Magiya gha Kamphazi

KWA NYENGO yitali chomene ŵanthu ŵakaghanaghananga kuti vinthu vyekha ivyo ŵanthu ŵakupanga ndivyo vili na magiya. Kweni vyawoneka kuti fundo iyi njautesi! Ŵasayansi ŵabowozga kuti twamoyo tunyake tuli na magiya. Twamoyo utu ni mtundu unyake wa mphazi izo zikusangika ku Europe.a

Tumphazi utu tukuzuntha luŵiro chomene mwakuti nyengo zinyake munthu wangakawona yayi! Pa sekondi yimoza, kangazuntha kufika pa mtunda wa mamita 3.9. Para kati waka zuu, mbwe yii. Kuti tuzunthe nthena, chikuchitika ntchakuti pa nyengo yimoza tumalundi tose twakumanyuma tukujitutuzga na nkhongono. Kasi chikuchitika ntchivichi chomene kuti viŵe nthena?

Wonani fundo iyi: Ŵasayansi ŵabowozga kuti ku malundi ghakumanyuma gha kamphazi aka kuli magiya ghaŵiri. Para kamphazi aka kakuzuntha, magiya agha ghakovwira kuti malundi ghose ghanyamukirenge pamoza na nkhongono zakuyana. Viŵenge nthena yayi, mphanyi tukukunkhura waka!

Kweni vinyama kuti vizunthe vikuthemba pa wongo. Tumphazi utu nato tuthembenge pa wongo mphanyi tukuzuntha nthena yayi. Lekani tuli na magiya ghaŵiri agha. Gregory Sutton wakati: “Tikaghanaghananga kuti mashini agho ŵanthu ŵakupanga ndigho ghekha ghakuŵa na magiya.” Iyo wakayowoyaso kuti tikaghanaghananga nthena chifukwa chakuti “tikapenja chomene yayi kunyake.”

Kasi mukuti wuli? Kasi magiya gha tumphazi utu ghakachita kusintha waka? Panji kasi ghakalengeka?