KU ŴAEFESO

1 Ine Paulosi, mpositole wa Khristu Yesu mu khumbo la Chiuta, ku ŵatuŵa awo ŵali mu Efeso+ na ŵakugomezgeka mwa Khristu Yesu:

2 Mphanyi lusungu lukuru na mtende vyakufuma kwa Chiuta Adada ŵithu na Fumu Yesu Khristu, vyaŵa namwe.

3 Walumbike Chiuta, Awiske ŵa Fumu yithu Yesu Khristu, pakuti watitumbika na thumbiko lose lauzimu mu malo ghakuchanya mwakukolerana na Khristu.+ 4 Wakatisora mu umoza na iyo* pambere charu chindaŵeko, mwakuti tiŵenge ŵatuŵa na ŵambura kalema+ panthazi pake mu chitemwa. 5 Pakuti wakatisankhirathu+ kuti tiŵe ŵana ŵake kwizira mwa Yesu Khristu,+ mwakuyana na icho chikumukondweska na khumbo lake,+ 6 mwakuti lulumbike lusungu lwake lukuru lwauchindami+ ulo wakatilongora kwizira mwa wakutemweka wake.+ 7 Mwa iyo tafwatulika na chiwombolero kwizira mu ndopa zake,+ ndipo tikugowokereka kwananga kwithu,+ mwakuyana na usambazi wa lusungu lwake lukuru.

8 Watipa lusungu lukuru ulu mwakukwana pamoza na vinjeru na mahara. 9 Wakativumbulira chisisi chakupatulika*+ cha khumbo lake icho chikumukondweska, ndipo chisisi chakupatulika ichi chikukolerana na icho wakukhumba kuchita 10 kuti para nyengo yakutemeka yakwana, paŵe ndondomeko* yakuti wawunganye vinthu vyose pamoza mwa Khristu, vinthu vya kuchanya na vinthu vya pa charu chapasi.+ Mwa iyo 11 uyo tili nayo mu umoza, nase tikagaŵirika kuŵa ŵahaliri.+ Pakuti tikasorekerathu mwakuyana na chilato cha Chiuta uyo wakufiska vinthu vyose ivyo waghanaghana kuyana na khumbo lake. 12 Wakachita ichi kuti ise tikaŵa ŵakwamba kugomezga mwa Khristu tilumbe na kuchindika Chiuta. 13 Kweni namwe mukagomezga mwa iyo mukati mwapulika mazgu gha unenesko, makani ghawemi gha chiponosko chinu. Kweniso kwizira mwa iyo, mukati mwagomezga,+ mukadindika na mzimu utuŵa uwo ukalayizgika, 14 uwo ntchikhole cha chiharo chithu.+ Chiuta wakachita nthena kuti wafwature ŵanthu ŵake+ na chiwombolero,+ mwakuti ŵamulumbe na kumuchindika.

15 Lekani nane, kufuma apo nkhapulikira za chipulikano chinu mwa Fumu Yesu na chitemwa icho mukulongora ku ŵatuŵa wose, 16 nkhuleka yayi kuwonga Chiuta chifukwa cha imwe. Nkhulutilira kumuzunurani mu malurombo ghane, 17 mwakuti Chiuta wa Fumu yithu Yesu Khristu, Dada wa uchindami, wamupani mzimu wa vinjeru ndiposo kuti mupulikiske vinthu ivyo wakuvumbura kweniso kuti mumumanye makora.+ 18 Wangweluska maso gha mtima winu, kuti mumanye chigomezgo icho wakamuchemerani, usambazi wauchindami uwo wasungira ŵatuŵa nga ntchiharo,+ 19 ndiposo ukuru wa nkhongono zake izo watipa ise ŵakugomezga.+ Ukuru wa nkhongono zake ukawoneka 20 apo wakamuwuska Khristu ku ŵakufwa na kumukhalika ku woko lake lamalyero+ mu malo ghakuchanya. 21 Wali kumuŵika pachanya kuluska maboma ghose, mazaza, nkhongono, muwuso, na zina lililose ilo likuzunulika,+ mu nyengo iyi* pera yayi kweniso mu nyengo iyo yikwiza. 22 Ndiposo wali kuŵika vinthu vyose pasi pa malundi ghake+ na kumuzgora iyo kuŵa mutu wa vinthu vyose mu mpingo,+ 23 uwo ni thupi lake,+ uwo ngwakuzura na iyo, ndipo iyo ndiyo wakuzuzga vinthu vyose.

