19 Pamanyuma, Nahashi themba la Ŵaamoni wakafwa, ndipo mwana wake wakaŵa themba mu malo ghake.+ 2 Davide wakati: “Nilongorenge lusungu*+ kwa Hanuni mwana wa Nahashi, chifukwa wiske wakalongora lusungu kwa ine.” Ntheura Davide wakatuma mathenga kukamusanguluska pa nyifwa ya wiske. Kweni ŵateŵeti ŵa Davide ŵakati ŵiza mu charu cha Ŵaamoni+ kuti ŵasanguluske Hanuni, 3 ŵakaronga ŵa Ŵaamoni ŵakati kwa Hanuni: “Kasi ukuwona nga Davide wakuchindika awuso pakukutumira ŵanthu ŵakuti ŵakusanguluske? Asi ŵateŵeti ŵake ŵizira kupenjapenja kuti ŵakuwiske na kwendera charu?” 4 Ntheura Hanuni wakatora ŵateŵeti ŵa Davide na kuŵameta,+ wakadumura pakati malaya ghawo mu matako, na kuŵaleka kuti ŵalutenge. 5 Davide wakati waphalirika ivyo vikachitikira ŵanthu aŵa, nyengo yeneyiyo wakatumaso ŵanyake kuti ŵakakumane nawo, chifukwa ŵakalengeskeka chomene. Themba likaŵaphalira kuti: “Mukhale mu Yeriko+ m’paka mwembe winu umere, ndipo mwizenge kuno.”