YONA
1 Mazgu gha Yehova ghakiza kwa Yona,*+ mwana wa Amitayi, ghakati: 2 “Wuka, ulute ku Nineve,+ ku msumba ukuru, ndipo ukapharazge cheruzgo pa iwo, pakuti uheni wawo wafika pamaso pane.”
3 Kweni Yona wakawuka kuti walute ku Tarishishi, kuchimbira Yehova. Yona wakakhilira ku Yopa uko wakasanga ngalaŵa yakuya ku Tarishishi. Ntheura wakalipira na kukwera ngalaŵa kuti walute nawo ku Tarishishi, kuchimbira Yehova.
4 Penepapo Yehova wakaponya chimphepo chankhongono pa nyanja, ndipo pa nyanja pakaŵa chimphepo chikuru, mwakuti ngalaŵa yikaŵa pafupi kusweka. 5 Ŵakwendeska ngalaŵa ŵakatenthema chomene ndipo waliyose wa iwo wakamba kuchema pa chiuta wake kuti wamovwire. Ndipo ŵakamba kutaya mu nyanja katundu uyo wakaŵa mu ngalaŵa kuti yipepukeko.+ Kweni Yona wakaŵa kuti wakhilira mu chipinda chamukati cha ngalaŵa, wakagona tulo twakufwa nato. 6 Mulara wa ŵakwendeska ngalaŵa wakiza apo pakaŵa Yona, wakati: “Chifukwa wuli ukugona? Wuka, chema chiuta wako! Panji Chiuta waunenesko wangatighanaghanira kuti tileke kuparanyika.”+
7 Ndipo ŵakati kwa yumoza na munyake: “Zaninge, tiyeni tichite mphenduzga*+ mwakuti timanye uyo watichemera soka ili.” Ntheura ŵakachita mphenduzga ndipo mphenduzga yikawira pa Yona.+ 8 Ŵakati kwa iyo: “Chonde tiphalira, kasi ni njani uyo watichemera soka ilo latiwira? Kasi uli na mulimo wuli, ndipo wafuma nkhu? Charu chako ni ntchi, ndipo ndiwe wa ku ŵanthu wuli?”
9 Wakazgora kuti: “Ndine Muhebere, nkhopa* Yehova, Chiuta wakuchanya uyo wali kulenga nyanja na mtunda.”
10 Penepapo ŵanthu ŵakawopa chomene, ndipo ŵakamufumba kuti: “Kasi ntchivichi icho wachita?” (Ŵanthu ŵakamanya kuti wakachimbiranga Yehova, chifukwa wakaŵaphalira.) 11 Ntheura ŵakati kwa iyo: “Kasi tichitechi nawe kuti nyanja yitikhalire bata?” Chifukwa chimphepo chikakulirangakuliranga pa nyanja. 12 Wakazgora kuti: “Muninyamure na kuniponya mu nyanja, ndipo nyanja yimukhaliraninge bata, pakuti nkhumanya kuti chimphepo chikuru ichi chamuwirani chifukwa cha ine.” 13 Ndipouli, ŵanalume aŵa ŵakavuŵa chomene kuti ŵawezgere ngalaŵa ku mtunda, kweni ŵakatondeka, chifukwa chimphepo chikakulirangakuliranga pa nyanja.
14 Penepapo ŵakalomba kwa Yehova, ŵakati: “Tikumuŵeyani, A Yehova, tingaparanyikanga chara chifukwa cha munthu uyu!* Mungaŵikanga pa ise chara ndopa zambura mulandu, chifukwa imwe, a Yehova, mwachita icho chamukondweskani.” 15 Ntheura ŵakamunyamura Yona na kumuponya mu nyanja, ndipo nyanja yikaleka kukalipa. 16 Penepapo ŵanalume aŵa ŵakawopa chomene Yehova,+ ndipo ŵakapeleka sembe kwa Yehova na kulapa vilapo.