2 Kweniso Chiuta wakamuzgorani ŵamoyo, nangauli mukaŵa ŵakufwa chifukwa cha maubudi ghinu na zakwananga zinu.+ 2 Nyengo yinyake mukendanga mwakuyana na makhaliro gha mu charu ichi,+ mwakuyana na fumu ya mazaza gha mphepo,+ mzimu+ uwo sono ukugwira ntchito mu ŵana ŵambura kupulikira. 3 Nase nyengo yinyake apo tikaŵa pakati pawo, tikachitanga mwakuyana na makhumbiro gha thupi lithu,+ tikachitanga vinthu ivyo thupi lithu na maghanoghano ghithu vikakhumbanga,+ ndipo mwakawiro tikaŵa ŵana awo Chiuta wakakwiyanga nawo,+ umo ŵanyake wose ŵaliri. 4 Kweni Chiuta ngwalusungu chomene,+ ndipo chifukwa cha chitemwa chake chikuru icho wakatilongora,+ 5 wakatizgora ŵamoyo pamoza na Khristu, nanga ni apo tikaŵa ŵakufwa chifukwa cha kwananga.+ Mwaponoskeka na lusungu lwake lukuru. 6 Ndipo wakatiwuskira pamoza na kutikhazika pamoza mu malo ghakuchanya pakuti tili mu umoza na Khristu Yesu,+ 7 mwakuti mu nyengo iyo yikwiza, wazakalongore usambazi wake ukuru na lusungu lwake lukuru, apo wazamutichitira vinthu viwemi ise tili mu umoza na Khristu Yesu.

8 Na lusungu lukuru ulu, mwaponoskeka kwizira mu chipulikano,+ chifukwa cha ivyo mukuchita yayi, ndipo ichi ntchawanangwa cha Chiuta. 9 Ntchifukwa cha milimo yinu yayi,+ mwakuti munthu waleke kuŵa na chifukwa chakunothera. 10 Ise ndise mulimo wa mawoko gha Chiuta ndipo tikalengeka+ mwa Khristu Yesu,+ kuti tichitenge milimo yiwemi iyo Chiuta wakanozgerathu kuti tendengemo.

11 Ntheura kumbukani kuti kale mukaŵa ŵanthu ŵamitundu mu thupi, mukachemekanga “ŵambura kukotoleka” na awo ŵakachemekanga “ŵakukotoleka” mu thupi na mawoko gha ŵanthu. 12 Nyengo yira mukaŵa ŵambura Khristu, mukaŵa kutali na mtundu wa Israyeli, ndipo mukamanyanga yayi mapangano agho Chiuta wakalayizga ŵanthu ŵake.+ Mukakhalanga mu charu kwambura chigomezgo ndipo mukaŵa ŵambura Chiuta.+ 13 Kweni mwakukolerana na Khristu Yesu, imwe nyengo yinyake mukaŵa kutali na Chiuta, sono mwiza kufupi kwizira mu ndopa za Khristu. 14 Pakuti iyo ni mtende withu,+ uyo wakazgora magulu ghaŵiri gha ŵanthu kuŵa limoza,+ na kuparanya chiliŵa icho chikaŵapaturanga.+ 15 Na thupi lake, wakamazga ulwani, Dango ilo likaŵa na malango ndiposo malanguro, mwakuti mu umoza na iyo wapange magulu ghaŵiri gha ŵanthu kuŵa munthu yumoza muphya+ na kuŵikapo mtende. 16 Kweniso kuti kwizira mu khuni lakusuzgikirapo,* waphemaniske magulu ghaŵiri gha ŵanthu mu thupi limoza kwa Chiuta,+ chifukwa wakawuskapo ulwani+ kwizira mwa iyo yekha. 17 Ndipo wakiza na kupharazga makani ghawemi gha mtende kwa imwe mukaŵa kutali na Chiuta, na kupharazgaso mtende kwa awo ŵakaŵa pafupi na Chiuta. 18 Pakuti kwizira mwa iyo, tose magulu ghaŵiri gha ŵanthu, tikusendelera kwa Adada kwizira mu mzimu umoza.

