Wovwiri ku Ŵanakazi Awo Ŵakuchitirika Nkhaza

Nkhani ya pa jw.org ya mutu wakuti “Kuvikilira Ŵanakazi—Kasi Baibolo Likuti Wuli?” yikwamba na mazgu agha. Linki iyo yili paumaliro pa nkhani iyi yikumupani mwaŵi wakuti mudawunilode PDF ya nkhani iyi, iyo mungapulinta na kuyipinda kupanga thirakiti la mapeji 4. Mudumbu munyake wa ku United States zina lake Stacy wakuti: “Nkhapulinta makope ghanandi gha nkhani iyi ndipo pamoza na mudumbu munyake tikaluta kukagaŵira ŵanakazi ŵanyake awo ŵakaŵasunganga pa malo ghanyake mu chigaŵa cha mpingo withu kuti ŵaleke kuchitirika nkhaza.”

Munthu munyake uyo wakagwiranga ntchito pa malo agha wakapempha usange ŵangamupa makope ghanyake kuti wagaŵire ŵanakazi awo ŵakakhalanga pa malo agha. Ntheura, ŵadumbu ŵithu ŵaŵiri aŵa ŵakagaŵiraso mathirakiti ghanyake 40 pamoza na makadi 30 gha jw.org. Ŵati ŵizaso ŵadumbu ŵithu, mulara wa pa malo agha wakakhumbanga kuti Ŵakaboni ŵalongore ŵanakazi ŵa pa malo agha umo ŵangasambilira Baibolo.

Stacy na ŵadumbu ŵanyake ŵaŵiri vinthu vikaŵayenderaso makora pa malo ghanyake ghakuyana waka, uko ŵakagaŵira makope ghankhondi gha thirakiti ili ndipo ghanyake ghakakhumbikwangaso. Wantchito munyake wa pa malo agha wakati “Kabuku aka kawovwirenge chomene ŵanakazi pano.” Wakatiso: “Uwu ni wovwiri wa panyengo yake.” Ŵati ŵizaso ŵadumbu ŵithu, ŵanakazi ŵanandi ŵa pa malo agha ŵakawungana pamoza kuti ŵawone umo sambiro la Baibolo likuchitikira, ndipo ŵaŵiri ŵakanweka kuti ŵizenge ku maungano ghithu ku Nyumba ya Ufumu.

Stacy wakuti: “Tazizwa chomene na umo ŵanthu ŵayipokelelera nkhani iyi. Para yapulintika na kuyipinda makora, ni nthowa yiwemi chomene yakupharazgira uthenga wa Ufumu ku ŵanakazi awo ŵakuchitirika nkhaza. Tikakhwaskika chomene na umo ŵanthu ŵakatipokelelera, ndipo tikukondwa chomene kuwona umo Yehova wakutumbikira kuyezgayezga kwithu apo tikulutilira kupharazgira ŵanakazi aŵa makani ghawemi.