NKHANI YAKUSAMBIRA 47
SUMU 38 Wamuzgoraninge Ŵankhongono
“ Uli Wakuzirwa Chomene”!
“Uli wakuzirwa chomene.”—DAN. 9:23.
FUNDO YIKURU
Nkhani iyi yiwovwirenge awo ŵakujiwona ŵawakawaka kumanya kuti mbakuzirwa kwa Yehova.
1-2. Kasi ntchivichi chingatovwira kumanya kuti tili ŵakuzirwa kwa Yehova?
PAKATI pa ŵateŵeti ŵa Yehova pali ŵanyake awo ŵakujiwona kuti mbawakawaka. Panji ŵakujiwona nthena chifukwa munthu munyake wakuŵachitira vinthu ivyo vikuŵapangiska kujiwona ŵambura kuzirwa. Kasi ndimo viliri kwa imwe? Usange ni nthena, kasi mungachita wuli kuti mumanye kuti muli ŵakuzirwa kwa Yehova?
2 Chinthu chimoza icho mungachita, nkhughanaghanirapo nkhani za mu Baibolo izo zikulongora umo Yehova wakukhumbira kuti ŵanthu ŵachitirikenge vinthu. Mwana wake Yesu, wakachitanga vinthu na ŵanthu mwalusungu kweniso mwantchindi. Pakuchita nthena, wakalongora kuti iyo na Adada ŵake ŵakuzirwiska chomene ŵanthu awo ŵakujiwona kuti mbambura kuzirwa. (Yoh. 5:19; Heb. 1:3) Mu nkhani iyi, tiwonenge: (1) umo Yesu wakawovwilira ŵanthu kumanya kuti mbakuzirwa kwa Yehova, kweniso (2) ivyo tingachita kuti tigomezge kuti ndise ŵakuzirwa nadi kwa Chiuta.—Hag. 2:7.
UMO YESU WAKAWOVWILIRA ŴANTHU KUMANYA KUTI MBAKUZIRWA KWA YEHOVA
3. Kasi Yesu wakachita wuli na Ŵagalileya awo ŵakiza kuzakamupempha wovwiri?
3 Pa ulendo wake wachitatu wakukapharazga ku Galileya, ŵanthu ŵakizanga kufuma mu vigaŵa vyose kuzakategherezga kwa iyo kweniso kuchizgika maulwari ghawo. Yesu wakati ŵanthu aŵa “ŵakaŵa ŵakufyopoka na kujowoleka nga ni mberere zambura muliska.” (Mat. 9:36) Ŵalongozgi ŵawo ŵa chisopa ŵakaŵawonanga kuti mbanthu ŵambura kukhumbikwa, ndipo ŵakafika na pakuŵachema kuti ‘ŵakutembeka.’ (Yoh. 7:47-49) Kweni Yesu wakaŵazirwiskanga ndipo wakapaturanga nyengo kuŵasambizga na kuŵachizga maulwari ghawo. (Mat. 9:35) Kweniso kuti wawovwire ŵanthu ŵanandi, wakasambizga ŵapositole ŵake ntchito yakupharazga na kuŵapa mazaza ghakuchizga maulwari ghakupambanapambana.—Mat. 10:5-8.
4. Kasi tikusambirapo vichi pa umo Yesu wakachitiranga vinthu na ŵanthu awo ŵakayuyulikanga?
4 Pakuchita vinthu mwalusungu kweniso mwantchindi na ŵanthu, Yesu wakalongora kuti iyo na Adada ŵake ŵakuzirwiska ŵanthu wose awo ŵakuwoneka kuti mbakuyuyulika. Usange mukuteŵetera Yehova kweni mukukayika usange muli ŵakuzirwa kwa iyo, ghanaghanirani umo Yesu wakachitiranga vinthu na ŵanthu ŵakuyuyuka awo ŵakakhumbanga kusambira kwa iyo. Kuchita nthena kumovwiraninge kumanya kuti muli ŵakuzirwa kwa Yehova.