19 Ntheura muchali ŵalendo yayi+ kweni muli ŵenekaya+ pamoza na ŵatuŵa, ndipo muli ŵamunyumba ya Chiuta.+ 20 Ndipo mwazengeka pa fawundeshoni ya ŵapositole na ntchimi,+ apo Khristu Yesu ndiyo ni libwe lapakona la fawundeshoni.+ 21 Mu umoza na iyo nyumba yose yikuzengeka pamoza,+ yikukura na kuŵa tempile lituŵa la Yehova.*+ 22 Mu umoza na iyo, namwe mukuzengeka pamoza kuŵa malo ghakuti Chiuta wakhalemo mwa mzimu.+

3 Pa chifukwa ichi, ine Paulosi ndine kayidi+ chifukwa cha Khristu Yesu m’malo mwa imwe ŵanthu ŵamitundu. 2 Muli kupulika nadi kuti nili kupika uteŵeti+ wakuti nimovwirani kuti musange chandulo na lusungu lukuru lwa Chiuta. 3 Nga umo nkhalembera pakwamba mwakudumura, chisisi chakupatulika* chikavumbulika kwa ine. 4 Ntheura para mukuŵazga ichi, mungamanya umo nkhupulikiskira chisisi chakupatulika*+ cha Khristu. 5 Mu miwiro yinyake, chisisi chakupatulika* ichi chikamanyikwa yayi ku ŵana ŵa ŵanthu nga umo sono chavumbukwira mwa mzimu ku ŵapositole ŵake ŵatuŵa na ntchimi,+ 6 kuti kwizira mu makani ghawemi ŵanthu ŵamitundu ŵaŵe ŵahaliri ŵamoza na kuŵa viŵaro vya thupi+ ndiposo ŵakusangana nase mu layizgano pamoza na Khristu Yesu. 7 Nkhazgoka muteŵeti wa chisisi ichi chifukwa cha lusungu lukuru lwa Chiuta. Wakanipa chawanangwa ichi kuti walongore nkhongono zake.+

8 Lusungu lukuru ulu lukapika kwa ine,+ munthu muchoko chomene pa ŵatuŵa wose,+ mwakuti nipharazge ku mitundu makani ghawemi ghakuyowoya za usambazi wambura kumara wa Khristu. 9 Ndiposo kuti nilongore ŵanthu umo chisisi chakupatulika*+ chikwendeskekera, icho kufuma kale chikabisika mwa Chiuta, uyo wakalenga vinthu vyose. 10 Vikaŵa nthena kuti kwizira mu mpingo,+ vinjeru vya Chiuta ivyo vikulongoreka mu nthowa zinandi, vimanyikwe ku maboma na mazaza agho ghali mu malo ghakuchanya.+ 11 Ichi chikukolerana na khumbo lamuyirayira ilo wakaŵa nalo lakukhwaskana na Khristu,+ Yesu Fumu yithu. 12 Kwizira mwa iyo tili na wanangwa uwu wakuyowoya ndipo na chigomezgo chose tikusendelera kwa Chiuta+ chifukwa tili na chipulikano mwa Yesu. 13 Ntheura nkhumupemphani kuti mungalekanga yayi chifukwa cha masuzgo agho nkhusangana nagho chifukwa cha imwe, pakuti uwu mbuchindami winu.+

