Wakasambira Unenesko ku Ŵakayidi

Mu 2011 mwanalume munyake wakachimbira kwawo ku Eritrea na kwiza ku Norway. Zuŵa linyake wakasangana na Ŵakaboni ŵa Yehova, ndipo wakaŵaphalira kuti apo wakaŵa kukwake wakachezgapo na Ŵakaboni ŵa Yehova. Wakayowoya kuti apo wakaŵa msilikari, Ŵakaboni ŵa Yehova ŵanandi ŵakajalirika mu jele chifukwa chakukana kunjira usilikari, nangauli ŵakatambuzgikanga kwazanimuwone.

Zuŵa linyake mwanalume uyu wakaswa malango ndipo ŵakamukaka na kumujalira mu jele. Mu jele wakasangamo Ŵakaboni ŵa Yehova ŵatatu, Paulos Eyasu, Negede Teklemariam, na Isaac Mogos, awo ŵakajalirika mu chaka cha 1994 chifukwa cha kukana kunjilirapo pa vya charu.

Apo wakaŵa mu jele, wakajiwonera yekha kuti Ŵakaboni ŵa Yehova ŵakuchita nadi ivyo ŵakusambizga ŵanthu. Wakawona kuti ŵakaŵa kugomezgeka chomene kweniso ŵakapangako ŵakayidi ŵanyawo vyakurya. Ŵakayidi awo ŵakaŵa Ŵakaboni ŵa Yehova ŵakasambiranga Baibolo zuŵa lililose ndipo ŵakachemanga ŵakayidi ŵanyawo kuti nawo ŵasambirenge nawo. Ŵakaphalirika kuti ŵangafuma mu jele pekha para ŵasayinira kuti Mbakaboni ŵa Yehova yayi, kweni ŵakakana chiŵenjuŵenju.

Mwanalume uyu wakakhwaskika chomene na ivyo ŵabali aŵa ŵakachita, ndipo wakati wafuma mu jele na kuwelera ku kwake ku Norway, wakakhumbanga kupulikiska chifukwa icho Ŵakaboni ŵa Yehova ŵakulutilira kugomezgeka nanga ŵangaŵa kuti ŵali kwa ŵekha. Ndipo wakati wakumana na Ŵakaboni ŵa Yehova, nyengo yeneyiyo wakamba kusambira Baibolo na kuluta ku maungano.

Mu Seputembala 2018, wakabatizika na kuŵa Kaboni wa Yehova. Pasono wakupharazgira ŵanthu ku Eritrea na Sudan pa mpata uliwose uwo wasangika, ndipo wakuŵapempha kuti ŵasambirenge Baibolo.