Mafumbo Ghakufuma ku Ŵaŵazgi

Kasi ni “maghanoghano” wuli agho Yehova wazamuŵika mu mitima ya mitundu sonosono apa munthazi?

Pakuyowoya vya kwamba kwa suzgo yikuru, lemba la Chivumbuzi 17:16, 17 likuti: “Masengwe 10 agho wanguwona, na chikoko, ivi vizamumutinkha muhule ndipo vizamumuparanya na kumuleka wali nkhule. Vizamurya minofu ya thupi lake na kumotcha thibu na moto. Chifukwa Chiuta wakaŵika ichi mu mitima yawo kuchita maghanoghano ghake, enya, kufiska maghanoghano ghawo ghakuyana na kupeleka ufumu wawo ku chikoko.” Kumasinda uku, mabuku ghithu ghakalongosoranga kuti “maghanoghano” agho Yehova wazamuŵika mu mitima ya mitundu ngakuti yiparanye chisopa chautesi.

Ndipouli, tawona kuti tisinthe. “Maghanoghano” agho Yehova wazamuŵika mu mitima ya mitundu ngakuti mitundu yipeleke “ufumu wawo ku chikoko.” Kuti tipulikiske makora umo uchimi uwu uzamufiskikira, tizgorenge mafumbo ghakulondezgapo agha.

Kasi mbanjani awo ŵakuyowoyeka mu uchimi uwu? “Muhule” uyoso wakuchemeka “Babuloni Mukuru”; wakwimira visopa vyose vyautesi. “Chikoko chiswesi” chikwimira wupu wa United Nations, ndipo wupu uwu ukapangika mu 1919 kuti wovwire pa charu chose paŵe mtende ndipo panyengo iyo ukachemekanga kuti League of Nations. (Chivu. 17:3-5) “Masengwe 10” ghakwimira maboma ghose agho ghakukhozgera chikoko chiswesi.

Kasi pali ubwezi wuli pakati pa muhule na chikoko chiswesi? Muhule kwamba kale wakukhala pa chikoko, ndipo wakutumbika chikoko ichi kweniso kuyezgayezga kuti chichitenge ivyo wakukhumba.

Kasi ntchivichi chizamuchitikira muhule? Chikoko chiswesi pamoza na masengwe 10 agho ghakumukhozgera, “vizamumutinkha muhule.” Pakulongora ukali wawo, vizamupoka usambazi wake na kuvumbura uheni wake. Ndipo kufuma apo vizamumuparanyirathu, kuchita ivyo Yehova wakayowoyerathu. (Chivu. 17:1; 18:8) Uwu ndiwo uzamuŵa umaliro wa visopa vyautesi. Ndipouli, pambere ivi vindachitike, Yehova wazamupangiska mitundu kuchita chinthu icho chindachitikepo mu mbiri ya muwuso wa ŵanthu.

Kasi Yehova wazamupangiska mitundu kuchita vichi? Wazamuŵika mu mitima ya masengwe 10 “maghanoghano ghake,” agho ngakuti “ŵazamupeleka nkhongono zawo na mazaza ku chikoko [chiswesi],” icho ni United Nations. (Chivu. 17:13) Ichi chikung’anamura kuti maboma ghazamuchita kukhumba ghekha yayi kuti ghapeleke nkhongono zawo na mazaza ghawo ku chikoko. Uchimi uwu ukulongora kuti Chiuta ndiyo wazamughapangiska kuchita nthena. (Zinth. 21:1; yaniskani na Yesaya 44:28.) Kasi ŵazamupelekanga pachokopachoko nkhongono zawo na mazaza ghawo? Yayi. Ntchakuwonekerathu kuti vinthu ivi vizamuchitika mwamabuchi. Kufuma apo, chikoko chizamupeleka cheruzgo cha Yehova pa visopa vyose vyautesi mwakuviparanyirathu.

Ipo kasi tikwenera kukhazga kuti kunthazi uku kuchitikenge vichi? Tileke kukhazga kuti manyuzipepara ghazamupharazga kuti maboma pachokopachoko ghamba kukhozgera chomene wupu wa United Nations. Icho tikwenera kukhazga ni ichi: Mwamabuchi, Yehova wazamuŵika mu mitima ya mitundu panji kuti maboma kuti ghapeleke nkhongono zawo ku chikoko. Para ivi vyachitika, tizamumanya kuti suzgo yikuru yili pafupi kwamba. Kweni panyengo yasono, tiyeni “tiŵe maso na kusungilira maghanoghano ghithu” chifukwa sonosono apa vinthu visinthenge mwamabuchi.—1 Tes. 5:6.