Mugwiliskirenge Ntchito ‘Chawanangwa Chinu Chauzimu’

Tose tikukondwa para tikuchezga na ŵabali na ŵadumbu ŵithu. Kweni tikwenera kuchita vinandi padera pa kuchezga waka. Baibolo likuyowoya kuti para tikukhozgana yumoza na munyake ndikuti tikupana “chawanangwa chauzimu.” (Rom. 1:11, 12) Kasi tingagwiliskira wuli ntchito mwakukwana chawanangwa ichi?

Musankhenge mazgu ghawemi. Mwachiyelezgero, para mukuzgorapo pa maungano mukwenera kuŵika maghanoghano ghinu pa Yehova, Mazgu ghake, kweniso ŵanthu ŵake m’malo mwa kujighanaghanira mwaŵene. Para mukuchezga na Ŵakhristu ŵanyinu, muyowoyenge nkhani izo zingaŵakhozga.

Khozgani ŵanyinu kwizira mu vyakusankha na vyakuchita vinu. Mwachiyelezgero, ŵanyake ŵali kusankha kuŵa mu uteŵeti wanyengozose nangauli ŵakusangana na masuzgo ghakupambanapambana. Ŵanyake ŵakuyezgayezga kusangikapo pa maungano ghamukati mwasabata nangauli mbakutangwanika chifukwa cha ntchito panji masuzgo gha muthupi.

Kasi mukuŵakhozga ŵabali na ŵadumbu kwizira mu chipulikano chinu? Ndipo kasi namwe mukuŵa maso kuti mukhozgekenge na Ŵakhristu ŵanyinu?