Mwaŵachekuru Ndimwe Ŵakuzirwa mu Mpingo

Panji namwe mukutondeka kuchita vinandi chifukwa cha uchekuru. Nangauli mwateŵetera Yehova mwakugomezgeka kwa vyaka vinandi, kweni nyengo zinyake mungamba kuyaniska ivyo mukuchita pasono na ivyo mukachitanga kale, ndipo mungamba kujiwona kuti ndimwe wambura ntchito. Usange ndimo viliri kwa imwe, kasi mungachita wuli kuti mutonde kaghanaghaniro aka na kuŵa wakukondwa?

IVYO YEHOVA WAKUKHAZGA KWA IMWE

Jifumbani kuti, ‘Kasi Yehova wakukhumba vichi kwa ine?’ Zgoro mungalisanga pa lemba la Dotoronome 6:​5, apo pakuti: “Utemwenge Yehova Chiuta wako na mtima wako wose, umoyo wako wose, na nkhongono zako zose.”

Vesi ili likulongora kuti Yehova wakukhumba kuti mumuteŵeterenge na mtima winu wose, umoyo winu wose, na nkhongono zinu zose. Fundo iyi yingamovwirani kuti muleke kujiyaniska na ŵanji panji kuyaniska ivyo mukuchita sono na ivyo mukachitanga kale.

Ghanaghanirani fundo iyi: Apo mukaŵa munyamata, kasi mukamupanga vichi Yehova? Ŵanthu ŵa Yehova ŵanandi ŵangazgora kuti ŵakamupanga vyose ivyo ŵakafiskanga. Ntheura tingati mukamupanga vyose ivyo mungafiska pa nyengo iyo mwakuyana na umo vinthu vikaŵira pa umoyo winu. Kasi tingati pasono mukufiska kumupa vichi Yehova? Mukwenera kuti mukumupa vyose ivyo mungafiska kuyana na umo vinthu viliri pa umoyo winu pasono. Usange mungawona vinthu munthowa iyi, mbwenu muwengemo kuti mukumupa Yehova vyose ivyo mungafiska nga umo mukachitiranga kale. Mukamupanga Yehova viwemi chomene panyengo iyo, ndipo sono napo mukumupa viwemi chomene.

IVYO MWAJUMPHAMO VINGAWOVWIRASO ŴANJI

Fundo yinyake iyo yingamovwirani ni iyi: Lekani kughanaghanira waka vinthu ivyo mukutondeka kufiska, m’malo mwake mughanaghanirenge nthowa izo mungawovwilira ŵanji. Nangauli sono mwachekura, kweni mungafiska kuchita vinyake ivyo pa unyamata mukatenge mufiskenge yayi kuchita. Mwachiyelezgero, mungachita vinthu vyakulondezgapo ivi:

Muphalirengeko ŵanji ivyo mwasangana navyo pa umoyo winu. Ghanaghanirani ivyo Baibolo likuyowoya mu mavesi ghakulondezgapo agha:

Themba Davide: “Nkhaŵa mwana, sono nili muchekuru, kweni nindawonepo kuti murunji wasidika, panji ŵana ŵake kupempheska chingwa.”—Sal. 37:25.

Joshuwa: “Sono wonani, ine nili pafupi kufwa, ndipo mukumanya makora na mtima winu wose na umoyo winu wose kuti palije lizgu nanga ndimoza pa malayizgo ghawemi ghose agho Yehova Chiuta winu wakayowoya kwa imwe ilo latondekapo. Ghose ghafiskika kwa imwe. Palije lizgu nanga ndimoza ilo latondekapo.”—Josh. 23:14.

Panji namwe muli kuyowoyapo mazgu ghanthena agha apo mukaŵa ŵawukirano kuti mukhozge ŵanji. Davide na Joshuwa ŵakayowoya vinthu ivyo vikaŵachitikirapo nadi. Chifukwa chakuti ŵateŵeti ŵakugomezgeka ŵa Yehova aŵa ŵakayowoyanga vinthu ivyo ŵakawona na kupulika kwa vyaka vinandi, lekani mazgu ghawo ngakovwira chomene.

Usange mwateŵetera Yehova kwanyengo yitali, namwe mungaphalirako ŵanji umo Yehova wakamovwilirani panji umo wakawovwilira ŵanji. Kasi mukukumbuka nyengo yinyake apo Yehova wakawovwira ŵateŵeti ŵake munthowa yapadera? Usange ni nthena, mbwenu ŵaphaliraniko ŵanji vya nkhani iyo! Yingaŵakhozga chomene nga umo vikaŵira kwa imwe. Ntheura, mungakhozga chomene ŵabali na ŵadumbu pakuŵaphalira ivyo mwasangana navyo pakuteŵetera Yehova.—Rom. 1:​11, 12.

