IVYO TINGACHITA APO MITENGO YA VINTHU YIKUKWERA

Muŵenge Ŵakupa

Para vikumusuzgani kulipira vinthu ivyo mukukhumba kugura, mungawona nga kuti mungakwaniska yayi kupako ŵanji vinthu. Kweni para mukupako ŵanji vinthu ivyo muli navyo, vingamovwirani kuti muzizipizge masuzgo gha vyachuma. Mungakwaniska kusunga ndalama kweniso kupako ŵanyinu vinthu.

CHIFUKWA WULI KUPA NKHWAKUZIRWA?

Tikuŵa ŵakukondwa kweniso tikujipulika makora para tikupako ŵanyithu vinthu, nanga vingaŵa kuti taŵapako vichoko waka. Madokotala ghanyake ghakuti kupako ŵanji vinthu, kukovwira munthu kuti waleke kulwaralwara. Mwachiyelezgero, kungachepeska kwenjerwa, kusuzgika maghanoghano, kuti ndopa zileke kuchimbira chomene panji kuti BP, thupi lileke kunyenyera chomene, na kuŵinya. Vingawovwiraso kuti munthu wagonenge mwakukwana.

“Uyo wakupeleka wakukondwa chomene kuluska uyo wakupokera.”—Milimo 20:35.

Para tikupako ŵanji ndalama panji vinthu vinyake, chizamuŵa chipusu kupokera wovwiri uwo tikukhumbikwira. Howard uyo wakukhala ku England, wakuti: “Pakuti tikupenjerezga mipata yakuti tipeko ŵanji vinthu na kuŵawovwira, ine na muwoli wane vikutisuzga yayi kupokera wovwiri pa nyengo iyo nase tikukhumbikwira wovwiri.” Nangauli ŵanthu awo ŵali nadi na mtima wakupa ŵakukhazga kuti ŵanyawo ŵaŵawezgerengepo yayi. Kweni ŵakusanga mabwezi agho ghakuŵa ghakukhumbisiska kuŵawovwira pa nyengo iyo ŵakukhumbikwira wovwiri.

“Mupelekenge, ndipo ŵanthu ŵamupaninge.”—Luka 6:38.

IVYO MUNGACHITA

Mupengeko ŵanyinu ivyo muli navyo. Nanga mungaŵa na vichoko, kweni mungapako ŵanyinu, nakuti nyengo zinyake chingaŵa chakurya chipusu waka. Duncan na mbumba yake awo ŵakukhala ku Uganda, mbakavu chomene kweni ŵakutemwa kupako ŵanji vinthu. Duncan wakuti: “Kanandi pa Sabata, ine na muwoli wane tikuchemerako munthu ku nyumba kwithu kuti wazakarye chakurya chipusu waka. Tikukondwa chomene kuchezga na ŵanji.”

Kweni para mukupeleka vinthu ku ŵanji, mukwenera kuchita vinthu mwamahara. Mukwenera yayi kupeleka vinthu vinandi chomene, mwakuti mbumba yinu yisoŵe na vinthu vyakukhumbikwa.—Yobu 17:5.

Yezgani kuchita ivi: Mungamupa munthu chakurya chipusu waka panji chakumwa chinyake. Para muli na vinthu vinyake ivyo mukuvigwiliskira ntchito yayi, mungapako ŵabwezi panji ŵazengezgani ŵinu awo vinthu ivyo vingaŵawovwira.

Mungapelekaso munthowa zinyake. Vinthu vinyake ivyo tingapeleka ku ŵanji, vikukhumbikwira ndalama yayi. Mwachiyelezgero, tingapeleka nyengo yithu na kuŵawovwira vinthu vinyake kulongora kuti tikuŵaghanaghanira. Kweniso kuyowoya mwalusungu nacho ntchawanangwa icho tingapeleka ku ŵanji! Ntheura ŵawongani ŵanyinu panji ŵaphalirani kuti mukuŵatemwa.

Yezgani kuchita ivi: Mungawovwira ŵanyinu ntchito za pa nyumba, kunozgaso vinthu vinyake, panji kukaŵagulirako vinthu vinyake. Mulemberani mubwezi winu kadi panji meseji yakulongora umo mukujipulikira, nakuti nyengo zinyake mungalemba kuti, mukughanaghana waka vya iyo.

Para muli na mtima wakupeleka mutumbikikenge chomene.

“Mungaluwanga yayi kuchita uwemi na kugaŵirako ŵanyinu vinthu ivyo muli navyo.”—Ŵahebere 13:16.