14 Pa chifukwa ichi, nkhujikama pasi makongono ghane kwa Adada, 15 kwa awo kukufuma mazina gha mbumba zose izo zili kuchanya na pa charu chapasi. 16 Nkhulomba kuti ŵamupani mwakuyana na usambazi wauchindami wawo, kuti wunthu winu wamukati+ uŵe wankhongono kwizira mu mzimu wawo. 17 Ndiposo kuti kwizira mu chipulikano chinu, Khristu wakhale mu mitima yinu pamoza na chitemwa.+ Mphanyi mwajintha misisi+ na kukhazikika pa fawundeshoni,+ 18 kuti pamoza na ŵatuŵa wose mumanye makora uwo mbusani, utali, kutumphuka, na kunyang’amira kwa unenesko. 19 Ndiposo kuti mumanye chitemwa cha Khristu+ icho chikuluska kumanya vinthu, mwakuti muŵe na mikhaliro yose iyo Chiuta wakupeleka.

20 Sono kwa uyo wangafiska, kuyana na nkhongono zake izo zikugwira ntchito mwa ise,+ wachite vinandi nkhanira kuluska vinthu vyose ivyo tikulomba panji kughanaghana,+ 21 iyo wapike ntchindi kwizira mu mpingo ndiposo kwizira mwa Khristu Yesu mu miwiro yose muyirayira swii. Ameni.

4 Ntheura ine, kayidi+ chifukwa cha Fumu, nkhumuŵeyani kuti mwendenge mwakwenelera+ ntchemo iyo mukachemeka nayo. 2 Muŵe ŵakujiyuyura,*+ ŵakuzika, ŵakuzikira,+ ndipo muzizipizgiranenge mu chitemwa.+ 3 Muyezgeyezge kusungilira umoza wa mzimu mu chakukakira cha mtende.+ 4 Pali thupi limoza,+ na mzimu umoza,+ nga umo paliri chigomezgo chimoza pera+ icho mukachemekerako. 5 Fumu yimoza,+ chipulikano chimoza, ubatizo umoza. 6 Chiuta yumoza uyo ni Dada wa ŵanthu wose. Iyo wali pachanya pa wose ndipo wakuchita vinthu kwizira mu wose. Nkhongono yake yikugwira ntchito mu wose.

7 Waliyose wa ise wali kupokera lusungu lukuru mwakuyana na umo Khristu wakapimira chawanangwa.+ 8 Ntheura iyo wakuti: “Apo wakakwelera kuchanya wakayegha ŵazga. Wakapeleka ŵanthu kuŵa vyawanangwa.”+ 9 Sono kasi mazgu ghakuti: “wakakwelera,” ghakung’anamurachi? Ghakung’anamura kuti wakakhilira pasi, pa charu chapasi. 10 Uyo wakakhira ndiyo wakakweleraso kuchanya+ nkhanira kuluska machanya ghose,+ mwakuti wafiske vinthu vyose.

11 Ndipo wakapeleka ŵanyake kuŵa ŵapositole,+ ŵanyake kuŵa ntchimi,+ ŵanyake kuŵa ŵapharazgi,+ ŵanyake kuŵa ŵaliska na ŵasambizgi,+ 12 kuti ŵawovwire* ŵatuŵa, ŵachite mulimo wa uteŵeti, kuti ŵazenge thupi la Khristu,+ 13 m’paka tose tifike ku umoza mu chipulikano na kumanya makora Mwana wa Chiuta, kuti tiŵe munthu mulara*+ na kufika pa msinkhu wakuyana na Khristu. 14 Ntheura tileke kuŵa ŵana, ŵakuyegheka waka na majigha na kuputira uku na uku na mphepo yiliyose ya chisambizgo chautesi+ cha ŵanthu ŵaryarya, awo ŵakukhumba kupuluska ŵanyawo. 15 Kweni uku tikuyowoya unenesko, tiyeni tikurenge mu vinthu vyose mu chitemwa mwakuyana na uyo ni mutu, Khristu.+ 16 Kwizira mwa iyo, viŵaro vyose vya thupi+ vikukumana makora pamoza ndipo chilichose chikovwirana na chinyake kuti vipeleke ivyo thupi likukhumba. Para chiŵaro chilichose chikugwira ntchito mwakwenelera, thupi likukura na kujizenga mu chitemwa.+

17 Ntheura ichi nkhuyowoya na kuchitira ukaboni mu Fumu, kuti muleke kwendaso nga umo mitundu yikwendera+ mu maghanoghano ghawo ghawakawaka.+ 18 Maghanoghano ghawo ghali mu chisi ndipo ŵali kutali na umoyo wakuyana na Chiuta, chifukwa ŵakumanya kanthu yayi, ndiposo chifukwa cha unonono wa mitima yawo. 19 Pakuŵa ŵambura kupwelerako kalikose, ŵakajipeleka ku ukwakwa,*+ na kuchita ukazuzi wa mtundu uliwose mu umbunu.