5. Longosorani umo vinthu vikaŵira kwa mwanakazi uyo Yesu wakasangana nayo ku Galileya.
5 Yesu wakasambizganga waka mizinda ya ŵanthu yayi, kweni wakaŵikangakoso mahara kwa munthu waliyose payekha. Mwachiyelezgero, apo wakapharazganga ku Galileya, Yesu wakasangana na mwanakazi uyo wakasuzgika na nthenda ya kusulura ndopa kwa vyaka 12. (Mrk. 5:25) Kuyana na Dango, mwanakazi uyu wakaŵa wakufipirwa chifukwa cha nthenda yake iyi, ndipo waliyose uyo wamukhwaska wakaŵangaso wakufipirwa. Ivi vikwenera vikapangiska kuti nyengo yinandi wakhalenge kwayekha. Kweniso, wakatondekanga kusopa Yehova lumoza na ŵanyake panji kuchitira nawo lumoza viphikiro vyakupatulika. (Lev. 15:19, 25) Ntheura tikukayika yayi kuti mwanakazi uyu wakajiwonangaso wawakawaka padera pa kusuzgika na nthenda yake iyi.—Mrk. 5:26.
6. Kasi mwanakazi uyo wakaŵa na nthenda ya kusulura ndopa wakachizgika wuli?
6 Mwanakazi uyu wakakhumbanga chomene kuti Yesu wamuchizge. Kweni wakaluta kwa iyo mwakudunjika yayi na kumupempha kuti wamuchizge. Chifukwa wuli? Panji wakaŵa na soni chifukwa cha nthenda iyo wakaŵa nayo. Panjiso wakawopanga kuti Yesu wangamukanira chifukwa wakanjira pa mzinda wa ŵanthu uku ngwakufipirwa. Ntheura wakakhwaska waka chakuvwara chake chakuwaro, ndipo wakaŵa na chigomezgo chose kuti wachirenge chifukwa cha kuchita nthena. (Mrk. 5:27, 28) Nakuti chipulikano chake chikamovwira, wakachizgika nadi. Ivi vikati vyachitika, Yesu wakafumba kuti ninjani wamukhwaska, ndipo mwanakazi uyu wakajiphara kuti ndiyo wamukhwaska. Kasi Yesu wakachita nayo wuli?
7. Kasi Yesu wakachita nayo wuli mwanakazi uyu, uyo wakatambura kwanyengo yitali? (Mariko 5:34)
7 Yesu wakachita nayo vinthu mwalusungu kweniso mwantchindi. Wakawona kuti mwanakazi uyu “wakawopa na kutenthema.” (Mrk. 5:33) Pakumanya umo mwanakazi uyu wakajipulikiranga, Yesu wakayowoya nayo mwalusungu chomene na kumukhozga. Wakafika na pakumuchema kuti “wamwana”—mazgu agho ghakalongoranga kuti wakumuchindika, kumulengera lusungu, kweniso kumutemwa. (Ŵazgani Mariko 5:34.) Manosi gha pa vesi ili ghakuti “apa pekha ndipo Yesu wakayowoya mwakudunjika kwa mwanakazi kuti ‘wamwana,’ panyake chifukwa cha kuwona umo vinthu vikaŵira kwa mwanakazi uyu kuti wakawopanga na ‘kutenthema.’” Ghanaghanirani waka umo mwanakazi uyu wakajipulikira! Viŵenge kuti Yesu wakayowoya nayo mwalusungu yayi, wakatenge wasuzgikenge maghanoghano na kujiyimba mulandu, nangauli wachizgika ku nthenda yake. M’malo mwake, Yesu wakamovwira mwanakazi uyu kujiwona mwakwenelera—kuti ni mwana wakuzirwa kwa Adada ŵake ŵakuchanya awo mbachitemwa.
8. Kasi mudumbu munyake wa ku Brazil wakaŵa na masuzgo wuli?
8 Mazuŵa ghano napo, ŵateŵeti ŵanyake ŵa Chiuta ŵakusangana na masuzgo gha muthupi agho ghakupangiska kuti ŵasuzgikenge maghanoghano. Maria,a mupayiniya wanyengozose wa ku Brazil, wakababika wakupendera, wakaŵavya malundi na woko la kumazere. Iyo wakuti: “Ku sukulu kanandi ŵanyane ŵakaninenanga chifukwa cha suzgo ilo nkhababika nalo. Ŵakanipanga mazina ghamsinjiro. Nanga mbanyake ŵamumbumba yakwithu ŵakachitanga nane vinthu vyakunipangiska kujiwona wawakawaka.”