17 Sono Yehova wakatuma chisomba chikuru kuti chimire Yona. Ntheura Yona wakaŵa mu nthumbo ya chisomba mazuŵa ghatatu, muhanya na usiku.+
2 Apo wakaŵa mu nthumbo ya chisomba, Yona wakalomba kwa Yehova Chiuta wake.+ 2 Wakati:
“Apo nkhaŵa mu suzgo nkhalomba kwa Yehova, ndipo iyo wakanizgora.+
Apo nkhaŵa pasi* pa Dindi* nkhalira kupenja wovwiri.+
Imwe mukapulika mazgu ghane.
Maŵiruŵiru ghinu ghose na majigha vikanibizga.+
4 Penepapo nkhati: ‘Nachimbizgika pamaso pinu!
Kasi ningalaŵiskaso wuli pa tempile linu lituŵa?’
5 Vimaji vikanizingilira ndipo vikatenthemeska umoyo wane,+
Ndimba ya maji yikanijalira.
Thondo lamunyanja* likavungilizga mutu wane.
6 Nkhabira pasi pa mapiri.
Mphingilizgo za charu chapasi zikanijaliranga muyirayira.
Kweni imwe, A Yehova Chiuta wane, mukafumiska umoyo wane mu khululu.+
7 Apo umoyo wane ukamaranga, Yehova ndiyo nkhamukumbuka.+
Lurombo lwane lukiza kwa imwe, ku tempile linu lituŵa.+
8 Awo ŵakujipeleka ku vikozgo vyawakawaka, ŵakuleka chisimi chawo cha lusungu.*
9 Kweni ine, na mazgu ghakuwonga nizamupeleka sembe kwa imwe.
Nizamupeleka icho nkhalapa.+
Chiponosko chikufuma kwa Yehova.”+
10 Pamasinda Yehova wakayowoya na chisomba, ndipo chikamubokora Yona pa mtunda wakomira.
3 Penepapo mazgu gha Yehova ghakiza kwa Yona kachiŵiri, ghakati:+ 2 “Wuka, ulute ku msumba ukuru wa Nineve,+ ndipo ukapharazge uthenga uwo nkhukuphalira.”
3 Ntheura, Yona wakapulikira mazgu gha Yehova,+ wakawuka na kuluta ku Nineve.+ Nineve ukaŵa msumba ukuru chomene,* mtunda wakwenda ulendo wa mazuŵa ghatatu. 4 Yona wakanjira mu msumba, wakenda ulendo wa zuŵa limoza, ndipo wakapharazganga kuti: “Kwakhala mazuŵa 40 pera kuti Nineve wabwanganduke.”
5 Ŵanthu ŵa mu Nineve ŵakapulikana mwa Chiuta,+ ŵakapharazga kuti ŵaziŵizge kurya ndipo ŵavware vigudulu, kwambira ŵakuru m’paka ŵachoko chomene. 6 Uthenga ukati wafika kwa themba la Nineve, likawuka pa chitengo chake na kuvura chakuvwara chake chaufumu na kudika chigudulu, likakhala mu vyoto. 7 Kweniso likalangura kuti mu Nineve mose mupharazgike kuti:
“Kwakuyana na dango la themba na ŵanthu ŵake ŵakuchindikika: Munthu panji chikoko, ng’ombe panji mberere, vingaryanga kanthu kalikose chara. Vingaryanga chakurya chara, nesi kumwa maji. 8 Munthu na chikoko, vyose vidikiskike chigudulu. Ŵamuŵeyelere chomene Chiuta, ndipo ŵawereko ku nthowa zawo ziheni na kuleka nkhaza izo ŵakuchita. 9 Ni njani wakumanya, panji Chiuta waunenesko wangaghanaghanirapo* pa icho wakukhumba kuchita na kuwerako ku ukali wake wakugolera, kuti tileke kumara?”
