Mungaŵa na Mtende Nangauli Kuli Nkhondo na Viwawa
Gary uyo pakwamba wakaŵa msilikari wakuti: “Pambere nindasambire Baibolo nkhamanyanga yayi chifukwa icho pa charu paliri nkhaza, vinthu vyambura urunji, na masuzgo ghanyake. Kweni pasono nili na mtende wa mu mtima chifukwa nkhumanya kuti Yehova Chiuta wazamuzgora charu kuŵa malo ghamtende.”
Ni Gary pera yayi uyo wakujipulika nthena. Wonani umo Baibolo lawovwilira ŵanji.
IVYO BAIBOLO LIKUYOWOYA: “Imwe, A Yehova, ndimwe muwemi, wakunozgeka kugowokera.”—Salimo 86:5.
UMO LAWOVWILIRA: Wilmar wa ku Colombia wakuti: “Vesi ili likunisimikizgira kuti Yehova ngwalusungu. Nkhumanya kuti ngwakunozgeka kunigowokera pa viheni vyose ivyo nkhachitanga apo nkhaŵa ku nkhondo.”
IVYO BAIBOLO LIKUYOWOYA: “Nkhulenga machanya ghaphya na charu chapasi chiphya, vinthu vyakale vikumbukikengeso chara, ndipo vinjirengeso yayi mu mtima.”—Yesaya 65:17.
UMO LAWOVWILIRA: Zafirah wa ku United States wakuti: “Nyengo zinyake kamutu kakuchimbiranga kweniso nkhusuzgika maghanoghano chifukwa cha ivyo nkhakumana navyo ku nkhondo. Kweni lemba ili likunikumbuska fundo yakuti sonosono apa Yehova wamazgenge maghanoghano ghose ghaheni agho nili nagho. Nizamughakumbukaso yayi napachoko. Iyi ni nkhani yakukondweska chomene!”
IVYO BAIBOLO LIKUYOWOYA: “Mu mazuŵa ghake ŵarunji ŵazamutikitira, ndipo kuzamuŵa mtende wakuzara, m’paka mwezi umare.”—Salimo 72:7.
UMO LAWOVWILIRA: Oleksandra wa ku Ukraine wakuti: “Kanandi nkhughanaghanira mazgu agha. Sonosono apa nkhondo na masuzgo ghose agho ghakwamba chifukwa cha nkhondo ghazamumara. Ndipo tizamufipaso mtima yayi chifukwa ŵakutemweka ŵithu wose ŵazamuŵa ŵakuvikilirika.”
IVYO BAIBOLO LIKUYOWOYA: “Ŵakufwa ŵinu ŵazamuŵaso ŵamoyo. . . . Wukani na kuchemerezga mwachimwemwe, imwe mukukhala mu fuvu!”—Yesaya 26:19.
UMO LAWOVWILIRA: Marie wa ku Rwanda wakuti: “Ŵabali ŵane wose ŵakakomeka apo ŵanthu ŵa mtundu unyake ŵakakomanga ŵa Tutsi. Kweni vesi ili likunisimikizgira kuti nizamuŵawonaso. Nkhulindilira mwakunweka kuzakapulikaso mazgu ghawo para ŵazakawuskika!”
IVYO BAIBOLO LIKUYOWOYA: “Kwakhala kanyengo kachoko waka, ŵaheni ŵazamuŵakoso chara . . . Kweni ŵakuzika ŵazamuhara charu chapasi, ŵazamukondwa chomene na mtende ukuru.”—Salimo 37:10, 11.
UMO LAWOVWILIRA: Daler wa ku Tajikistan wakuti: “Nangauli nkhondo yili kumara, kweni pachali vinthu vyambura urunji na ŵanthu ŵaheni. Mavesi agha ghanovwira chomene. Yehova wakuwona chilichose kweniso wakupulikiska masuzgo ghane. Walayizga kuti sonosono apa masuzgo ghose ghamalenge ndipo ghazamukumbukikaso yayi.”
Ŵanthu awo ŵazunulika mu magazini iyi, mbamoza mwa Ŵakaboni ŵa Yehova mamiliyoni ghanandi, awo Baibolo laŵawovwira kusanga mtende. Ŵasambira umo ŵangalekera kusankhana mtundu, vyaru, fuko, kweniso kutinkhana. (Ŵaefeso 4:31, 32) Ŵakaboni ŵa Yehova ŵakunjilirapo yayi pa ndyali ndipo ŵakukana kuchitako viwawa.—Yohane 18:36.
Ŵakaboni ŵa Yehova ŵakovwirana mwachitemwa chifukwa ŵali paubali wa pa charu chose. (Yohane 13:35) Mwachiyelezgero, Oleksandra uyo tamuzunura kale, wakachimbilira ku charu chinyake pamoza na mudumbu wake chifukwa cha nkhondo. Iyo wakati: “Tikati tajumpha waka pa boda, nyengo yeneyiyo tikawona Ŵakaboni awo ŵakatilindiliranga kuti ŵatipokelere. Ŵakatovwira chomene, nakuti tikachedwa yayi kuzgoŵera ku charu chaŵene.”
Tikumuchemani kuti mwize ku maungano ghithu uko mwamusambira ivyo Baibolo likuyowoya pa nkhani yamtende, kweniso ivyo tingachita kuti tiŵe pa mtende. Kuti mumanye uko maungano ghakuchitikira kufupi na kwinu, lutani pa jw.org, panji pemphani kuti musambirenge Baibolo na yumoza wa Ŵakaboni ŵa Yehova na buku la Mungakondwa na Umoyo Kwamuyirayira!