20 Kweni imwe mukasambira kuti Khristu wali nthena yayi. 21 Mukamupulika nadi Yesu ndipo mukasambira unenesko uwo uli mwa iyo. 22 Mukasambizgika kuti muvure wunthu wakale+ uwo ukuyana na nkharo yinu yakale ndiposo uwo ukunangika mwakuyana na makhumbiro ghake ghakupusika.+ 23 Kweni mulutilire kuzgoka ŵaphya mu kaghanaghaniro kinu.*+ 24 Ndipo muvware wunthu uphya+ uwo ukalengeka mwakuyana na khumbo la Chiuta, mu urunji wenecho na kugomezgeka.

25 Ntheura sono pakuti mwaleka utesi, waliyose wa imwe wayowoyenge unenesko na mzengezgani wake,+ pakuti tili viŵaro vya thupi limoza.+ 26 Kwiyani kweni kwananga chara.+ Dazi lileke kunjira uku muchali na ukali.+ 27 Ndipo muleke kumupa malo* Dyabulosi.+ 28 Wakwiba waleke kwiba. Kweni wafukafuke, wagwire ntchito yiwemi na mawoko ghake,+ mwakuti waŵe na kanthu kakuti wamupeko mukavu.+ 29 Pa mulomo winu pangafumanga mazgu ghakuvunda yayi,+ kweni mazgu ghawemi ghakuzenga ŵanyinu mwakuyana na icho chikukhumbikwa, kuti ghakhozge awo ŵakupulika.+ 30 Kweniso kuchitiska chitima mzimu utuŵa wa Chiuta yayi.+ Chifukwa ndiwo mwadindika nawo+ kuti muzakafwatulike na chiwombolero pa zuŵa la chiponosko.+

31 Wuskaniko kwa imwe mtima wa thinkho,+ ukali, kutukutwa, kukolomoka, na kayowoyero kaheni,+ pamoza na uheni wose.+ 32 Muchitiranenge lusungu, ndipo muŵe na mtima wa chiwuravi,+ mugowokeranenge na mtima wose umo Chiuta nayo kwizira mwa Khristu wakamugowokerani na mtima wose.+

5 Pakuti ndimwe ŵana ŵakutemweka, yezgani Chiuta.+ 2 Lutilirani kwenda mu chitemwa,+ nga umo Khristu nayo wakamutemwerani+ ndipo wakapeleka umoyo wake m’malo mwa ise kuŵa sembe ya sungu liwemi kwa Chiuta.+

3 Uzaghali* na ukazuzi wa mtundu uliwose panji uryezi vileke nanga nkhuzunulika pakati pinu,+ pakuti ndimwe ŵanthu ŵatuŵa.+ 4 Mungazomerezganga yayi nkharo yakulengeska panji kuyowoya vyauchindere nesi milangwe yabweka,+ vinthu ivyo ni vyambura kwenelera, m’malo mwake muwongenge Chiuta.+ 5 Pakuti mukumanya makora kuti palije muzaghali*+ panji mukazuzi panji munthu muryezi,+ icho chikung’anamura kuŵa wakusopa vikozgo, uyo wazamuhara Ufumu wa Khristu na wa Chiuta.+