10 Chiuta waunenesko wakati wawona ivyo ŵakachita, umo ŵakawelerako ku nthowa zawo ziheni,+ wakaghanaghanirapo* pa soka ilo wakayowoya kuti wizenge nalo pa iwo, ndipo wakiza nalo chara.+
4 Kweni ichi chikamukwiyiska chomene Yona, ndipo wakagolera na ukali. 2 Ntheura wakalomba kwa Yehova, wakati: “A Yehova, asi ivi ndivyo nkhawopanga apo nkhaŵa mu charu chane? Lekani pakwamba nkhakhumbanga kuchimbilira ku Tarishishi,+ chifukwa nkhamanya kuti ndimwe Chiuta wachiwuravi ndiposo walusungu, wakukalipa luŵiro chara, na wakuzura na chitemwa,*+ uyo wakuchita chitima na soka ilo wakhumbanga kutuma. 3 Sono nkhumuŵeyani, A Yehova, wuskanimo umoyo wane mwa ine, pakuti ntchiwemi nifwe kuluska kuŵa wamoyo.”+
4 Yehova wakamufumba kuti: “Kasi ntchakwenelera kuti iwe ukwiye nthena?”
5 Penepapo Yona wakafuma mu msumba na kukhala pasi kumafumiro gha dazi kwa msumba. Wakajizengera kachisakasa kwenekura na kukhala pa mfwiri wake kuti wawone icho chichitikirenge msumba.+ 6 Yehova Chiuta wakamezga nyungu ya mphindi kuti yithazire pa Yona, kuti yimupe mfwiri pa mutu wake na kumuwombora ku suzgo lake. Yona wakakondwa chomene na nyungu ya mphindi.
7 Kweni zuŵa lakulondezgapo kumatandakucha, Chiuta wakatuma chibungu, icho chikarya nyungu ya mphindi yira, ndipo yikafota. 8 Apo dazi likamba kuŵala, Chiuta wakatuma mphepo yakotcha yakumafumiro gha dazi, ndipo dazi likatimbanga pa mutu wa Yona, mwakuti wakazinduka nalo. Wakalomba mwakuwerezgawerezga kuti wafwe, wakatenge: “Ntchiwemi kuti nifwe waka kuluska kuŵa wamoyo.”+
9 Chiuta wakati kwa Yona: “Kasi ntchakwenelera kuti iwe ukwiye nthena chifukwa cha nyungu ya mphindi?”+
Iyo wakati: “Nkhwenera nadi kukwiya, nakwiya chomene mwakuti nkhukhumba kufwa.” 10 Kweni Yehova wakati: “Iwe ukuchitira chitima nyungu ya mphindi iyo undayitokatokerepo, nesi kuyimezga. Yikamera mu usiku umoza na kufota mu usiku umoza. 11 Kasi ine nkhwenera chara kuchitira chitima msumba ukuru wa Nineve,+ uwo uli na ŵanthu ŵakujumpha 120,000, awo ŵakumanya chara kupambaniska pakati pa chiwemi na chiheni,* kusazgapo viŵeto vyawo vinandi?”+
Kung’anamura kuti, “Nkhunda.”
Wonani Mang’anamuro gha Mazgu.
Panji kuti, “nkhusopa.”
Panji kuti, “chifukwa cha umoyo wa munthu uyu.”
Mazgu gheneko, “mu nthumbo ya.”
Panji kuti, “Sheole.” Ndiko kuti, malaro. Wonani Mang’anamuro gha Mazgu.
Wonani Mang’anamuro gha Mazgu.
Mazgu ghanyake, “Makhangawa.”
Panji kuti, “chitemwa chakugomezgeka.”
Mazgu gheneko, “msumba ukuru kwa Chiuta.”
Panji kuti, “wangasintha maghanoghano.”
Panji kuti, “wakasintha maghanoghano.”
Panji kuti, “chitemwa chakugomezgeka.”
Panji kuti, “ŵakumanya yayi kupambaniska pakati pa woko lawo lamalyero na woko lawo lamazere.”