9. Kasi ntchivichi chikamovwira Maria kumanya kuti ngwakuzirwa kwa Yehova?
9 Kasi ntchivichi chikamovwira Maria? Wati waŵa Kaboni wa Yehova, Ŵakhristu ŵanyake ŵakamukhozga na kumovwira kujiwona nga umo Yehova wakumuwonera. Iyo wakuti: “Ŵabali na ŵadumbu ŵanandi chomene ŵakanovwira! Nkhuwonga Yehova na mtima wane wose chifukwa cha kunipa mbumba yauzimu yapadera iyi.” Ŵabali na ŵadumbu ŵakamovwira Maria kumanya kuti ngwakuzirwa kwa Chiuta.
10. Kasi Mariya wa ku Magadala wakaŵa na suzgo wuli, ndipo wakajipulikanga wuli chifukwa cha suzgo lake ili? (Wonaniso vithuzi.)
10 Wonani umo Yesu wakawovwiliraso munthu munyake—Mariya wa ku Magadala. Iyo wakaŵa na mizimu yiheni 7! (Luka 8:2) Wakwenera kuti wakachitanga vinthu munthowa zachilendo chomene chifukwa cha mizimu iyi, ndipo panji ivi vikapangiskanga kuti ŵanthu ŵamugegenge. Panyengo iyo wakaŵa na mizimu yiheni iyi, wakwenera kuti wakajipulikanga wakujowoleka, wambura kuvikilirika, kweniso kuwona kuti palije uyo wangamovwira. Yesu wakwenera kuti wakayifumiska mizimu yiheni iyi mwa iyo, ndipo wakazgoka msambiri wake wakujipeleka chomene. Kasi Yesu wakamovwiraso wuli Mariya wa ku Magadala kumanya kuti ngwakuzirwa kwa Chiuta?
Kasi Yesu wakamusimikizgira wuli Mariya wa ku Magadala kuti wakaŵa wakuzirwa kwa Yehova? (Wonani ndime 10-11)
11. Kasi Yesu wakamulongora wuli Mariya wa ku Magadala kuti ngwakuzirwa kwa Chiuta? (Wonaniso vithuzi.)
11 Yesu wakamuchema Mariya wa ku Magadala kuti ŵenderenge lumoza pa maulendo ghake gha kukapharazga.b Ivi vikawovwira kuti walutilire kusanga chandulo apo wakategherezganga Yesu wakusambizga ŵanji. Yesu wakawonekeraso kwa iyo pa zuŵa ilo wakawuskikira ku ŵakufwa. Wakaŵa yumoza mwa ŵasambiri ŵakwambilira awo Yesu wakayowoya nawo pa zuŵa lira. Yesu wakamutuma kukaphalira ŵapositole ŵake kuti iyo wawuskika ku ŵakufwa. Mu vyose ivi, Yesu wakamovwira Mariya wa ku Magadala kumanya kuti wakaŵa nadi wakuzirwa kwa Yehova.—Yoh. 20:11-18.
12. Longosorani ivyo vikapangiska Lidia kujiwona kuti ngwambura kuzirwa.
12 Nga umo vikaŵira na Mariya wa ku Magadala, ŵanandi mazuŵa ghano nawo ŵakusuzgika na maghanoghano ghakujiwona ŵambura kuzirwa. Lidia, mudumbu wa ku Spain, wakuti pambere wandababike amama ŵake ŵakaghanaghananga vya kufumiska nthumbo. Nanga ni apo wakaŵa muchoko, wakukumbuka umo amama ŵake ŵakalekeranga kuŵikako mahara kwa iyo kweniso kumuyowoyera msinjiro. Iyo wakuti: “Chifukwa chakuti amama ŵakanitemwanga yayi, nkhakhumbanga chomene kuti ŵanthu ŵanyake ŵanitemwenge na kuŵa nane paubwezi. Kweni nkhaghanaghananga kuti ŵanthu ŵanganitemwa yayi chifukwa amama ŵakaniphaliranga kuti ndine munthu muheni.”
