‘Sungilirani Umoza wa Mzimu’
Mpositole Paulosi wakachiska Ŵakhristu ku Efeso kuti ŵalutilire ‘kuzizipizgirana mu chitemwa, na kuyezgayezga kusungilira umoza wa mzimu mu chakukakira cha mtende.’—Efe. 4:2, 3.
“Umoza,” panji kuti mtende uwo tikusangwa nawo ngwa “mzimu.” Ichi chikung’anamura kuti mtende uwu ukuŵapo chifukwa cha nkhongono ya Chiuta. Ndipouli, nga umo Paulosi wakalongosolera, mtende withu ukwenera kulutilira kuŵapo. Ninjani uyo wakwenera kuchitapo kanthu? Mkhristu waliyose wakwenera kuchitapo kanthu kuti “umoza wa mzimu mu chakukakira cha mtende” ulutilire kuŵapo.
Kuti tipulikiske makora, tiyelezgere kuti munthu munyake wamupani galimoto yanyuwani. Kasi ni njani wali na udindo wakuyipwelelera? Zgoro ndakumanyikwirathu. Mungamupa mulandu yayi uyo wakamupani galimoto iyi usange yanangika chifukwa chakuti mwatondeka kuyipwelelera.
Mwakuyana waka, nangauli umoza withu ntchawanangwa chakufuma kwa Chiuta, kweni waliyose wakwenera kuchitapo kanthu kuti umoza uwu ulutilire kuŵapo. Usange tili pa mtende yayi na ŵabali na ŵadumbu, tikwenera kujifumba kuti: ‘Kasi nkhuchita chigaŵa chane kuti umoza withu ulutilire mu mpingo?’
‘YEZGAYEZGANI’ KUSUNGILIRA UMOZA WITHU
Nga umo Paulosi wakayowoyera, nyengo zinyake tingakhumbikwira kuŵikapo mtima kuti tisungilire umoza wa mzimu. Tingakhumbikwira kuchita nthena, chomenechomene usange mubali panji mudumbu watikhuŵazga. Kweni kasi kuti tisungilire mtende withu nyengo zose tikukhumbikwira kuti timufike munthu munyake na kuyowoya nayo vya suzgo ilo laŵapo? Viŵi yayi. Jifumbani kuti, ‘Kasi para ningachita nthena nikhuŵilizgenge mtende panji nipangiskenge kuti vinthu vihenipirethu?’ Nyengo zinyake nthowa yiwemi chomene nkhusulako waka panji kugowoka.—Zinth. 19:11; Mrk. 11:25.
Jifumbani kuti, ‘Kasi para ningachita nthena nikhuŵilizgenge mtende panji nipangiskenge kuti vinthu vihenipirethu?’
Nga umo mpositole Paulosi wakalembera, tiyeni tilutilire ‘kuzizipizgirana mu chitemwa.’ (Efe. 4:2) Buku linyake likuyowoya kuti mazgu agha ghangang’anamulikaso kuti “ŵapokelerani umo iwo ŵaliri.” Ichi chikung’anamura kuti tikuzomerezga fundo yakuti Ŵakhristu ŵanyithu nawo mbambura kufikapo. Mbunenesko kuti tikuyezgayezga ‘kuvwara wunthu uphya.’ (Efe. 4:23, 24) Ndipouli, palije uyo wangachita mwakufikapo. (Rom. 3:23) Usange tazomerezga fundo iyi, chiŵenge chipusu kuzizipizgirana, kugowokerana, kweniso “kusungilira umoza wa mzimu.”
Para tikumazga ivyo tapambana maghanoghano, nanga chingaŵa cha mu mtima pera, tilutilirenge kuŵa na “chakukakira cha mtende.” Lizgu Lachigiriki ilo lili kung’anamulika kuti “chakukakira” pa Ŵaefeso 4:3 lili kung’anamulika kuti “misipa” pa Ŵakolose 2:19. Misipa ndiyo yikovwira kuti chiwangwa chinyake chilukane pamoza na chiwangwa chinyake. Mwakuyana waka, mtende kweniso kutemwa ŵabali ŵithu, ndivyo vikovwira kuti tiŵe nawo paubwezi Ŵakhristu ŵanyithu nanga tingapambana pa vinthu vinyake.
Ntheura para Mkhristu munyinu wamukhuŵazgani panji kumukwiyiskani, yezgayezgani kumuwona munthu uyo na mtima wachiwuravi m’malo mwa kumuwona na jiso liheni. (Kol. 3:12) Pakuti tose tili ŵambura kufikapo, ntchakuwonekerathu kuti namwe muli kukhuŵazgapo munthu munyake. Kukumbuka fundo iyi kumovwiraninge kuti ‘musungilire umoza wa mzimu.’