Kasi Mukukumbuka?

Kasi mwaŵazga mwakupwelelera magazini gha Gongwe la Mulinda gha chaka chino? Yezgani kuzgora mafumbo agha:

Kasi ntchivichi chikutituma kuti tipeleke uchindami kwa Yehova?

Tikuchita nthena chifukwa tikumuchindika chomene Yehova kweniso tikumutemwa chomene. Kweniso tikumuchindika chifukwa tikukhumba ŵanji ŵamumanye.—w25.01, p. 3.

Usange munyake watikhuŵazga, kasi ntchivichi chingatovwira kuti timugowokere?

Tileke kusulako waka umo tikujipulikira; kweni para tataya ukali na kuleka kusunga vyakusingo, vingatovwira kuti tigege masuzgo agho ghakwiza chifukwa cha ukali.—w25.02, pp. 15-16.

Chifukwa wuli msambiri Mariko ntchiyelezgero chiwemi ku ŵabali ŵachinyamata?

Mariko wakazomera na mtima wose mulimo wakuteŵetera ŵanji. Nangauli wakwenera kuti nyengo yinyake wakakhuŵara, kweni Mariko wakaleka yayi uteŵeti. Wakalutilira kuŵa paubwezi na Paulosi na ŵabali ŵanyake ŵakukhwima.—w25.04, p. 27.

Kasi Yesu wakang’anamurangachi apo wakalomba kuti: “Naŵamanyiska zina linu”? (Yoh. 17:26)

Ŵasambiri ŵake ŵakalimanyanga kale zina la Chiuta. Kweni Yesu wakaŵawovwira kuti ŵamumanye makora Chiuta, kusazgapo khumbo lake, milimo yake, na mikhaliro yake.—w25.05, pp. 20-21.

Usange ndise ŵakujiyuyura, kasi tizomerezgenge kuti vichi?

Tizomerezgenge kuti tikumanya vyose yayi. Mwachiyelezgero, tikumanya yayi apo umaliro wizirenge panji umo Yehova wazamuchitira pa nyengo iyo. Kweniso tikumanya yayi kuti machero kuwengechi panji umo Yehova wakutimanyira ise.—w25.06, pp. 15-18.

Kasi ntchivichi chingatovwira kuti tisange chandulo na nkhani iyo tikuŵazga panji nkhani yachisanisani?

Tingajifumba kuti: ‘Kasi ŵagwiliskira ntchito maukaboni wuli kuti nkhani iyi yiŵafike pamtima ŵanthu? Kasi mu nkhani iyi muli chiyelezgero chinyake chiwemi icho ningachigwiliskira ntchito para nkhusambizga ŵanji? Kasi ni njani wanganweka na nkhani iyi?’—w25.07, p. 19.

Kasi tingasambira vichi pa nkhani ya umo Chiuta wakugowokelera para tikuwona umo wakachitira na Davide?

Nangauli Davide wakachita kwananga kukuru, kweni wakati wang’anamuka mtima, Yehova wakamugowokera. (1 Mathe. 9:4, 5) Para Chiuta wagowoka, wakusungaso yayi zakwananga za munthu wakwananga panji kuzakazikumbuskaso munthazi.—w25.08, p. 17.

Kasi mungachita wuli usange msambiri wa Baibolo wakusuzgika kupulikiska fundo yinyake?

Usange wakusuzgikira kupulikiska fundo yinyake pamanyuma pakuti mwamulongosolera kale makora kufuma mu Baibolo, jumphanipo dankha na kuzakaweleraposo nyengo yinyake.—w25.09, p. 24.

Baibolo likuti kwananga kuli na “nkhongono yakupusika.” (Heb. 3:13) Mwawuli?

Kwananga kungatipangiska kuti tichite vinthu viheni. Kungatipusikaso kuti tikayikirenge vinthu vinyake, nga fundo yakuti Chiuta wakutitemwa nadi.—w25.10, p. 16.

Kasi ni vinthu wuli vitatu ivyo vingatovwira kuti malurombo ghithu ghaŵenge ghakupulikikwa makora chomene?

(1) Tighanaghanirenge mikhaliro ya Yehova. (2) Tighanaghanirenge ivyo tikujumphamo na kuvizunura mu malurombo ghithu, nga kukhumbikwa kwa kugowokera munthu munyake. (3) Tilombenge kwa nyengo yitali. Kuchita nthena kungatovwira kuti tiyowoye vyose ivyo vili mu mtima withu.—w25.10, pp. 19-20.

Kasi tingawovwira wuli ŵachekuru?

Tingaŵayendera panji kuŵayimbira foni. Tingakaŵapelekezgaso ku chipatala. Panji tingapharazga nawo munthowa zakupambanapambana.—w25.11, pp. 6-7.

Kasi ntchivichi chingawovwira kuti ukwati Wachikhristu uŵe wakuchindikika?

Londezgani malango gha boma ghakukolerana na fundo za mu Baibolo. Woneseskani kuti ivyo vikuchitika pa mwambo wa ukwati kweniso ku malo ghakuvinira vikulongora mzimu wa Chiuta. Vwarani mwantchindi ndipo gegani tumaluso tose uto tukukolerana yayi na fundo za mu Baibolo. Yowoyeskanani makora apo mukunozgekera ukwati winu.—w25.12, pp. 21-24.