13. Kasi ntchivichi chikamovwira Lidia kujiwona kuti ngwakuzirwa kwa Yehova?
13 Pamanyuma pakuti Lidia wasambira unenesko, lurombo na kusambira payekha kweniso mazgu ghalusungu na vyakuchita vya ŵabali na ŵadumbu vikamovwira kumanya kuti ngwakuzirwa kwa Yehova. Iyo wakuti: “Kanandi mfumu wane wakuniphalira umo wakunitemwera. Nyengo na nyengo, wakunikumbuska mikhaliro yane yiwemi. Kweniso ŵabwezi ŵane nawo ŵakuchita mwakuyana waka.” Kasi mukumanyapo waliyose uyo wakukhumbikwira wovwiri kuti wamanye kuti ngwakuzirwa kwa Yehova?
IVYO TINGACHITA KUTI TIJIWONENGE NGA UMO YEHOVA WAKUTIWONERA
14. Kasi lemba la 1 Samuyeli 16:7 likutovwira wuli kumanya umo Yehova wakuwonera ŵanthu? (Wonaniso bokosi lakuti “Chifukwa Wuli Yehova Wakuzirwiska Ŵanthu Ŵake?”)
14 Kumbukani kuti Yehova wakumuwonani nga umo charu chikumuwonerani yayi. (Ŵazgani 1 Samuyeli 16:7.) Iyo wakuwona kuti ndimwe ŵakuzirwa chifukwa cha umo mukuwonekera, kasangiro kinu, panji masambiro ghinu yayi. (Yes. 55:8, 9) Ntheura yezgani kujiwona nga umo Yehova wakumuwonerani m’malo mwa kujiwona nga umo ŵakuchitira ŵanthu ŵa mu charu ichi. Nyengo zinyake mungaŵazga nkhani za mu Baibolo izo zikulongora kuti Yehova wakaŵazirwiskanga ŵanthu awo panyengo yinyake ŵakajiwonanga ŵambura kuzirwa, nga ni Eliya, Naomi, na Hana. Kweniso mungalemba ivyo vyamuchitikiranipo pa umoyo winu ivyo vikumusimikizgirani kuti Yehova wakumutemwani nadi ndipo wakumuzirwiskani. Chinyakeso icho mungachita ndicho kuweleramo nkhani zakukhwaskana na kujiwona ŵakuzirwa izo zikusangika mu mabuku ghithu.c
15. Chifukwa wuli Yehova wakawonanga Daniyeli kuti ‘ngwakuzirwa chomene’? (Daniyeli 9:23)
15 Manyani kuti ndimwe ŵakuzirwa kwa Yehova chifukwa cha kugomezgeka kwinu. Pa nyengo yinyake, panji apo ntchimi Daniyeli yikaŵa na vyaka vya m’ma 90, yikaŵa na “vyakulema vikuru” kweniso yikagongoweskeka. (Dan. 9:20, 21) Kasi Yehova wakamukhozga wuli Daniyeli? Chiuta wakatuma mungelo Gabriyeli kuti wamukumbuske Daniyeli kuti wakaŵa “wakuzirwa chomene” kweniso kuti malurombo ghake ghapulikikwa. (Ŵazgani Daniyeli 9:23.) Kasi ntchivichi chikapangiska Daniyeli kuŵa wakuzirwa chomene kwa Chiuta? Chikaŵa chifukwa chakuti wakatemwanga urunji kweniso wakaŵa wakugomezgeka. (Ezek. 14:14) Yehova wakasunga nkhani iyi mu Mazgu ghake kuti yitikhozge. (Rom. 15:4) Namweso Yehova wakupulika malurombo ghinu na kumuwonani kuti muli ŵakuzirwa chifukwa chakuti mukutemwa icho ntchakwenelera na kumuteŵetera mwakugomezgeka.—Mika 6:8, mazgu ghamusi; Heb. 6:10.
