Kasi Ŵanthu Ŵakusambira Chomene Ŵakugomezga Kuti Yesu Wakaŵako?

Pali ukaboni wakukwana wakuti Yesu wakaŵako pa charu chapasi. Ndipo ŵanandi awo ŵali kusambira chomene ŵakuzomerezga. M’ma 100 na 200 C.E, ŵanthu ŵanyake ŵakulemba mbiri, ŵakalemba vya Yesu na Ŵakhristu ŵakwambilira. Pa nkhani iyi, buku linyake likuti: ‘Uwu mbukaboni wakuti kale, nanga ni awo ŵakatinkhanga Chikhristu ŵakagomezganga kuti Yesu wakaŵako. Kweni mu 1700, 1800 na 1900, ŵanthu ŵakamba kukayika kuti Yesu wakaŵako.’—Encyclopædia Britannica, 2002 Edition.

Mu 2006, buku linyake likati: ‘Palije munthu wakusambira chomene uyo wangasuska kuti Yesu, mwana wa Yosefe wakaŵako. Pasono tikumanya vinandi ivyo Yesu wakachita na kusambizga.’—Jesus and Archaeology.

Baibolo likuti Yesu wakaŵako nadi. Likuzunura mazina gha ŵapapi ŵake na ŵabali ŵake. (Mateyu 1:1; 13:55) Likuzunuraso mazina gha mafumu agho ghakaŵako mu nyengo yake. (Luka 3:1, 2) Ivi vikovwira awo ŵakusanda Baibolo kukhorwa kuti likuneneska.