6 Munthu wangamupusikaninge yayi na mazgu ghawakawaka, pakuti chifukwa cha vinthu ivi, ukali wa Chiuta ukwiza pa ŵana ŵambura kupulikira. 7 Ntheura kuchitako nawo yayi. 8 Pakuti nyengo yinyake imwe mukaŵa chisi, kweni sono ndimwe ungweru,+ pakuti muli ŵa Fumu.+ Lutilirani kwenda nga mbana ŵa ungweru. 9 Pakuti vipambi vya ungweru ni uwemi wa mtundu uliwose na urunji na unenesko.+ 10 Lutilirani kusanda icho ntchakuzomerezgeka+ kwa Fumu. 11 Ndipo lekani kuchitako milimo yawo yambura vipambi iyo nja chisi,+ kweni muyivumbulire pakweru. 12 Pakuti ivyo ŵakuchita kwakubisika ni vinthu vyakulengeska nanga nkhuviyowoya. 13 Ndipo vinthu vyose ivyo vikuvumbulika* vikuwoneka na ungweru, pakuti chilichose icho chikuwoneka mbungweru. 14 Ntheura kukuyowoyeka kuti: “Wuka, iwe ukugona tulo, wuka ku ŵakufwa,+ ndipo Khristu waŵalenge pa iwe.”+

15 Ntheura muŵe maso chomene na umo mukwendera, nga mbambura vinjeru yayi, kweni nga mbanthu ŵavinjeru. 16 Mugwiliskirenge ntchito makora nyengo yinu,*+ pakuti mazuŵa ngaheni. 17 Pa chifukwa ichi, mungaŵanga ŵazeleza yayi, kweni lutilirani kumanya khumbo la Yehova.*+ 18 Kweniso mungaloŵeranga vinyo yayi,+ umo muli makhaliro ghaheni,* kweni lutilirani kuzuzgika na mzimu. 19 Yowoyeskanani mu masalimo, malumbo kwa Chiuta, na sumu zauzimu, kwimba+ na kukoŵerana sumu+ mu mitima yinu kwa Yehova.*+ 20 Nyengo zose tiwongenge+ Chiuta withu na Adada mu zina la Fumu yithu Yesu Khristu pa vinthu vyose.+

21 Mujilambikenge ku yumoza na munyake+ mu kopa Khristu. 22 Ŵawoli ŵajilambikenge ku ŵafumu ŵawo+ nga nkhu Fumu. 23 Chifukwa mfumu ni mutu wa muwoli wake,+ umo Khristu nayo waliri mutu wa mpingo,+ pakuŵa mponoski wa thupi ili. 24 Umo mpingo ukujilambikira kwa Khristu, ndimo ŵawoli nawo ŵachitirenge ku ŵafumu ŵawo mu chilichose. 25 Ŵafumu, lutilirani kutemwa ŵawoli ŵinu,+ umo Khristu nayo wakatemwera mpingo na kujipeleka yekha chifukwa cha iwo.+ 26 Wakachita nthena kuti watuŵiske mpingo, kuwusuka na maji kwizira mu mazgu,+ 27 kuti wapokelere mpingo uli wakutowa, wambura kabanga panji nkhwinya panji kalikose ka vinthu ivi,+ kweni kuti uŵe utuŵa na wambura kalema.+

28 Ntheura ŵafumu nawo ŵatemwenge ŵawoli ŵawo nga ni mathupi ghawo. Mwanalume uyo wakutemwa muwoli wake wakujitemwa yekha. 29 Pakuti palije munthu uyo wakutinkha thupi lake, kweni wakulilyeska na kulipwelelera, umo Khristu nayo wakuchitira na mpingo, 30 chifukwa ndise viŵaro vya thupi lake.+ 31 “Pa chifukwa ichi, mwanalume walekenge awiske na anyina na kubatikana* na muwoli wake, ndipo wose ŵaŵiri ŵaŵenge thupi limoza.”+ 32 Chisisi chakupatulika*+ ichi ntchikuru. Kweni sono nkhuyowoya vya Khristu na mpingo.+ 33 Kweni namwe waliyose payekha watemwenge muwoli wake+ umo wakujitemwera yekha. Ndipo muwoli nayo wachindikenge chomene mfumu wake.+

