4 Modekayi+ wakati wapulika vyose ivyo vikachitika,+ wakapalura malaya ghake, wakavwara chigudulu na kujithira vyoto. Wakaluta pakati pa msumba, wakamba kulira chomene chifukwa cha kuŵinya mtima. 2 Wakimilira pa chipata cha themba, pakuti munthu wakazomerezgekanga yayi kunjira pa chipata cha themba uku wavwara chigudulu. 3 Mu chigaŵa chilichose+ uko kukafika mazgu gha themba na dango kukaŵa chitengero chikuru pakati pa Ŵayuda, pamoza na kuziŵizga kurya,+ kulira na kutengera. Ŵanandi ŵakagonanga mu vigudulu na mu vyoto.+