Vya mu Uteŵeti wa mu Munda

Pafupifupi chigaŵa chose cha kumwera mu charu cha Malaŵi chikakhwaskika na ngozi ya kusefukira kwa maji. Mwaluŵiro, ofesi ya munthavi yikapeleka wovwiri ku ŵabali na ŵadumbu awo ŵakakumana na ngozi iyi. Mudumbu munyake wakati wapokera wovwiri, wakayowoya kuti: “Ndalama izo tikapokera zikaŵa zakukwana kugulira sungwi (mushombe), pepara lakuŵika kuchanya kwa nyumba, chakurya, na vinyake vyakuzengera nyumba. Patenkha tikate tikwaniskenge yayi kusanga ndalama zakugulira vinthu ivi pa nyengo yakusuzga iyi. Tikuwonga chomene ŵabali na ŵadumbu chifukwa cha kutipa wovwiri pa nyengo yakwenelera.” Ŵanandi ŵakayowoya kuti, Yehova wakaŵawovwira pambere ŵandapemphe wovwiri. (Yes. 65:24) Ŵabali na ŵadumbu aŵa wakulutilira kupharazga nangauli ŵali mu nyengo yakusuzga. Tikumuwongani chomene ŵabali chifukwa cha chiyelezgero chinu chiwemi.