6 Mwaŵana, pulikirani ŵapapi ŵinu+ mu Fumu, pakuti uwu mburunji. 2 “Chindika awuso na anyoko,”+ ili ni dango lakwamba ilo lili na layizgo lakuti: 3 “Kuti vikuŵire makora* nakuti ukhale nyengo yitali pa charu chapasi.” 4 Ndipo imwe ŵawiskewo, mungakwiyiskanga ŵana ŵinu yayi,+ kweni lutilirani kuŵalera makora pa kuŵalanga+ na kuŵasambizga maghanoghano gha Yehova.*+

5 Imwe ŵazga, pulikirani mabwana ghinu.+ Muŵawopenge na kuŵachindika na mtima winu wose, nga nkhwa Khristu, 6 para iwo ŵalipo pera yayi kuti muŵakondweske waka,+ kweni muchitenge nga mbazga ŵa Khristu awo ŵakuchita khumbo la Chiuta na umoyo wose.+ 7 Muteŵetenge na maghanoghano ghawemi, nga mukuteŵetera Yehova,*+ ŵanthu yayi. 8 Pakuti mukumanya kuti chiwemi chilichose icho waliyose wakuchita, kwali ni muzga panji mwanangwa, Yehova* wazamumupaso chenechicho.+ 9 Kweniso imwe mabwana, lutilirani kuŵachitira vyakuyana waka, muleke kuŵawofya, pakuti mukumanya kuti Fumu yawo na yinu wuwo yili kuchanya,+ ndipo yikutemwera yayi.

10 Paumaliro, lutilirani kupokera nkhongono kwa Fumu kwizira mu nkhongono zake zikuru.+ 11 Vwarani vyankhondo vyose+ vyakufuma kwa Chiuta, mwakuti mutchinthe pakulimbana na mauryarya gha* Dyabulosi. 12 Pakuti tikulimbana+ na ndopa na thupi yayi, kweni na maboma, na ŵamazaza, na mafumu gha charu cha chisi ichi, ndiposo mawumba gha mizimu+ yiheni mu malo ghakuchanya. 13 Pa chifukwa ichi, torani vyankhondo vyose vyakufuma kwa Chiuta,+ mwakuti mukhore pa zuŵa liheni, ndipo para mwachita vinthu vyose makora, mutchinthe.

14 Ntheura tchinthani, mwati mwajikakilira mu chiwuno lamba wa unenesko,+ na kuvwara chakujivikilira* pa chifuŵa cha urunji.+ 15 Ndipo muvwalike malundi ghinu pakunozgekera kupharazga makani ghawemi gha mtende.+ 16 Padera pa vyose, torani chiskango chikuru cha chipulikano,+ icho mungazimwira mivi yose yakugolera ya muheni.+ 17 Kweniso vwarani chisoti cha chiponosko,+ na kuyegha lupanga lwa mzimu, ulo ni mazgu gha Chiuta.+ 18 Ndipo pa chakuchitika chilichose lutilirani kulomba+ mu mzimu na lurombo lwa mtundu uliwose na kuŵeyelera.+ Ntheura muŵenge maso na kuŵeyelera m’malo mwa ŵatuŵa wose nyengo zose. 19 Nane munilomberenge kuti Chiuta wanipe mazgu ghake kuti para nkhujura mulomo wane, niyowoyenge na chikanga apo nkhumanyiska ŵanthu chisisi chakupatulika* cha makani ghawemi.+ 20 Nangauli ndine wakukakika, kweni ndine mwimiliri+ wa makani agha kuti nighayowoye na chikanga umo nkhwenera kuyowoyera.

21 Tikiko,+ mubali wakutemweka na muteŵeti wakugomezgeka mu Fumu, ndiyo sono wamuphaliraninge vyose vya ine na umo niliri.+ 22 Nkhumutuma kwa imwe na khumbo lakuti mumanye vya ise kweniso kuti wasanguluske mitima yinu.

23 Chiuta Adada na Fumu Yesu Khristu mphanyi ŵamupani imwe ŵabali mtende, chitemwa, na chipulikano. 24 Lusungu lukuru luŵe na wose awo ŵakutemwa nadi Fumu Yesu Khristu.