Nthowa yinyake iyo mungakhozgera ŵanji nkhuyezgayezga kusangikapo pa maungano gha mpingo usange mungafiska. Para mwachita nthena mungakhozga ŵabali na ŵadumbu kweniso namwe mungakhozgeka. Connie, uyo tangumuzunura kukwambilira, wakati: “Kusangikapo pa maungano kukunovwira kuti nileke kugongowa. Pakuwona chitemwa icho ŵabali na ŵadumbu ŵakunilongora ku Nyumba ya Ufumu, vikunovwira kuti nileke kuŵa na chitima. Nkhuyezga kuŵawonga ŵabali na ŵadumbu pa ivyo ŵakunichitira pakuŵapa tuvyawanangwa tuchokotuchoko. Ndipo nkhuwoneseska kuti nyengo zose nkhuchitako vinthu vyauzimu lumoza na ŵabali na ŵadumbu.”

YEHOVA WAKUZIRWISKA IVYO MUKUFISKA KUMUCHITIRA

Mu Baibolo muli viyelezgero vinandi vya ŵanthu awo ŵakatondekanga kuchita vinandi pakuteŵetera chifukwa cha umo vinthu vikaŵira pa umoyo wawo, kweni ŵakatemwekanga na Yehova. Ghanaghanirani za Simiyoni, Muisrayeli muchekuru uyo wakaŵa wachali wamoyo apo Yesu wakababikanga. Para Simiyoni wiza ku tempile wakwenera kuti wakawonanga ŵachinyamata ŵakuchita milimo yakuzirwa chomene. Kweni kasi iyo wakajiwonanga wuli? Mukawonero ka wunthu panji wakaghanaghananga kuti iyo ngwakuzirwa pachoko mu maso gha Yehova pakuti ni muchekuru. Kweni Yehova wakawonanga vinthu mwakupambanako. Iyo wakawonanga kuti Simiyoni ni muteŵeti wake “murunji na wakutemwa kusopa” ndipo wakamupa mwaŵi wakuwona Yesu apo wakaŵa bonda. Yehova wakamugwiliskiraso ntchito Simiyoni kuti wayowoye uchimi wakuti Yesu ndiyo ni Mesiya wakulayizgika. (Luka 2:​25-35) Ntchakuwonekerathu kuti Yehova wakaŵika mtima pa uchekuru wa Simiyoni yayi, kweni wakawonanga kuti ni munthu wachipulikano chakukhora ndipo “mzimu utuŵa ukaŵa pa iyo.”

Namweso mungaŵa na chigomezgo chose kuti Yehova wakuzirwiska uteŵeti winu uwo mukuchita, nanga vingaŵa kuti mukutondeka kuchita vinandi. Kwa Yehova, chawanangwa icho munthu wangapeleka “ntchakuzomerezgeka chomene mwakuyana na ivyo munthu wali navyo, kuti mwakuyana na ivyo munthu walije chara.”—2 Kor. 8:​12, bi7.

Ntheura ŵikani mtima pa ivyo mungafiska kuchita. Mwachiyelezgero, mungaghanaghanira nthowa zakupambanapambana izo mungapharazgira nanga yingaŵa nyengo yichoko waka. Mungakhozgaso ŵabali na ŵadumbu kwizira pa foni panji kuŵatumira kadi. Manyani kuti ŵabali na ŵadumbu ŵangakhozgeka chomene na tunthu tuchokotuchoko uto tingaŵachitira, chomenechomene usange twafuma kwa imwe ŵachekuru, imwe mwateŵetera Yehova kwa nyengo yitali.

Ŵanji ŵali na masuzgo ghanyake pa umoyo agho ghakuŵatondeska kuchita vinandi. Wonani ivyo vikachitika ku East Africa mu bokosi lakulondezgapo la mutu wakuti “Vikaponoska Umoyo Wake.”

Kumbukani kuti chiyelezgero chinu chiwemi pa nkhani ya kuteŵetera Yehova mwakugomezgeka kwa vyaka vinandi, chingakhozga chomene ŵanji. Ndimwe chiyelezgero chiwemi pa nkhani ya kuzizipizga ndipo gomezgani kuti “Chiuta ngwambura urunji yayi kuti waluwe mulimo winu na chitemwa icho mukalongora ku zina lake pakuteŵetera ŵatuŵa ndipo mukulutilira kuŵateŵetera.”—Heb. 6:10.

LUTILIRANI KOVWIRA ŴANJI

Kafukufuku wakulongora kuti ŵachekuru ŵanandi awo ŵakovwira ŵanji ŵakuŵa na mathupi ghawemi, ŵakughanaghana makora, kweniso ŵakuŵa na umoyo utali.

Mbunenesko kuti kovwira ŵanji kungawuskapo yayi masuzgo ghose agho ghakwiza chifukwa cha uchekuru. Ufumu wa Chiuta pera ndiwo uzamufiska kuwuskapo icho chikambiska uchekuru na nyifwa, icho nkhwananga uko tili kuhara kufuma kwa Adamu.—Rom. 5:12.

Kweni pasono nthena, para mukuchita ivyo Yehova wakukhumba, kusazgapo kovwira ŵanji kuti ŵamumanye makora, mukhozgenge chigomezgo chinu kweniso muŵenge na umoyo uwemi. Mwaŵachekuru manyani kuti Yehova wakuzirwiska chomene uteŵeti uwo mukuchita, ndipo mpingo nawo ukuzirwiska chomene chiyelezgero chinu chiwemi pa nkhani ya kugomezgeka.