16. Kasi ntchivichi chingamovwirani kuwona Yehova kuti ni Dada wachitemwa?
16 Muwonenge Yehova kuti ni Dada uyo wakumutemwani. Iyo wakukhumba kumovwirani, kumusangani vifukwa yayi. (Sal. 130:3; Mat. 7:11; Luka 12:6, 7) Kughanaghanirapo fundo iyi kwawovwira ŵanandi awo ŵakujiwona kuti mbambura kuzirwa. Mwachiyelezgero, ghanaghanirani vya Michelle, mudumbu wa ku Spain uyo wakajiwonanga wawakawaka kweniso wambura kuzirwa chifukwa chakuti mfumu wake wakamunyozanga kwa vyaka vinandi. Iyo wakuti, “Nyengo yiliyose para namba kujipulika wawakawaka, nkhuyezga kujiwona nga kuti Yehova waninyamura mu mawoko ghake ndipo wakunilongora chitemwa na kunivikilira.” (Sal. 28:9) Lauren, mudumbu wa ku South Africa, wakujikumbuska kuti, “Usange mwalusungu Yehova wakaniguzira kwa iyo na vingwe vya chitemwa, wanisunga pafupi nayo vyaka vyose ivi, nanga nkhunigwiliskira ntchito kusambizga ŵanji, ipo wakuniwona nadi kuti nili wakuzirwa kwa iyo.”—Hos. 11:4.
17. Kasi ntchivichi chingamovwirani kugomezga kuti Yehova wakukondwa namwe? (Salimo 5:12) (Wonaniso chithuzi.)
17 Gomezgani kuti Yehova wakukondwa namwe. (Ŵazgani Salimo 5:12.) Davide wakayaniska lusungu lwa Yehova na ‘chiskango chikuru’ icho chikuvikilira ŵanthu ŵarunji. Kumanya kuti Yehova wakukondwa namwe kweniso wakumovwirani, kungamovwirani kuti muleke kujiwona ŵawakawaka. Kasi mungamanya wuli kuti Yehova wakukondwa namwe? Nga umo tawonera kale, Yehova wakumusimikizgirani kwizira mu Mazgu ghake. Kweniso wakugwiliskira ntchito ŵalara, ŵabwezi ŵinu, na ŵanji kuti ŵamukumbuskani kuti muli ŵakuzirwa kwa iyo. Kasi mukwenera kuchita wuli usange ŵanji ŵamukhozgani?
Kumanya kuti Yehova wakukondwa nase kungatovwira kuti tileke kujiwona ŵawakawaka (Wonani ndime 17)
18. Chifukwa wuli mukwenera kuzomera para ŵanji ŵakumuwongani?
18 Lekani kukana panji kujandizga para ŵanji awo ŵakumumanyani makora kweniso kumutemwani ŵakumuwongani pa viwemi ivyo mukuchita. Kumbukani kuti Yehova wangaŵa kuti wakuŵagwiliskira ntchito kuti ŵamovwirani kumanya kuti iyo wakukondwa namwe. Michelle, uyo tamuzunura kale wakuti: “Pachoko na pachoko nkhusambira kugomezga nadi mazgu ghalusungu agho ŵanji ŵakuniphalira. Nangauli ntchipusu yayi, kweni nkhumanya kuti ivi ndivyo Yehova wakukhumba nichitenge.” Michelle wakawovwirikaso mwachitemwa na ŵalara. Pasono ni mupayiniya ndipo wali kujipeleka kovwirapo milimo yinyake ya pa Beteli uku wali kunyumba kwake.
19. Chifukwa wuli mungagomezga kuti muli ŵakuzirwa kwa Chiuta?
19 Yesu wakutikumbuska kuti ndise ŵakuzirwa chomene kwa Adada ŵithu ŵakuchanya. (Luka 12:24) Ipo tingakayikanga yayi kuti Yehova wakutiwona kuti ndise ŵakuzirwa kwa iyo. Ntheura tingaluwanga yayi fundo iyi. Ndipo mphanyi tachita vyose ivyo tingafiska kuti tovwire ŵanji kuwona umo ŵaliri ŵakuzirwa kwa Chiuta!
SUMU 139 Mujiwone Kuti Muli mu Charu Chiphya
a Mazina ghanyake ghasinthika.
b Vikuwoneka kuti Mariya wa ku Magadala wakaŵa yumoza mwa ŵanakazi awo ŵakendanga lumoza na Yesu. Ŵanakazi aŵa ŵakagwiliskiranga ntchito vyuma vyawo kovwilira Yesu na ŵapositole ŵake.—Mat. 27:55, 56; Luka 8:1-3.
c Mwachiyelezgero, wonani mutu 24 mu buku la Sendelerani kwa Yehova kweniso ŵazgani malemba na nkhani izo zili pasi pa kamutu kakuti “Kukayika” mu buku la Malemba Ghakovwira pa Umoyo Withu Wachikhristu.