, kandi mwikale nimugambira abantu byona ebirukukwata ha bwomeezi bunu.” 21 Hanyuma y’okuhurra eki, baataaha omu yekaru nyenkyakara omu rukyakya kandi baatandika kwegesa.
Nubwo nyakatagara omukuru hamu n’abo abakaba bali na uwe baija, baayeta Orukurato Orukuru* hamu n’ekitebe kyona eky’abakuru b’abaana ba Isaleeri, baatuma abaserikale bagende omu nkomo babaleetere abakwenda. 22 Baitu abaserikale obu baahikireyo, baasanga omu nkomo bataliyo. Nubwo baagaruka, kumanyisa ababatumire eki basangire, 23 baagamba bati: “Tusangire enkomo ekingirwe kandi erinzirwe kurungi n’abalinzi beemeriire ha miryango, baitu obu tugikingwire, titusangiremu muntu weena omunda.” 24 Omukuru w’abalinzi ba ha yekaru hamu n’abakuru ba banyakatagara* obu baahuliire eki, baasoberwa batamanyire ekiraahonderaho. 25 Baitu haabaho omuntu yaija yabagambira ati: “Dora! Abasaija abamutairege omu nkomo bali omu yekaru, beemeriire kandi nibeegesa abantu. 26 Omukuru w’abalinzi ba ha yekaru yagenda n’abaserikale be, baabaleeta, baitu batarukubatwaza kubi, habwokuba bakaba nibatiina abantu kubateera amabaale.
27 Nubwo baabaleeta baabeemereza omu maiso g’Orukurato Orukuru. Nyakatagara omukuru* yabakaguliiriza, 28 naagamba ati: “Tukabaragira kuleka kwegesa omu ibara eri, baitu dora! Mwijwize Yerusaalemu enyegesa zanyu kandi mucweriiremu kimu kutujunaaniza esagama ey’omusaija ogu.” 29 Baitu Petero, hamu n’abakwenda abandi baagamba bati: “Tusemeriire kworobera Ruhanga nk’omulemi hatali abantu. 30 Ruhanga wa baisenkuruitwe akahumbuura Yesu ou mwaisire kandi mwahanika ha muti. 31 Ruhanga akamuteeka ha mukono gwe ogw’obulyo kandi yamunyumiza kuba Omwebembezi Omukuru* kandi Omujuni nukwo Isaleeri esobole kwegarukamu n’okuganyirwa ebibi. 32 Itwe hamu n’omwoyo ogurukwera tuli bakaiso ab’ebintu binu, Ruhanga ebi ahaire abo abamworobera nk’omulemi.”
33 Obu baahuliire eki, baabiihirwa muno, baagonza kubaita. 34 Baitu Omufalisaayo arukwetwa Gamalyeri ow’akaba ali mwegesa w’Ebiragiro* kandi abantu boona ou baateekamuga ekitiinisa, yayemerra omu Rukurato Orukuru* yaragira abasaija banu kubaturukya aheeru kake. 35 Nubwo yagamba ati: “Inywe abasaija aba Isaleeri, mwegendereze habw’ekintu eki murukugonza kukora abasaija banu. 36 Ekyokurorraho, omu biro eby’enyuma Siyuda akaimuka yayeyeta omuntu ow’ekitiinisa kingi, kandi abasaija abarukuhika omu 400, bakamweteeranizaaho. Baitu akaitwa kandi abo boona abakaba nibamuhondera baararanga, n’ekitebe kye kyahwaho. 37 Hanyuma y’ogu, hakaimuka Yuda Omunyagaliraaya omu biro by’okwehandiikisa kandi yayetungira abahondezi. Omusaija ogu na uwe akahwerekerra kandi abo boona abakaba nibamuhondera baararanga. 38 Nahabweki, kusigikirra ha nyikara ey’eroho hati, nyowe nimbagambira nti, abasaija banu mutagira eki mwabakora, baitu mubaleke. Habwokuba enteekaniza enu rundi omulimo gunu obu biraaba by’abantu, nibiija kuhwaho; 39 baitu obu biraaba nibiruga hali Ruhanga timurukwija kusobora kubiihaho. Kitali eki, nimusobora kwesanga nimurwanisa Ruhanga weenyini.” 40 Baikiriza obuhabuzi bwe, kandi baayeta abakwenda, baabateera kandi baabaragira kutongera kubaza omu ibara lya Yesu, kandi baabaleka baagenda.
41 Nubwo baaruga omu maiso g’Orukurato Orukuru basemeriirwe, habwokuba Ruhanga akaba abahaire omugisa ogw’okuswazibwa habw’ibara lya Yesu. 42 Kandi buli kiro, bakagumizaamu batarukujwaha nibeegesa kandi nibarangirra amakuru amarungi* agarukukwata hali Kristo Yesu, omu yekaru hamu n’enju ha nju.