Wakabisanga Manosi Kusi ku Mashini Ghakuchapira

Zarina wakati wabatizika na kuŵa Kaboni wa Yehova, wakafumako ku Russia na kuwelera kukwake ku Central Asia. Wakakhumbanga kuti para wakafika waka, wakasambizgenge ŵana ŵake Baibolo. Banja lake likaŵa likavu, ntheura iyo na ŵana ŵake ŵaŵiri, ŵapapi ŵake, kweniso mudumbu wake pamoza na muwoli wake, wose ŵakakhalanga mu nyumba ya chipinda chimoza. Ŵapapi ŵake ŵakamuphalira kuti waleke kusambizga ŵana ŵake vya Baibolo. Ŵakaphaliraso ŵana ŵake kuti ŵaleke kuyowoyeskana na amama ŵawo vya Baibolo.

Zarina wakaghanaghanirapo ivyo wangachita kuti wasambizge ŵana ŵake vya Yehova. (Zintharika 1:8) Ntheura wakalomba kwa Yehova kuti wamovwire umo wangasambizgira ŵana ŵake. Kufuma apo, Zarina wakachita ivyo wakalomba. Wakamba kutembeya na ŵana ŵake na kuŵalongora vinthu vyakuzizika ivyo Yehova wali kulenga. Ivi vikawovwira chomene ŵana ŵake, ndipo ŵakanweka kuti ŵamanye uyo wakalenga vinthu ivi.

Kufuma apo, Zarina wakasangaso nthowa yinyake yakuti wasambizgire ŵana ŵake. Wakamba kugwiliskira ntchito buku la Kasi Baibolo Likusambizgachi Chomenechomene?a Wakakoperanga mazgu mu buku ili na kulemba pa pepara. Wakalembangaposo fundo zinyake kuti ŵana ŵake ŵakapulikiske makora. Kufuma apo, wakaŵikanga mapepara agha pamoza na phesulu kusi kwa mashini ghakuchapira. Ŵana aŵa ŵakaŵerenganga mapepara agha na kulembaso mazgoro.

Nthowa iyi yikawovwira Zarina kuti wasambire machaputara ghaŵiri na ŵana ŵake mu buku la Baibolo Likusambizgachi. Kufuma apo, Zarina na ŵana ŵake ŵakasanga nyumba yawo ndipo ŵakasamuka. Kufuma waka panyengo iyi, ŵakasambiranga umo ŵakhumbira, kwambura munthu wakuŵatimbanizga. Mu Okutobala 2016, ŵasungwana wose ŵakabatizika, ndipo ŵakukondwa chomene kuti amama ŵawo ŵakachita vinthu mwavinjeru kweniso mwaumanyi kuti ŵasambire unenesko.