“Uwemi Umoza”

Danielle, yumoza wa Ŵakaboni ŵa Yehova ku South Africa, wakasanga chikwama icho kasitomara wakachiluwa mu shopu ya khofi. Mu chikwama ichi mukaŵa waleti iyo yikaŵa na ndalama kweniso makadi gha ku banki. Pakukhumba kuwezgera chikwama ichi kwa mwenecho, Danielle wakayezga kupenjamo adiresi panji nambara ya foni kweni wakasangamo waka zina la munthu uyu. Wakayezga kuti wakumane na munthu uyu kwizira ku banki yake kweni vikenda yayi. Wakavuka yayi, wakayimba pa nambara iyo yikaŵa pa lisiti la kwa dokotala ilo wakalisanga mu chikwama. Wakugwira ntchito yakupokelera ŵalendo kwa dokotala kura, wakazomera kupeleka nambara ya foni ya Danielle kwa munthu yura.

Munthu uyu wakazizwa kupokera foni kufuma ku ofesi ya dokotala wake, kumuphalira kuti Danielle ndiyo wali kusora chikwama chake ndipo wakukhumba kumuwezgera. Wati wafika kuti watore chikwama chake, wakasanga Danielle na adada ŵake. Iwo ŵakasangirapo mwaŵi kumuphalira chifukwa icho ŵakalimbikilira kumupenja m’paka ŵamusange. Ŵakalongosora kuti iwo pakuŵa Ŵakaboni ŵa Yehova, ŵakuyezgayezga kulondezga fundo za mu Baibolo. Ndicho chifukwa nyengo zose ŵakuyezgayezga kuŵa ŵanenesko panji kuti ŵakugomezgeka.—Ŵahebere 13:18.

Pati pajumpha maora ghachoko waka, munthu yura wakatumira uthenga Danielle na adada ŵake, kuŵawonga chifukwa cha kumuwezgera chikwama chake na waleti. Wakalemba kuti: “Nkhumuwongani chomene chifukwa cha kulimbikira kunipenja. Nkhakondwa chomene kukumana namwe kweniso banja linu ndipo nizamumuluwani yayi chifukwa cha mtima winu waubwezi. Kuti nilongore kuwonga kwane, nkhukhumba kumupaniko chawanangwa. Nkhumanya kuti mukujipata chomene kuti mufiske kuteŵetera Chiuta. Ivyo mukuchita vikulongora kuti ndimwe ŵanthu ŵawemi, ukaboni wa fundo iyi nkhugomezgeka uko Danielle walongora. Ntheura nkhuwerezgaposo, yewo chomene ndipo Chiuta watumbike uteŵeti winu.”

Pati pajumpha myezi, adada ŵake Danielle ŵakasanganaso na munthu yura, ndipo wakaŵaphalira ivyo vikachitika kwa iyo nyengo yinyake apo wakasora waleti ya munthu munyake. Wakayowoya kuti apo wakaŵa mu shopu, wakasanga waleti yili pasi. Wati wamusanga mwanakazi uyo wakaŵa mwenecho wa waleti na kumuwezgera waleti yake, wakamulongosolera icho chikamupangiska kuchita nthena. Wakamulongosolera kuti nayo munthu munyake wakamuchitira uwemi pakumuwezgera waleti yake iyo wakasoŵeska. Iyo wakati: “Para ŵanyako ŵakuchitira uwemi kweniso ŵakulongora lusungu nawe ndivyo ukwenera kuchitira ŵanji, ivi vikovwira kuti waliyose waŵe wakukondwa.”